« ការធ្លាក់របស់លោកអ័ដាម និងនាងអេវ៉ា » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការធ្លាក់របស់លោកអ័ដាម និងនាងអេវ៉ា
ដោយសារតែការរំលងរបស់លោកអ័ដាម និងនាងអេវ៉ា នោះអំពើបាបនិងសេចក្ដីស្លាប់បានកើតឡើងក្នុងលោកិយ
ខណៈដែលដំណើររឿងនៃព្រះគម្ពីរប៊ីបអំពីលោកអ័ដាម និងនាងអេវ៉ាមានមនុស្សជាច្រើនធ្លាប់ស្គាល់ក៏ដោយ តែជាញឹកញាប់វាត្រូវបានគេយល់ខុស ។ សេចក្ដីពិតនៃព្រះគម្ពីរដែលបានស្តារឡើងវិញនៅក្នុងជំនាន់របស់យើង ជួយយើងឲ្យយល់កាន់តែច្បាស់អំពីស្ថានភាពនៅក្នុងសួនច្បារអេដែន និងជម្រើសដែលធ្វើឡើងដោយឪពុកម្ដាយដំបូងរបស់យើង ដែលបណ្តាលឲ្យពួកគេត្រូវបានបណ្តេញចេញពីសួនច្បារនោះ ។ បទពិសោធន៍នោះត្រូវបានគេស្គាល់ថាជាការធ្លាក់ និងដែលបាននាំមកនូវផលវិបាកដែលបានប៉ះពាល់ដល់បុត្រាបុត្រីទាំងអស់របស់ព្រះ ។
ការធ្លាក់របស់លោកអ័ដាម និងនាងអេវ៉ាមិនមែនជាការភ្ញាក់ផ្អើលចំពោះព្រះវរបិតាសួគ៌ទេ ។ ការធ្លាក់ចុះនេះគឺជាផ្នែកចាំបាច់មួយនៃផែនការរបស់ព្រះសម្រាប់ការសង្គ្រោះ និងភាពតម្កើងឡើងនៃបុត្រាបុត្រីរបស់ទ្រង់ ។ ក្រោយពីការធ្លាក់នេះបានកើតឡើង លោកអ័ដាម និងនាងអេវ៉ាបានក្លាយជាមនុស្សរមែងស្លាប់ និងទទួលបានសមត្ថភាពក្នុងការបង្កើតកូន ប៉ុន្តែពួកគេក៏បានក្លាយជាមនុស្សមានបាប និងត្រូវស្លាប់ផងដែរ ។
ដោយសារការធ្លាក់ រាល់អ្វីៗដែលមានជីវិតទាំងអស់គឺត្រូវជួបការលំបាក មានជំងឺ និងសេចក្តីស្លាប់ ។ ភាពផ្ទុយគ្នានេះគឺជាផ្នែកមួយនៃផែនការរបស់ព្រះសម្រាប់យើង ហើយវារួមចំណែកដល់ការរៀនសូត្រ ការរីកចម្រើន និងសមត្ថភាពរបស់យើងដើម្បីមានបទពិសោធន៍នៃក្តីអំណរ ។ ដើម្បីប្រោសលោះយើងពីឥទ្ធិពលនៃការធ្លាក់ ព្រះវរបិតាសួគ៌បានផ្តល់នូវព្រះអង្គសង្រ្គោះមួយអង្គ–គឺព្រះយេស៊ូវគ្រីស្ទ ។ ព្រះគ្រីស្ទមានអំណាចដើម្បីប្រោសលោះពិភពលោក និងមនុស្សគ្រប់រូបនៅក្នុងពិភពលោកចេញពីផលប៉ះពាល់នៃការធ្លាក់នេះ ។
តើការធ្លាក់របស់លោកអ័ដាម និងនាងអេវ៉ាជាអ្វី ?
ការធ្លាក់ចុះនៃលោកអ័ដាម និងនាងអេវ៉ាសំដៅទៅលើជម្រើសដែលពួកគេបានធ្វើដើម្បីរំលោភច្បាប់របស់ព្រះ ដែលធ្វើឲ្យពួកគេស្ថិតនៅក្រោមសេចក្តីស្លាប់ និងបំបែកពួកគេចេញពីវត្តមានរបស់ទ្រង់ ។ ការធ្លាក់ចុះរបស់លោកអ័ដាម និងនាងអេវ៉ាបាននាំមកនូវការស្លាប់ខាងរូបកាយ និងខាងវិញ្ញាណមកកាន់ពិភពលោក ។ វាគឺជាផ្នែកចាំបាច់មួយនៃផែនការរបស់ព្រះវរបិតាសួគ៌ ពីព្រោះមានតែក្រោយពីការធ្លាក់ចុះនេះប៉ុណ្ណោះទើបលោកអ័ដាម និងនាងអេវ៉ាអាចបង្កើតកូនបាន ។ ហេតុដូច្នេះហើយការធ្លាក់ចុះនេះបានធ្វើឲ្យព្រះ « នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។
ទិដ្ឋភាពទូទៅនៃប្រធានបទ ៖ ការធ្លាក់ចុះនៃលោកអ័ដាម និងនាងអេវ៉ា
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ សិទ្ធជ្រើសរើស, ដង្វាយធួនរបស់ព្រះយេស៊ូវគ្រីស្ទ, ការបង្កបង្កើត, ជីវិតរមែងស្លាប់, ផែនការនៃសេចក្ដីសង្គ្រោះ
ផ្នែកទី ១
ការអនុវត្តសិទ្ធជ្រើសរើសរបស់លោកអ័ដាម និងនាងអេវ៉ា
លោកអ័ដាម និងនាងអេវ៉ាគឺជាបុត្រាបុត្រីដំបូងរបស់ព្រះដែលបានមកកាន់ផែនដីនេះ ។ ពួកគេបានរស់នៅក្នុងស្ថានភាពគ្មានទោសនៅក្នុងសួនច្បារអេដែន មានន័យថាពួកគេមិនមានកូន ហើយមិនបានស្គាល់អំណរ ឬទុក្ខវេទនាឡើយ ( សូមមើល នីហ្វៃទី២ ២:២៣ ) ។ ដើមឈើពីរដើមនៅក្នុងសួនច្បារមានសារៈសំខាន់ជាពិសេស គឺដើមឈើនៃជីវិត និងដើមឈើដឹងខុស ត្រូវ ( សូមមើល ម៉ូសេ ៣:៩ ) ។ ព្រះទ្រង់បញ្ជាមិនឲ្យលោកអ័ដាម និងនាងអេវ៉ាបរិភោគផ្លែឈើពីដើមដឹងខុសត្រូវឡើយ ( សូមមើល ម៉ូសេ ៣:១៧ ) ។ ប្រសិនបើពួកគេគោរពតាមបទបញ្ញត្តិនេះនោះពួកលោកអាចនៅក្នុងសួនច្បារនេះ ។ ប្រសិនបើពួកគេបរិភោគផ្លែឈើនោះ ពួកគេនឹងត្រូវស្លាប់ជាមិនខានឡើយ ។
ព្រះក៏បានសង្កត់ធ្ងន់ថាពួកគេមានសិទ្ធជ្រើសរើសខាងសីលធម៌ ឬមានអំណាចក្នុងការជ្រើសរើស ( សូមមើល ម៉ូសេ ៣:១៦–១៧ ) ។ សាតាំងបានមកល្បួងលោកអ័ដាម និងនាងអេវ៉ាឲ្យបរិភោគផ្លែឈើ ។ វាបានប្រាប់ពួកគេថាពួកគេនឹងមិនស្លាប់ទេ ប៉ុន្តែនឹងក្លាយជាមនុស្សឈ្លាសវៃដូចជាព្រះវរបិតាសួគ៌ ( សូមមើល ម៉ូសេ ៤:១០–១១ ) ។ ពេលលោកអ័ដាម និងនាងអេវ៉ាជ្រើសរើសបរិភោគផ្លែឈើ នោះភ្នែករបស់ពួកគេត្រូវបានបើក ហើយពួកគេបានទទួលចំណេះដឹង ប៉ុន្តែពួកគេក៏បានជួបនឹងការស្លាប់ខាងវិញ្ញាណផងដែរ នៅទីបំផុតពួកគេត្រូវបានបណ្តេញចេញពីវត្តមានរបស់ព្រះអម្ចាស់ ( សូមមើល គោលលទ្ធិ និងសេចក្តីសញ្ញា ២៩:៤០–៤១ ) ។ ពួកគេក៏បានក្លាយជាមនុស្សរមែងស្លាប់ ដែលអាចមានការឈឺចាប់ ជំងឺ ការស្លាប់ និងបទពិសោធន៍ផ្សេងទៀតនៃពិភពលោកដែលបានធ្លាក់ចុះនេះ ។
ការណ៍ទាំងឡាយដែលត្រូវពិចារណា
-
សូមអាន នីហ្វៃទី២ ២:១៥–១៥ ។ តើបងប្អូនរៀនអ្វីខ្លះអំពីសិទ្ធជ្រើសរើសតាមរយៈការយល់ដឹងបន្ថែមអំពីកាលៈទេសៈនៃការធ្លាក់ចុះ ? តើបងប្អូនរៀនអ្វីខ្លះអំពីសារៈសំខាន់នៃតម្រូវការរបស់យើង នៅក្នុងការជ្រើសរើសសេចក្តីល្អសម្រាប់ខ្លួនយើងដែលផ្ទុយនឹងសេចក្តីអាក្រក់ ? សូមកត់សម្គាល់អំពីការប្រើប្រាស់ពាក្យ « ល្បួង » របស់លីហៃ នៅក្នុងខគម្ពីរទាំងនេះ ។ តើយើងត្រូវបានល្បួងដោយសេចក្តីល្អ និងសេចក្តីអាក្រក់នៅថ្ងៃនេះដោយរបៀបណា ? តើការណ៍នេះបង្រៀនបងប្អូនអំពីតម្រូវការរបស់យើងសម្រាប់ព្រះអង្គសង្គ្រោះយ៉ាងដូចម្ដេច ?
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន ដាល្លិន អេក អូក បានមានប្រសាសន៍ថា ៖
« លោកឪពុក លីហៃ បានបង្រៀនថា ប្រសិនបើការធ្លាក់ពុំកើតមានទេ នោះលោកអ័ដាម និងនាងអេវ៉ា‹ នឹងនៅក្នុងភាពឆោតល្ងង់ ដោយគ្មានសេចក្ដីអំណរ ព្រោះពួកគេមិនស្គាល់សេចក្ដីទុក្ខវេទនា › ( នីហ្វៃទី២ ២:២៣ ) ។ បើគ្មានបទពិសោធន៍នៃការផ្ទុយគ្នានៅក្នុងជីវិតរមែងស្លាប់ទេ ‹ គ្រប់អ្វីៗទាំងអស់ត្រូវតែប្រមូលគ្នាជាដុំមួយ › ដែលគ្មានសុភមង្គល ឬសេចក្ដីទុក្ខវេទនានោះឡើយ ( ខទី ១១ ) ។ …
« លោកអ័ដាមបានធ្លាក់ខ្លួន ដើម្បីឲ្យមានមនុស្សលោក ហើយមានមនុស្សលោក ដើម្បីឲ្យគេអាចមានសេចក្ដីអំណរ › [ ខទី ២៥ ] »
តើបងប្អូនបានរៀនអ្វីខ្លះមកពីការបង្រៀនរបស់ប្រធាន អូក និងលីហៃនៅក្នុងព្រះគម្ពីរមរមនអំពីតម្រូវការសម្រាប់ភាពផ្ទុយគ្នា ?
ស្វែងយល់បន្ថែមទៀត
-
ដាល្លិន អេក អូក « The Great Plan of Happiness » Ensign ខែ វិច្ឆិកា ឆ្នាំ ១៩៩៣ ទំព័រ ៧២–៧៥
-
« ការធ្លាក់នៃលោកអ័ដាម និងនាងអេវ៉ា និងអំណោយទាននៃសិទ្ធជ្រើសរើស » ការបង្រៀន និងគោលលទ្ធិនៃព្រះគម្ពីរមរមនឯកសារគ្រូបង្រៀន ( ឆ្នាំ ២០២១ ) ទំព័រ ៣២–៣៨
ផ្នែកទី ២
ព្រះយេស៊ូវគ្រីស្ទបានយកឈ្នះលើឥទ្ធិពលនៃការធ្លាក់ចុះ
ការធ្លាក់ចុះរបស់លោកអ័ដាម និងនាងអេវ៉ាបានបង្កើតនូវការបែកចេញរវាងពួកគេ និងព្រះ ដែលស្គាល់ថាជាការស្លាប់ខាងវិញ្ញាណ ។ ដោយសាររូបរាងកាយរបស់ពួកគេបានក្លាយជាមនុស្សរមែងស្លាប់ នោះពួកគេក៏នឹងស្លាប់ខាងរូបកាយ និងត្រូវបានដាក់ក្នុងស្ថានភាពផ្ទុយគ្នានៅក្នុងពិភពលោកនេះ ដែលអាចធ្វើឲ្យមានអំពើបាប ។ ការស្លាប់ខាងវិញ្ញាណ និងខាងរូបកាយ ហើយនៅទីបំផុតអំពើបាបនឹងរារាំងលោកអ័ដាម និងនាងអេវ៉ា និងកូនចៅរបស់ពួកគេពីការវិលត្រឡប់ទៅកាន់វត្តមានរបស់ព្រះវិញ ។
នៅក្នុងសេចក្ដីស្រឡាញ់ដ៏និរន្តរ៍របស់ទ្រង់ចំពោះបុត្រាបុត្រីរបស់ទ្រង់ ព្រះវរបិតាសួគ៌បានប្រទានព្រះអង្គសង្រ្គោះមួយអង្គដែលបានធ្វើឲ្យលោកអ័ដាម និងនាងអេវ៉ា—និងយើងទាំងអស់គ្នា—ប្រែចិត្តពីអំពើបាប ។ ព្រះយេស៊ូវគ្រីស្ទបានបង់ថ្លៃសម្រាប់អំពើបាបយើង ។ ទ្រង់ក៏នឹងទទួលរងនូវការឈឺចាប់របស់មនុស្សគ្រប់រូបគឺមនុស្សប្រុស មនុស្សស្រី និងកុមារទាំងឡាយ ដែលធ្លាប់មានជីវិតរួមមានទាំងការឈឺចាប់នៃអំពើបាបរបស់យើង ការរងរបួស ជំងឺ និងការបាត់បង់នានា ។ ទ្រង់នឹងសុគត ហើយមានព្រះជន្មរស់ឡើងវិញដើម្បីឲ្យយើងទាំងអស់គ្នាអាចរស់ឡើងវិញម្តងទៀត ។ តាមរយៈអំណោយដែលគ្មានអ្វីប្រៀបផ្ទឹមបានរបស់ព្រះយេស៊ូវគ្រីស្ទ ព្រះបានធ្វើឲ្យយើងមានលទ្ធភាពក្នុងការប្រែចិត្តពីអំពើបាប រៀន រីកចម្រើន ហើយនៅទីបំផុតត្រឡប់មករស់នៅជាមួយនឹងទ្រង់វិញ ។
បន្ទាប់ពីចាកចេញពីសួនច្បារអេដែន លោកអ័ដាម និងនាងអេវ៉ាបានគោរពតាមបញ្ញត្តិរបស់ព្រះអម្ចាស់ រួមទាំងការថ្វាយកូនសត្វច្បងនៃហ្វូងចៀមរបស់គេ មកថ្វាយជាយញ្ញបូជាទាំងឡាយដល់ព្រះអម្ចាស់ ។ ក្រោយមកពួកគេបានដឹងថាគោលបំណងនៃយញ្ញបូជានេះគឺដើម្បីជួយពួកគេឲ្យចងចាំថាព្រះយេស៊ូវគ្រីស្ទនឹងប្រទានជីវិតរបស់ទ្រង់ជាយញ្ញបូជាសម្រាប់យើងទាំងអស់គ្នា ។ ( សូមមើល ម៉ូសេ ៥:៤–៨ ) ។
ការណ៍ទាំងឡាយដែលត្រូវពិចារណា
-
សូមអាន ម៉ូសេ ៥:១១ ។ នៅក្នុងខគម្ពីរនេះ នាងអេវ៉ាបានសង្ខេបនូវអ្វីដែលនាងបានរៀនមកពីបទពិសោធន៍របស់ពួកគេជាមួយនឹងការធ្លាក់នេះ ។ ខណៈដែលយើងតែងតែមើលឃើញការធ្លាក់នេះ ជាការចាប់ផ្តើមនៃការឈឺចាប់ និងការរងទុក្ខដល់ផែនដី នាងមិនបាននិយាយអំពីរឿងទាំងនេះទេ ។ ហេតុអ្វីបានជាបងប្អូនគិតថានាងអេវ៉ា បានជ្រើសរើសនិយាយអំពីការធ្លាក់ចុះ តាមរបៀបរបស់នាង ? តើយើងអាចរៀនអ្វីពីនាងអេវ៉ា អំពីគោលបំណងនៃជីវិតរបស់យើង ?
ប្រធាន រ័សុល អិម ណិលសុន បានបង្រៀនថា ៖
« ដោយសារព្រះយេស៊ូវគ្រីស្ទបានឈ្នះលោកិយដ៏ធ្លាក់នេះ ហើយដោយសារទ្រង់បានធួននឹងអំពើបាបយើងម្នាក់ៗ នោះយើងក៏អាចឈ្នះពិភពលោកដែលមានអំពើបាបដ៏ជោគជាំ ដែលអត្មានិយម និងគួរឲ្យនឿយហត់នេះផងដែរ ។
ដោយសារព្រះអង្គសង្គ្រោះ តាមរយៈដង្វាយធួនដ៏និរន្តររបស់ទ្រង់ បានប្រោសលោះពួកយើងម្នាក់ៗពីភាពទន់ខ្សោយ កំហុស និងអំពើបាប ហើយដោយសារទ្រង់បានដកពិសោធរាល់ការឈឺចាប់ ការបារម្ភ និងបន្ទុកដែលបងប្អូនធ្លាប់មាន បន្ទាប់មកពេលបងប្អូនប្រែចិត្តដ៏ពិត ហើយស្វែងរកជំនួយពីទ្រង់ នោះបងប្អូនអាចយកឈ្នះលើពិភពលោកដ៏គ្រោះថ្នាក់បច្ចុប្បន្ននេះបាន » ។
តើយើងអាចយកឈ្នះលើពិភពរមែងស្លាប់ដែលបានធ្លាក់ចុះនេះយ៉ាងដូចម្ដេច ? តើបងប្អូនបានជួបប្រទះនឹងជំនួយរបស់ព្រះអង្គសង្គ្រោះដើម្បីយកឈ្នះលើពិភពលោកនៅពេលណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអាន យ៉ូហាន ៣:១៦ ជាក្រុម ហើយបន្ទាប់មកអញ្ជើញសមាជិកក្រុមឲ្យចែកចាយនូវអត្ថន័យនៃខគម្ពីរនេះ ។ បន្ទាប់មកអាន ម៉ូសេ ៥:៩ ដែលពិពណ៌នាអំពីតួនាទីរបស់ព្រះយេស៊ូវគ្រីស្ទដែលជាអង្គប្រោសលោះរបស់យើង ។ សូមអញ្ជើញសមាជិកក្រុមឲ្យចែកចាយនូវអ្វីដែលពួកគេរៀនមកពីខគម្ពីរទាំងនេះ អំពីសេចក្ដីស្រឡាញ់របស់ព្រះ និងអំណោយនៃដង្វាយធួន និងការរស់ឡើងវិញរបស់ព្រះគ្រីស្ទ ដែលអនុញ្ញាតឲ្យយើងយកឈ្នះលើឥទ្ធិពលនៃការធ្លាក់ចុះ ។
-
សូមអាន អាលម៉ា ៧:១១–១៣ ជាក្រុម ដោយកត់សម្គាល់ពីពាក្យនីមួយៗដែលពិពណ៌នាអំពីអ្វីដែលយើងជួបប្រទះនៅក្នុងពិភពលោកដ៏ធ្លាក់ចុះនេះ ។ ឧទាហរណ៍ បងប្អូនអាចកត់សម្គាល់ឃើញពាក្យ « ការល្បួង » និង « ជំងឺ » ។ ធ្វើបញ្ជីមួយអំពីពាក្យទាំងនេះសម្រាប់សមាជិកក្រុមមើល ។ បន្ទាប់មកអានវគ្គបទគម្ពីរម្តងទៀត លើកនេះយកចិត្តទុកដាក់ទៅលើពាក្យដែលពិពណ៌នាអំពីអ្វីដែលព្រះគ្រីស្ទបានធ្វើសម្រាប់យើង ។ សរសេរពាក្យទាំងនេះក្នុងបញ្ជីទីពីរនៅក្បែរបញ្ជីទីមួយ ។ តើលំហាត់នេះបង្រៀនបងប្អូនអំពីទំនាក់ទំនងរវាងការធ្លាក់ របស់លោកអ័ដាម និងនាងអេវ៉ា និងតួនាទីរបស់ព្រះយេស៊ូវគ្រីស្ទដែលជាព្រះអង្គសង្រ្គោះរបស់យើងយ៉ាងដូចម្ដេច ?
ស្វែងយល់បន្ថែមទៀត
-
ជែហ្វ្រី អ័រ ហូឡិន « Where Justice, Love, and Mercy Meet » Liahona ខែ ឧសភា ឆ្នាំ ២០១៥ ទំព័រ ១០៤–១០៦
-
រ៉ូបឺត ឌី ហែល « The Plan of Salvation: A Sacred Treasure of Knowledge to Guide Us » Ensign ខែ តុលា ឆ្នាំ ២០១៥ ទំព័រ ២៤–៣១
ផ្នែកទី ៣
ការធ្លាក់របស់លោកអ័ដាម និងនាងអេវ៉ាគឺជាផ្នែកមួយដ៏សំខាន់នៃផែនការរបស់ព្រះ ។
ដោយសារតែការធ្លាក់របស់លោកអ័ដាម និងនាងអេវ៉ា នោះយើងទាំងអស់គ្នាមានឱកាសទទួលបានរូបរាងកាយ និងបទពិសោធន៍នៃអំណរ និងការលំបាកក្នុងជីវិតរមែងស្លាប់ ។ យើងក៏មានឱកាសជារៀងរាល់ថ្ងៃ ដើម្បីអនុវត្តសិទ្ធជ្រើសរើសខាងសីលធម៌របស់យើងផងដែរ ។ ដោយសារយើងត្រូវបានបែកចេញពីព្រះដោយគ្មានការនឹកចាំពីជីវិតមុនរបស់យើង នោះយើងត្រូវតែរៀន និងរីកចម្រើនតាមរយៈសេចក្តីជំនឿលើព្រះយេស៊ូវគ្រីស្ទ និងតាមរយៈបទពិសោធន៍ផ្ទាល់ខ្លួនរបស់យើង ។
ទាំងអស់នេះគឺចាំបាច់ណាស់ចំពោះផែនការរបស់ព្រះ សម្រាប់សុភមង្គលដ៏អស់កល្បជានិច្ចរបស់យើង ។ ដើម្បីត្រឡប់ទៅកាន់ទ្រង់វិញ ហើយក្លាយដូចជាព្រះអង្គ យើងត្រូវប្រើសិទ្ធជ្រើសរើសរបស់យើងដើម្បីជ្រើសរើសសេចក្តីល្អ ជាជាងសេចក្តីអាក្រក់ ។ យើងចេះធ្វើខុស ពេលយើងឆ្លងកាត់ដំណើរការនៃការរៀនសូត្រនេះ ។ ប៉ុន្តែព្រះយេស៊ូវគ្រីស្ទ និងដង្វាយធួនរបស់ទ្រង់ធ្វើឲ្យយើងអាចយកឈ្នះអំពើបាបរបស់យើង ហើយបានអភ័យទោស និងធ្វើឲ្យជ្រះស្អាត ដោយអនុញ្ញាតឲ្យយើងត្រឡប់ទៅកាន់វត្តមានរបស់ព្រះវិញនៅថ្ងៃណាមួយហើយប្រែក្លាយដូចជាទ្រង់ ។
ការណ៍ទាំងឡាយដែលត្រូវពិចារណា
-
សូមអាន នីហ្វៃទី២ ២:១១,១៥ ដោយយកចិត្តទុកដាក់ទៅលើតួនាទីនៃភាពផ្ទុយគ្នានៅក្នុងផែនការរបស់ព្រះ ។ តើបងប្អូនរៀនអ្វីខ្លះមកពីខគម្ពីទាំងនេះអំពីតម្រូវការឲ្យមានភាពផ្ទុយគ្នា ? តើការយល់ដឹងអំពីគោលបំណងរបស់ភាពផ្ទុយគ្នាប៉ះពាល់ដល់របៀបដែលបងប្អូនគិតអំពីការសាកល្បងរបស់បងប្អូនដោយរបៀបណា ?
-
ការធ្លាក់បាននាំឲ្យពិភពលោកនេះមានទាំងទុក្ខវេទនា និងសេចក្តីអំណរ ។ សូមអាន កូរិនថូស ទី១ ១៥:២១–២២ និង នីហ្វៃទី២ ២:១៩–២៥ ដោយរកមើលពរជ័យទាំងឡាយដែលអាចមានទៅដល់មនុស្សគ្រប់រូបបន្ទាប់ពីការធ្លាក់ចុះ ។ តើបងប្អូនរៀនអ្វីខ្លះមកពីខគម្ពីទាំងនេះអំពីគោលបំណងនៃជីវិត ?
សកម្មភាពសម្រាប់ការរៀនសូត្រជាមួយអ្នកដទៃ
-
យើងដឹងចេញពីព្រះគម្ពីរសម័យទំនើបអំពីរបៀបដែលលោកអ័ដាម និងនាងអេវ៉ាមានអារម្មណ៍អំពីការរំលងរបស់ពួកគេ ។ សូមអាន ម៉ូសេ ៥:១០–១១ ជាក្រុម ។ វាប្រហែលជាមានប្រសិទ្ធភាពក្នុងការជ្រើសរើសបុរសម្នាក់ឲ្យអាន ខទី ១០ និងស្ត្រីម្នាក់ដើម្បីអាន ខទី ១១ ដោយជួយសមាជិកក្រុមស្រមៃឃើញថាជាលោកអ័ដាម និងនាងអេវ៉ាកំពុងនិយាយ ។ ចែកចាយអារម្មណ៍របស់បងប្អូនអំពីខគម្ពីរទាំងនេះជាមួយនឹងក្រុមរបស់បងប្អូន ។ តើសេចក្ដីជំនឿរបស់លោកអ័ដាម និងនាងអេវ៉ាទៅលើព្រះយេស៊ូវគ្រីស្ទបានជួយពួកគេឲ្យមើលការរំលងរបស់ពួកគេ តាមរបៀបដែលពួកគេបានមើលឃើញយ៉ាងដូចម្ដេច ?
-
តើអ្វីទៅដែលធ្វើឲ្យបងប្អូនមានអំណរ ? សូមអញ្ជើញសមាជិកក្រុមចែកចាយចម្លើយរបស់ពួកគេចំពោះសំណួរនេះ ។ បន្ទាប់មកសូមអាន នីហ្វៃទី២ ២:២៥ ជាមួយគ្នា ។ ហេតុអ្វីបងប្អូនគិតថាលីហៃ បានបង្រៀនកូនប្រុសរបស់គាត់ថា « មានមនុស្សលោក ដើម្បីឲ្យគេអាចមានសេចក្ដីអំណរ » ? តើការធ្លាក់របស់លោកអ័ដាម និងនាងអេវ៉ាមានអ្វីទាក់ទងនឹងសេចក្តីអំណរ ? សូមអញ្ជើញសិស្សបីបួននាក់ឲ្យចែកចាយគំនិតរបស់ពួកគេ ។
ស្វែងយល់បន្ថែមទៀត
-
លោកុប្បត្តិ ២–៤; នីហ្វៃទី២ ២:១៥–២៦; ៩:៦–២១; ម៉ូសាយ ៣:១១–១៦; អាលម៉ា ១២:២១–៣៥; ២២:១២–១៤; ៤២:២–១៥; គោលលទ្ធិ និងសេចក្តីសញ្ញា ២៩:៣៤–៤៤; ម៉ូសេ ៣–៥; ៥:៩–១៣
-
ដាល្លិន អេក អូក « The Great Plan of Happiness » Ensign ខែ វិច្ឆិកា ឆ្នាំ ១៩៩៣ ទំព័រ ៧២–៧៥
-
ជែហ្វ្រី អ័រ ហូឡិន « Where Justice, Love, and Mercy Meet » Liahona ខែ ឧសភា ឆ្នាំ ២០១៥ ទំព័រ ១០៤–១០៦
-
« The Fulness of the Gospel: The Fall of Adam and Eve » Ensign ខែ មិថុនា ឆ្នាំ ២០០៦ ទំព័រ ៤៨–៤៩
ធនធានផ្សេងទៀតអំពីការធ្លាក់របស់លោកអ័ដាម និងនាងអេវ៉ា