Magkat-on—Labing Dugay nga Oras: 45 Minutos

Basaha:Sa miagi nga miting sa grupo inyong nakat-unan ang mahitungod sa pagmugna og palibut alang sa kalampusan. Karon magkat-on kamo mahitungod sa pagsabut sa mga ekspektasyon ug pagkab-ot niadto nga mga ekspektasyon pinaagi sa pagbuhat sa mosunod:

1. Sabta ug buhata ang unsay gikinahanglan.

2. Sabta ang inyong estilo sa pagkat-on.

3. Idumala ang stress sa epektibong paagi

1. Sabta ug Buhata ang Unsay Gikinahanglan

Basaha:Importante sa mga employer ang mga sertipiko, degree, o ubang kamatuoran nga kwalipikado kamo sa pagbuhat sa piho nga mga trabaho. Maangkon ninyo kini pinaagi sa pagtuman sa mga rekisito sa eskwelahan o training program. Kini nga mga rekisitos naglakip sa mga butang sama sa mga klase, mga assignment, ug mga test.

Aron matabangan kamo nga matuman ang mga rekisito sa programa, kinahanglan kamong (1) mangutana mahitungod sa mga rekisito, (2) mohimo og notes, ug (3) aktibong moapil sa mga kurso ug mga programa.

Mangutana mahitungod sa mga Rekisito

Basaha:Ang mga eskwelahan ug mga training program mohimo og mga rekisito alang sa matag degree, sertipiko, klase, ug assignment. Ang malampusong mga tigkat-on mosiguro nga nakasabut sila sa mga rekisito.

Aniay pipila ka mga ehemplo sa mga pangutana nga mahimo ninyong ipangutana aron masayud unsay gikinahanglan kaninyo:

• Unsaon nako nga molampus sa imong klase?

• Unsay gusto nimo nga akong makat-unan ug buhaton?

• Kanus-a man isumiter ang mga assignment?

• Unsaon nimo sa pag-evaluate sa akong nabuhat?

Hisguti:Sa unsang paagi ang pagpangutana nakatabang kaninyo nga makasabut sa mga rekisito sa nangagi?

Mohimo og Notes

Basaha:Usa ka paagi sa paghinumdom sa mga rekisito mao ang paghimo og notes. Ribyuha unya kadto nga mga notes aron mas makahinumdom sa unsay inyong nakita, nadungog, o nabasa diha sa klase.

Kon maghimo og notes mahitungod sa usa ka assignment, siguroa nga inyong nahibaloan:

• Unsay buhaton.

• Unsaon kini sa pagbuhat.

• Kanus-a kini isumiter.

Hisguti:Sa miaging mga assignment sa eskwelahan o trabaho, sa unsang paagi ang paghimo og mga notes nakatabang kaninyo?

Basaha:Ang mosunod mahimong makatabang kaninyo sa paghimo og maayong notes sa mga assignment:

• Moapil ug mag-alerto, ug magbaton og positibo nga kinaiya.

• Ayaw sulayi sa pagsulat sa matag pulong nga gisulti; tutuki ang importanting mga mensahe ug ang labing importante nga impormasyon.

• Gamiti og mga pinamubo [abbreviation]; kon makatabang, pagdrowing og mga hulagway.

• Andami og luna aron makadugang unya og mga klaripikasyon.

• Iorganisar ang mga notes.

Kalihokan _{(5 minutos)}

Alang niini nga kalihokan, hunahunaa nga anaa kamo sa welding class ni Juan naghimo og notes kabahin sa usa ka assignment.

Step 1: Hangyoa ang usa ka sakop sa grupo sa pagpakli ngadto sa pahina 161 ug basahon ang mga instruksyon. Ang uban sa grupo kinahanglang mohimo og notes sa ubos.

Step 2: Papangutan-a ang nahabilin sa grupo kabahin sa assignment ug paghimo og dugang nga mga notes (ang tawo nga nagbasa sa assignment kinahanglang mohimo og mga tubag).

Step 3: Itandi ang inyong mga notes ngadto sa mga notes sa ubang sakop sa grupo.

Step 4: Isip grupo, hisguti ang mga paagi sa paghimo og mga notes nga labing epektibo kaninyo.

Aktibo nga Moapil

Basaha:Laing paagi nga makasabut sa mga rekisito ug makakat-on sa hilisgutan sa klase mao ang aktibong pag-apil. Ang aktibong pag-apil makatabang kaninyo nga makat-on og maayo sa klase. Pipila ka mga sugyot gilista sa ubos:

• Paminaw og maayo.

• Lingkod sa atubangan kon mahimo.

• Pangutana ug tubaga ang mga pangutana.

• Pangita ug pakigtrabaho sa mga estudyante nga mapasaligon sa pagkat-on (tupad kanila, pagpaambit og mga ideya, pakig-abut, pangutana, ug tabangi ang usag usa).

• Pakig-istorya sa mga instruktor (atol ug human sa klase) aron mas makasabut sa mga rekisito ug sa mga konsepto nga inyong nakat-unan.

Hisguti:Unsa ang mga kalainan nga inyong namatikdan sa dihang aktibo kamong miapil sa usa ka butang kay sa dili kaayo moapil?

2. Sabta ang Inyong Estilo sa Pagkat-on

Basaha:Ang ubang mga tawo labing maayong makakat-on pinaagi sa pagtan-aw, ang uban pinaagi sa pagpaminaw, ang uban pinaagi sa pagbuhat, ug ang uban sa laing mga paagi. Ang uban labing makakat-on kon mag-inusara ug ang uban kon kauban sa mga grupo sa mga tawo. Ang malampuson nga mga estudyante mogamit sa estilo sa pagkat-on nga labing epektibo kanila kutob sa ilang mahimo.

Kalihokan _{(2 minutos)}

Step 1: Basaha ang sitwasyon sa ubos ug pilia ang (mga) butang nga labing naghulagway ninyo.

Kon ang usa ka magtutudlo adunay bag-o nga device nga wala kamoy nahibaloan, gusto ba ninyo nga:

1. Motan-aw niini o mobasa mahitungod niini? Kon oo, tingali labing makat-on kamo pinaagi sa pagtan-aw.

2. Maminaw sa magtutudlo nga mosulti kaninyo mahitungod niini? Kon oo, tingali labing makat-on kamo pinaagi sa pagpaminaw.

3. Mohikap niini, mopislit sa mga button, o mobungkag niini aron makat-on sa unsang paagi kini naglihok? Kon oo, tingali labing makat-on kamo pinaagi sa pagbuhat.

Step 2: Pakig-istorya sa tawo nga inyong tupad kon sa unsang paagi kamo labing makakat-on.

Basaha:Ang mga instruktor dili kinahanglan nga motudlo sa paagi nga labing haum sa inyong estilo sa pagkat-on. Tingali kinahanglan ninyong ipahiangay ang inyong pamaagi sa pagkat-on aron mohaum og maayo sa sitwasyon.

Sama pananglit, si Juan mas ganahan sa pamaagi nga aktwal nga mobuhat. Ganahan siyang magkuri-kuri. Dili siya ganahan nga maglingkod sa klase ug maminaw sa magtutudlo nga mag-istorya. Dili siya ganahan nga mobasa og mga libro. Apan ang lecture usa ka bahin sa iyang pag-eskwela, ug ang pagbasa gikinahanglan aron makapasar sa test. Dili siya mahimong mobaliwala sa mga rekisito tungod kay dili kini mohaum sa iyang estilo sa pagkat-on. Nakahukom siya nga maminaw kutob sa iyang mahimo, mobasa kutob sa iyang mahimo, ug unya sulayan dayon ang mga butang human sa klase aron makakat-on siya pinaagi sa aktwal nga pagbuhat.

Nadiskubrihan ni Arlene nga mas makat-on siya kon makighisgut siya og mga idea ngadto sa uban. Nakahukom siya nga regular nga magtuon nga dunay kauban.

Kalihokan _{(5 minutos)}

Sa unsang paagi nga labing maayo ninyong magamit ang inyong estilo sa pagkat-on sa lain-laing mga sitwasyon sa pagkat-on?

Step 1: Hunahunaa ang inyong ganahan nga estilo sa pagkat-on.

Step 2: Atubanga ang laing sakop sa grupo ug hisguti kon unsaon ninyo sa pagpahiangay sa mosunod nga mga sitwasyon:

1. Unsay inyong mabuhat aron makat-on gikan sa usa ka diskusyon sa grupo?

2. Unsay inyong mabuhat aron makat-on gikan sa lecture?

3. Unsay inyong mabuhat aron makasag-ulo og lista sa mga pulong?

Step 3: Pagbaylo og tahas ug balika ang step 1 ug 2.

3. Idumala ang Stress sa Epektibong Paagi

Basaha:Samtang maningkamot kamo sa inyong edukasyon, makasinati kamo og stress. Kabahin kini sa kinabuhi ug kabahin sa inyong edukasyon. Ang stress sa inyong edukasyon moabut gikan sa mosunod nga mga tinubdan ug daghan pang uban:

• Wala makasabut sa unsay gipaabut

• Wala makapangandam

• Wala makahuman sa mga assignment sa saktong panahon

• Kahadlok nga dili makapasar sa test

• Kahadlok nga mamulong atubangan sa uban

• Daghan kaayong buhatunon

• Pakigtrabaho sa ubang tawo

Samtang mopadayon kamo uban sa hugot nga pagtuo, ang Ginoo mopanalangin kaninyo og kalig-on ug abilidad. Dili kamo makawagtang sa stress gikan sa inyong edukasyon, apan makadumala kamo niini. Busa hatagi og pagtagad ang mga timailhan sa stress ug pangita og mga paagi sa pag-adjust o pagdumala sa stress. Pipila ka mga sugyot gilista sa ubos:

• Ikonsiderar og usab ang inyong mga ekspektasyon

• Pasagdi ang dili ninyo makontrolar

• Tutuki ang unsay maayo ninyong mabuhat.

• Likayi ang pagkomparar sa inyong kaugalingon ngadto sa uban

• Pag-ehersisyo

• Pagserbisyo sa uban

• Pahulay

• Tutuki og balik ang kamapasalamaton

• Bahin-bahina ang dagko o lisud nga mga buluhaton ngadto sa gagmay nga mga piraso

• Paghimo og usa ka gamay nga lakang paingon sa unahan karon

Hisguti:Unsa ang nakatabang ninyo sa pagdumala sa stress?

Kalihokan _{(5 minutos)}

Paghunahuna og mga paagi sa pagdumala sa inyong stress. Paggahin og pipila ka minuto nga pribadong mamalandong ug mosulat og mga tubag sa mosunod nga mga pangutana.

Step 1: Unsa nga mga stress ang akong giatubang?

Step 2: Pagpili og usa ka paagi sa pagdumala sa stress nga gusto ninyong sulayan. Kompletuha ang mosunod nga sentence:

“Kon ma-stress ko mahitungod sa ,

Ako .”

Step 3: Bisan kanus-a karong adlawa, isulat og usab kini nga sentence sa laing piraso nga papel. Ibutang kini sa inyong bong-bong, sa inyong bulsa, o sa laing dapit diin kini makatabang kaninyo sa paghinumdom kon unsaon ninyo pagdumala ang stress.

Hisguti:Unsa ang labing importante nga mga butang nga inyong nakat-unan niini nga miting sa grupo?