Mga Kapanguhaan

Mga Sundanan sa Kahayag: Espiritu sa Pagpadayag

Elder David A. Bednar

“Kon ang mga anak sa Dios makigsulti ngadto Kaniya, motawag kita niini nga pag-ampo. Kon Siya makigsulti kanato, moabut kini sa lain-laing mga paagi o mga sistema. Naghisgut kita sa mga sundanan diin ang Dios makigsulti sa Iyang mga anak dinhi sa yuta.

“Ang pagpadayag usa ka komunikasyon gikan sa Dios ngadto sa Iyang mga anak dinhi sa yuta. Usahay, kadto nga mga mensahe moabut diha-diha dayon ug daw maukyabon. Gitandi ko kana ngadto sa usa ka suga nga gipasiga sa ngitngit nga kwarto, diin sa kalit lang, ang kangitngit napapahawa, ug makita ninyo ang tanan diha sa lawak sa klaro ug sanag nga paagi. Mosugyot ko nga kana nga sundanan sa pagdawat og mga mensahe gikan sa Dios mas panagsa ra kay sa komon.

“Ang ikaduha nga sundanan mao ang pag-abut sa kahayag sa hinay-hinay, susama gayud sa pagsubang sa adlaw. Inyong makita nga madugangan ang kahayag sa kalangitan apan dili tanan diha-diha dayon. Kini nga sundanan sa pagpadayag, mosugyot ko, mas komon kay sa panagsa ra.

“Usahay, ang pagdawat og inspirasyon sama sa usa ka adlaw nga gabunon. Adunay igong kahayag aron makasulti kamo nga dili na ngitngit. Dili gabii. Apan dili hayag ang pagkadan-ag. Igo lang ang inyong makita aron makahimo og pipila ka lakang sa unahan padulong sa kahanap. Wala ako masayud sa ubang mga tawo, apan kanunay nga ingon niini ang nahitabo kanako. Igo lang aron makahimo og pipila ka mga lakang. Ug dayon ang kahayag padayon nga nagtabang kanako nga igo lang makakita sa unahan aron makahimo ko sa pagpadayon.

“Samtang mosunod kita sa mga pagtulun-an ni Jesukristo, Siya mao ang kahayag. Usa sa Iyang mga ngalan mao ‘ang Kahayag.’ Samtang mosunod kita sa Iyang ehemplo ug magpakabuhi sumala sa Iyang mga pagtulun-an, adunay kahayag alang sa tanang mga aspeto sa atong kinabuhi. Kon kita mosalikway Kaniya ug mosalikway sa Iyang mga pagtulun-an, pasagdan kita nga kita ra. Mas pilion nako nga mosunod sa Iyang kahayag. Nahibalo ako kon adunay gahum nga labaw sa akong kaugalingon nga moabut gikan sa Dios padulong kanako ug pinaagi kanako, nga mao ang espiritu sa pagpadayag.”

Balik sa pahina 24.