Magkat-on—Labing Dugay nga Oras: 45 Minutos

Basaha:Samtang sugdan ninyo sa pagsuhid ang inyong mga opsyon sa edukasyon, ang Langitnong Amahan motabang kaninyo nga makakita sa mga posibilidad nga abli alang kaninyo. Magsugod kamo niini nga pagdiskubre pinaagi sa pagkat-on mahitungod niining mga butanga:

1. Aduna kamoy balaan nga potensyal.

2. Ang edukasyon usa ka taytayan ngadto sa self-reliance [makatabang nga mahimong self-reliant].

3. Hibaloi kon pila ang inyong gikinahanglan nga kita aron mahimong self-reliant.

4. Sugdi ang inyong plano sa self-reliance

1. Aduna Kamoy Balaan nga Potensyal

Basaha:Ang himaya sa Dios mao ang salabutan, o, sa lain nga mga pulong, kahayag ug kamatuoran” (D&P 93:36). Gusto sa Dios nga makabaton kamo og salabutan. Gusto Niya nga mahibalo kamo unsay buhaton niining kinabuhia. Gusto Niya nga mahibalo kamo unsaon sa pagsangkap sa inyong kaugalingon ug sa inyong pamilya, sa espirituhanon ug temporal nga paagi.

Hisguti:Kanus-a kamo natabangan sa Dios sa pagkat-on og butang nga nagtugot kaninyo nga mahimong mas maayo nga tigsangkap alang sa inyong kaugalingon o sa inyong pamilya?

Basaha:Isip anak sa Dios, nakapanunod kamo og balaanong mga kinaiya ug mga abilidad ug adunay potensyal nga mahimong sama sa inyong Langitnong mga Ginikanan. Makapalambo kamo niini nga mga kinaiya ug mga abilidad pinaagi sa kasinatian ug edukasyon. Makakuha kamo og edukasyon ug training pinaagi sa pag-eskwela, pag-enroll sa usa ka training program, pagkat-on sa trabaho, pagkat-on diha sa internet, pagbasa og mga libro, ug daghan pang ubang paagi.

“Ang edukasyon mao ang yawe ngadto sa oportunidad” (Gordon B. Hinckley, “The Perpetual Education Fund,” Ensign, Mayo 2001, 53).

Hisguti:

• Duha kaninyo daklit nga mosaysay mahitungod sa usa ka tawo nga inyong kaila kinsa nakapalambo sa iyang kinabuhi pinaagi sa dugang nga edukasyon o training.

• Sa unsang paagi ang edukasyon o training makadugang sa inyong mga abilidad ug makaabli sa mga pultahan sa oportunidad nganha kaninyo?

2. Ang Edukasyon Usa ka Taytayan ngadto sa Self-Reliance

Basaha:Tingali adunay gintang tali sa unsa kamo ka self-reliant karon ug kon asa ninyo gusto. Ang inyong gintang mahimong dako o gamay, apan kini usa ka gintang nga angay latason. Ang edukasyon ug training makatabang sa pagsumpay niana nga gintang. Ang edukasyon ug training mosangput ngadto sa mas maayong trabaho, mas dakong kinitaan, ug napalambo nga self-reliance.

Ang taytayan sa sunod nga pahina nagrepresentar sa dalan nga inyong sundon uban niini nga grupo sa self-reliance. Mouswag kamo pinaagi niini nga mga lakang padulong sa mas dako nga pagka-self-reliance.

Kalihokan _{(5 minutos)}

Pagpuli-puli sa pagbasa sa mga parte sa taytayan (sa pahina 8) ug hisguti unsa ang labing lisud o labing sayon alang kaninyo.

Basaha:Samtang mopadayon kamo sa pag-uswag sa inyong self-reliance, tingali motabok kamo sa taytayan sa makadaghang higayon sa inyong kinabuhi aron makabaton sa labing bag-o nga mga kahanas sa inyong propesyon, mahashasan ang mga kahanas sa trabaho, o mobalhin og trabaho o propesyon.

3. Hibaloi kon Pila ang Inyong Gikinahanglan nga Kita Aron Mahimong Self-Reliant

Basaha:“Ang self-reliance mao ang katakus, commitment [pasalig], ug paningkamot sa pagsangkap sa espiritwal ug temporal nga mga panginahanglan sa kinabuhi alang sa kaugalingon ug sa pamilya” (Handbook 2: Administering the Church [2010], 6.1.1).

Usa sa unang mga lakang sa inyong dalan sa edukasyon mao ang pagtino kon pila ang kinitaan nga inyong gikinahanglan aron mahimong self-reliant. Sa higayon nga masayud kamo pila ang kinitaan nga inyong gikinahanglan, makasugod kamo sa pagsuhid sa potensyal nga mga trabaho ug gikinahanglan nga training.

Aron sa pagtabang kaninyo nga masayud pila ang kinitaan nga inyong gikinahanglan, subaya ang inyong inadlaw nga kinitaan ug gasto diha sa usa ka notebook. Sa katapusan sa matag semana, isumada ang mga numero ug i-rekord ang total nga mga kantidad diha sa Rekord sa Kinitaan ug Gasto nga Talaan diha sa pahina 15. Gamiton ninyo kini nga rekord sa mosunod nga pipila ka semana. Kini nga impormasyon makatabang kaninyo sa pagpili og angay nga trabaho ug training nga subayon.

4. Sugdi ang Inyong Plano sa Self-Reliance

Basaha:Sa mosunod nga pipila ka semana, mohimo kamo og plano sa self-reliance. Aron makasugod sa inyong plano sa self-reliance, sugdi og usa ka tumong sa self-reliance. Sama pananglit, ang usa ka partisipante misulat:

“Makakuha ko og trabaho nga mosweldo og labaw og 20,000 kay sa akong kita karon aron makasangkap ko sa akong pamilya ug makatigum alang sa mga emerhensya.”

Kalihokan _{(5 minutos)}

Isulat ang inyong tumong sa self-reliance diha sa ubos. Ayaw kabalaka kon dili kini perpekto. Aduna kamoy daghang kahigayunan sa pag-usab niini. Sulod sa semana, pag-ampo mahitungod sa inyong tumong sa self-reliance ug pakig-istorya sa mga sakop sa pamilya o mga higala mahitungod niini. Usaba kini kon gikinahanglan.

Ang Akong Tumong sa Self-Reliance

Ako

aron ako .

Hisguti:Unsa ang labing importante nga mga butang nga inyong nakat-unan sa miting sa grupo karong adlawa?