Basaha:Sa milabay nga miting, mipalambo kamo og pipila ka mga kahanas ug mga gawi nga makatabang kaninyo nga magmalampuson sa inyong training program. Karon mopalambo kamo og mga kahanas nga makatabang kaninyo nga magpadayon sa giplanong direksyon aron matapos ang inyong pagbansay.
Bisan kon kini lisud, tapusa ang inyong edukasyon pinaagi sa pagbuhat niini nga mga butang:
Motrabaho nga adunay mentor.
Magkat-on diha sa mga grupo.
Magkat-on gikan sa mga kapakyasan.
Mousab lamang sa direksyon kon gikinahanglan.
1: Motrabaho nga adunay Mentor
Basaha:Ang Langitnong Amahan mibutang og mga tawo sa atong kinabuhi kinsa nagpakabana kanato ug makalig-on kanato. Ang ubang mga mentor tingali adunay daghang kasinatian sa pagbuhat sa unsay gusto ninyong buhaton ug makatubag sa inyong mga pangutana. Ang ubang mga mentor tingali andam nga mogahin og panahon sa pag-awhag kaninyo sa paghimo og mga kausaban sa inyong kinabuhi ug sa paghimo kaninyo nga responsable sa inyong pag-uswag.
Hisguti:Kinsa ang labing nakatabang kaninyo samtang inyong gihimo ang inyong plano sa self-reliance? Unsa man ang iyang gibuhat?
Basaha:Si Elder Robert D. Hales mitudlo, “Mainampuong mopili og mga tigtudlo [mentor] kinsa naghunahuna sa inyong espirituhanong kaayohan” (“Pagdawat ug Pagbuntog sa mga Hagit sa Kalibutan Karon,” Ensign o Liahona, Nob. 2015, 46).
Basaha:Padayon sa pagpangita og mga mentor. Pangita og mga tawo kinsa malampuson sa pagbuhat sa unsay gusto ninyong buhaton. Tan-awa kon unsay ilang gibuhat ug ang mga kinaiya nga nakapahimo kanila nga malampuson. Ayaw kahadlok sa pagpangutana kanila, ug himoa ang inyong kaugalingon nga andam sa pagkat-on gikan kanila. Pasalamat kanunay sa tabang sa usa ka mentor. Pag-ampo aron masayud kon sa unsang paagi ninyo mapalambo ug malig-on kining espesyal nga relasyon, ug gamita ang unsay inyong nakat-unan.
2. Magkat-on diha sa mga Grupo
Basaha:Ang mga grupo naghatag kanato og oportunidad sa pagpaambit sa atong mga ideya ug makat-on gikan sa mga kasinatian ug kahibalo sa uban.
Hisguti:Unsa ang pipila ninyo ka mga kasinatian kalabut sa nangagi nga mga proyekto sa grupo? Unsa ang inyong nakat-unan gikan niini?
Basaha:Ang samang mga baruganan nga nakahimong malampuson niini nga grupo sa self-reliance mahimong magamit sa inyong umaabut nga mga grupo sa pagtuon o susama nga mga grupo, sama sa mga work team ug mga Church council. Aron sa pagtabang nga mahimong epektibo ang mga grupo, buhata ang mosunod:
Pangitaa ang pinakamaayong mga estudyante nga inyong ikatrabaho—ilabi na kadtong committed kaayo sama ninyo.
Itratar ang tanan nga katumbas nga mga partisipante.
Magmatinahuron sa pagpakigsulti sa uban. Kinahanglang mobati ang tanan nga luwas sa pagpaambit sa iyang mga ideya.
Pag-set og regular nga oras sa dungan nga pagtuon.
Uyoni ang usa ka piho nga tumong sa sinugdanan.
Tapusa ang matag study session pinaagi sa paghimo og mga commitment: “Unsa ang buhaton sa matag usa kaninyo ug kanus-a ninyo kini buhaton?
Paglingaw-lingaw mo apan pabilin nga naka-focus.
Pangandam ug buhata ang inyong bahin. Ipaambit ang unsay inyong nahibaloan ug pagkat-on kutob sa inyong mahimo gikan sa uban.
Kon nagtinabangay kamo sa usa ka proyekto, hibaloi ang deadline ug pag-assign og gagmay nga mga bahin nga humanon sa dili pa ang deadline.
3. Magkat-on gikan sa mga Kapakyasan
Basaha:Sa inyong training makasinati kamo og pipila ka kapakyasan. Tingali usa kini ka kapakyasan sa test, nataligam-an nga assignment, o dili maayo nga grado sa klase. Ang kapakyasan usa ka bahin sa pagkat-on. Ang labing maayo nga mga tigkat-on mopadayon sa pagpaningkamot human sa matag kapakyasan. Ang pagkat-on kon unsaon kini sa pagbuhat mas importante kay sa dili gayud makahimo og sayop, nga lisud kaayong kab-uton.
Adunay daghang mga paagi sa pagtubag sa kapakyasan. Ang pipila ka negatibong mga reaksyon naglakip sa pag-undang, pagbasol sa inyong kaugalingon tungod sa pagkapakyas, o walay buhaton tungod kay nahadlok kamo nga mapakyas pag-usab.
Adunay positibo usab nga mga paagi sa pagtubag sa kapakyasan. Kini naglakip sa:
Pagtinguha og tambag gikan sa Ginoo.
Pagkat-on unsa ang hinungdan sa kapakyasan ug sa paglikay niana.
Pakigtambag sa inyong mentor.
Pagsulay og laing paagi aron makab-ot ang katuyoan o tumong.
Pagtimbang-timbang og usab kon kini nga buhat nagdala ba kaninyo sa direksyon nga inyong gusto, dayon pag-usab sa giplano nga direksyon kon gikinahanglan.
Hisguti:Unsa ang inyong nakat-unan gikan sa usa ka kapakyasan o kahigawad diha sa inyong kinabuhi?
Basaha:“Walay tawo nga gustong mapakyas. Ug kita dili gusto nga ang uban—ilabi na ang atong mga minahal—makakita nato nga napakyas. Kitang tanan gusto nga irespeto ug tahuron. Gusto kita nga mahimong mananaug. Apan kitang mga mortal dili mahimong mananaug kon walay paningkamot ug disiplina o dili masayop.
“… Ang atong kapalaran dili magbase kon kapila kita natumba apan kon kapila kita mibangon, mipapha sa abug sa atong kaugalingon, ug mipadayon” (Dieter F. Uchtdorf, “Makahimo Kamo Niini Karon!” Ensign o Liahona, Nob. 2013, 55–56).
Hisguti:Unsay inyong buhaton sa sunod higayon nga makasinati kamo og kapakyasan?
4. Mousab Lamang sa Direksyon Kon Gikinahanglan
Basaha:Dunay higayon atol sa inyong pag-training nga tingali mobati kamo nga ang inyong dalan sa edukasyon o ang trabaho nga inyong gitinguha dili tukma alang kaninyo. Tingali makahunahuna kamo nga kinahanglan ninyong mag-usab og direksyon. Kon motumaw kini nga mga pagbati, pagmainampingon ug mahunahunaon kabahin sa paghimo sa ingon nga kausaban.
Kon maghunahuna kabahin sa pag-usab og direksyon, kinahanglang pangutan-on ninyo ang inyong kaugalingon, “Mas maayo ba gayud kanako ang bag-o nga direksyon?” Sa unang unom ka mga miting niini nga grupo sa self-reliance, gikonsiderar ninyo pag-ayo ang inyong mga opsyon. Nakig-istorya kamo og daghang mga tawo ug gisiksik ang trabaho, ang training nga gikinahanglan niini, ug unsaon sa pagbayad sa training. Mihimo kamo og mga desisyon nga inyong gibati nga maayo.
Alang lamang sa inyong kaayohan nga mainampingong ikonsiderar ang kausaban sa direksyon sama sa inyong pagpili sa inyong kasamtangan direksyon.
Kon gikinahanglan, gamiti og bag-o nga kopya sa plano sa self-reliance (sa mga pahina 191–92), ingon man usab sa mga kalihokan diha sa mga kapitulo 1–6 sa paghimo sa inyong mga desisyon.
Hisguti:Sa unsang paagi kamo makalikay sa padali-dali nga mga desisyon apan makalikay usab sa sobrang paghunahuna ug pag-ukon-ukon?
Basaha:Si Elder Jeffrey R. Holland mitudlo: “Ako dunay bug-os, sigurado, hingpit nga kahibalo nga ang Dios nahigugma nato. Maayo Siya. Siya ang atong Amahan, ug nagpaabut Siya nato nga mag-ampo ug mosalig ug magmatuohon ug dili mohunong ug dili mahadlok ug dili mosibug ug dili mobiya sa atong tumong kon dunay dili maayo nga mahitabo. Magpadayon kita diha sa dalan. Magpadayon kita sa pagtrabaho. Magpadayon kita sa pagtuo” (“Wrong Roads,” lds.org/media-library).
Hisguti:Unsa ang labing importante nga mga butang nga inyong nakat-unan sa miting sa grupo karong adlawa?