Lesona 6

Faatomuaga i Autu: Eseesega ma le Lotogatasi i le Ekalesia

O lenei lesona o le a tuuina atu ai se faataitaiga o le auala e maua ai se aafiaga anoa ma le fausiaina o le faatuatua e faaaoga ai punaoa o loo maua i le vaega o Autu o le Gospel Library. I le taimi o le lesona, faamanatu i tagata aoga o i tatou o se ekalesia faavaomalo ua aofia ni aganuu, ituaiga, atunuu, ma gagana eseese. O le a maua e tagata aoga le avanoa e faataitai ai le mamanu lenei a o latou talanoaina le autu o eseesega ma le lotogatasi i le Ekalesia: (1) talanoa i le taua o le autu, (2) faaloloto le malamalama, (3) faamatala, ma le (4) manatunatu ma faamaumau.

Fautuaga mo le Aoao Atu

Filifili Autu.

Olesona 7–14 o le a faavae i autu e filifili e lau vasega e aoao atili i ai. Mafaufau e lafoai se aoaoga laitiiti po o le “O Le A Se Mea Fou” mo le vasega i le asō ina ia lava le taimi o tagata aoga e filifili ai autu mo lesona o loo loma.

Afai e te lagona e manaomia e lau vasega sina taimi e toe manatunatu ai i le taua o le talanoaina o autu o a latou lava filifiliga, e mafai ona e vaevaeina le vasega i ni vaega toalaiti ma fai i ni vaega e talanoaina le pepa e tufa atu 7 ae talanoaina e isi vaega le pepa e tufa atu 8 mai le faaopoopoga E. Tuu atu i tagata aoga se taimi e faasoa mai ai mea sa latou aoaoina. Ona faailoa mai lea o se vasega ia autu e sili ona mananao tagata aoga e talanoaina i le taimi o lesona o totoe o le kosi.

Talanoa i le Taua o le Autu

E faalagolago i manaoga o au tagata aoga, e mafai ona outou matamata i le “Is There a Place for Me?” (3:59) po o le “Diversity Is Good” (0:55).

Pe faitau le saunoaga lenei a Peresitene M. Russell Ballard o le Korama a Aposetolo e Toasefululua.

Sa folafola mai e le Au Peresitene Sili [i se taimi ua te’a]: “O la tatou savali … o se savali faapitoa o le alofa ma le manatu mo le soifua manuia lelei o alii ma tamaitai uma, e tusa lava po o a ia talitonuga faalelotu, lanu, po o tagatanuu, i le iloaina lea o i tatou moni lava o ni uso ma tuafafine aua o i tatou o atalii ma afafine o le Tama Faavavau e tasi’” (First Presidency statement, 15 Feb. 1978).

O la tatou aoaoga faavae lena—o se aoaoga faavae o le faaaofia ai. O le mea lenei tatou te talitonu i ai. O le mea lenei na aoaoina ai i tatou. Mai tagata uma i lenei lalolagi, e tatau ona avea i tatou ma tagata sili ona agaalofa, sili ona agalelei, ma sili ona onosai ona o lena aoaoga faavae. (“Doctrine of Inclusion,” Ensign, Nov. 2001, 37)

• Aisea e taua ai mo i tatou taitoatasi ona lagona ua i ai so tatou nofoaga i le Ekalesia?

• O le a se mea e mafai ona taofia tagata taitoatasi mai lagona e pei o i latou o ni tagata o le Ekalesia?

• E mafai faapefea ona tatou ausia le lotogatasi pe a faateleina le eseesega i le Ekalesia?

Faalolotoina o le Malamalama

Tuu atu i tagata aoga se avanoa e aoao atili ai e uiga i lenei autu e ala i le alu i le tusiga “Eseesega ma le Lotogatasi i Le Ekalesia a Iesu Keriso o le Au Paia o Aso e Gata Ai” i Autu ma suesue i ai mo ni nai minute.

Valaaulia tagata aoga e talanoaina ma se paga po o ni vaega toalaiti se tasi pe sili atu foi o fesili nei:

• O le a se mea ua e aoaoina e uiga i le eseese mai lenei mea? O le fea o mau faasino sa sili ona aoga? Faasoa atu nisi o faataitaiga o mea sa sili ona anoa ia te oe mai lenei tusiga.

• Aisea e taua ai mo i tatou taitoatasi ona iloa ma faasoa atu mea o loo aoao mai e perofeta ma aposetolo o aso nei i eseesega?

• E mafai faapefea e nei aoaoga ona fesoasoani ia i tatou e avea atili ai e faapei o le Faaola?”

• E mafai faapefea e lenei anomea ona fesoasoani e faamanino ni malamalamaaga sese e ono tulai mai ma faateleina ai le mautinoa i le Ekalesia a le Alii?

• A o e suesueina lenei anomea, o a ni uunaiga po o ni malamalamaaga na e maua ma na faapefea ona aafia ai oe?

Faamatala

Fai se tasi o gaoioiga o loo maua i pepa e tufa atu 3–5 i le faaopoopoga E, pe mamanu sau oe lava gaoioiga.

Mafaufau ma Faamaumau

Tuu atu i tagata aoga se taimi e mafaufau loloto ai i mea sa latou aoaoina ma lagonaina i le taimi o lenei vasega. E mafai ona e faaaogaina fesili o loo i le pepa e tufa atu 6, “Manatunatu ma Faamaumau” (o loo maua i le faaopoopoga E), e taiala ai lenei gaoioiga.

Mo Le Isi Taimi

E faavae i le filifiliga a tagata aoga o autu i le amataga o le vasega, faamanatu atu ia i latou po o le a le autu o le a talanoaina i le isi vasega e sosoo ai. Valaaulia tagata aoga e faaalu sina taimi i le aluga o le vaiaso e suesue ai a le o le Newsroom, Taiala i Tusitusiga Paia, Konafesi Aoao, Fesoasoani mo le Olaga, po o Autu mo punaoa talafeagai.