Lesona 5

Faatomuaga i le Fesoasoani o le Olaga: Puipuia o i Tatou Lava mai Ponokalafi

O lenei lesona o le a tuuina atu ai se faataitaiga o le auala e maua ai se aafiaga anoa ma le fausiaina o le faatuatua e ala i le faaaogaina o punaoa mai le vaega Fesoasoani o le Olaga o le Gospel Library. O le a talanoaina e tagata aoga pe faapefea ona puipuia i latou lava mai ponokalafi, o se faiga e feteenai ma aoaoga a le Faaola ma o se faafitauli tele i le lalolagi atoa. O le a maua e tagata aoga le avanoa e faataitai ai le mamanu lenei a o latou talanoaina lenei autu: (1) talanoa i le taua o le autu, (2) faaloloto le malamalama, (3) faamatala, ma le (4) manatunatu ma faamaumau.

Fautuaga mo le Aoao Atu

E faavae i manaoga o tagata aoga, e mafai ona e amataina le vasega i se tasi o mea nei:

• O se aoaoga laitiiti mai le faaopoopoga A

• O se talanoaga “O Le A Se Mea Fou?” e uiga i lipoti o talafou mai le Potu o Talafou (tagai i le pepa tufa atu 1 i le faaopoopoga E)

• O se talanoaga e uiga i le autu o le aso

Talanoa i le Taua o le Autu

Faasoa atu le faamatalaga lenei mai se alii e igoa ia Iasona (o le a e maua le avanoa e faasoa atili atu ai lenei tala i se taimi mulimuli ane i le vasega):

“O la‘u vaisu i ponokalafi na amata i lo’u laitiiti lava, ina ua tusa ma le 11 o o‘u tausaga. Sa muai faailoa mai ia te au e se tagata o le aiga na te faaali mai ia te au i soo se taimi lava ou te alu ai i lona fale. Sa faaauau pea la‘u vaisu mo le tele o tausaga.”*

• O le a le taatele o ponokalafi i lo tatou lalolagi?

• Aisea e tatau ai ona popole se tasi e uiga i ponokalafi pe afai e le o se faafitauli mo i latou?

• O a ni auala e mafai ai e ponokalafi ona aafia ai i latou o e matamata i ai ma i latou latou te alolofa i ai?

Faaloloto le Malamalama

Valaaulia tagata aoga e o i le vaega o Ponokalafi i le Fesoasoani o le Olaga. Tuu atu ia i latou se taimi e suesue ma maua ai punaoa i le vaega o Ponokalafi. Fautuaina tagata aoga e filifili le soavaega e sili ona latou fiafia i ai: Fesoasoani mo A‘u, Fesoasoani mo Taitoalua, Fesoasoani mo Matua, po o le Lagolago ma Punaoa.

Valaaulia tagata aoga e toe faamanatu fesili nei faatasi ma se paga po o ni vaega toalaiti ona talanoaina lea o fesili e sili ona manaia ma talafeauga:

• O le a se mea na e aoaoina e uiga i punaoa ua saunia e le Ekalesia e uiga i ponokalafi? O le a se mea na e maua na sili ona faagaeetia ai oe?

• Pe na faatosina e lenei anomea ou manatu i le auala o loo talanoaina ai e le Ekalesia ia ponokalafi? Afai o lea, na faapefea?

• E mafai faapefea e lenei anomea ona fausia le faatuatua ia Iesu Keriso ma Lana Ekalesia toefuataiina?

• E mafai faapefea e lenei anomea ona fesoasoani i tagata taitoatasi, ulugalii faaipoipo, po o taitai o le Ekalesia?

• A o e suesueina lenei anomea, o a ni uunaiga po o ni malamalamaaga na e maua, ma na faapefea ona aafia ai oe?

Faamatala

Fai se tasi o gaoioiga o loo maua i pepa e tufa atu 3–5 i le faaopoopoga E, pe mamanu sau oe lava gaoioiga.

Mafaufau ma Faamaumau

Tuu atu i tagata aoga se taimi e mafaufau loloto ai i mea sa latou aoaoina ma lagonaina i le asō. E mafai ona e faaaogaina fesili o loo i le pepa e tufa atu 6, “Manatunatu ma Faamaumau” (o loo maua i le faaopoopoga E), e taiala ai lenei gaoioiga.

Atonu e te manao e faasoa atu le faaiuga o le tala o le toe manuia o Iasona e faamaea ai le vasega. O le vaisu a Iasona sa tele ni tausaga na i ai ma mafua ai le tele o faafitauli i lona olaga, e aofia ai faaipoipoga malepelepe e lua ma lona taofia mai le Ekalesia mo filifiliga le lelei sa ia faia ona o lona tagofia o mea ua fai ma vaisu. Ae faatasi ai ma le fesoasoani a Iesu Keriso, ua mafai ai ona ia faatoilaloina lona tagofia o mea ua fai ma vaisu. Sa ia tusia e uiga i lona aafiaga:

“Sa ou lagona le gaogao. Ae sa matuai ogatusa lava lo‘u peresitene o le paranesi ma le Agaga. Sa ia tuuina mai ia te au le taiala o le Polokalama o le Toe Faaleleia o Olaga mai le Tagofia o Mea ua Fai ma Vaisu ma faailoa mai ni lagona malolosi sa manaomia ona ou alu i fonotaga a le ARP. O le alu i le fonotaga muamua sa faigata. Sa ou lagona le tuuatoatasi ma le fefe. Sa ou tietie atu i le nofoaga o le fonotaga mo ni nai taimi ae ou te lei filifili e alu i totonu.

“Ina ua iu ina ou alu i totonu o le fonotaga, sa ou lagonaina le Agaga mo le taimi muamua mai se taimi umi lava. Sa ou iloaina sa ou lagonaina le tuuatoatasi ona ou te lei lagonaina le mafanafana o le Agaga faapenei mo se taimi umi tele. Sa ou filifili ou te manao e toe maua mai lo‘u Faaola i lo’u olaga. Sa ou iloaina o le a avea ma se malaga tuga ma faigata, ae o se tasi sa ou naunau e faia ona o le alofa sa ou lagonaina i lena fonotaga muamua. Sa ou aoaoina e le tatau ona ou fefe e alu i sauniga, ae e tatau ona ou fefe i faamanuiaga ma avanoa o le a ou misia mo le le alu. I fonotaga, sa na ona ou lagonaina lava o le alofa ma le taliaina mai ia i latou sa feagai ma tauiviga lava e tasi, ma sa ou faalagolago atu ia i latou mo le malosi.

“O mea na tutupu na mulimuli mai ma mea na ou oo i ai talu mai lena taimi sa matuai ofoofogia lava le faigata ona faaupu. Sa tau mai e isi ia te au o le a avea pea lava au ma se tagata ua fai ma vaisu ma e le mafai ona ou toe manuia. Ae sa ou lagonaina le mana faamama o le Togiola, ma sa ou iloa o le a mafai ona ou faatoilaloina lenei vaisu.

“Sa taofia au e lou tagofia o mea ua fai ma vaisu ona ou te lei maua se lagona lelei e uiga ia te au lava ia, ae o le asō o au o se tagata agavaa o le Ekalesia, ua amata la’u matātā i se itu sa ou moemiti i ai i taimi uma, ua ou toe faaipoipo, ma talu mai lena taimi ua maua so’u afafine lalelei.”

Mafaufau e tuuina atu lau molimau i le mana o le Faaola e faamalolo ma fesoasoani ai ia i tatou.

Mo Le Isi Taimi

Faasoa atu i tagata aoga o le vasega e sosoo ai o le a tatou talanoaina ai mea o loo aoao mai e le vaega o Autu i le Gospel Library e uiga i eseesega ma le lotogatasi i le Ekalesia. Valaaulia tagata aoga e faaalu sina taimi i le aluga o le vaiaso e suesue ai lenei punaoa.

Faamatalaga

• O lenei tala na muai aumaia mai le uepisaite o le Polokalama o le Toefaaleleia mai Mea ua Avea ma Vaisu.