Magkat-on—Labing Dugay nga Oras: 45 Minutos

Basaha:Sa miaging semana inyong nakat-unan nga ang edukasyon ug training mahimong usa ka taytayan ngadto sa self-reliance, paingon sa mas maayong trabaho ug dugang nga kinitaan. Karong semanaha magsugod kamo sa pagsusi unsa nga trabaho ang inyong gusto. Ang pagkat-on mahitungod sa mosunod makatabang kaninyo samtang magtan-aw kamo sa umaabut nga mga oportunidad sa panarbaho:

1. Himoa ang mga desisyon.

2. Ang mga kompaniya modawat og mga tawo nga makahatag og benepisyo.

3. Hibaloi unsay inyong ikatanyag sa mga employer.

4. Hibaloi kinsa ang pakig-istoryahan.

5. I-update ang inyong plano sa self-reliance.

1. Paghimo og mga Desisyon

Basaha:Si Presidente Thomas S. Monson kanunayng mipahinumdom kanato nga “ang mga desisyon motino sa destinasyon” (“Decisions Determine Destiny,” New Era, Nob. 1979, 4). Ang inyong dalan padulong sa self-reliance nagkinahanglan kaninyo nga mohimo og mga desisyon. Sa sumunod nga lima ka semana, magtinabangay kamo sa paghimo sa mosunod nga mga desisyon:

• Unsa nga trabaho ang inyong gusto

• Unsa nga edukasyon o training program ang inyong buhaton

• Unsaon sa pagbayad sa inyong edukasyon o training

Hisguti:Unsa ang inyong gibati sa pagkasayud nga mohimo kamo niini nga mga desisyon sa mosunod nga pipila ka semana?

Basaha:Tingali mabalaka kamo nga makahimo kamo og sayop nga pagpili kon unsa nga trabaho ang inyong buhaton ug unsa nga training ang inyong kuhaon. Daghang mga tawo ang manobra sa paghunahuna sa ilang mga desisyon. Gusto tingali nila og klaro kaayo nga mga tubag sa dili pa sila mopadayon. Apan ang Ginoo kasagaran mohatag kanato og “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30).

Ang Langitnong Amahan makatabang kaninyo sa paghimo og mga desisyon. Paminaw samtang si Elder David A. Bednar mitudlo kon sa unsang paagi ang Dios makigsulti kanato.

Tan-awa:“Patterns of Light: Spirit of Revelation,” anaa sa srs.lds.org/videos. (Walay video? Basaha ang mga pahina 39–40.)

Hisguti:Sa unsang paagi ang Langitnong Amahan makatabang kaninyo sa mga desisyon kabahin sa trabaho o training?

Basaha:Tingali wala pa kamo masayud sa hingpit kon unsa nga trabaho ang angay ninyong buhaton karon, apan buhata ang sunod nga lakang, ug dayon ang sunod nga lakang. Padayon sa pag-abante sa unahan. Pagtinguha og impormasyon, pamalandong, ug pag-ampo, apan ayaw pasobrahi og paghunahuna ug ayaw pagpundo diha sa pagduha-duha. Si Elder Dallin H. Oaks mitambag, “[Ang] pagpadayag ngadto sa mga anak sa Dios moabut kon sila naglihok” (“Sa Iyang Kaugalingong Panahon, Sa Iyang Kaugalingong Paagi,” Liahona, Ago. 2013, 22).

Hisguti:Unsaon nato sa pagtabang sa usag usa nga “maglihok” aron makadawat kita og pagpadayag nga atong gikinahanglan sa paghimo og mga desisyon?

Basaha:Sa tibuok niini nga mga materyal, makasugat kamo og dili tinuod nga mga tawo kinsa naningkamot sa paghimo og mga desisyon samtang nagtinguha sila nga mahimong self-reliant.

Himamata si Stefano, edad 28. Si Stefano ulitawo ug nagpuyo ipon sa iyang mga ginikanan. Sa batan-on pa siya, mieskwela siya og usa ka tuig sa unibersidad aron mahimong usa ka engineer, apan miundang dayon siya. Dugay-dugay siya nga nagsige og ingon, “Kinahanglan gyud kong mobalik og eskwela, apan wala ko masayud unsay angay nakong eskwelahan.”

Kinahanglan nga modesisyon si Stefano unsa nga trabaho ang iyang gusto sa dili pa siya modesisyon unsa ang tun-an. Sama ni Stefano, magsugod usab kamo sa pagsusi unsa nga trabaho ang inyong gusto.

2. Ang mga Kompaniya Modawat og mga Tawo nga Makahatag og Benepisyo

Basaha:Walay bisan unsa sa kinabuhi nga mohatag kanato og kalampusan nga walay paningkamot. Si Presidente Gordon B. Hinckley miingon, “Ang trabaho mao ang milagro diin mapakita ang talento ug matinuod ang mga damgo” (“To a Man Who Has Done What This Church Expects of Each of Us” [Brigham Young University devotional, Oct. 17, 1995], 6, speeches.byu.edu).

Ang mga kompaniya mo-hire og mga tawo aron sa pagtabang kanila nga mokita og kwarta o mosulbad sa mga problema. Dili sila mo-hire og mga tawo aron lang ang mga empleyado mokita og kwarta. Kon maayo kamo motrabaho sa usa ka piho nga trabaho, ang mga kompaniya mahimong andam sa pag-hire kaninyo ug mosweldo kaninyo alang niana nga trabaho. Ang edukasyon ug training makatabang kaninyo nga makaangkon og mga kahanas ug pagkabatid nga makahatag og benepisyo sa usa ka kompaniya, nga moresulta sa mas maayo nga trabaho alang kaninyo.

Hisguti:Nganong importante man alang sa usa ka trabahante nga makahatag og benepisyo ngadto sa employer agig tugbang sa iyang sweldo?

3. Hibaloi Unsay Inyong Ikatanyag sa mga Employer

Basaha:Tungod kay ang mga employer nangita og mga tawo nga makahatag og benepisyo sa ilang kompaniya, importante nga masayud kamo kon unsay inyong ikatanyag sa mga employer. Unsa ang maayo ninyo nga mabuhat? Unsa ang mahimo kamong maayo nga mobuhat?

Ang Ginoo wala gayud mohatag og lista sa mga trabaho nga gihan-ay gikan sa labing importante ngadto sa pinakadili importante. Si Presidente Gordon B. Hinckley mitudlo: “Dili nako igsapayan kon unsa nga bokasyon ang inyong pilion sa kinabuhi basta ligdong lang kini. Usa ba ka mekaniko sa sakyanan, mason, tubero, elektrisyan, doktor, abogado, negosyante. … Apan kon unsa man kamo, kuhaa ang oportunidad sa pagbansay alang niini ug pahimusli og maayo kana nga oportunidad” (Teachings of Gordon B. Hinckley [1997], 172).

Kalihokan _{(10 minutos)}

Isip grupo, buhata ang mosunod:

Step 1: Pag-abli og unom ka kopya niini nga basahon aron ang matag basahon nagpakita og lain-laing pahina tali sa mga pahina 27 ug 32. Kini nga mga pahina nagpakita og lain-laing matang sa trabaho. Ibutang ang mga basahon sa palibut sa kwarto.

Step 2: Karon, mobarug ang tanan ug motan-aw sa mga pahina.

Step 3: Barug duol sa pahina nga nagpakita og mga hulagway nga labing nagrepresentar sa mga kahanas ug mga abilidad nga aduna kamo karon o gusto ninyo nga maangkon. Ayaw pagkalibog sa mga hulagway. Ang ubang mga tawo ug mga lugar lahi tan-awon kay sa makita kini diha sa inyong dapit. Kon dili ninyo makita ang inyong mga kahanas ug mga abilidad diha sa mga hulagway, ipaambit sa uban ang mga abilidad nga aduna kamo o gusto nga maangkon.

Step 4: Ipaambit nganong gipili ninyo kana nga pahina.

Ganahan Kong Motrabaho Gamit ang Akong mga Kamot

Ganahan Ko sa Pagsiksik ug Imbestigasyon

Ganahan Ko nga Magmamugnaon ug Orihinal

Ganahan Ko nga Makigtrabaho og mga Tawo

Ganahan Ko nga Moagni sa Uban

Ganahan Ko nga Nakatutok sa mga Detalye

Kalihokan _{(10 minutos)}

Sa inyong kaugalingon, hunahunaa sa hilum ang mosunod nga mga pangutana: Isulat ang inyong mga hunahuna sa ubos sa matag usa.

1. Unsa nga matang sa trabaho ang natural lang kanako?

2. Unsa nga trabaho ang nakapainteres kanako? Sama pananglit, gusto ba ko nga mamaligya og mga butang, moatiman og mga tawo, o magtukod og mga butang? Ganahan ba ko og detalyadong trabaho? Gusto ba ko nga i-assign ang trabaho kanako, o gusto nga akoy modumala sa akong trabaho?

3. Unsa nga mga kahanas nga aduna na ko? Sama pananglit, hanas ba ko sa pagsulbad og mga problema, pagplano sa umaabut, o pagtrabaho gamit ang akong mga kamot?

4. Unsa nga mga trabaho ang magtugot kanako sa paggamit sa mga kahanas nga aduna ko o gustong makat-unan?

Kalihokan _{(5 minutos)}

Step 1: Pagsulat og tulo ka trabaho nga labing nakapainteres ninyo.

Step 2: Pagpuli-puli sa pagpangutana sa grupo:

“Aduna ba kaninyo nga nakahibalo kabahin niini nga mga trabaho?”

“Aduna ba kaninyo nga nakaila og tawo nga nagtrabaho karon sa bisan hain niini nga mga trabaho sa atong dapit?”

Step 3: Isulat ang bisan unsang ideya nga ilang gipaambit kaninyo.

4. Hibaloi Kinsa ang Pakig-istoryahan

Basaha:Daghan sa mga kalihokan niini nga workbook nagkinahanglan nga makig-istorya kamo sa uban gawas sa grupo.

Sama pananglit, ang labing maayong paagi aron mahibalo mahitungod sa usa ka trabaho mao ang pakig-istorya sa mga tawo nga nagbuhat niana nga trabaho. Usa sa inyong mga commitment niining semanaha mao ang pagsusi sa tulo ka trabaho nga kamo interesado pinaagi sa pakig-istorya sa mga tawo nga anaa niana nga mga posisyon. Kini nga panag-istoryahanay makatabang ninyo sa paghimo og maayong mga desisyon mahitungod sa inyong training ug umaabut nga trabaho.

Ang pipila sa mga tawo nga inyong mahimamat matinabangon kaayo ug interesado sa inyong kalampusan. Pwede sila nga mahimong mga “mentor” ninyo. Ang mentor usa ka tawo nga inyong gisaligan nga makatambag ninyo o makagiya ninyo. Ang mentor makahatag ninyo og mga ideya, mopataas sa inyong panan-aw, ug makatabang ninyo nga mapalambo ang inyong potensyal sa hingpit. Pag-ampo alang sa giya aron makakita ug makapalambo niining espesyal nga mga panaghigalaay.

Ang pakig-istorya sa mga tawo mahitungod niini nga mga butang dili lisud. Mahimo kamong moingon, “Hi, Joseph. Naghunahuna ko nga mahimong computer programmer. Nasayud ko nga nagtrabaho ka isip usa ka programmer. Duna kay pipila ka minutos aron makapangutana ko nimo og pipila ka mga pangutana?” Kadaghanan sa mga tawo andam ug malipay nga motabang.

Hisguti:Kanus-a kamo nakapangutana og importanting pangutana sa usa ka tawo mahitungod sa trabaho ug nakadawat og tubag nga nakatabang?

Basaha:Kon mangayo kamo og tambag gikan sa uban:

• Pag-andam og pipila ka piho nga mga pangutana (siguroa nga haum ang mga pangutana).

• Isulat kon unsa ang ilang isulti kaninyo.

• Ayaw paggamit og mas taas nga oras kay sa inyong gihangyo (ipamubo kini).

• Pagmatinahuron.

• Ayaw panghangyo og trabaho sa tawo.

• Pasalamati ang tawo sa iyang panahon.

5. I-update ang Inyong Plano sa Self-Reliance

Kalihokan _{(5 minutos)}

I-update ang inyong plano sa self-reliance sa ubos. Sulod sa semana, pakigsulti sa mga tawo ug pagbasa (naa sa internet ug ubang mga kapanguhaan) mahitungod sa tulo ka trabaho nga inyong gihunahuna. Ang Langitnong Amahan mas nakaila kaninyo kay sa inyong pagkaila sa inyong kaugalingon. Pag-ampo karong gabhiona kon hain sa tulo ka mga opsyon sa trabaho ang labing maayo alang kaninyo. Mahimong maaghat kamo sa pagdugang og laing mga trabaho sa inyong lista o sa pagtangtang sa pipila ka mga trabaho.

Ang Akong Tumong sa Self-Reliance (kapitulo 1)

Ako

aron ako .

Ang Akong Plano sa Pagtrabaho

Akong itandi kining tulo ka mga trabaho:

Hisguti:Unsa ang labing importante nga mga butang nga inyong nakat-unan sa miting sa grupo karong adlawa?