Ngaahi Maʻuʻanga Tokoní

Ko Hono Maʻu e Tokoni Fakapalōfesinale Totonú

ʻI he taimi ʻokú ke fili ai ke fekumi ki ha tokoni fakapalōfesinalé, fakatokangaʻi ʻokú ke hoko ko ha konisiuma ki ha ngāue pea ʻokú ke maʻu e totonu ke ʻeke ha ngaahi fehuʻi. Fakakaukau ke kumi ha tokotaha fakapalōfesinale ʻokú ne maʻu e ngaahi ʻulungaanga ko ʻení:

• Maʻu ha mahino mo fakaʻapaʻapaʻi ho ngaahi tuʻunga ʻulungaanga mahuʻingá. ʻI he taimi ʻokú ke fili ai ke kumi tokoní, te ke tokoni ai ke fakapapauʻi e ngaahi ola ʻoku fiemaʻú. Kumi ha tokotaha fakapalōfesinale ʻokú ne fakaʻapaʻapaʻi ʻa e malava ʻe he kasitomaá ke fili maʻaná, pe ko hoʻo malava ke fili ʻa e meʻa ʻokú ke loto ke maʻu mei he talatalaifalé, faitoʻó, pe ko e ngaahi founga kehe ʻo e tokoní.

• Te ne lava ʻo fakamatalaʻi ʻene akó mo e aʻusiá pea mo e anga ʻene fekauʻaki mo hoʻo ngaahi fiemaʻú. ʻOku kau ʻi he kau palōfesinale ʻe niʻihi ha kau faifaleʻi kuo laiseni ki he nofo-malí mo e fāmilí, kau ngāue kuo laiseni ke ngāue kilīniki fakasōsiale, kau mataotao fakafaitoʻo ki he ʻatamaí, kau faifaleʻi ki he ʻatamaí, kau faifaleʻi fakapalōfesinalé, mo e alā meʻa pehē.

• ʻOkú ne maʻu e ngaahi sēsini ʻoku feʻunga kiate koé. Fakakaukau ki he lōloa, totongi, mo e tuʻo lahi ʻo e fakataha takitaha mo ha ngaahi meʻa kehe ʻi hoʻo fakakaukauʻi e meʻa ʻoku feʻunga mo hoʻo ngaahi fiemaʻú.

• ʻOku loto-fiemālie ke talanoa mo hono taki faka-Siasí ki heʻene fakalakalaká, kapau te ke loto ki ai. ʻOku kau heni hono ʻoatu ha ngaahi fokotuʻu ki he founga te ne lava ai mo ho takí ʻo fengāueʻaki fakataha ke tokoniʻi koé.

Ngaahi Taumuʻá, Monūʻiá, mo e Fakatuʻutāmakí

ʻOku ngalingali te ke lavaʻi lelei hoʻo ngaahi taumuʻá ʻi he taimi ʻe mahino ai kiate koe ʻa e natula mo e ngaahi fakangatangata ʻo e faifaleʻí. ʻOku fakataumuʻa ʻa e faifaleʻí ke tokoniʻi koe ke ke ako ʻa e founga ke mahino mo tākiekina ai hoʻo ngaahi fakakaukaú, ongó, mo e ʻulungāngá. ʻOku aʻusia ʻe ha kakai tokolahi ʻa e fakalakalaká pe fakaleleiʻi ʻenau ngaahi hohaʻá ʻo fakafou ʻi he faifaleʻí. Ko e taupotu tahá, ʻe mahuʻinga hono fokotuʻu ha vā fetuʻutaki ʻo e falalá ki he fakalakalaka ʻi he faifaleʻí. Tokanga ki he meʻa te ke fuofua ongoʻí ʻi hoʻo talanoa mo e tokotaha palōfesinalé. Falala kiate koe mo hoʻo fakakaukau fakapotopotó ʻi hoʻo fekumi ki ha taha ʻe feʻunga lelei mo hoʻo ngaahi fiemaʻú mo e tōʻongá. Kapau ʻoku ʻikai te ke ongoʻi fiemālie, hokohoko atu pē hoʻo fekumí. Neongo he ʻikai lava ke fakapapauʻi e ngaahi ola ʻo e faifaleʻí, ka ʻe hanga ʻe hoʻo loto ʻaki e founga ngāué ʻo tākiekina lahi ʻa ʻene ʻaonga kiate koé.