“7: Ko Hoku Fakavaʻé: Fakahaaʻi e Angatonú,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó (2020)
“7: Ko Hoku Fakavaʻé: Fakahaaʻi e Angatonú,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó
Ko Hoku Fakavaʻé: Fakahaaʻi ʻo e Angatonú—Taimi Lōloa Tahá: Miniti ʻe 20
Fakalaulauloto:
Ko e hā ʻoku ʻofa ai ʻa e ʻEikí ʻiate kinautolu ʻoku “angatonu honau lotó” (Tokāteline mo e Ngaahi Fuakava 124:15)?
Mamata ʻi he:
“What Shall a Man Give in Exchange for His Soul?” ʻoku maʻu ʻi he https://churchofjesuschrist.org/study/video/self-reliance-videos. (ʻIkai ha vitiō? Lau ʻa e fakamatala ki he “Ko e hā ʻe Foaki ʻe ha Tangata ke Fetongi ʻaki Hono Laumālié?”)
Ko e hā ʻe Foaki ʻe ha Tangata ke Fetongi ʻaki Hono Laumālié?
Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.
ʻEletā Robert C. Gay:
Naʻe fai ange ʻe he Fakamoʻuí ki Heʻene kau ākongá ʻa e fehuʻi ko ʻení: “Ko e hā ʻe foaki ʻe ha tangata ke fetongi ʻaki hono laumālié?”
Ko ha fehuʻi ʻeni naʻe akoʻi mai heʻeku tamaí ke u fakakaukauʻi lelei he ngaahi taʻu lahi kuohilí. ʻI heʻeku tupu haké, ne tuku mai heʻeku ongomātuʻá ha fanga kiʻi ngāue ʻi ʻapi pea totongi e ngāue ko iá. Naʻá ku faʻa ngāue ʻaki e paʻanga ko iá, ne laka siʻi hake pē he sēniti ʻe 50 he uike, ke ʻalu ki he heleʻuhilá. Ko e taimi ko iá naʻe sēniti pē ʻe 25 ha taha taʻu 11. Naʻe toe heni haʻaku sēniti ʻe 25 ke fakatau ʻaki ha lole, he naʻe sēniti ʻe 5 ki he taha. Heleʻuhila mo e foʻi lole [ʻe nima]! He ʻikai lava ʻo toe lelei ange ai.
Naʻe lelei ʻa e meʻa kotoa kae tālunga e hoko hoku taʻu 12. Lolotonga ʻeku tuʻu laine ʻi ha efiafi ʻe taha, kuó u fakatokangaʻi ko e totongi ʻo e tikite ki he taʻu 12 kuo sēniti ʻe 35, ʻa ia ʻe siʻi ʻaki heni ha foʻi lole ʻe ua. ʻI he ʻikai ke u mateuteu ke fai e feilaulau ko ʻení, ne u kumi ʻuhinga ai, “ʻOkú ke hā tatau pē ʻo hangē ko e uike kuo ʻosí.” Naʻá ku laka atu leva ʻo kole haʻaku tikite sēniti ʻe 25. Naʻe ʻikai toe fehuʻia ʻe he tokotaha tali totongí pea ne u kumi ʻa ʻeku foʻi lole ʻe nima angamahení kae ʻikai ko e tolu pē.
ʻI heʻeku fiefia he meʻa ne u lavá, ne u fakavavevave kimui ange ai ki ʻapi ke tala ki heʻeku tangataʻeikí ʻa e meʻa lahi ne u lavaʻí. Naʻe ʻikai lea ia ʻi heʻeku fakamatala atu hono fakaikiikí. Pea ʻi heʻeku ʻosí, ne sio mai pē ia pea pehē mai, “Foha, te ke fakatau atu ho laumālié ʻaki ha sēniti ʻe nima?” Ne ongo ʻaupito ʻene leá ki hoku loto taʻu 12. Ko ha lēsoni ia kuo ʻikai toe ngalo ʻiate au.
(“Ko e Hā ʻe Foaki ʻe ha Tangata ke Fetongi ʻAki Hono Laumālié?” Liahona, Nōv. 2012, 34)
Aleaʻi:
ʻOku ʻuhinga ki he hā ke angatonu? Ko e hā ha fanga kiʻi founga ʻoku foaki ai ʻe he kakaí honau laumālié ke maʻu ha ngaahi meʻa ʻi he moʻui ko ʻení?
Laukonga:
“ʻOku mau tui ʻoku totonu ke faitotonu (Ngaahi Tefito ʻo e Tuí 1:13).
“Te u mate pē ka ʻe ʻikai te u tukuange ʻeku angatonú meiate au” (Siope 27:5).
Laukonga:
Ko e potufolofola mo e lea ko ʻení ʻa ʻEletā Uefilini:
“Pea ʻoku ou loto ke mou manatu, ʻilonga ia ʻiate kimoutolu ʻoku kole mei hono kaungāʻapí ʻoku totonu ke ne fakafoki ʻa e meʻa ʻokú ne kolé, ʻo fakatatau mo e alea naʻá ne faí, ka ʻikai te ke fai angahala ai; pea mahalo te ke fakatupu foki ha fai angahala ai ʻa ho kaungāʻapí” (Mōsaia 4:28).
“ʻOku ʻuhinga ʻa e angatonú ke fakahoko maʻu pē ʻa e meʻa ʻoku totonu mo leleí, tatau ai pē pe ko e hā hono ngaahi nunuʻá. ʻOku ʻuhinga ia ke angamāʻoniʻoni ʻo kamata mei he takele ʻo hotau lotó, ʻo ʻikai ngata pē ʻi heʻetau ngaahi ngāué, kae mahuʻinga tahá, ʻi heʻetau ngaahi fakakaukaú pea ʻi hotau lotó. … Ko e kiʻi loí, kiʻi kākaá, pe kiʻi talanoa taʻetotonu ke tau ngali leleí ʻoku ʻikai tali ia ʻe he ʻEikí. … Ko e pale taupotu taha ʻo e angatonú ko e hoko ʻa e Laumālie Māʻoniʻoní ko e takaua maʻu peé. … ʻI heʻetau fai ʻa ia ʻoku totonú, te ne lava ʻo feʻao mo kitautolu pea tataki kitautolu ʻi he meʻa kotoa pē ʻoku tau faí” (Joseph B. Wirthlin, “Personal Integrity,” Ensign, May 1990, 30, 32–33).
Aleaʻi:
Ko e hā ʻoku fiemaʻu ai ʻa e faitotonú ke hoko ʻo matuʻuaki fakaeloto lahi angé?
Tukupā:
Te u faitotonu ange ʻi ha taha ʻo e ngaahi ʻēlia ʻe hiva naʻá ku fakamaaka ʻi ʻolungá.