« ថ្ងៃទី ១៦–២២ ខែ ធ្នូ បុណ្យគ្រីស្ទម៉ាស់ ៖ ‹ ដំណឹងល្អពីសេចក្ដីអំណរយ៉ាងអស្ចារ្យ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ១៦–២២ ខែ ធ្នូ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
សុវត្ថិភាពនៅក្នុងក្រោល ដោយ ដាន ប៊ឺរ
ថ្ងៃទី ១៦–២២ ខែ ធ្នូ
បុណ្យគ្រីស្ទម៉ាស់
« ដំណឹងល្អពីសេចក្ដីអំណរយ៉ាងអស្ចារ្យ »
មេរៀននេះគឺជាឱកាសមួយដើម្បីជួយកុមារដែលអ្នកបង្រៀនឲ្យប្រារព្ធការប្រសូត ព្រះជន្ម និងបេសកកម្មរបស់ព្រះអង្គសង្គ្រោះនៅពេលរដូវគ្រីស្ទម៉ាស់ ។ សូមចាំរឿងនេះនៅក្នុងចិត្ត នៅពេលដែលអ្នករៀបចំមេរៀន ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមអញ្ជើញកុមារឲ្យចែកចាយអ្វីដែលពួកគេដឹង អំពីការប្រសូតរបស់ព្រះអង្គសង្គ្រោះ ។
បង្រៀនគោលលទ្ធិ
កុមារតូចៗ
ព្រះយេស៊ូវគ្រីស្ទបានយាងមកផែនដីជាទារក ។
ដំណើររឿងនៃការប្រសូតរបស់ព្រះយេស៊ូវគ្រីស្ទ ទាក់ទាញចំណាប់អារម្មណ៍របស់កុមារ ។ តើសេចក្ដីពិតខាងគោលលទ្ធិណាខ្លះ ដែលអ្នកឃើញមាននៅក្នុងដំណើររឿងនេះ ដែលអ្នកមានអារម្មណ៍ថាកុមារគួរតែយល់ ?
សកម្មភាពដែលអាចជ្រើសរើស
-
សូមអាន លូកា ២:១–១៤ ឲ្យកុមារស្ដាប់ ឬពិពណ៌នាអំពីព្រឹត្តិការណ៍នៅក្នុងខគម្ពីរទាំងនេះ ដោយយោងទៅ « ជំពូក ៥ ៖ ព្រះយេស៊ូវគ្រីស្ទបានប្រសូតមក ដំណើររឿងព្រះគម្ពីរសញ្ញាថ្មី ទំព័រ ១៣–១៥ ឬវីដេអូដែលទាក់ទងនៅលើគេហទំព័រ LDS.org ។ សូមអញ្ជើញកុមារឲ្យគូររូបនៃព្រឹត្តិការណ៍ទាំងនេះ រួចប្រើរូបភាពទាំងនោះដើម្បីដំណាលរឿងដោយខ្លួនពួកគេ ។ ហេតុអ្វីបានជាអ្នករីករាយ ដែលព្រះយេស៊ូវបានយាងមកផែនដីបែបជាទារក ?
-
សូមឲ្យកុមារប្រាប់អ្នកអំពីរឿងនៃពួកហោរា ដែលបានដើរតាមផ្កាយទៅស្វែងរកព្រះយេស៊ូវ ។ ប្រសិនបើពួកគេត្រូវការរំឭកអំពីរឿងនោះ សូមមើល ម៉ាថាយ ២:១–១២ ឬ « ជំពូក ៧ ៖ ពួកហោរា ដំណើររឿងព្រះគម្ពីរសញ្ញាថ្មី ទំព័រ ១៨ ឬវីដេអូដែលទាក់ទងនៅលើគេហទំព័រ LDS.org ។ សូមលាក់រូបភាពព្រះយេស៊ូវមួយសន្លឹកនៅក្នុងបន្ទប់ ។ សូមគូររូប ឬកាត់ក្រដាសជារាងផ្កាយ រួចដាក់ឡើងទៅលើ ។ សូមអញ្ជើញកុមារឲ្យធ្វើជាពួកហោរាដែលកាន់អំណោយ ហើយសូមដឹកនាំពួកគេជុំវិញបន្ទប់ដើម្បីស្វែងរកព្រះយេស៊ូវ ។ តើអំណោយមួយចំនួនណាខ្លះ ដែលយើងអាចថ្វាយព្រះយេស៊ូវនៅក្នុងជីវិតរបស់យើងសព្វថ្ងៃនេះ ?
-
សូមច្រៀងចម្រៀងបុណ្យគ្រីស្ទម៉ាស់ពីរបីបទជាមួយកុមារ ដូចជាបទ « អំណរដល់លោក » និង « យប់សុខសាន្ត » ( ទំនុកតម្កើង លេខ ១២៤, ១២៦ ) ឬ « ផ្កាយចាំងពន្លឺ » « ផ្ទុំនៅក្នុងស្នូកទីឆ្ងាយ » និង « ឱកូនអើយកុំយំ » ( សៀវភៅចម្រៀងកុមារ ទំព័រ ២៤, ២៦–២៧ ៣០ ) ។
ព្រះយេស៊ូវគ្រីស្ទបានធ្វើឲ្យខ្ញុំអាចរស់នៅជាមួយព្រះវរបិតាសួគ៌ ម្ដងទៀតនៅថ្ងៃណាមួយ ។
តើកុមារដែលអ្នកបង្រៀន យល់អំពីមូលហេតុដែលព្រះយេស៊ូវគ្រីស្ទបានយាងមកផែនដីឬទេ ? សូមចំណាយពេលពិចារណាអំពីអ្វីដែលព្រះអង្គសង្គ្រោះបានធ្វើសម្រាប់អ្នកដោយផ្ទាល់ និងរបៀបដែលអ្នកអាចជួយកុមារឲ្យយល់អំពីអ្វីដែលទ្រង់បានធ្វើសម្រាប់ពួកគេ ។
សកម្មភាពដែលអាចជ្រើសរើស
-
សូមនាំយកអំណោយដែលបានវេចខ្ចប់ទៅកាន់ថ្នាក់ ដោយមានរូបភាពព្រះយេស៊ូវគ្រីស្ទនៅខាងក្នុង ។ សូមដាក់ស្លាកនៅលើអំណោយដោយសរសេរ « យ៉ូហាន ៣:១៦ » រួចប្រាប់កុមារថា នេះខគម្ពីរនេះគឺជាតម្រុយប្រាប់អំពីអ្វីដែលមាននៅក្នុងកញ្ចប់នេះ ។ សូមអាន យ៉ូហាន ៣:១៦ ជាមួយកុមារ រួចអញ្ជើញពួកគេឲ្យទាយ ថា តើអំណោយនោះជាអ្វី រួចបើកវា ។ ហេតុអ្វីបានជាព្រះបានបញ្ជូនបុត្រាទ្រង់មកដល់យើង ?
-
សូមជ្រើសរើសរូបភាពចេញពី សៀវភៅរូបភាពដំណឹងល្អ ( ដូចជា ទំព័រ ១, ៣០, ៣៥–៦៦, ៨៤ ) ដែលបង្ហាញពីរបៀបមួយចំនួន ដែលព្រះយេស៊ូវបានប្រទានពរដល់មនុស្សដទៃ កាលទ្រង់បានមានព្រះជន្មនៅលើផែនដី ។ សូមឲ្យកុមារកាន់រូបភាពទាំងនេះ ខណៈអ្នកតំណាលរឿង ។ អ្នកអាចនឹងជ្រើសរើសរូបភាពដែលត្រូវទៅនឹងពាក្យទាំងឡាយនៅក្នុងចម្រៀង « ទ្រង់បញ្ជូនបុត្រាទ្រង់មក » និង « សូមប្រាប់ខ្ញុំពីរឿងព្រះយេស៊ូវ » ( សៀវភៅចម្រៀងកុមារ ទំព័រ ២០–២១ ៣៦ ) រួចប្រាប់កុមារលើករូបភាពទាំងនោះឡើង នៅពេលពួកគេច្រៀងចម្រៀងទាំងនេះ ។
-
សូមអញ្ជើញកុមារឲ្យចែកចាយរឿងអំពីព្រះយេស៊ូវដែលពួកគេចូលចិត្ត ។ បន្ទាប់ពីបានដំណាលហើយ សូមជួយកុមារឲ្យបំពេញប្រយោគនេះ ៖ « ព្រះយេស៊ូវគ្រីស្ទបានយាងមកផែនដីដើម្បី » ។ បន្ទាប់មក សូមបង្ហាញរូបភាពដែលទាក់ទងទៅនឹងពលិកម្មធួនរបស់ព្រះអង្គសង្គ្រោះ ការសុគត និងការមានព្រះជន្មរស់ឡើងវិញ ( សូមមើល សៀវភៅរូបភាពដំណឹងល្អ ទំព័រ ៥៦, ៥៧, ៥៨, ៥៩) រួចប្រាប់អំពីព្រឹត្តិការណ៍ទាំងនេះដោយសង្ខេប ។ សូមថ្លែងទីបន្ទាល់ថា ព្រះយេស៊ូវគ្រីស្ទបានយាងមកផែនដីដើម្បីសុគតសម្រាប់យើង ហើយមានព្រះជន្មរស់ឡើងវិញ ដើម្បីយើងអាចត្រឡប់ទៅឯព្រះវរបិតាសួគ៌របស់យើងវិញ ។
សួនច្បារគែតសេម៉ានី ដោយ ជេ ឃើក រីឆាដ
បង្រៀនគោលលទ្ធិ
កុមារធំៗ
ម៉ាថាយ ១:១៨–២៥, ២:១–១២, លូកា ១:២៦–៣៨, ២:១–២០
ព្រះយេស៊ូវគ្រីស្ទបានយាងមកផែនដីជាទារក ។
តើអ្នកអាចជួយកុមារឲ្យផ្ដោតអារម្មណ៍ទៅលើព្រះយេស៊ូវគ្រីស្ទ នៅពេលបុណ្យគ្រីស្ទម៉ាស់បានយ៉ាងដូចម្ដេច ?
សកម្មភាពដែលអាចជ្រើសរើស
-
សូមអញ្ជើញកុមារម្នាក់ឲ្យអានព្រឹត្តិការណ៍នានា ដែលទាក់ទងទៅនឹងការប្រសូតរបស់ព្រះអង្គសង្គ្រោះ ម៉ាថាយ ១:១៨–២៥, ២:១–១២, លូកា ១:២៦–៣៨, ២:១–២០ ។ សូមឲ្យកុមារដទៃទៀតដាក់វេនគ្នាគូររូបនៅលើក្ដារខៀន នៃអ្វីដែលបទគម្ពីរពិពណ៌នា ។ តើរឿងទាំងនេះបង្រៀនយើងអ្វីខ្លះអំពីព្រះយេស៊ូវគ្រីស្ទ ?
-
សូមបង្ហាញវីដេអូ « Good Tidings of Great Joy: The Birth of Jesus Christ » ( LDS.org ) ។ សូមឲ្យកុមារសរសេរអ្វីក៏បាន ដែលពួកគេឮដែលនឹងជួយពួកគេឲ្យផ្ដោតអារម្មណ៍ទៅលើព្រះយេស៊ូវគ្រីស្ទនៅពេលបុណ្យគ្រីស្ទម៉ាស់ ។ ក្រោយពីវីដេអូនេះ សូមអញ្ជើញសិស្សឲ្យចែកចាយពីអ្វីដែលពួកគេបានសរសេរ ។
-
សូមអញ្ជើញកុមារឲ្យសរសេរនៅក្រដាសបីបួនសន្លឹក អំពីកិច្ចការនានាដែលពួកគេអាចធ្វើដើម្បីជួយពួកគេ ឲ្យផ្ដោតអារម្មណ៍ទៅលើព្រះយេស៊ូវគ្រីស្ទអំឡុងរដូវបុណ្យគ្រីស្ទម៉ាស់ ។ សូមដាក់ក្រដាសរបស់ពួកគេនៅក្នុងថង់ ដើម្បីឲ្យកុមារយកវាទៅផ្ទះ ។ យោបល់មួយចំនួនអាចរួមបញ្ចូលទាំងការអានព្រះគម្ពីរ ការច្រៀងទំនុកតម្កើងបុណ្យគ្រីស្ទម៉ាស់ និងការធ្វើទង្វើនៃសេចក្ដីស្រឡាញ់ដោយអស់ពីចិត្ត ។
-
សូមច្រៀងចម្រៀងបុណ្យគ្រីស្ទម៉ាស់អំពីព្រះអង្គសង្គ្រោះ ( សូមមើល សៀវភៅចម្រៀងកុមារ ទំព័រ ២០–៣៦, ទំនុកតម្កើង លេខ ១២៣–១៣២ ) រួចអញ្ជើញកុមារឲ្យចែកចាយជួរ ឬឃ្លាដែលពួកគេចូលចិត្តនៅក្នុងចម្រៀងទាំងនេះ ។
ព្រះយេស៊ូវគ្រីស្ទបានធ្វើឲ្យខ្ញុំអាចរស់នៅជាមួយព្រះវរបិតាសួគ៌ ម្ដងទៀតនៅថ្ងៃណាមួយ ។
តើអ្នកអាចជួយកុមារឲ្យរំឭកអ្វីដែលពួកគេបានរៀននៅឆ្នាំនេះ ហើយយល់អំពីមូលហេតុដែលពួកគេត្រូវការព្រះយេស៊ូវគ្រីស្ទនៅក្នុងជីវិតរបស់ពួកគេយ៉ាងដូចម្ដេច ?
សកម្មភាពដែលអាចជ្រើសរើស
-
សូមសរសេរនៅលើក្រដាសពីរសន្លឹកថា តើព្រះយេស៊ូវគ្រីស្ទជានរណា ? និង ហេតុអ្វីបានជាទ្រង់យាងមកផែនដី ? រួចបិទវាទៅលើផ្នែកផ្សេងៗលើជញ្ជាំង ។ សូមអញ្ជើញកុមារម្នាក់ៗឲ្យអានខគម្ពីរដូចតទៅនេះមួយ ៖ ម៉ាថាយ ១៦:១៥–១៦, យ៉ូហាន ៣:១៦, នីហ្វៃទី១ ១០:៤, ម៉ូសាយ ៣:៨, អាលម៉ា ៧:១០–១៣, នីហ្វៃទី៣ ២៧:១៤–១៥ ។ សូមឲ្យកុមារស្វែងរកចម្លើយនៅក្នុងខគម្ពីរទាំងនេះ សម្រាប់សំណួរទាំងពីរនៅលើជញ្ជាំង ។ សូមអញ្ជើញពួកគេឲ្យសរសេរចម្លើយរបស់ខ្លួននៅលើក្រដាស រួចបិទលើជញ្ជាំងក្បែរសំណួររបស់វា ។ តើយើងអាចបង្ហាញការដឹងគុណ ចំពោះអ្វីៗដែលព្រះយេស៊ូវគ្រីស្ទបានធ្វើសម្រាប់យើងតាមរបៀបណា ?
-
សូមអញ្ជើញកុមារឲ្យសរសេរនៅលើក្ដារខៀន នូវរាល់ព្រះនាម ឬងារទាំងឡាយរបស់ព្រះយេស៊ូវដែលពួកគេអាចគិតដល់ ( សូមមើល Bible Dictionary « Christ, names of » ) ។ តើព្រះនាមទាំងនេះបង្រៀនយើងអ្វីខ្លះអំពីព្រះយេស៊ូវគ្រីស្ទ និងបេសកកម្មរបស់ទ្រង់ ? ហេតុអ្វីបានជាយើងត្រូវការព្រះយេស៊ូវគ្រីស្ទនៅក្នុងជីវិតរបស់យើង ? ដើម្បីជួយកុមារឆ្លើយសំណួរនេះ សូមបង្ហាញវីដេអូ « Why We Need a Savior—A Christmas Message about Our Savior Jesus Christ » ( LDS.org ) ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យស្វែងរកយ៉ាងហោចណស់ឲ្យបានរបៀបមួយ ដើម្បីបម្រើមនុស្សដទៃ ឬមកកាន់តែជិតព្រះយេស៊ូវគ្រីស្ទនៅពេលបុណ្យគ្រីស្ទម៉ាស់នេះ ។
ការកែលម្អការបង្រៀនរបស់យើង
កុមារចូលចិត្តចែកចាយអ្វីដែលពួកគេកំពុងរៀន ។ ទោះបីជាពួកគេនៅក្មេងក្ដី ក៏កុមារអាចពង្រឹងដល់សមាជិកគ្រួសាររបស់ពួកគេបានដែរ ។ សូមលើកទឹកចិត្តកុមារដែលអ្នកបង្រៀនឲ្យចែកចាយជាមួយក្រុមគ្រួសាររបស់ពួកគេ នូវអ្វីដែលពួកគេបានរៀននៅក្នុងថ្នាក់បឋមសិក្សា ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣០ ) ។