“Tungod lamang kay ang usa ka butang maayo kini dili igo nga rason sa pagbuhat niini. Ang gidaghanon sa maayong mga butang nga atong mahimo misobra kaayo sa panahon nga magamit sa pagbuhat niini. Pipila sa mga butang mas maayo kay sa maayo, og kini mao ang mga butang nga nagkinahanglan nga unang hatagan ug pagtagad sa atong mga kinabuhi.
“Si Jesus mitudlo niini nga baruganan diha sa panimalay ni Marta. Samtang siya ‘nagkalibuglibog sa hilabihang pag-amuma’ (Lucas 10:40), ang iyang igsoon, si Maria, ‘milingkod sa tiilan sa Ginoo ug nagpatalinghug sa iyang mga pulong’ (b. 39). Sa dihang mireklamo si Marta nga ang igsoon wala motabang kaniya, si Jesus midayeg ni Marta sa unsay iyang gibuhat (b. 41) apan mitudlo kaniya nga ‘usa ra gayud ka butang ang kinahanglanon: ug hingpilian ni Maria ang maayong bahin, nga dili na makuha gikan kaniya’ (b. 42). Dalaygon si Marta nga ‘nagmatngon ug nabalaka sa daghang mga butang’ (b. 41), apan ang pagkat-on sa ebanghelyo gikan sa Labing Maayong Magtutudlo mas labaw nga ‘gikinahanglan.’ Ang mga kasulatan naglangkub ug mga pagtulun-an nga pipila sa mga butang mas napanalanginan kay sa uban (tan-awa sa Mga Buhat 20:35; Alma 32:14–15). …
“Samtang atong hunahunaon ang daghang kapilian, kinahanglan atong hinumduman nga dili igo nga ang usa ka butang maayo. Ang ubang kapilian mas maayo, ug ang uban pa gayud labing maayo. …
“Hunahunaa giunsa nato paggamit ang atong oras diha sa mga pagpili nga atong gihimo sa pagtan-aw og telebisyon, pagdula og mga video games, pag-surf sa Internet, o sa pagbasa og mga basahon o mga magasin. Siyempre maayo ang pagtan-aw og nindot nga salida o ang pagkuha og makalingaw nga impormasyon. Apan dili tanan niana nga klase takus sa bahin sa atong kinabuhi nga atong gihatag sa pagkuha niini. Ang ubang mga butang mas maayo, ug ang uban pinakamaayo” (“Maayo, Mas Maayo, Labing Maayo,” Ensign o Liahona, Nob. 2007, 104–5).