Fakalaulauloto—Taimi Lōloa Tahá: Miniti ʻe 5

Fakakaukau fakafoʻituitui ki he meʻa kuó ke ako he ʻaho ní mo fakakaukau pe ko e hā ha meʻa ʻe finangalo e ʻEikí ke ke faí. Lau ʻa e potufolofolá pea hiki hoʻo tali ki he ngaahi fehuʻi ʻi laló.

“Pea ko e kāingalotu kotoa pē ʻoku nau manatu ke tauhi mo fai ki he ngaahi talá ni, ʻo ʻaʻeva ʻi he talangofua ki he ngaahi fekaú, te nau maʻu ʻa e moʻui lelei ki honau pitó mo e uho ki honau ngaahi huí; pea te nau maʻu ʻa e poto mo e ngaahi fuʻu koloa mahuʻinga ʻo e ʻiló, ʻio, ʻa e ngaahi koloa mahuʻinga fufū; pea te nau lele kae ʻikai ongosia, pea ʻalu ʻo ʻikai pongia. Pea ko au, ko e ʻEikí, ʻoku ou fai ha talaʻofa kiate kinautolu, ʻe laka ʻa e ʻāngelo fakaʻauhá ʻiate kinautolu ʻo ʻikai tāmateʻi ʻa kinautolu, ʻo hangē ko e fānau ʻa ʻIsilelí. ʻĒmeni” (Tokāteline mo e Ngaahi Fuakava 89:18–21).

Ko e hā e ngaahi meʻa mahuʻinga taha kuó u ako he ʻaho ní?

Ko e hā ha meʻa pē ʻe taha te u fai koeʻuhi ko e meʻa ne u ako he ʻaho ní? (ʻE lava ke hoko ʻeni ko hoʻo tukupā fakataautaha ki he uiké. Kapau he ʻikai te ke lava ʻo fakakaukau ki ha tukupā, ʻoku hiki atu ʻi lalo ha ngaahi fakakaukau ʻe niʻihi.)

Ngaahi Fakakaukau ki he Tukupaá:

• Muimui ki ha palani fakamālohisino.

• Maʻu ha mālōlō mo ha mohe feʻunga ange.

• Ako ʻa e moʻui haisini fakatāutahá.

• Talanoa ki ha kaungāmeʻa pe mēmipa ʻo e fāmilí fekauʻaki mo ʻeku founga maʻu meʻatokoní.