“2: Ko Hoku Fakavaʻé: Ko Hotau Tuʻunga mo e Taumuʻa Fakalangí,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó (2020)
“2: Ko Hoku Fakavaʻé: Ko Hotau Tuʻunga mo e Taumuʻa Fakalangí,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó
Ko Hoku Fakavaʻé: Ko Hotau Tuʻunga mo e Taumuʻa Fakalangí—Taimi Lōloa Tahá: Miniti ʻe 20
Fakalaulauloto:
Ko e hā e mahuʻinga ʻo hoku laumālié ki he ʻOtuá?
Laukonga:
“Manatu, ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá; he vakai, naʻe kātakiʻi ʻe he ʻEikí ko homo Huhuʻí ʻa e mate ʻi he kakanó; ko ia, naʻá ne kātakiʻi ai ʻa e mamahi ʻa e kakai kotoa pē, koeʻuhí ke lava ʻa e kakai kotoa pē ʻo fakatomala pea haʻu kiate ia” (Tokāteline mo e Ngaahi Fuakava 18:10–11).
Mamata ʻi he:
“Our True Identity,” ʻoku maʻu ʻi he https://churchofjesuschrist.org/study/video/self-reliance-videos [3:39]. (ʻIkai ha vitiō? Lau ʻa e fakamatala ki he “Ko Hotau Tuʻunga Moʻoní.”)
Ko Hotau Tuʻunga Moʻoní
Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.
Palesiteni Dieter F. Uchtdorf:
ʻOku tupu e lahi ʻo e puputuʻú he moʻui ní mei he ʻikai ke tau ʻiloʻi pe ko hai kitautolú.
Ko e taha ʻo e kau faʻu talanoa ʻofeina taha ʻo e kuongá ʻa e tangata faʻu tohi mei Tenimaʻake ko Hānisi Kalisitiane ʻEnitasení. ʻI he taha ʻo ʻene ngaahi talanoa, “Ko e Pato Palakuú,” ne ʻilo ai ʻe ha motuʻaʻi pato ʻoku fuʻu lahi makehe mo palakū ʻaupito ha taha ʻo hono fanga kiʻi ʻuhiki ne toki fofoaʻí. Ne ngaohi koviʻi ʻe he fanga kiʻi ʻuhikiʻi pato kehé ʻa e kiʻi pato palakuú. ʻOku nau fakamamahiʻi tavale ia.
ʻOku fakakaukau e kiʻi pato palakuú ʻe sai ange haʻane mavahe mei hono fāmilí, pea naʻá ne hola leva. ʻI ha ʻaho ʻe taha, naʻá ne sio ki ha puna hake ha fanga manupuna fakaʻeiʻeiki. ʻOkú ne puna ʻo muimuiʻi kinautolu ki ha anovai fakaʻofoʻofa. ʻOku sio hifo e kiʻi pato palakuú ki he loto vaí ʻo sio ki ha ʻata ʻo ha suani fakaʻofoʻofa. Naʻe fakatokangaʻi ʻe he kiʻi pato palakuú ko hono ʻata ia ʻoʻoná! Kuó ne ʻiloʻi ko hai moʻoni ia.
Fakakaukau ki he feituʻu naʻá ke haʻu mei aí. Ko e ngaahi foha mo e ngaahi ʻofefine kimoutolu ʻo e tokotaha maʻongoʻonga mo nāunauʻia taha ʻi he ʻunivēsí. ʻOkú Ne ʻofa ʻiate koe, ʻaki ha ʻofa taʻengata. ʻOkú Ne finangalo ke ke maʻu e lelei tahá. ʻOku liliu ʻe he foʻi ʻilo ko ʻení ʻa e meʻa kotoa pē. ʻOkú ne liliu hoʻo tuʻunga lolotongá. Te ne lava ʻo liliu ho kahaʻú. Pea te ne lava ʻo liliu ʻa e māmaní.
Kapau pē ʻe mahino kiate kitautolu pe ko hai kitautolu mo e meʻa kuo teuteuʻi maʻatautolú, ʻe fonu hotau lotó he fakamālō mo e fiefia ʻo ne fakamāmaaʻi e faingataʻa fakamamahi tahá ʻaki e maama mo e ʻofa ʻa e ʻOtuá.
ʻE ʻi ai maʻu pē ha leʻo te ne tala atu ʻoku mou vale ke tui ko ha fanga suani kimoutolu, mo kikihi pē ko ha fanga kiʻi pato palakū kimoutolu pea ke ʻoua naʻa mou fakakaukau te mou toe hoko ko ha meʻa kehe. Ka ʻokú ke ʻiloʻi lahi ange. ʻOku ʻikai ko ha taha noaʻia pē koe. ʻOkú ke nāunauʻia mo taʻengata.
ʻOku ou kole atu—sio ki he vaí ke ke ʻiloʻi ai ho ʻata totonú! Ko ʻeku fakaʻānauá mo e tāpuakí ko e taimi te ke vakai ai ki ho ʻatá, te ke lava ʻo sio ʻo mavahe atu mei he ngaahi tōnounoú mo e veiveiuá mo fakatokangaʻi pe ko hai moʻoni koe: ko ha ngaahi foha mo ha ngaahi ʻofefine nāunauʻia ʻo e ʻOtua Māfimafí. ʻI he huafa toputapu ʻo Sīsū Kalaisí, ʻēmeni.
Laukonga:
Ko ha ngaahi lea ʻeni ʻa e kau taki ʻo e Siasí:
“Ko e fānau koe ʻa e ʻOtuá. Ko e Tamai Ia ho laumālié. Kuo fāʻeleʻi fakalaumālie koe ki ha hako fakaʻeiʻeiki, ko e hako ʻo e Tuʻi ʻo e Langí. Fokotuʻu maʻu e foʻi moʻoni ko iá ʻi ho ʻatamaí pea puke ia” (Boyd K. Packer, “To Young Women and Men,” Ensign, May 1989, 54).
“Tokanga ki he anga hoʻo fakafōtungá. ʻOua te ke fakafōtunga pe fakahā koe ʻaki ha ʻulungaanga fakataimi pē. Ko e ʻulungaanga mahuʻinga taha ʻoku totonu ke ne fakafōtungaʻi kitautolú ko e foha pē ʻofefine kitautolu ʻo e ʻOtuá. ʻOku hulu ange ʻa e moʻoniʻi meʻa ko iá ʻi he ngaahi ʻulungaanga kotoa pē, kau ai ʻa e faʻahingá, lakangá, ngaahi ʻulungaanga fakatuʻasinó, ngaahi lāngilangí, naʻa mo e tui fakalotu ʻoku tau kau ki aí” (Dallin H. Oaks, “How to Define Yourself,” New Era, June 2013, 48).
“ʻOkú ke makehe. ʻOku mahulu hake ʻa e poto taʻengata ʻokú ke maʻú, ʻa ia ʻoku malava ai ke ke maʻu ʻa e moʻui taʻengatá.
“ʻOua naʻá ke teitei fehuʻia ho mahuʻinga fakafoʻituituí. Ko e taumuʻa kakato e palani ʻo e ongoongoleleí ko hano ʻomi ha faingamālie maʻamoutolu kotoa ke mou aʻusia ai ʻa e lelei taha te mou malavá, ʻa ia ko e fakalakalaka taʻengatá mo e tuʻunga faka-ʻOtuá” (Spencer W. Kimball, “Privileges and Responsibilities of Sisters,” Ensign, Nov. 1978, 105).
Aleaʻi:
Ko e hā ʻoku fuʻu mahuʻinga ai ke tau manatuʻi hotau tuʻunga totonú mo e ivi malavá?
Laukonga:
“He ʻikai ke tau lava ʻo tala e mahuʻinga ʻo ha laumālie, ʻo tatau mo e ʻikai ke tau lava ʻo fua e lahi ʻo e ʻunivēsí. ʻOku mahuʻinga e tokotaha kotoa pē ʻoku tau fetaulakí ki heʻetau Tamai Hēvaní. Ka mahino ia, ʻe mahino leva e anga ʻoku tonu ke tau fai ki hotau kāingá” (Dieter F. Uchtdorf, “Ko Hoku Ongo Nimá Kimoutolu,” Liahona, Mē 2010, 69).
Aleaʻi:
Ko e hā ʻoku mahuʻinga ai ke vakai ki he niʻihi kehé ʻo tatau mo e anga e ʻafio mai ʻa e ʻOtuá kiate kinautolú? Te tau lava fēfē ʻo fakatupulaki e meʻa-foaki fakalaumālie ko ʻení?
Tukupā:
Te u fakahā atu ha founga ʻe taha te u manatuʻi ai hoku tuʻunga fakalangí he uiké ni.