Lesona 3

Faia o Fesili ma le Faatuatua ia Iesu Keriso

E tele fesili a tagata aoga. O nisi fesili e tuusa‘o, o nisi e feagai ma autu maaleale, ma o isi e faʻaalia ai le le mautonu ma le lavelave. Atonu e lagona e nisi tagata aoga le popole e fai atu a latou fesili pe atonu foi e le o mautinoa pe faapefea ona faamatala mai. I le lesona lenei, o le a talanoaina ai e tagata aoga le taua o le faia o fesili, mafaufau pe faapefea ona talanoaina le le manino, ma faataitai le faia o fesili mai se vaaiga o le faatuatua ia Iesu Keriso.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Taulai atu i le Faaola. Po o a lava ni fesili faaleaoaoga faavae, faaleagafesootai, pe faaletalafaasolopito e mananao au tagata aoga e talanoaina i lenei kosi, fautuaina i latou e mafaufau loloto pe faapefea ona fesootai autu latou te filifilia i le Faaola ma Lana talalelei. Fesoasoani ia i latou e fai a latou talanoaga mai se vaaiga o le faatuatua ia Iesu Keriso. Sa saunoa atu Chad H Webb, o le taitai o Seminare ma Inisitituti o Mataupu Faalelotu, i faiaoga: “O le auala e tasi e sili ona taua e mafai ai ona tatou fesoasoani e faateleina le faatuatua i le tupulaga faia’e o le tuu atoatoa atili lea o Iesu Keriso i le totonugalemu o lo tatou aoao atu ma le aoao mai e ala i le fesoasoani i a tatou tagata aoga ia iloa o Ia, ia aoao mai ia te Ia, ma taumafai malosi e avea e faapei o Ia” (“We Talk of Christ, We Rejoice in Christ” [saunoaga na tuuina atu i le faasalalauga o le aoaoga faaletausaga o Seminare ma Inisitituti, Iuni 12, 2018], ChurchofJesusChrist.org).

Atiina ae o tomai o le aoaoina ma talanoaga i aoaoga laiti

O nei aoaoga laiti o le a mafai ai e tagata aoga ona aoao ma faataitai tomai e mafai ona latou faaaogaina e aoao atili ai ma le mataalia le talalelei ma talanoaina ai autu o i ai nei e faatatau i le Ekalesia.

E tatau i faiaoga ona filifili ia aoaoga laiti latou te lagona e sili ona talafeagai ma fetaui le taimi mo a latou tagata aoga. E fuafua e faiaoga pe faafia ona faia nei aoaoga. O loo maua aoaoga faamasani i le faaopoopoga A. O aoaoga faamasani taitasi ua mamanuina e faaalu ai pe tusa ma le 15 minute.

Faamalamalama atu i tagata aoga o le taimi o lenei kosi o le a latou maua ai le avanoa e auai ai i aoaoga laiti e fesoasoani ai ia i latou e faaleleia lo latou tomai e aoao ai ma talanoaina autu e faatatau i le aoaoga faavae, aoaoga, aiaiga faavae, ma le talafaasolopito o le Ekalesia. Filifili se tomai mai aoaoga laiti, ma faamaea le aoaoga faamasani ma au tagata aoga.

Faia o fesili ma le faatuatua

Tau atu i tagata aoga o le asō o le a e suesue ai i le matafaioi o loo faia e fesili i le aoaoina o le talalelei. Faaali atu faamatalaga nei, ma fai i le vasega e mafaufau pe faapefea ona latou tali atu i tagata taitoatasi e faaaoga ai se tasi o tali nei: (1) matuai le ioeina, (2) le ioeina, (3) e le ioeina po o le le ioeina, (4) ioeina, po o le (5) matuai ioeina. Faailoa atu i tagata aoga o nei faamatalaga o le a avea ma faavae mo talanoaga faalevaega o le a mulimuli mai i lenei gaoioiga.

1. E le talafeagai le fai atu o fesili e faatatau i aoaoga faavae, aoaoga, aiaiga faavae, ma le talafaasolopito o le Ekalesia.

2. E i ai lava tali faigofie ma tuusa‘o i fesili e uiga i aoaoga faavae, aoaoga, aiaiga faavae, ma le talafaasolopito o le Ekalesia.

3. O le talitonu po o le le talitonu i le Atua o le a le aafia ai le ala tatou te taulimaina ai fesili e uiga i le uiga o le ola mama ma le faamoemoega o le olaga.

Fai atu i tagata aoga e fai ni vaega toalaiti e faavae i le po o le fea faamatalaga e sili ona latou mananao e talanoaina. (Ia mautinoa ua talanoaina faamatalaga uma.) Tuu atu i vaega taitasi le pepa tufa atu talafeagai. Valaaulia i latou e fai se talanoaga e faavae i anomea ma fesili i le pepa e tufa atu.

Faamatalaga 1: E le talafeagai le faia o fesili e faatatau i le aoaoga faavae, aoaoga, aiaiga faavae, ma le talafaasolopito o le Ekalesia.

Taliina o A‘u Fesili o le Talalelei—Lesona 3

Ia talanoaina faatasi o se vaega le sa‘o o le faamatalaga 1. Faitau Iosefa Samita—Talafaasolopito 1:10–13, ma talanoaina pe na faapefea e le faia o fesili ona suia le olaga o Iosefa Samita. Ona faitau lea o saunoaga nei a taitai o le Ekalesia:

O le fesili o le amataga lea o se molimau. E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. O le faia o fesili e le o se faailoga lea o le vaivai; ae o se teuteuala mo le tuputupu a’e.

Ua poloaiina i tatou e le Atua e saili i tali i a tatou fesili ma ia ole atu tatou te maua ai “ma le loto faamaoni, ma le manatu moni i ai, ma le faatuatua ia Keriso” [Moronae 10:4]. A tatou faia faapea, o le a mafai ona faaali mai ia i tatou le moni o mea uma “i le mana o le Agaga Paia” [Moronae 10:5].

Aua le fefefe; ia fesili atu. Ia fia iloa, ae aua le masalosalo! Ae ia uumau pea e le aunoa i le faatuatua ma le malamalama ua uma ona e maua. (“President Dieter F. Uchtdorf: The Reflection in the Water,” Church News, Nov. 1, 2009, thechurchnews.com)

Avatu au fesili i le Alii ma i isi puna faatuatuaina. Su’esu’e faatasi ma se manao ia talitonu nai lo le faamoemoe e mafai ona e maua se mea sese na tupu i le soifuaga o se perofeta po o se mea faaletonu i tusitusiga paia. Taofi le faateleina o ou masalosaloga e ala i le talanoa ma isi tagata masalosalo. Faataga le Alii e ta’ita’i oe i lau malaga o le sailiga faaleagaga. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103.)

E i ai uluai fesili ma e i ai foi fesili lona lua. Tali muamua ia fesili autu. E le tutusa uma fesili ma e le tutusa uma upumoni. O uluai fesili e aupito sili ona taua. O isi mea uma o loo i lalo ifo. E itiiti lava ni nai uluai fesili. O le a ou ta‘ua le fa o i latou.

1. Pe o i ai se Atua o lo tatou Tama?

2. Pe o Iesu Keriso o le Alo o le Atua, le Faaola o le lalolagi?

3. Pe o Iosefa Samita o se perofeta?

4. Pe O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi?

O le eseesega, o fesili lona lua e le muta. …

Afai e te taliina uluai fesili, ona maua foi lea o tali o fesili lona lua, pe itiiti lona taua, ma mafai ona e taulimaina mea e te malamalama ai ma mea e te le malamalama ai, faapea ma mea e te ioeina ma mea e te le ioeina e aunoa ma le oso atoa ese mai le va’a. (Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu)

Talanoaina fesili nei:

• O le a le lagona o le Alii e uiga ia i tatou i le faia o fesili? O le a se mea e mafai ona tatou maua mai le Alii pe afai atu ia te Ia a tatou fesili? (I le avea ai ma se vaega o lenei talanoaga, e mafai ona outou matamata i le “2.3.1 Ole atu, Saili, ma Tuitui Atu” [1:14], faatasi ai ma Elder David A. Bednar o le Korama a Aposetolo e Toasefululua.)

• O le a le eseesega i le va o se fesili na fesiligia ma le faatuatua ma le fesili na faia ma le masalosalo? (Ina ia loloto atu, e mafai ona e faitauina le Alema 22:4–12 o se faataitaiga o fesili e fesiligia ma le faatuatua ma le Alema 11:21–22, 26–35 o se faataitaiga o fesili e fesiligia ma le masalosalo.)

• Aisea e ono taua ai le faailoa o le eseesega i le va o le fesili autu ma le fesili lona lua? O le a se mea e mafai ona tupu pe afai tatou te faatuatuanai i fesili autu ma taulai atoa atu i fesili lona lua?

• O a ni auala ua uunaia ai le aoaoina ma le tuputupu ae o lou olaga ona o le aveina o au fesili i le Alii ma isi tagata faamaoni ma punaoa faatupu faatuatua?

E faavae i mea ua e aoaoina i le taimi o lenei talanoaga, tusifaamaumau se lomiga ua toe faafouina o le faamatalaga 1. Ia saunia e faasoa atu lau faamatalaga ua toe faafouina ma mea na e aoaoina i lau vasega.

© 2022 Puletaofia e le Intellectual Reserve, Inc. Ua taofia aia tatau uma.

Faamatalaga 1: E le talafeagai le faia o fesili e faatatau i le aoaoga faavae, aoaoga, aiaiga faavae, ma le talafaasolopito o le Ekalesia.

Faamatalaga 2: E i ai lava tali faigofie ma tuusa‘o i fesili e uiga i aoaoga faavae, aoaoga, aiaiga faavae, ma le talafaasolopito o le Ekalesia.

Taliina o A‘u Fesili o le Talalelei—Lesona 3

Ia talanoaina faatasi o se vaega le sa‘o o le faamatalaga 2. Faitau le 1 Nifae 11:14–17, ma talanoaina le taua o le tali a Nifae i le fesili a le Agaga. Ona faitau lea o faamatalaga nei:

O aoaoga faavae o le talalelei toefuataiina e malosi, manino, ma e le faigata. Peitai, e oo lava i tusitusiga paia o loo i ai sina le manino. Mafaufau, mo se faataitaiga, i le tala ia Nifae, o le sa faatonuina e fasioti Lapana ina ia maua ai se faamaumauga faaleagaga taua tele. O lena tulaga ua faamasinoina ma le le mautonu. …

O lea la, o le olaga e tumu i le faauigalua ma le aoao e pulea le va o le tulaga lelei ma le mea moni o se tasi lea o faamoemoega o le fuafuaga faaletino. E ala i le mamanu paia, tatou te feagai uma lava ma “faafeagai o mea uma” (2 Nifae 2:11). …

… O le tomai e faailoa ai le faauigalua, o se laasaga taua i lo tatou atinaega faaleagaga, e le o se ituaiga faaiu o le malamalama—ua na o se amataga. …

O le tali sili i le va o le [mautinoa ma le] le mautonu o le faaauau pea ona tuputupu ae. …

Pe a tatou fetaiai ma mea e faateia ai muamua i le lavelave, e tatau ona tatou tausia le fatu totogo a‘e o le faatuatua ma le faaeteete tele, ma a oo ina vevela le la, o le a le mamae lava le laau fou. (Bruce C. Hafen and Marie K. Hafen, Faith Is Not Blind [2018], 9–10, 13–14, 18)

O le aoaoina e ala i le faatuatua e taua tele e pei o le aoaoina e ala i le suesue, aua e i ai nisi o mea e le mafai ona tatou aoaoina mai se tusi.

Sa faamamafa mai e Elder Dallin H. Oaks lenei upumoni: “[A]o mea uma e mafai ona tatou lolomiina, o nisi taimi e tuua ai o tatou tagata ma fesili faavae ia e le mafai ona foia e ala i le suesue. … O nisi mea e na o le faatuatua e mafai ona aoaoina ai [tagai Mataupu Faavae ma Feagaiga 88:118]. O le faatumutumuga o lo tatou faalagolagomaga e tatau ona i ai lea i le faatuatua i le molimau ua tatou maua mai le Agaga Paia” [Faafeagai i Mea Uma,” Liahona, Me 2016, 117]. …

… Pe a tulai mai ni fesili … e le o se faailoga e le o i ai sau molimau pe e le moni le talalelei. O i latou o se valaaulia mo oe ia tuputupu ae faaleagaga. …

… O fesili, aemaise lava fesili faigata, e uunai ai i tatou e punouai i se tauiviga faaleagaga ina ia mafai ai e le Alii ona taitai i tatou i le ala. …

O le tuputupu ae faaleagaga ma le mauaina o tali i a tatou fesili e faalagolago lea i lo tatou tomai e lagona, faalogo, ma malamalama i musumusuga a le Agaga. E taua le punouai i se tauiviga faaleagaga e aoao ai ia maua faaaliga faaletagata lava ia, aua e na o le pau le mea e mafai ona tatou iloa ai le mea moni pe a molimau mai le Agaga i o tatou loto ma mafaufau aua na o le Agaga Paia e mafai ai. (Sheri Dew, “Will You Engage in the Wrestle?” [Faigalotu a le Iunivesite a Polika Iaga–Idaho, Me 17, 2016], byui.edu)

Talanoaina fesili nei:

• Aisea e taua ai le iloa e mafai ona i ai le faauigalua, le mautonu, ma le lavelave i nisi o a tatou fesili e uiga i aoaoga faavae, aoaoga, aiaiga faavae, ma le talafaasolopito o le Ekalesia?

• E tusa ai ma saunoaga a Elder ma Sister Hafen ma Sister Dew, o a nisi o auala aoga e tali atu ai i fesili faigata o le talalelei ma le olaga lea e taunuu i le faauigalua po o le lavelave?

• O le a se mea na sili ona fesoasoani ia te oe e tumau faamaoni ai i lou faatuatua ia Iesu Keriso ma Lana talalelei ina ua e feagai ma le faauigalua, le mautonu, po o le lavelave?

E faavae i mea ua e aoaoina i le taimi o lenei talanoaga, tusifaamaumau se vaega ua toe faafouina o le faamatalaga 2. Ia saunia e faasoa atu lau faamatalaga ua toe faafouina ma mea na e aoaoina i lau vasega.

© 2022 Puletaofia e le Intellectual Reserve, Inc. Ua taofia aia tatau uma.

Faamatalaga 2: E i ai lava tali faigofie ma tuusa‘o i fesili e uiga i aoaoga faavae, aoaoga, aiaiga faavae, ma le talafaasolopito o le Ekalesia.

Faamatalaga 3: O le talitonu po o le le talitonu i le Atua o le a le aafia ai le ala tatou te taulimaina ai fesili e uiga i le uiga o le ola mama ma le faamoemoega o le olaga.

Taliina o A‘u Fesili o le Talalelei—Lesona 3

Ia talanoaina faatasi o se vaega le sa‘o o le faamatalaga 3. Faitau le Alema 30:12–18, ma talanoaina pe na faapefea e talitonuga o Korioa ona aafia ai lana vaaiga i le ola mama ma le faamoemoega o le olaga. Ona faitau lea o faamatalaga nei:

O le faatinoga o le talitonu e aliae mai i le loto o le tagata vaai. Na fetalai atu le Faaola ia i latou na siomia o Ia, “O le ua i ai taliga e faalogo ai, ina faalogo mai ia o ia” (Luka 8:8). …

Na fananau uma atalii e toafa a Liae i ni matua lelei lava e tasi. O le eseesega i le va o le au talitonu sa le tele naua i le mea na tupu ia i latou, ae i o latou uiga faaalia i le mea na tupu. O le uiga faaalia na afua mai i totonu o o latou lava loto, faatasi ai ma le faia e i latou taitoatasi o lana lava filifiliga saoloto ia talitonu—pe leai. …

… E le mafai e [le Atua] ona pulea pe tatou te filifili ma le lotofuatiaifo e talitonu ia te Ia, e talia o Ia, e saili atu ia te Ia. E na o Lona aao lava e mafai ona Ia ofoina mai ia i tatou, ma afai tatou te filifili e talia, ona mafai lea ona Ia taialaina i tatou agai atu i soo se mea tatou te matua manaomia mo lo [tatou] lava tuputupu ae. (Bruce C. Hafen and Marie K. Hafen, Faith Is Not Blind [2018], 81, 88)

O se aoga mamana ma faatosina faaonapo nei o mafaufauga o le “manatu tonu i ai,” o le manatu e faapea e leai se sa‘o a’ia‘i po o se mea sese. I tua atu o na ituaiga manatu o loo i ai taumatega e faapea e le o i ai se Atua po o le, afai e i ai se Atua, Na te le’i tuuina mai ni poloaiga e faatatau ia i tatou i aso nei. …

O le Au Paia o Aso e Gata Ai e manino lava e amata i se tulaga ese: o loo i ai se Atua o le punavai o le tulafono e Faavavau, ma ua Ia tuuina mai poloaiga e faavae ai se sa‘o ma se sese mo le tele o filifiliga. … Tatou te tetee atu i manatu sese, ma e tatau ona tatou fesoasoani i a tatou talavou ia aloese mai le faaseseina ma le faatauanauina e manatunatuga ma faaiuga e faavae i ona manatu sese.

O fea tatou te tagai i ai mo ni manatu ia tatou te amata ai ona tatou iloiloina upumoni po o le taliaina o talosaga eseese? Tatou te taula i tatou lava i le afioga a le Atua, e pei ona i ai i tusitusiga paia ma aoaoga a perofeta o ona po nei. Vagana ai ua tatou taula i nei upumoni o ni o tatou faavae ma talitonuga [tutotonu], e le mafai ona tatou mautinoa ua moni a tatou faaiuga. (Dallin H. Oaks, “E Pei Ona Manatu o Ia i Lona Loto” [afiafi ma se Pulega Aoao, 8 Fep., 2013])

(Manatua: O se manatu o se amataga po o se faavae mo lou manatu. O se manatunatuga o se mea e te manatu e moni ae atonu e le moni lena mea.)

Talanoaina fesili nei:

• Aisea e faia ai e a tatou mataupu (vaega amata) se eseesega tele i le auala tatou te taliina ai fesili?

• O le a le eseesega e i ai pe a tatou faia se fesili ma le talitonuga i le Atua e fai ma o tatou manatu autu?

• Aisea e taua ai le malamalama o le talitonu i le Atua o se mataupu o le filifiliga?

E faavae i mea ua e aoaoina i le taimi o lenei talanoaga, tusifaamaumau se lomiga ua toe faafouina o le faamatalaga 3. Ia saunia e faasoa atu lau faamatalaga ua toe faafouina ma mea na e aoaoina i lau vasega.

© 2022 Puletaofia e le Intellectual Reserve, Inc. Ua taofia aia tatau uma.

Faamatalaga 3: O le talitonu po o le le talitonu i le Atua o le a le aafia ai le ala tatou te taulimaina ai fesili e faatatau i le uiga o le ola mama ma le faamoemoega o le olaga.

A uma se taimi tele mo talanoaga faavaega, e mafai ona e valaaulia se tagata mai vaega taitasi e tusi a latou faamatalaga ua toe faafouina i luga o le laupapa. O nei faʻamatalaga atonu e tutusa ma manatu nei:

1. E talafeagai, ma atonu foi e tatau ai mo lo tatou tuputupu ae faaleagaga, le fai atu o fesili e musuia e le faatuatua e faatatau i aoaoga faavae, aoaoga, aiaiga faavae, ma le talafaasolopito o le Ekalesia.

2. E le o i ai i taimi uma ni tali faigofie ma tuusa‘o e uiga i aoaoga faavae, aoaoga, aiaiga faavae, ma le talafaasolopito o le Ekalesia.

3. O le talitonu po o le le talitonu i le Atua o le a aafia ai le ala tatou te taulimaina ai fesili e faatatau i le uiga o le ola mama ma le faamoemoega o le olaga.

Tuu atu i tagata aoga se taimi e faamatala ai a latou faamatalaga ua toeiloiloina ma mea sa latou aoaoina mai a latou talanoaga. A o faasoa mai e tagata aoga o latou manatu, mafaufau e fai atu fesili tulitatao e mafai ona fesoasoani latou te malamalama atili ai i le uiga o le fai atu ma tali fesili i le faatuatua. Mo se faataitaiga, e mafai ona e fai atu se fesili se tasi po o fesili uma nei:

• E mafai faapefea e lenei malamalamaaga ona fesoasoani tatou te malamalama atili ai i le uiga o le fai o fesili ma le faatuatua?

• O anafea na fesoasoani ai lenei malamalamaaga ia te oe a o e sailia se tali i se tasi o au lava fesili?

Faamanatu i tagata aoga o le sauniuniga mo le vasega sa valaaulia ai i latou e tusi i lalo se fesili o ia i latou e uiga i le aoaoga faavae, aoaoga, aiaiga faavae, po o le talafaasolopito o le Ekalesia. Fesili atu pe i ai ni tagata aoga ua suia le ala latou te vaai ai i a latou fesili ona o mea sa latou aoaoina i le aso, ma valaaulia soo se tasi e fia faasoa mai o latou manatu.

Mafaufau e faaiu le vasega i lou lava aafiaga ma lau molimau i le faia o fesili mai se vaaiga o le faatuatua ia Iesu Keriso.

Mo Le Isi Taimi

Faamalamalama atu o le isi vasega o le a e talanoaina ai le meaalofa paia o le alofa tunoa. Fautuaina tagata aoga e faaalu sina taimi i le aluga o le vaiaso e vaai ai i mea e mafai ona latou aoaoina e uiga i le meaalofa paia o le alofa tunoa mai le Gospel Library.