Mga Kapanguhaan

Espirituhanong Pagkaandam

Pagpuli-puli sa pagbasa sa mosunod.

JULIE B. BECK

Ang abilidad nga mahimong sarang, makadawat, ug makalihok sa personal nga pinadayag mao lamang ang labing importante nga kahanas nga mahimong maangkon niining kinabuhia. Ang pagkahimong sarang alang sa Espiritu sa Ginoo nagsugod sa usa ka tinguha alang niana nga Espiritu ug nagpakita og piho nga ang-ang sa katakus.

Ang pagsunod sa mga sugo, paghinulsol, ug pagbag-o sa mga pakigsaad nga gihimo atol sa bunyag nagdala ngadto sa panalangin sa pagbaton kanunay sa Espiritu sa Ginoo uban kanato [tan-awa sa D&P 20:77]. Ang paghimo ug pagtuman sa mga pakigsaad sa templo nagdugang usab og espirituhanon nga kalig-on ug gahum. …

Daghang mga tubag sa lisud nga mga pangutana ang makit-an pinaagi sa pagbasa sa mga kasulatan tungod kay ang mga kasulatan mao ang katabang sa pinadayag [tan-awa sa 2 Nephi 32:3]. Ang panabut nga makita diha sa kasulatan matigum sa katapusan, busa mahinungdanon nga mogahin og pipila ka oras sa mga kasulatan matag adlaw.

Ang matag adlaw nga pag-ampo mahinungdanon usab aron sa pagbaton sa Espiritu sa Ginoo uban kanato (tan-awa sa 3 Nephi 19:24–33). Kadtong kinsa tinuoray nga nagtinguha og panabang pinaagi sa pag-ampo ug pagtuon sa kasulatan kasagaran adunay tupad nga papel ug lapis aron isulat ang mga pangutana ug irekord ang mga impresyon ug mga ideya.

Ang pinadayag mahimong moabut matag oras ug matag gutlo samtang kita nagbuhat sa sakto nga mga butang. … Ang personal nga pinadayag naghatag kanato og pagsabut kon unsay angay nga buhaton matag adlaw aron sa pagpalambo sa pagtuo ug sa personal nga pagkamatarung, paglig-on sa mga pamilya ug sa mga panimalay, ug pagpangita niadtong kinsa nanginahanglan sa atong panabang. Tungod kay ang personal nga pinadayag usa ka bag-ohonon kanunay nga tinubdan sa kalig-on, kini posibleng bation nga gilibutan sa panabang bisan atol sa gubot nga mga panahon.

Gisultihan kita nga atong ibutang ang atong pagsalig diha niana nga Espiritu nga modala kanato “sa paghimo sa makiangayon, sa paglakaw nga mapainubsanon, sa paghukom nga matinud-anon” (D&P 11:12). Gisultihan usab kita nga kini nga Espiritu mohatag og kahayag sa atong mga hunahuna, nga mopuno sa atong mga kalag og hingpit nga kalipay, ug motabang kanato nga masayud sa tanang mga butang nga kinahanglan natong buhaton (tana-wa sa D&P 11:13–14).

Ang gisaad nga personal nga pagpadayag moabut kon kita mangayo niini, mangandam niini, ug magpadayon diha sa hugot nga pagtuo, mosalig nga ibu-bu kini ngari kanato. (“Ug Ibabaw sa mga Sulugoong Babaye Niadtong mga Adlawa Igabu-bu Ko ang Akong Espiritu,” Ensign o Liahona, Mayo 2010, 11.)

Balik sa pahina 101

Paningkamot sa Pagkat-on pinaagi sa Hugot nga Pagtuo

Basaha kini nga mensahe nga ikaw ra o kauban sa laing sakop sa grupo. Basaha ug markahi kini gamit ang mga ideya nga naa sa pahina 104. Ribyuha kini unya, sa moabut nga semana, ug sa sunod bulan. Kon mabuhat ninyo kini, inyong mahinumduman ang hapit tanan ninyong nakat-unan!

DAVID A. BEDNAR

Unsay ipasabut sa paningkamot sa pagkat-on pinaagi sa hugot nga pagtuo?

… Isip mga anak sa atong Langitnong Amahan, gipanalanginan kita sa gasa sa kabubut-on. … isip mga tigkat-on, kamo ug ako kinahanglan molihok ug motuman sa pulong. … Kamo ba ug ako mga tinugyanan kinsa molihok ug maningkamot sa pagkat-on pinaagi sa hugot nga pagtuo, o kita ba naghulat nga tudloan ug pagaaghaton? … Kitang tanan matinguhaon nga mipili sa pagpangayo, pagpaningkamot, ug pagpanuktok [tan-awa sa 3 Nephi 14:7].

… Ang pagkat-on pinaagi sa hugot nga pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. … Ang pagkat-on pinaagi sa hugot nga pagtuo nagkinahanglan “sa kasingkasing ug sa usa ka andam nga hunahuna” (D&P 64:34). Ang pagkat-on pinaagi sa hugot nga pagtuo mao ang resulta sa Espiritu Santo nga nagdala sa gahum sa pulong sa Dios ug paingon ug pasulod sa kasingkasing. Ang pagkat-on pinaagi sa hugot nga pagtuo dili mabalhin gikan sa magtutudlo ngadto sa estudyante … hinoon, ang usa ka estudyante kinahanglang mopakita og pagtuo ug molihok aron makaangkon og kahibalo alang sa iyang kaugalingon.

Ang batan-ong lalaki nga si Joseph Smith … nakasabut kon unsay gipasabut sa pagpaningkamot sa pagkat-on pinaagi sa hugot nga pagtuo. … Klaro nga iyang giandam ang iyang kaugalingon sa “pagpangayo uban sa pagtuo” [Santiago 1:6] ug sa paglihok. … Tan-awa nga ang mga pangutana ni Joseph gitumong dili lang sa unsa ang iyang angay mahibaloan apan kon unsa usab ang iyang gikinahanglang buhaton. … Ang iyang pag-ampo dili lamang kon hain nga simbahan ang tinuod. Ang iyang pangutana mao kon hain nga simbahan ang iyang apilan. Miadto si Joseph ngadto sa kakahoyan aron makat-on pinaagi sa hugot nga pagtuo. Determinado siya sa paglihok. …

Sa pagkatinuod, usa sa dakong mga hagit sa pagkamortal mao ang pagpaningkamot sa pagkat-on pinaagi sa hugot nga pagtuo. … Mitudlo si Joseph, “Ang labing maayong paagi nga makahibalo sa kamatuoran ug kaalam dili ang pagpangita niini gikan sa mga libro, apan sa pag-adto ngadto sa Dios pinaagi sa pag-ampo, ug makaangkon og balaan nga panudlo” [History of the Church, 4:425]. …

… Ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay. … Apan ang tubag nga atong nadiskobrehan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi. …

Ang responsibilidad sa pagpaningkamot pinaagi sa hugot nga pagtuo anaa sa matag usa kanato. … Ang pagkat-on pinaagi sa hugot nga pagtuo importante sa atong personal nga espirituhanong kalamboan ug alang sa pagtubo sa Simbahan. … Hinaut nga ang matag usa kanato tinud-anay nga gigutom ug giuhaw sa pagkamatarung ug mapuno sa Espiritu Santo [tan-awa sa 3 Nephi 12:6]—nga kita unta maningkamot sa pagkat-on pinaagi sa hugot nga pagtuo. (“Paningkamot sa Pagkat-on pinaagi sa Hugot nga Pagtuo,” Ensign, Sept. 2007, 63–68 o Liahona, Sept. 2007, 19–24)

Balik sa pahina 106

Kalihokan sa Panimalay: Andam na ba Kong Molampus sa Pag-eskwela?

Kinahanglan kitang mangandam nga molampus sa atong edukasyon o training. Kompletuha kini nga assessment sa inyong kaugalingon. Mahimo kang mohangyo sa uban sa paghatag sa ilang nahibaloan.

Butangi og numero atubangan sa matag pamahayag, mahimong 1, 2, o 3. 1 = nagkinahanglang mobuhat 2 = maayo 3 = maayo kaayo

Magsulat og mga ideya kon unsaon nga molambo dihang dapita.

Kinaugalingon nga Pagdasig. Makahimo ko mismo og lisud nga mga butang. Motrabaho ko matag adlaw nga walay tawo nga magsugo nako.
Mga paagi sa paglambo:
Desisyon sa Pagpanarbaho. Duna koy klaro nga tumong, ug committed ko nga mohuman og eskwela.
Mga paagi sa paglambo:
Tinguha sa Pagkat-on. Duna koy hilig sa pagkat-on, ug dili ko motugot sa mga hagit nga mobabag sa akong dalan.
Mga paagi sa paglambo:
Magplano. Ako ang moatiman sa akong kinabuhi. Planohon nako ang akong mga adlaw ug semana, ug tugutan nako nga motudlo nako ang Espiritu.
Mga paagi sa paglambo:
Suporta. Duna koy mga tawo sa akong palibut nga mosuporta nako, mogiya nako ug nahigugma nako. Kon wala, mangita ko og mga tawo nga makasuporta.
Mga paagi sa paglambo:
Pagdumala sa Kwarta. Makapangita ug makatigum ko og kwarta. Mobayad ko sa akong mga bayranan kon mo-due na kini, lakip ang pagbayad sa akong PEF loan. Mogasto ko kon pila ang akong kinitaan.
Mga paagi sa paglambo:

Unsa man ang inyong nakat-unan gikan niini nga kasinatian? Sa daklit ipakigbahin ang inyong mga ideya ngadto sa inyong pamilya o mga higala.