Mga Kapanguhaan
Pag-report sa Akong Kalamboan
Pagpili og mga tahas ug i-drama ang mga mosunod.
FACILITATOR: Mag-report ta sa atong kalamboan karon. Robert, pwedeng ikaw ang mouna?
ROBERT: Okey. Ang unang pangutana mao ni “Nganong gusto man kong mas ma-self-reliant?” Ah, kahibalo mo sa akong sitwasyon—nagkadako ang pamilya ug daghang responsibilidad—mao nga nagkinahanglan ko og maayong trabaho. Gusto gyud kong mahimong self-reliant aron makaatiman sa akong pamilya ug makaserbisyo og maayo sa akong calling.
ROBERT: Ang sunod nga item mao ang “Unsa nga kinitaan ang akong gikinahanglan?” Maayo para nato nga moagi sa proseso sa pag-budget. Nagkinahanglan mi og labaw pa sa doble sa among kinitaan karon. Ug okey ra na; mahimo ra kini.
ROBERT: Sunod, “Unsa nga matang unya sa trabaho ang makahatag niana nga kinitaan?” Among gibati nga maayo ang trabaho sa translation. Makasulti ko og duha ka pinulongan karon. Ug ang trabaho mag-agad-agad ra sa oras.
MEKALA: Naa ba kini sa Preferred Jobs List?
ROBERT: Oo, naa. Taas ang demand niini ug nagkadaghan ang nanginahanglan.
ROBERT: Okey “Unsa nga training ang akong gikinahanglan?” Kinahanglan nakong palamboon ang akong kahanas sa pinulongan. Dugang pa, kinahanglan kong magkat-on sa teknolohiya ug pipila usab ka kahanas sa negosyo. Nakita usab nako nga nagkinahanglan ko nga mag-apprentice aron makatrabaho.
KWAME: Nakakita ka ba og eskwelahan nga naghimo nianang tanan?
ROBERT: Oo. Ug ang programa ug ang eskwelahan naa sa Preferred Schools and Programs List. Nanghinaot ko nga makakuha og Advanced Translation program sa Lingua Celeri. Daghan silag napatrabaho, maayong pag-apprentice, ug maayo nga mga koneksyon.
JANYA: Unsa kadugayon ang programa ug pila ang magasto niini?
ROBERT: Duha ka tuig kini nga programa, lakip na ang pag-apprentice. Makahimo ko niana kadaghanan inig kagabii, mao nga makapadayon ko sa akong calling. Makahimo kita sa pagbayad og katunga sa bayranan ug kinahanglan ko og PEF loan para sa kulang.
FACILITATOR: Maayo, Robert. Kamo ba dunay mga problema o pangutana?
ROBERT: Ah, ang akong asawa ug ako nabalaka bahin sa panahon nga malayo ko sa pamilya, ilabi na sa akong calling sa simbahan. Apan nangutana mi sa mga bata ug ang tanan misuporta gayud. Sa tinuod maka-triple ni sa akong kinitaan.
FACILITATOR: Nindot nga report. Duna bay feedback o tambag para kang Robert?
JANYA: Duna bay maayong transportasyon padulong sa eskwelahan, ug giplano ba nimo ang igasto niana nga galastuhan?
ROBERT: Mosakay ko og bus kaduha padulong sa eskwela, ug wala, wala nako na maplano. Mao nga, salamat niana.
KWAME: Sa akong pagtuo mamahimo kang maayo nga translator. Dali kaayo kang makahunahuna ug maayong mosulti. Mahimo bang mag-translate pud ka samtang nag-eskwela aron molambo ang kasinatian?
ROBERT: Nindot kaayo nga ideya. Duna pa ninyo ang may mga ideya?
Balik sa pahina 82
Ang Edukasyon mao ang Yawe sa Oportunidad
Pagpuli-puli sa pagbasa sa mosunod nga mga pamahayag.
Balik sa pahina 84
Edukasyon sa Tinuod nga Kinabuhi
Ipabasa kini og kusog sa usa ka sakop sa grupo samtang ang uban sa grupo magtan-aw sa mga notes diha sa pahina 85.
HENRY B. EYRING
Ang pagkakabig ngadto sa ebanghelyo ni Jesukristo magdala og tinguha sa pagkat-on. … Usa kini ka natural nga bunga sa pagsunod sa ebanghelyo ni Jesukristo. … Kon padayon kita nga magtinguha sa pagkat-on alang sa mas maayong pagserbisyo sa Dios ug sa Iyang mga anak, panalangin kini nga dako og bili. …
Ang Ginoo ug ang Iyang Simbahan kanunayng nag-awhag og edukasyon aron sa pagpalambo sa atong abilidad sa pagserbisyo Kaniya ug sa [Iyang] mga anak. Alang sa matag usa kanato, bisan unsa pa ang atong mga talento, Siya adunay buluhaton nga atong ikahatag. Ug ang maayong paghimo niini kanunay nga naglakip og pagkat-on, dili kausa o sulod sa limitado nga panahon, apan sa kanunay.
… Pinaagi sa pag-ampo, pagpuasa, ug pagkugi, uban sa tinguha nga makaserbisyo Kaniya, makalaum kita sa Iyang grasya nga moabut kanato. … [Kini] nagpasabut nga mas dali kitang makakat-on ug molambo sa kahanas lapas sa unsay ato lamang nga mahimo gamit ang atong natural nga mga abilidad. …
Ang atong unang prayoridad kinahanglang mao ang espirituhanong pagkat-on. … Interesado kamo sa edukasyon, dili lamang alang sa mortal nga kinabuhi kondili alang sa kinabuhing dayon. Kon klaro ninyong makita kana nga kamatuoran, ibutang ninyo pag-una ang espirituhanon nga pagkat-on ug dili ibaliwala ang sekyular nga pagkat-on. Gani, mas motrabaho pa mo og maayo sa inyong sekyular nga pagkat-on kay sa wala kanang espirituhanong panglantaw. …
… Ang Ginoo nasayud og unsay Iyang gusto nga angay ninyong buhaton ug unsay angay ninyong masayran sa pagbuhat niini. Kamo uban sa pagsalig makalaum nga Siya nag-andam og mga kahigayunan alang ninyo sa pagkat-on. …
Ang atong edukasyon kinahanglang dili gayud mohunong. … Ang tinuod nga kinabuhi nga atong gipangandaman mao ang kinabuhing dayon. … Ang atong kombiksyon mao nga ang Dios, ang atong Langitnong Amahan, gusto nga magpakabuhi kita sama sa Iyang pagpakabuhi. Ang tanang tinuod nga atong makat-unan samtang nia kita niining kinabuhia atong madala sa Pagkabanhaw. Ug ang tanan natong makat-unan makadugang sa atong kapasidad sa pagserbisyo. …
Ako nag-ampo nga kamo mobati nga kinahanglang magpasalamat sa Bantugang Magtutudlo, ang atong Manluluwas nga si Jesukristo. Ako nag-ampo nga inyong mabati ang talagsaong pag-alagad nga gilauman sa mapinanggaong Langitnong Amahan diha kaninyo nga ihatag ngadto sa Iyang mga anak ug unta kamo makakita sa mga oportunidad nga makakat-on nga Iyang giandam alang kaninyo. “Real-Life Education,” New Era, Abr. 2009, 2–8)
Balik sa pahina 85
Pagtuon ug ang mga Santos sa Ulahing mga Adlaw
Ipabasa kini og kusog sa usa ka sakop sa grupo samtang ang uban sa grupo magpraktis sa paghimo og mga notes diha sa pahina 86.
DALLIN H. OAKS UG KRISTEN M. OAKS
Isip mga Santos sa Ulahing mga Adlaw kita mituo sa edukasyon. … Ang atong relihiyusong pagtuo nagtudlo kanato nga kita kinahanglang magtinguha sa pagkat-on pinaagi sa Espiritu ug nga kita gitugyanan sa paggamit sa atong kahibalo alang sa kaayohan sa katawhan. … Ang Espiritu sa [Langitnong Amahan] makagiya ug makapakusog sa atong mga paningkamot sa pagkat-on ug sa pagpalambo sa atong abilidad sa pagtuhop sa kamatuoran. …
Ang atong mga paningkamot sa pagkat-on kinahanglan gayud nga sagulan og personal nga katakus aron kita makadawat sa giya sa Espiritu Santo. … Ang sala nag-abug palayo sa Espiritu sa Ginoo, ug kon kana mahitabo, ang espesyal nga pagdan-ag sa Espiritu mawagtang ug ang lampara sa pagkat-on moawup. …
… Kita adunay saad nga kon ang atong katuyoan usa ngadto sa himaya sa Dios, diin nag-apil sa personal nga katakus, ang atong “tibuok [lawas] mapuno sa kahayag, ug walay kangitngit dinhi [kanato]; ug kana nga lawas nga napuno sa kahayag makasabut sa tanan nga mga butang” (D&P 88:67). …
… Ang paghinulsol, nga makalimpyo kanato gikan sa sala pinaagi sa maulaong sakripisyo ni Jesukristo, mao gayud ang importanting lakang ngadto sa dalan sa pagkat-on alang sa tanan kinsa nagtinguha sa kahayag ug sa kamatuoran pinaagi sa gahum sa pagtudlo sa Espiritu Santo. …
Sa atong mga pagpili og edukasyon kita kinahanglang andam nga mosuporta sa atong kaugalingon ug niadtong kinsa tingali mahimo nga magsalig unya kanato. Gikinahanglan nga kita adunay mga kahanas nga mapanginabuhian. Ang edukasyon gikinahanglan gayud alang sa personal nga kasigurohan ug kaayohan.
Ang atong Langitnong Amahan naglaum kanato nga gamiton ang atong kabubut-on ug kadasig aron sa pagsusi sa atong mga kaugalingon ug sa atong mga abilidad ug sa pagpili sa kurso nga kinahanglan natong kuhaon. … Basaha ang inyong patriyarkal nga panalangin, hunahunaa ang inyong kinaiyanhong mga kahanas ug mga talento, ug padayon. Himoa ang unang lakang, ug ang mga pultahan moabli. … Uban sa Ginoo ang “matag usa ka butang nagabuhat alang sa [atong] kaayohan.” (Mga Taga-Roma 8:28). …
Tingali kita kinahanglan nga manlimbasog aron sa pagkab-ot sa atong mga tumong, apan ang atong mga panlimbasog mahimong mamunga ingon ka daghan sama sa atong pagkat-on. Ang mga kalig-on nga atong napalambo pinaagi sa pagbuntog sa mga hagit magauban kanato didto sa mga kahangturan nga moabut. …
Ang labing importante, kita adunay obligasyon sa pagpadayon sa atong espirituhanong edukasyon pinaagi sa pagtuon sa mga kasulatan ug mga literatura sa Simbahan ug pinaagi sa pag-adto sa Simbahan ug sa templo. Ang pagbusog diha sa mga pulong sa kinabuhi mopabuhong kanato, mopatubo sa atong abilidad sa pagtudlo niadto nga atong gihigugma, ug moandam kanato alang sa kinabuhing dayon.
Ang katapusang tumong sa edukasyon mao ang paghimo kanato nga mas maayong mga ginikanan ug mga sulugoon sa gingharian. … Ang edukasyon usa ka gasa gikan sa Dios; kini usa ka tukurang bato sa atong relihiyon kon ato kining gamiton alang sa kaayohan sa uban. (“Pagtuon ug mga Santos sa Ulahing mga Adlaw,” Liahona, Abr. 2009, 26–31)
Balik sa pahina 86