O Le Faatomuaga

O le Taliina o A‘u Fesili o le Talalelei (Mataupu Faalelotu 280) ua mamanuina e tuuina atu ai i tagata aoga le avanoa e maua ai ni talanoaga talafeagai, tatala, faamaoni, ma faagaeetia e uiga i autu e faatatau i le talalelei latou te filifilia. E pei ona i iai i kosi uma o le inisitituti, o lo tatou faamoemoega o le “fesoasoani lea i le autalavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama i le Lagi” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 1).

Ina ia fesoasoani i faiaoga ma tagata aoga e faatulaga talanoaga a le vasega i se auala e faateleina ai le faatuatua ia Iesu Keriso ma Lana Ekalesia toefuataiina, ua faatulagaina ai le mataupu aoaoina faapenei:

• Vaega 1: Aoaoina e ala i le Faatuatua. Ua faatonuina i tatou e le Alii ina ia “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). Olesona 1–3 ua tuuina atu ai i faiaoga ma tagata aoga se avanoa e faailoa ma talanoaina ai mataupu faavae e taua i le aoaoina e ala i le suesue ma le faatuatua.

• Vaega 2: Faaaogaina o Punavai e Faafaigofie ai le Aoaoina e Musuia e le Faatuatua ma Talanoaga Faagaeetia. Olesona 4–6 o loo aumaia ai se mamanu o le auala e faia ai ni talanoaga e faatotonugalemu ia Keriso, talafeauga, tatala, faamaoni, ma faagaeetia faatasi ma tagata o le vasega ma isi.

• Vaega 3: Talanoaina o Autu ua Filifilia e Tagata aoga. Olesona 7–14 e faataga ai tagata aoga e filifili ia autu latou te mananao e talanoaina. O mataupu faavae ma mamanu ua faavaeina i lesona 1–6 e taiala ai aafiaga e aoao ai le vasega mo lesona 7–14.

O lenei kosi o le a maua ai e tagata aoga se avanoa e faaaoga ai le tele o punaoa o loo maua i le Gospel Library (i le polokalama feaveai po o luga o le initoneti) ma le Newsroom a le Ekalesia e talanoaina ai a latou fesili. (Manatua: E faaauau pea ona faatulaga e le Ekalesia ia punaoa, faaleleia le faatinoga, ma faaliliu anotusi faaopoopo mo le Gospel Library. Fetuunai lou faaaogaina o anomea faafaiaoga e atagia ai nei suiga.) O nisi taimi o se punavai atonu e tapulaa mea e faasino i ai i nao i tusitusiga paia po o upu a aposetolo ma perofeta o aso nei. I tulaga faapea, e mafai e faiaoga ma tagata aoga ona faia a latou lava sailiiliga e sue ai mau ma faamatalaga talafeagai mai taitai o le Ekalesia.

O lenei mataupu aoaoina e aofia ai le iva o aoaoga laiti e fesoasoani ai i tagata aoga e faaleleia lo latou tomai e aoao ai ma talanoaina autu e faatatau i le talalelei (tagai faaopoopoga A). E mafai e faiaoga ona filifili po o fea o aoaoga laiti e faaaoga i le taimi o le kosi ma le taimi e faaaoga ai. O aoaoga taitasi ua faamoemoe e alu ai pe tusa ma le 15 minute.

Afai e oo ina taumatemate pe fefinauai se talanoaga a le vasega, ia toe taitai tagata aoga i le aoaoga mautu ma amioga faaKeriso e faaaoga ai mataupu faavae ma mamanu na aoaoina i lesona 1–6. Aua lava nei galo le mea moni e faapea, o lo tatou faamoemoega o le fausia lea o le faatuatua ia Iesu Keriso ma maua faamanuiaga o Lana talalelei (tagai Aoao Atu ma le Aoaoina Mai o le Talalelei, 1).

Talu ai o lenei kosi e faalagolago i punaoa a le Ekalesia e maua i le initoneti, mafaufau po o le a se mea e mafai ona e faia e faamautinoa ai se fesootaiga faamoemoeina i le initoneti. Mafaufau foi po o le a se mea e mafai ona e faia e fesoasoani ai i tagata aoga o e e le o i ai se masini e maua ai le initoneti ina ia i ai pea se aafiaga anoa e aoao ai i le taimi o lenei kosi.

Tulaga Manaomia o Togi

Ina ia maua se togi mo le faauuga o le inisitituti mo lenei kosi, e manaomia ona auai tagata aoga i le 75 pasene o vasega o loo faia. E tatau foi ona latou faamaeaina se gaoioiga moni ma anoa e aoao ai e atagia ai mea latou te mananao e maua mai lenei kosi. E tatau i tagata aoga ma faiaoga ona fefautuaai faatasi ma talanoaina filifiliga aoga. Ina ia fesoasoani e faatupu ni manatu, e mafai ona e faasoa atu nisi o faataitaiga nei:

• Faamaea ia fesili masani e filifili ai se kosi i le Aafiaga o le Siitia le Aoaoina a le Inisitituti.

• Ia tausi se api faamaumau mo suesuega.

• Faailoa mai se fesili po o se atugaluga patino e faatatau i le Ekalesia, ona faaaoga lea o mataupu faavae ma tomai na aoaoina i lenei kosi e talanoaina ai.

• Ia talanoaina mea o loo e aoaoina ia le itiiti ifo i le ta‘i vaiaso ma se tasi e le o i ai i lenei vasega.

• Asiasi i le Newsroom ia le itiiti ifo ma le ta‘i vaiaso e fesoasoani ai ia te oe ia iloa mea o loo tutupu i le Ekalesia i le taimi nei.

• Filifili se autu i le Life Help po o Autu lea e taua ia te oe, ma suesue i anomea uma ma punaoa e fesootai.

E tatau i tagata aoga ona tusifaamaumau mea o le a latou faia ma faasoa atu a latou fuafuaga i lo latou faiaoga. I le faaiuga o le semesa, e tatau i tagata aoga ona tuuina atu se lipoti faigofie, tusitusia pe faaleoina, e ta‘u mai ai pe ua maea ona latou faia mea e manaomia na latou faatulagaina. E tatau i faiaoga ona ofo atu ni fetuunaiga talafeagai mo tagata aoga e i ai manaoga faapitoa (tagai i le “Faia o Fetuunaiga mo Tagata Aoga e i ai Manaoga Faapitoa,” ChurchofJesusChrist.org).