Ko Hono Kamataʻí—Taimi Lōloa Tahá: Miniti ʻe 20

Fai ha fua lotu.

Fakafeʻiloaki kimoutolu. Mou takitaha fakaʻaongaʻi ha miniti ʻe taha ke fakahā ho hingoá mo ha meʻa fekauʻaki mo koe.

ʻOku Talitali Lelei Kimoutolu ki Heʻetau Kulupu Moʻui Fakafalala Pē Kiate Kitá!

Laukonga:

Koeʻuhí ʻoku ʻofa hoʻo Tamai Hēvaní ʻiate koe, naʻá Ne fekauʻi mai Hono ʻAlo ko Sīsū Kalaisí ke fakamālohia koe ʻi ha faʻahinga tūkunga pē te ke fehangahangai mo ia ʻi he moʻuí.

ʻE tokoni atu e kulupu ko ʻení ke ke ako ha ngaahi taukei fakalaumālie mo mahuʻinga ke tokoniʻi kotoa kitautolu ke tau tokangaʻi lelei ange hotau sinó, ʻatamaí, ngaahi ongó, mo e ngaahi vā fetuʻutakí. ʻI hoʻo ʻalu ki he kalasi ko ʻení, ngāue mo e Tamai Hēvaní mo Sīsū Kalaisi ke ʻiloʻi e founga ke fakaʻaongaʻi ai e meʻa ʻokú ke akó ki hoʻo moʻuí mo e moʻui ʻo kinautolu ʻokú ke ʻofa aí. ʻE hoko e ngaahi fakataha ko ʻení ko ha feituʻu malu ki he fevahevaheʻaki tauʻatāiná he ʻoku muimui ʻa e kulupú ni ki he tefitoʻi moʻoni ʻo e ʻikai fakahāhāholó mo fakaʻaongaʻi ʻa e lea mo e ʻulungaanga ʻokú ne fakaafeʻi mai e Laumālié. ʻOku fakaafeʻi koe ke ke vahevahe ha ngaahi aʻusia fakataautaha; vahevahe ha ngaahi founga fakaleleiʻi kuó ke maʻu pe te ke fie ʻahiʻahiʻi, ʻo ʻikai tuku e tokangá ki he ngaahi palopalemá.

Laukonga:

Ko e kulupu ko ʻení ki he ngaahi taumuʻa fakaakó pē. ʻOku ʻikai ko ha faleʻi fakakulupu pe faitoʻo fakapalōfesinale ki he ngaahi palopalema fakaeʻatamaí. Kapau ʻokú ke tui kuo fuoloa hoʻo foua e ngaahi palopalema ʻo e kulukiatamakí, loto-mafasiá mo e loto-hohaʻá, ʻitá, maʻunimaá, pe ngaahi palopalema kehe fakaeʻatamaí, ʻoku totonu ke ke fekumi ki ha tokoni fakapalōfesinale.

ʻOku Founga Fēfē e Ngāue ʻa e Kulupú?

Laukonga:

ʻOku ngāue e ngaahi kulupu moʻui fakafalala pē kiate kitá ʻo tatau mo ha fakataha alēlea. ʻOku ʻikai ke ʻi ai ha faiako ia pe mataotao. Ka, te ke muimui pē ki he ngaahi naunaú ʻo hangē ko hono tohí. ʻOku feʻunga e fakataha fakakulupu kotoa pē mo e miniti ʻe 90 ki he 120. ʻE tokoni hoʻo malava ke fetuʻutaki mo e niʻihi kehé ke ke ongoʻi ai e Laumālié pea matuʻuaki fakaeloto lahi ange. ʻI he fakahinohino ʻa e Laumālié, te mou fetokoniʻaki:

• ʻAi e tokoni ki he ngaahi fealēleaʻakí mo e ʻekitivitií ke hōhoa tatau. ʻOku ʻikai totonu ke maʻu pē ʻe ha tokotaha ʻa e taimí ʻi he pōtalanoá, tautautefito ki he tokotaha tokoní.

• Tauhi pē ki he taimi ne tuku mai ki he feʻinasiʻakí.

• Feʻofaʻaki mo fepoupouaki. Fakahaaʻi hoʻo mahuʻingaʻiá, fai ha ngaahi fehuʻi, pea fakaʻapaʻapaʻi e ngaahi ongo ʻa e niʻihi kehé.

• Vahevahe ha ngaahi fakamatala lelei mo ʻaonga; fakaʻehiʻehi mei hono tuku atu ha ngaahi fakamatala ʻoku fuʻu fakaikiikí.

• Fakahoko mo tauhi e ngaahi tukupaá.

Mamata ʻi he:

“My Self-Reliance Group,” ʻoku lava ke maʻu ʻi he https://churchofjesuschrist.org/study/video/self-reliance-videos [4:01]. (ʻIkai ha vitiō? Lau ʻa e konga ko ʻení, “Ka ʻIkai ha Faiako, ʻE Anga Fēfē ʻEtau ʻIloʻi e Meʻa ke Faí?”)

Aleaʻi:

Ko e hā naʻá ne ʻai e kulupu ʻi he vitioó ke lavameʻá? Ko e hā te tau fakahoko fakakulupu ke malava lahi ange ai ʻo maʻu ha aʻusia liliu moʻui?

Ka ʻikai ha Faiako, ʻE Anga Fēfē ʻEtau ʻIloʻi e Meʻa ke Faí?

Laukonga:

ʻOku faingofua pē. Muimui pē ki he naunaú. ʻOku konga ʻe nima e vahe kotoa pē ʻi he tohi ngāué:

Lipooti: Fakamatalaʻi e fakalakalaka naʻá ke aʻusia he lolotonga ʻo e uiké ʻi hoʻo ngaahi tukupaá.

Ko Hoku Fakavaʻé: Toe fakamanatu ha tefitoʻi moʻoni ʻo e ongoongoleleí ʻe iku ki ha moʻui fakafalala fakalaumālie lahi ange.

Akó: Ako fakahoko ha ngaahi pōtoʻi ngāue ʻe iku ki ha tuʻunga moʻui fakafalala fakatuʻasino lahi ange.

Fakalaulauloto: Fakafanongo ki ha tataki fakalaumālie mei he Laumālie Māʻoniʻoní ki he founga te ke ngāueʻi ai e meʻa naʻá ke akó.

Tukupā: Palōmesi te ke ngāueʻi he lolotonga ʻo e uiké e ngaahi tukupā ʻe tokoni ki hoʻo fakalakalaká. Te ke toe vahevahe mo e fāmilí pe ngaahi kaungāmeʻá e meʻa naʻá ke ako mei he fakataha ʻa e kulupu takitaha.

Founga Hono Fakaʻaongaʻi ʻo e Tohi Ngāue ko ʻEní

ʻI Hoʻo Vakai ki he Ngaahi Meʻá Ni, Muimui ki he Ngaahi Fakahinohino ko ʻEní.

Lau	Mamataʻi	Aleaʻi	Fakalaulauloto	ʻEkitivitī
Lau Lau leʻolahi ʻe ha taha maʻá e kulupú fakakātoa.	Mamataʻi Mamataʻi ʻe he kulupú kotoa ʻa e foʻi vitioó.	Aleaʻi Fevahevaheʻaki ʻe he kau mēmipa ʻo e kulupú ʻa e ngaahi fakakaukaú ʻi ha miniti ʻe ua ki he fā.	Fakalaulauloto Fakakaukauʻi, fakalaulauloto, mo tohi fakafoʻituitui ʻi ha miniti ʻe ua ki he tolu.	ʻEkitivitī Ngāue fakafoʻituitui e kau mēmipa ʻo e kulupú pe mo ha niʻihi kehe, ʻi ha vahaʻataimi pau.

Laukonga:

Neongo ʻoku faʻa fakaʻaongaʻi e tohi lēsoni ko ʻení ʻi he ngaahi kulupu moʻui fakafalala pē kiate kinautolu ʻoku fokotuʻutuʻu ʻe ha siteiki pe uooti, ka ʻe toe lava pē ke fakaʻaongaʻi ia ʻi ha faʻahinga taimi pē mo e fāmilí, kaungāmeʻá, pe kaungāʻapi ʻoku nau loto ke vakaiʻi fakataha iá.

Laukonga:

Manatuʻi ʻoku ʻikai ke fakahāhāholo e meʻa ʻoku vahevahe he ngaahi fakataha fakakulupú. Ko e ngaahi fakakaukau ʻoku fakahaaʻi ʻi heʻetau kulupú ko ha fakakaukau fakafoʻituitui pē ia pea ʻoku ʻikai ke nau fakafofongaʻi e ngaahi fakakaukau pe tokāteline ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.