« ការនិមិត្តដំបូង » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការនិមិត្តដំបូង
យ៉ូសែប ស្ម៊ីធ បានមើលឃើញព្រះជាព្រះវរបិតា និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ។
ព្រះគម្ពីរបានចែកចាយនូវកំណត់ហេតុជាច្រើនរបស់ព្យាការីដែលបានប្រាស្រ័យទាក់ទងជាមួយនឹងព្រះ ( សូមមើល អេម៉ុស ៣:៧ ) ។ ព្រះគម្ពីរបង្រៀនថា ព្រះទ្រង់មានព្រះបន្ទូល « ប្រទល់មុខនឹង » ម៉ូសេ( និក្ខមនំ ៣៣:១១ ) ។ ព្យាការីនៃព្រះគម្ពីរមរមន ក៏បាននិយាយជាមួយនឹង ឬមានការជួបផ្ទាល់ខ្លួនមកពីព្រះយេស៊ូវគ្រីស្ទ ហើយបានទទួលការណែនាំមកពីទ្រង់សម្រាប់ជំនាន់របស់ពួកគេផងដែរ ( សូមមើល ឧទាហរណ៍ នីហ្វៃទី៣ ១១ ) ។
បន្ទាប់ពីការសុគត និងការរស់ឡើងវិញរបស់ព្រះយេស៊ូវ និងការស្លាប់របស់ពួកសាវករបស់ទ្រង់ សាសនាចក្ររបស់ព្រះគ្រីស្ទត្រូវបានពុករលួយដោយការផ្លាស់ប្ដូរទៅលើគោលលទ្ធិ និងពិធិបរិសុទ្ធរបស់ទ្រង់ ។ អស់ជាច្រើនសតវត្សរ៍មកហើយ ពិភពលោកនេះស្ថិតនៅក្នុងស្ថានភាពនៃភាពងងឹតខាងវិញ្ញាណដោយគ្មានវត្តមាននៃសាសនាចក្ររបស់ព្រះគ្រីស្ទឡើយ ។ នៅនិទាឃរដូវ ឆ្នាំ ១៨២០ យ៉ូសែប ស្ម៊ីធ វ័យក្មេងមានការព្រួយបារម្ភអំពីសុខុមាលភាពនៃព្រលឹងរបស់លោក ហើយបានស្វែងរកដើម្បីដឹងថាតើសាសនាចក្រណាដែល លោកគួរចូលរួម ។ លោកបានទៅព្រៃក្បែរផ្ទះរបស់លោក ហើយបានអធិស្ឋានទូលសុំព្រះសម្រាប់ការណែនាំ ។ ក្នុងការឆ្លើយតបទៅនឹងការអធិស្ឋានរបស់លោក ព្រះវរបិតា និងព្រះយេស៊ូវគ្រីស្ទបានបង្ហាញព្រះកាយទៅកាន់ យ៉ូសែប ។ ដូចម៉ូសេដែរ យ៉ូសែបបាននិយាយទល់មុខជាមួយនឹងព្រះ ។ ព្រឹត្តិការណ៍នេះត្រូវបានគេស្គាល់ថាជាការនិមិត្តដំបូងដែលបានចាប់ផ្តើមការស្ដារឡើងវិញ នៃដំណឹងល្អរបស់ព្រះយេស៊ូវគ្រីស្ទនៅក្នុងជំនាន់របស់យើង ( សូមមើល យ៉ូសែប ស្ម៊ីធ—ប្រវត្ដិ ១:៧-២០ ) ។
តើអ្វីទៅជាការនិមិត្តដំបូង ?
នៅនិទាឃរដូវ ឆ្នាំ ១៨២០ យុវជនម្នាក់ឈ្មោះ យ៉ូសែប ស្ម៊ីធ បានអធិស្ឋាននៅក្នុងព្រៃក្បែរផ្ទះរបស់លោក នៅក្នុងរដ្ឋញូវយ៉ក សហរដ្ឋអាមេរិក ។ ក្នុងការឆ្លើយតបទៅនឹងការអធិស្ឋានរបស់លោក ព្រះវរបិតា និងព្រះយេស៊ូវគ្រីស្ទបានបង្ហាញព្រះកាយដល់លោក ។ តាមរយៈវិវរណៈនេះ យ៉ូសែប ស្ម៊ីធ ត្រូវបានគេហៅឲ្យធ្វើជាព្យាការីនៃព្រះអម្ចាស់ ហើយការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទបានចាប់ផ្ដើម ។
ទិដ្ឋភាពទូទៅនៃប្រធានបទ ៖ ការនិមិត្តដំបូង
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្យាការី, ការស្ដារដំណឹងល្អឡើងវិញ, វិវរណៈផ្ទាល់ខ្លួន
ផ្នែកទី ១
អ្នកអាចរៀនដោយខ្លួនឯងថាការនិមិត្តដំបូងពិតជាបានកើតឡើងមែន
ការពិតនៃព្រះកាយរបស់ព្រះជាព្រះវរបិតា និងព្រះរាជបុត្រារបស់ទ្រង់ ព្រះយេស៊ូវគ្រីស្ទ ចំពោះយុវជន យ៉ូសែប ស្ម៊ីធ គឺជាទិដ្ឋភាពដ៏សំខាន់មួយនៃការស្ដារសាសនាចក្ររបស់ព្រះគ្រីស្ទឡើងវិញ ។ ការនិមិត្តដំបូងបង្កើតនូវការពិតដែលថាស្ថានសួគ៌បើកចំហ ហើយព្រះកំពុងមានបន្ទូលទៅកាន់មនុស្សលោកម្ដងទៀត ។
យើងអាចសិក្សា ដំណើររឿងរបស់ យ៉ូសែប ស្ម៊ីធ អំពីការនិមិត្តដំបូង ។ យើងក៏អាចសួរព្រះផងដែរថា តើការនិមិត្តដំបូងពិតជាបានកើតឡើងមែនដែរឬទេ ( មរ៉ូណៃ ១០:៤–៦ ) ។ នៅពេលយើងធ្វើកិច្ចការទាំងនេះ នោះព្រះវិញ្ញាណបរិសុទ្ធនឹងបង្រៀនយើងនូវសេចក្ដីពិតនៃការនិមិត្តដំបូង ( សូមមើល អាលម៉ា ៥:៤៥–៤៦ ) » ។
រឿងទាំងឡាយដែលត្រូវពិចារណា
-
ប្រធាន ហ្គរដុន ប៊ី ហ៊ិងគ្លី បានបង្រៀនថា ៖ « កម្លាំងទាំងមូលរបស់យើងគឺស្ថិតនៅលើការទទួលស្គាល់ផ្លូវការណ៍នៃការនិមិត្តនោះ ។ ថាវាបានកើតឡើង ឬពុំបានកើតឡើង ។ ប្រសិនបើវាពុំបានកើតឡើងទេ នោះកិច្ចការនេះគឺជាការបោកប្រាស់ហើយ ។ ប្រសិនបើវាកើតឡើងមែន នោះវាគឺជាកិច្ចការដ៏សំខាន់ និងអស្ចារ្យបំផុតនៅលើផែនដី » ។ តើការពិតនៃការនិមិត្តដំបូងមានឥទ្ធិពលទៅលើជីវិតរបស់អ្នកដោយរបៀបណា ? ប្រសិនបើអ្នកមិនទាន់ទទួលបានទីបន្ទាល់អំពីការទទួលស្គាល់ផ្លូវការណ៍របស់វាទេ តើអ្នកនឹងខិតខំធ្វើយ៉ាងណាដើម្បីបានទីបន្ទាល់នោះ ?
-
នៅពេលដែលអ្នករៀនអំពីការនិមិត្តដំបូង វាអាចមានប្រយោជន៍ក្នុងការអានដំណើររឿងផ្សេងៗដែល យ៉ូសែប ស្ម៊ីធ បានផ្តល់ឲ្យអំពីព្រឹត្តិការណ៍នោះ ។ ដំណើររឿងទាំងនោះមាននៅ « Accounts of Joseph Smith’s First Vision » នៅលើគេហទំព័រឯកសាររបស់ យ៉ូសែប ស្ម៊ីធ ។ ហេតុអ្វីអ្នកគិតថា យ៉ូសែប ស្ម៊ីធ បានជ្រើសរើសសង្កត់ធ្ងន់លើព័ត៌មានលម្អិតផ្សេងគ្នានៅក្នុងដំណើររឿងជាក់លាក់ ? តើអ្នកបានទទួលការយល់ដឹងថ្មីអ្វីខ្លះអំពីការនិមិត្តដំបូងដែលអ្នកទទួលបានដោយការសិក្សាពីដំណើររឿងផ្សេងៗ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមមើលវីដេអូ « Ask of God: Joseph Smith’s First Vision » ( នាទីទី ៦:៣៥ ) ជាមួយគ្នា ។ ចែកចាយជាមួយសមាជិកក្រុមថា វីដេអូនេះត្រូវបានបង្កើតឡើងដោយប្រើព័ត៌មានលម្អិតមកពីដំណើររឿងនីមួយៗរបស់ យ៉ូសែប ស្ម៊ីធ អំពីការនិមិត្តនេះ ។ តើអ្នកមានអារម្មណ៍យ៉ាងណាពេលអ្នកទស្សនាការបង្ហាញនេះ ? តើអ្នកបានរៀនអ្វីខ្លះដែលអ្នកមិនធ្លាប់គិតពីមុនមក ? អញ្ជើញសមាជិកក្រុមឲ្យចែកចាយចំណាប់អារម្មណ៍ និងគំនិតរបស់ពួកគេ ។
ស្វែងយល់បន្ថែមទៀត
-
អេសាយ ២៩:១៣-១៤; យ៉ូអែល ២:២៨-២៩; អេភេសូរ ១:១០; នីហ្វៃទី២ ៣:៦-១៥; យ៉ូសែប ស្ម៊ីធ—ប្រវត្តិ ១:២៣-២៦
-
« The First Vision: The Father and the Son Appear to Joseph Smith » Teachings of Presidents of the Church: Joseph Smith ( ឆ្នាំ ២០១១ ) ទំព័រ ២៧-៣៥
-
« The First Vision: Journey to the Sacred Grove » ប្រវត្តិសាស្រ្តសាសនាចក្រ នៅលើគេហទំព័រ history.ChurchofJesusChrist.org
-
« The First Vision » New Era ខែ សីហា ឆ្នាំ ២០១៨ ទំព័រ ៤៤
ផ្នែកទី ២
ការយល់ដឹងអំពីការនិមិត្តដំបូងអាចពង្រឹងទីបន្ទាល់របស់អ្នកអំពីដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ
បន្ថែមពីលើតួនាទីដ៏សំខាន់ដែលការនិមិត្តដំបូងបានដើរតួនៅក្នុងការស្ដារដំណឹងល្អរបស់ព្រះយេស៊ូវគ្រីស្ទ យើងក៏អាចរៀនអំពីសេចក្ដីពិតដ៏សំខាន់នៃដំណឹងល្អដោយសិក្សាអំពីការនិមិត្តរបស់ យ៉ូសែប ស្ម៊ីធ បានផងដែរ ។ និស្ស័យនៃព្រះ តម្រូវការសម្រាប់ការស្តារឡើងវិញនៃសាសនាចក្ររបស់ព្រះគ្រីស្ទ គោលបំណងនៃដំណឹងល្អ និងសេចក្ដីពិតសំខាន់ៗផ្សេងទៀតត្រូវបានបង្ហាញនៅក្នុងគ្រានោះ ។
ការបង្ហាញព្រះកាយរបស់ព្រះវរបិតា និងព្រះយេស៊ូវគ្រីស្ទបានបញ្ជាក់សេចក្ដីពិតអំពីនិស្ស័យនៃព្រះដែលបានបាត់បង់អស់ជាច្រើនសតវត្សរ៍មកហើយ ។ សេចក្តីពិតមួយក្នុងចំណោមសេចក្តីពិតទាំងនោះគឺថា ព្រះវរបិតាសួគ៌ និងព្រះយេស៊ូវគ្រីស្ទគឺជាអង្គពីរដាច់ដោយឡែកពីគ្នាដែលមានរូបកាយមើលទៅដូចជាយើង ( សូមមើល យ៉ូសែប ស្ម៊ីធ—ប្រវត្ដិ ១:១៧ សូមមើល ផងដែរ គោលលទ្ធិ និងសេចក្តីសញ្ញា ១៣០:១, ២២ ) ។ ព្រះយេស៊ូវគ្រីស្ទបានឆ្លើយសំណួររបស់ យ៉ូសែប ស្ម៊ីធ អំពីស្ថានភាពសាសនានៅសម័យនោះ ហើយបានប្រាប់ យ៉ូសែប ថាសាសនាចក្រពិតនៃព្រះយេស៊ូវគ្រីស្ទ ពុំមាននៅលើផែនដីនោះទេ ( សូមមើល យ៉ូសែប ស្ម៊ីធ—ប្រវត្ដិ ១:១៩-២០ ) ។ ហើយក្នុងព្រះបន្ទូលពីរម៉ាត់យ៉ាងសាមញ្ញ ព្រះជាព្រះវរបិតាបានបង្រៀន យ៉ូសែប អំពីជំនាញដ៏សំខាន់មួយ សម្រាប់អស់អ្នកដែលស្វែងរកសេចក្ដីពិត ៖ ទ្រង់បានចង្អុលទៅព្រះយេស៊ូវគ្រីស្ទ ហើយបានបញ្ជាថា « ចូរស្ដាប់តាមទ្រង់ចុះ ! » ( យ៉ូសែប ស្ម៊ីធ—ប្រវត្តិ ១:១៧ ) ។
រឿងទាំងឡាយដែលត្រូវពិចារណា
-
សូមអានសុន្ទរកថារបស់អែលឌើរ ឌៀថើរ អេហ្វ អុជដូហ្វ « The Fruits of the First Vision » ដោយយកចិត្តទុកដាក់ទៅលើ « ផ្លែឈើ » ដែលលោកពិភាក្សា និងរបៀបដែលវាទាក់ទងនឹងជីវិតរបស់អ្នក ។ តើការនិមិត្តដំបូងបានជះឥទ្ធិពលលើអ្នកយ៉ាងដូចម្ដេច ? តើការណ៍នេះមានន័យយ៉ាងណាចំពោះអ្នក ? អ្នកអាចកត់ត្រាគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។
-
សូមអាន « A Faithful Search Rewarded » ដោយអែលឌើរ ផាតទ្រីស៊ីអូ អឹម ហ្គាយហ្វ្រា ។ នៅក្នុងសុន្ទរកថាសន្និសីទទូទៅនេះ អែលឌើរ ហ្គាយហ្វ្រា បានរាយបញ្ជីរអំពីសេចក្ដីពិតដ៏ចាំបាច់ចំនួនប្រាំដែលលោកបានរៀនក្នុងអំឡុងពេលមេរៀនជាមួយអ្នកផ្សព្វផ្សាយសាសនាដែលលោកបានឮដំណើររឿងនៃការនិមិត្តដំបូងជាលើកទីមួយ ។ តើសេចក្ដីពិតមួយណាក្នុងចំណោមសេចក្ដីពិតទាំងនេះមានសារៈសំខាន់ផ្ទាល់ខ្លួនចំពោះអ្នក ? តើសេចក្ដីពិតទាំងនេះបានពង្រឹងទីបន្ទាល់របស់អ្នក ហើយបានប្រទានពរដល់ជីវិតរបស់អ្នកដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ខណៈដែលការនិមិត្តដំបូងគឺជាព្រឹត្តិការណ៍ដ៏អស្ចារ្យមួយ វាគ្រាន់តែជាការចាប់ផ្តើមនៃការស្តារឡើងវិញនៃដំណឹងល្អប៉ុណ្ណោះ ។ ការចាក់បង្ហូរខាងវិញ្ញាណជាច្រើនបានកើតឡើងបន្ទាប់ពីនោះ ។ សូមពិចារណាព្រឹត្តិការណ៍នេះនៅពេលអ្នកអានជាមួយគ្នាចេញពី « ការស្ដារឡើងវិញនៃភាពពោរពេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » ។ ពេលអ្នកអាន សូមឈប់ជាទៀងទាត់ដើម្បីពិភាក្សាអំពីការយាងមកជួបរបស់ទេវតាដែលបានកើតឡើងបន្ទាប់ពីការនិមិត្តដំបូង ។ ហេតុអ្វីអ្នកគិតថាការស្តារឡើងវិញចាប់ផ្តើមឡើងដោយការនិមិត្តនៃព្រះវរបិតាសួគ៌ និងព្រះយេស៊ូវគ្រីស្ទ ? តើការនិមិត្តដំបូងបានចាក់គ្រឹះសម្រាប់អ្វីដែលនឹងកើតឡើងយ៉ាងដូចម្ដេច ?
-
ក្នុងចំណោមសេចក្ដីពិតដែលយើងរៀនចេញពីការនិមិត្តដំបូងគឺថា ព្រះឆ្លើយតបទៅនឹងបុត្រាបុត្រីរបស់ទ្រង់នៅពេលពួកគេមានទុក្ខព្រួយ ។ សូមទស្សនា the trailer for The First Vision: A Joseph Smith Papers Podcast ដែលអ្នកប្រវត្ដិវិទូសាសនាចក្រ ស្ពែនស៊ើ ដបុលយូ ម៉ាកប្រាយ ពិភាក្សាអំពីសេចក្ដីពិតនេះ ។ បន្ទាប់មកសូមអញ្ជើញសមាជិកក្រុមឲ្យចែកចាយអារម្មណ៍ និងការយល់ដឹងរបស់ពួកគេ ។
ស្វែងយល់បន្ថែមទៀត
-
នែល អិល អាន់ឌើរសិន « Strengthen Your Faith through the First Vision » Liahona ខែ មេសា ឆ្នាំ ២០២០ ទំព័រ ៥២–៥៥
-
អាឌីលសុន ឌឺ ផុលឡា ផារ៉ែលឡា « Essential Truths—Our Need to Act » Liahonaខែ វិច្ឆិកា ឆ្នាំ ២០១៧ ទំព័រ ១១៥–១១៦
ផ្នែកទី ៣
ការនិមិត្តដំបូងអាចបង្រៀនអ្នកអំពីរបៀបរៀនសេចក្ដីពិត
អ្នកអាចរៀនមកពីគំរូរបស់ យ៉ូសែប ស្ម៊ីធ អំពីរបៀបស្វែងរកសេចក្ដីពិត ។ ប្រវត្តិរបស់ យ៉ូសែប ស្ម៊ីធ បានថ្លែងថាលោកចង់ដឹងថាព្រះវិហារមួយណាត្រូវចូលរួម ។ លោកមានសំណួរនេះនៅក្នុងគំនិតរបស់លោក ពេលដែលលោកបានអានគម្ពីរ យ៉ាកុប ១:៥-៦ វគ្គបទគម្ពីរនេះមានអត្ថន័យជាពិសេសចំពោះលោក ៖ « បើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ ដែលទ្រង់ប្រទានដល់មនុស្សទាំងអស់ដោយសទ្ធា ឥតបន្ទោសផង នោះទ្រង់នឹងប្រទានឲ្យ ។ តែត្រូវឲ្យអ្នកនោះសូមដោយចិត្តជឿ ឥតសង្ស័យអ្វីសោះ » ។
ប្រធាន រ័សុល អិម ណិលសុន បានបង្រៀនថា « បើបទពិសោធន៍ដ៏អស្ចារ្យរបស់ យ៉ូសែប ស្ម៊ីធ នៅក្នុងព្រៃពិសិដ្ឋបង្រៀនយើងអំពីអ្វីមួយ នោះគឺថា ស្ថានសួគ៌បានបើក ហើយថាព្រះមានបន្ទូលមកកាន់បុត្រាបុត្រីរបស់ទ្រង់ ។ » ។ ខណៈដែលចម្លើយចំពោះសំណួររបស់អ្នកប្រហែលជាមិនកើតឡើងតាមរយៈការនិមិត្តមួយទេ អ្នកនៅតែអាចប្រាកដថាព្រះបានស្តាប់ និងឆ្លើយតបការអធិស្ឋានរបស់អ្នក ។ ពេលអ្នកបានដាក់ការខិតខំយ៉ាងឧស្សាហ៍ ហើយដាក់សេចក្តីជំនឿរបស់អ្នកទៅលើព្រះ នោះអ្នកអាចប្រាកដបាន—ដូចជា យ៉ូសែប ស្ម៊ីធ ថា—ព្រះនឹងរក្សាសេចក្ដីសន្យារបស់ទ្រង់ ។
រឿងទាំងឡាយដែលត្រូវពិចារណា
-
ពេលយើងរៀនអំពីដំណឹងល្អរបស់ព្រះយេស៊ូវគ្រីស្ទ យើងទាំងអស់គ្នាមានសំណួរ ។ សំណួរខ្លះឆ្លើយបានយ៉ាងងាយស្រួល ខណៈដែលសំណួរខ្លះទៀតអាចទាមទារការខិតខំយ៉ាងខ្លាំង ។ តើអ្នកមានសំណួរអំពីដំណឹងល្អ ឬព្រះគម្ពីរ ឬពាក្យសម្តីរបស់ព្យាការីនៅរស់អ្វីខ្លះ ? ដោយមានសំណួរនៅក្នុងគំនិត សូមអាន នីហ្វៃទី១ ១៥:៦–១១ ។ តើអ្នករៀនអ្វីខ្លះមកពីខគម្ពីរទាំងនេះអំពីរបៀបដើម្បីទទួលបានវិវរណៈ ? តើអ្នកអាចអនុវត្តសេចក្តីជំនឿលើព្រះយេស៊ូវគ្រីស្ទបានយ៉ាងដូចម្ដេចពេលអ្នករង់ចាំចម្លើយដែលអ្នកស្វែងរក ?
-
សូមអានអត្ថបទ « The First Vision: A Pattern for Personal Revelation » ដោយប្រធាន ហិនរី ប៊ី អាវរិង ។ តើអ្នករៀនអ្វីខ្លះមកពីអត្ថបទនេះអំពីការរៀបចំខ្លួនដើម្បីទទួលបានវិវរណៈផ្ទាល់ខ្លួន ? តើអ្នកអាចធ្វើការផ្លាស់ប្ដូរតូចៗអ្វីខ្លះក្នុងជីវិតរបស់អ្នក ដើម្បីជួយអ្នកឲ្យកាន់តែទទួលបានការបំផុសគំនិតរបស់ព្រះវិញ្ញាណបរិសុទ្ធ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអាន នីហ្វៃទី១ ១០:១៧-១៩ ជាក្រុម ។ តើអ្នករៀនអ្វីខ្លះចេញពីខគម្ពីរទាំងនេះអំពីព្រះឆន្ទៈរបស់ព្រះក្នុងការឆ្លើយតបទៅនឹងការអធិស្ឋានរបស់យើង ? តើបទពិសោធន៍អ្វីខ្លះដែលអ្នកមានជាមួយនឹងការទទួលបានវិវរណៈផ្ទាល់ខ្លួន ? សូមអញ្ជើញសមាជិកក្រុមឲ្យចែកចាយគំនិត និងបទពិសោធន៍របស់ពួកគេតាមការគួរ ។
-
សូមអញ្ជើញសមាជិកក្រុមឲ្យអាន ឬស្តាប់ដោយខ្លួនឯងនូវសុន្ទរកថារបស់ប្រធាន ណិលសុន « Revelation for the Church, Revelation for Our Lives » ។ សូមឲ្យពួកគេយកចិត្តទុកដាក់ជាពិសេសទៅលើការបង្រៀនរបស់លោកអំពីការទទួលបានវិវរណៈផ្ទាល់ខ្លួន ។ បន្ទាប់មកប្រមូលផ្តុំគ្នាជាក្រុម ហើយអញ្ជើញបុគ្គលម្នាក់ៗឲ្យចែកចាយនូវអ្វីដែលគាត់ ឬនាងបានរៀន ។ តើអ្នកកត់សម្គាល់ឃើញលំនាំណាមួយនៅក្នុងអ្វីដែលសមាជិកក្រុមរបស់អ្នកបានរកឃើញថាមានការណែនាំដែរឬទេ ? តើអ្នកអាចរៀនអ្វីខ្លះមកពីប្រធាន ណិលសុន និងមកពីក្រុមរបស់អ្នក អំពីរបៀបដែលអ្នកអាចទទួលបានវិវរណៈផ្ទាល់ខ្លួនកាន់តែប្រសើរឡើង ?
ស្វែងយល់បន្ថែមទៀត
-
ជែហ្វ្រី អ័រ ហូឡិន « The Message, the Meaning, and the Multitude » Liahona ខែ វិច្ឆិកា ឆ្នាំ ២០១៩ ទំព័រ ៦–៨
-
រីឆាត ជេ ម៉េណេស « The First Vision: Key to Truth » Ensign ខែ វិច្ឆិកា ឆ្នាំ ២០១៧ ទំព័រ ៦១–៦៥
-
« Prayer and Personal Revelation » Teachings of Presidents of the Church: Joseph Smith ( ឆ្នាំ ២០០៧ ) ទំព័រ ១២៥–១៣៤