Pōpoaki mei he Kau Palesitenisī ʻUluakí

Siʻi Kāinga ʻOfeina:

Kuo fakahā ʻe he ʻEikí, “Ko ʻeku taumuʻá ke tauhi ʻa ʻeku kau māʻoniʻoní” (Tokāteline mo e Ngaahi Fuakava 104:15). Ko e fakahā ko ʻení ko ha talaʻofa ia mei he ʻEikí te Ne ʻomi ha ngaahi tāpuaki mo fakaava e matapā ʻo e moʻui fakafalala pē kiate kitá, ʻa ia ko e malava ke tau maʻu e ngaahi fiemaʻu ʻo e moʻuí maʻatautolu mo e kau mēmipa hotau fāmilí.

Kuo teuteu ʻa e kiʻi tohi ngāué ni ke tokoniʻi e kau mēmipa ʻo e Siasí ke nau ʻilo mo moʻui ʻaki e ngaahi tefitoʻi moʻoni ʻo e tuí, akó, ngāue mālohí, mo falala ki he ʻEikí. ʻI haʻo tali mo moʻui ʻaki e ngaahi tefitoʻi moʻoni ko ʻení te ke lava lelei ange ai ke maʻu e mālohi kuo talaʻofa mai ʻe he ʻEikí.

ʻOku mau fakaafeʻi koe ke ke ako faivelenga pea mo fakaʻaongaʻi ʻa e ngaahi tefitoʻi moʻoni ko ʻení pea mo akoʻi kinautolu ki he kau mēmipa hoʻo fāmilí. ʻI hoʻo fai iá, ʻe faitāpuekina ai hoʻo moʻuí. Te ke ako ʻa e founga ke ngāue ai ʻi ho hala ki he moʻui fakafalala lahi ange kiate kitá. ʻE tāpuakiʻi koe ʻaki ha ʻamanaki lelei, nonga, mo ha fakalakalaka lahi ange.

Kātaki ʻo ʻiloʻi fakapapau ko e fānau koe ʻa ʻetau Tamai ʻi Hēvaní. ʻOkú Ne ʻofa ʻiate koe pea he ʻikai teitei liʻaki koe. ʻOkú Ne ʻafioʻi koe pea mo mateuteu ke ʻoatu e ngaahi tāpuaki fakalaumālie mo fakatuʻasino ʻo e moʻui fakafalala pē kiate kitá.

Fakaʻapaʻapa Atu,

Kau Palesitenisī ʻUluakí