Ko Hoku Fakavaʻé: Ngāue ʻaki ʻa e Tui kia Sīsū Kalaisí—Taimi Lōloa Tahá: Miniti ʻe 20

Fakalaulauloto:

Fehuʻi pē kiate koe, “ʻOku tokoni fēfē ʻeku tui kia Sīsū Kalaisí ke u matuʻuaki ai e ngaahi taimi faingataʻá?”

Mamata ʻi he:

“Exercise Faith in Jesus Christ,” ʻoku maʻu ʻi he https://churchofjesuschrist.org/study/video/self-reliance-videos [1:43]. (ʻIkai ha vitiō? Lau e fakamatala ki he “Ngāue ʻaki ʻa e Tui kia Sīsū Kalaisí.”)

Ngāue ʻaki ʻa e Tui kia Sīsū Kalaisí

Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.

ʻEletā David A. Bednar:

Ko e ngāué ko hono fakahaaʻi ia ʻo e tuí. ʻOku fua ʻe he fānau ʻo ʻIsilelí ʻa e puha ʻo e fuakavá. Ko ʻenau aʻu ki he Vaitafe Soataní. Ko e talaʻofá te nau kolosi he fonua mōmoá. ʻE mavaeua fakakū ʻa e vaí? ʻI he taimi ʻe viviku ai honau vaʻé. Ne nau hifo atu ki he vaí—ngāue. Ne hoko mai e mālohí—ʻo mavaeua ʻa e vaí.

ʻOku tau faʻa tui he taimi ʻe niʻihi, “Te u maʻu e mahino haohaoa ko ʻení pea te u liliu ia ki heʻeku meʻa ʻe faí.” ʻOku ou fokotuʻu atu kuo feʻunga ia ke tau kamata ʻaki. Kuo tau ʻiloʻi ʻetau taumuʻá. Ko e tuí ko ha tefitoʻi moʻoni—ko e tefitoʻi moʻoni—ʻo e ngāué mo e mālohí. ʻOku fakataumuʻa ʻa e tui moʻoní ki he ʻEiki ko Sīsū Kalaisí pea ʻoku iku maʻu pē ia ki he ngāué.

(Vakai ki he “Seek Learning by Faith” [address to Church Educational System religious educators, Feb. 3, 2006], ChurchofJesusChrist.org/media-library.)

Laukonga:

Ko e potufolofola mo e ngaahi fakamatala ko ʻení naʻe fai ʻe he kau taki ʻo e Siasí:

“Pea kuo teʻeki ai foki ke ʻi ai ha taimi kuo fai ai ʻe he taha ha mana ka ʻi he hili pē ʻenau tuí; ko ia, naʻa nau tomuʻa tui ki he ʻAlo ʻo e ʻOtuá” (ʻEta 12:18).

“ʻOku kau ʻi he tui ki he ʻOtuá ʻa e tui ki Heʻene ngaahi taumuʻá kae pehē ki Heʻene taimí. He ʻikai lava ke tau tali kakato Ia lolotonga iá ʻoku tau fakasītuʻaʻi ʻEne ngaahi fokotuʻutuʻú” (Neal A. Maxwell, That Ye May Believe [Salt Lake City: Bookcraft, 1992], 84).

“ʻOku fakaivia kitautolu ʻe he tui kia Sīsū Kalaisí ke tau fai ha ngaahi meʻa naʻe ʻikai ke tau mei fai. ʻOku ʻomi ʻe he tui ʻokú ne fakaʻaiʻai kitautolú, ha faingamālie lahi ange ke maʻu Hono mālohí. ʻOku tau toe fakatupulaki foki e mālohi ʻo e Fakamoʻuí ʻi heʻetau moʻuí ʻi he taimi ʻoku tau fai ai e ngaahi fuakava toputapú mo fai pau ki he ngaahi fuakava ko iá. ʻOku haʻi kitautolu ʻe heʻetau ngaahi fuakavá, kiate Ia mo ʻomi ha mālohi faka-ʻOtua” (Russell M. Nelson, “Ko Hono Tohoakiʻi Mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 41).

“Te tau kei fiefia pē neongo ko ha ʻaho, uike, pe ko ha taʻu ne fakamamahi!

“Siʻoku kāinga ʻofeina, ʻoku siʻi ha kaunga e fiefia ʻoku tau maʻú, ki he tūkunga ʻetau moʻuí mo e meʻa ʻoku tukutaha ai ʻetau tokangá.

“ʻI hono tukutaha ʻetau tokangá ʻi he palani ʻa e ʻOtuá ki he fakamoʻuí … pea mo Sīsū Kalaisi mo ʻEne ongoongoleleí, te tau lava ʻo ongoʻi fiefia ʻo tatau ai pē pe ko e hā e meʻa ʻoku hoko—pe ʻikai ke hoko—ʻi heʻetau moʻuí. ʻOku maʻu ʻa e fiefiá meiate Ia. Ko Ia e tupuʻanga ʻo e fiefia kotoa pē” (Russell M. Nelson, “Fiefiá mo e Moʻui Fakalaumālié,” Liahona, Nōvema 2016, 82).

Aleaʻi:

Ko e hā ʻoku mahuʻinga ai e tuí ki hono tokoniʻi fakatuʻasino, fakaeloto mo fakalaumālie kitautolu ʻe he ʻOtuá?

ʻEkitivitī

Sitepu 1: Lau fakakulupu leʻolahi ʻa e ngaahi konga lea ʻi laló.

Sitepu 2: Aleaʻi ʻa e founga ʻe lava ke tokoniʻi ai koe ʻe hoʻo ngāueʻi e ngaahi akonaki fakaepalōfita ko ʻení ke ke maʻu ai ha tui lahi ange kia Sīsū Kalaisí.

Ngaahi Akonaki Fakaepalōfita Mahuʻingá mo e Ngaahi Talaʻofá

“Ko e lahi ange ʻetau ʻilo ki he ngāue mo e misiona ʻo e Fakamoʻuí—ko e lahi ange ia e mahino kiate kitautolu ʻEne tokāteliné mo e meʻa naʻá Ne fai maʻatautolú—ko e lahi ange ia ʻetau ʻilo te Ne lava ʻo ʻomi ʻa e mālohi ʻoku tau fiemaʻu ki heʻetau moʻuí” (Russell M. Nelson, “Ko Hono Tohoakiʻi Mai e Mālohi ʻo Sīsū Kalaisí ki Heʻetau Moʻuí,” Liahona, ʻEpeleli 2017, 39).

“ʻE ʻikai ke tupulaki noa pē hoʻo tuí, ka ʻi hoʻo fili ki ai. … Ko e fē ʻa e taimi fakamuimui taha naʻá ke lau ai ʻa e Tohi ʻa Molomoná mei he kamatá ki heʻene ʻosi? Toe lau ia. Te ne fakatupulaki ʻa hoʻo tuí” (Neil L. Andersen, “ʻOku ʻIkai Hokonoa ʻa e Tuí, ka ʻi Hoʻo Fili Ki ai,” Liahona, Nōvema 2015, 66).

“Ko e ngaahi ouau ʻoku maʻu ʻi he taau mo manatua maʻu peé, ʻoku nau fakaava mai e ngaahi matapā fakalangí ʻa ia ʻoku tafe mai ai e mālohi ʻo e anga faka-ʻOtuá ki heʻetau moʻuí. … Ko e ʻaho Sāpaté mo e temipale māʻoniʻoní ʻa e ongo maʻuʻanga tokoni pau ki he meʻa fakalangi ne fokotuʻu ʻe he ʻOtuá ke tokoniʻi kitautolu ke tau mavahe hake mei he kovi ʻo e māmaní” (David A. Bednar, “Ngaahi Talaʻofa Lahi ʻAupito mo Mahuʻinga,” Liahona, Nōvema 2017, 91–92).

Tukupā:

Te u fili ha meʻa ʻe taha ke fai he uiké ni ke fakamālohia ai ʻeku tui kia Sīsū Kalaisí.