« ការបង្កបង្កើត » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការបង្កបង្កើត
គោលបំណងរបស់ព្រះនៅក្នុងការបង្កបង្កើតអ្វីៗទាំងអស់សម្រាប់បុត្រាបុត្រីរបស់ទ្រង់
តើពេលចុងក្រោយដែលបងប្អូនបានមើលផ្កាយនៅលើមេឃនាពេលយប់ ស្តាប់សំឡេងទឹករលកនៅលើឆ្នេរ ឬក៏ឡើងភ្នំនៅខាងក្រៅនៅពេលណា ? យើងរស់នៅក្នុងពិភពលោកមួយដ៏ស្រស់ស្អាត ។ ខណៈដែលយើងមិនដឹងព័ត៌មានលម្អិតជាច្រើនអំពីរបៀបដែលផែនដីត្រូវបានបង្កើត តែយើងដឹងថាវាត្រូវបានបង្កើតឡើងដោយព្រះយេស៊ូវគ្រីស្ទនៅក្រោមការដឹកនាំរបស់ព្រះជាព្រះវរបិតា ។ ហើយយើងដឹងអំពីមូលហេតុដែលផែនដីត្រូវបានបង្កើតឡើង ។ ព្យាការីម៉ូសេធ្លាប់បានរៀននៅក្នុងទស្សនៈសួគ៌ថា ព្រះបានបង្កើតពិភពលោកដ៏ច្រើនអនេក ( សូមមើល ម៉ូសេ ១:៧–៨, ២៧–២៩ ) ។ ព្រះបានពន្យល់ដល់ម៉ូសេថា ទ្រង់បានបង្កើតផែនដីនេះដើម្បី « នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ នៅពេលយើងយល់ដឹងថាការបង្កបង្កើតត្រូវបានអនុវត្តនៅក្រោមការដឹកនាំ និងអំណាចរបស់ព្រះផ្ទាល់ នោះយើងចាប់ផ្ដើមមើលឃើញថាវាចាំបាច់ប៉ុណ្ណានៅក្នុងផែនការរបស់ទ្រង់សម្រាប់សេចក្ដីសង្គ្រោះរបស់យើង ។
តើអ្វីទៅជាការបង្កបង្កើត ?
នៅក្រោមការដឹកនាំរបស់ព្រះជាព្រះវរបិតា ព្រះយេស៊ូវគ្រីស្ទបានបង្កើតស្ថានសួគ៌ និងផែនដី និងអ្វីៗគ្រប់យ៉ាងនៅលើផែនដី ។ ព្រះវរបិតាសួគ៌បានបង្កើតលោកអ័ដាម និងនាងអេវ៉ាតាមរូបរាងរបស់ទ្រង់ផ្ទាល់ ដែលធ្វើឲ្យបុត្រាបុត្រីរបស់ទ្រង់អាចកើតមកលើផែនដីនេះ ។
ទិដ្ឋភាពទូទៅនៃប្រធានបទ ៖ ការបង្កបង្កើត
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ផែនការនៃសេចក្ដីសង្គ្រោះ, ជីវិតមុនជីវិតលើផែនដី, ព្រះយេស៊ូវគ្រីស្ទ, ការធ្លាក់របស់លោកអ័ដាម និងនាងអេវ៉ា, ជីវិតរមែងស្លាប់
ផ្នែកទី ១
ព្រះយេស៊ូវគ្រីស្ទបានបង្កើតពិភពលោកនៅក្រោមការដឹកនាំរបស់ព្រះវរបិតាសួគ៌
ក្នុងការប្រជុំក្រុមប្រឹក្សានៅឯសា្ថនសួគ៌មុនជីវិតនេះ ព្រះជាព្រះវរបិតាបានប្រកាសអំពីផែនការរបស់ទ្រង់ដើម្បីរៀបចំផែនដីមួយដែលបុត្រាបុត្រីរបស់ទ្រង់អាចមានបទពិសោធន៍នៃជីវិតរមែងស្លាប់ ( សូមមើល អ័ប្រាហាំ ៣:២៤–២៥ ) ។ ព្រះគម្ពីរបង្ហាញថាព្រះយេស៊ូវគ្រីស្ទបានធ្វើការបង្កបង្កើតនៅក្រោមការដឹកនាំរបស់ព្រះជាព្រះវរបិតា ( សូមមើល ម៉ូសេ ២:១ ) ។ ការបង្កបង្កើតផែនដីបានកើតឡើងក្នុង ៦ ដំណាក់កាល ដែលព្រះគម្ពីរហៅថា « ថ្ងៃ » ( សូមមើល ម៉ូសេ ២:១–៣១; លោកុប្បត្តិ ១:៣–៣១; អ័ប្រាហាំ ៤:១–៣១ ) ។ ព្រះអម្ចាស់មិនបានបង្ហាញថា « ថ្ងៃ » នីមួយៗមានរយៈពេលយូរប៉ុណ្ណានោះទេ ( សូមមើល គោលលទ្ធិ និងសេចក្តីសញ្ញា ១០១:៣២–៣៤ ) ។ ព្រះគម្ពីរផ្ដោតលើគោលបំណងនៃការបង្កបង្កើតជាជាងនៅលើដំណើរការដែលព្រះបានប្រើដើម្បីបង្កើតវាមក ។ គ្រប់យ៉ាងអំពីការបង្កបង្កើតធ្វើទីបន្ទាល់អំពីអង្គបង្កបង្កើត គឺព្រះយេស៊ូវគ្រីស្ទ ( សូមមើល ម៉ូសេ ៦:៦៣ ) ។
ការណ៍ទាំងឡាយដែលត្រូវពិចារណា
-
សូមអានកំណត់ត្រាសំខាន់ៗទាំងបីនៃការបង្កបង្កើតផែនដី ៖ លោកុប្បត្ដិ ១:១–២៥; ម៉ូសេ ២:១–២៥; និង អ័ប្រាហាំ ៤:១–២៥ ។ តើបងប្អូនអាចរៀនអ្វីខ្លះតាមរយៈការប្រៀបធៀបតំណត់ត្រាទាំងនេះ ?
-
សូមអាន គោលលទ្ធិ និងសេចក្តីសញ្ញា ១០១:៣២–៣៤ ។ ដោយដឹងថាមានរឿងជាច្រើនដែលនៅមិនទាន់បានបើកសម្តែងនៅឡើយ តើបងប្អូនបានប្រើអ្វីដែលបានបើកសម្តែងហើយ អំពីការបង្កបង្កើតដើម្បីពង្រឹងសចក្តីជំនឿរបស់បងប្អូននៅថ្ងៃនេះយ៉ាងដូចម្ដេច ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមចែកក្រដាសមួយសន្លឹកដល់បុគ្គលម្នាក់ៗ ។ សូមឲ្យពួកគេបត់ក្រដាសនោះពាក់កណ្តាលឲ្យបានបីដង ហើយបន្ទាប់មកលាតត្រដាងក្រដាសនោះដែលមានការបែងចែកទៅជាប្រាំបីផ្នែក ។ សូមឲ្យពួកគេសរសេរ ឬគូរនៅលើក្រដាសរបស់ពួកគេនូវអ្វីដែលបានកើតឡើងក្នុងអំឡុងពេលនៃថ្ងៃនីមួយៗនៃការបង្កបង្កើត មួយថ្ងៃក្នុងមួយផ្នែក ដោយរាប់ថ្ងៃបង្កបង្កើតតាមលំដាប់លំដោយ ។ នៅក្នុងចន្លោះជ្រុងទាំងប្រាំបី សូមឲ្យពួកគេសរសេរ ឬគូរអ្វីមួយអំពីការបង្កបង្កើតដែលពួកគេមានអំណរគុណជាពិសេស ( ឧទាហរណ៍ គ្រួសាររបស់ពួកគេ សមុទ្រ សត្វពាហនៈ និង ព្រិល ជាដើម ) ។
ស្វែងយល់បន្ថែមទៀត
-
កូល៉ុស ១:៩–១៧; គោលលទ្ធិ និងសេចក្តីសញ្ញា ៧៦:២២–២៤; ម៉ូសេ ១:២៧–៣៩
-
រ័សុល អិម ណិលសុន « The Creation » Ensign ខែ ឧសភា ឆ្នាំ ២០០០ ទំព័រ ៨៤–៨៦
-
ប្រ៊ូស អ័រ ម៉ាក់ខន់ឃី « Christ and the Creation » Ensign ខែ មិថុនា ឆ្នាំ ១៩៨២ ទំព័រ ៩–១៥
-
ថូម៉ាស អ័រ វ៉ាលីតា « The Length of Creation » Liahona ខែ មីនា ឆ្នាំ ១៩៩៨ នៅលើគេហទំព័រ ChurchofJesusChrist.org
-
អាលីសា ខេ ស្តានថុន « វិទ្យាសាស្ត្រ និងការស្រាវជ្រាវរបស់យើងរកការពិត » លីអាហូណា ខែ កក្កដា ឆ្នាំ ២០១៦ ទំព័រ ៥៤–៥៧
-
« We Lived with God » ( វិដេអូ ) នៅលើគេហទំព័រ ChurchofJesusChrist.org
ផ្នែកទី ២
ការបង្កបង្កើតដ៏អស្ចារ្យបំផុតនៃអ្វីៗទាំងអស់គឺមនុស្សជាតិ
លោកអ័ដាម និងនាងអេវ៉ាគឺជាបុរស និងស្រ្តីទីមួយនៅលើផែនដី ដែលត្រូវបានបង្កើតឡើងដោយព្រះ ហើយបានប្រទានរូបកាយដែលដូចទៅនឹងព្រះមាតាបិតាសួគ៌របស់យើង ( សូមមើល លោកុប្បត្តិ ១:២៧ ) ។ លោកអ័ដាម និងនាងអេវ៉ាបានរៀបការជាមួយគ្នាក្នុងអាពាហ៍ពិពាហ៍នៅពេលដែលពួកគេត្រូវបានប្រទានពរដោយព្រះអម្ចាស់ ( សូមមើល ម៉ូសេ ២:២៧–២៨ ) ។ គោលលទ្ធិ និងសេចក្តីសញ្ញាបង្ហាញថាគោលបំណងដ៏ទេវភាពមួយនៃផែនដីនេះគឺជាប់ទាក់ទងនឹងផែនការរបស់ព្រះសម្រាប់បុត្រាបុត្រីរបស់ទ្រង់ដើម្បីចូលរួមក្នុងអាពាហ៍ពិពាហ៍ និងគ្រួសារ ( សូមមើល គោលលទ្ធិ និងសេចក្ដីសញ្ញា ៤៩:១៥–១៧ ) ។ ដោយសារការបង្កបង្កើតនោះ វិញ្ញាណរបស់បុត្រាបុត្រីរបស់ព្រះអាចទទួលបានរូបកាយ និងមានបទពិសោធន៍នៃជីវិតរមែងស្លាប់ ។
ការណ៍ទាំងឡាយដែលត្រូវពិចារណា
-
សូមអាន លោកុប្បត្ដិ ១:២៧; រ៉ូម ៨:១៦–១៧; ហេព្រើរ ១២:៩; គោលលទ្ធិ និងសេចក្តីសញ្ញា ២០:១៧–១៨; ម៉ូសេ ២:២៦–២៧; ៦:៨–៩ ។ តើវាអាចធ្វើឲ្យមានភាពខុសគ្នាអ្វីខ្លះពេលដឹងថាយើងជាកូនរបស់ព្រះ ? បងប្អូនក៏អាចអានផងដែរនូវ អេធើរ ៣:៦–១៦; គោលលទ្ធិ និងសេចក្តីសញ្ញា ១១០:១–៤; ១៣០:២២ ។
-
សូមអានកថាខណ្ឌនេះមកពី « ក្រុមគ្រួសារ ៖ ការប្រកាសដល់ពិភពលោក » ៖ « ព្រះបញ្ញត្តិទីមួយដែលព្រះបានប្រទានដល់លោកអ័ដាម និងនាងអេវ៉ា ទាក់ទងទៅនឹងសមត្ថភាពរបស់ពួកគេសម្រាប់ភាពជាឪពុកម្ដាយ ក្នុងនាមជាស្វាមី និងភរិយា ។ យើងសូមប្រកាសថា ព្រះបញ្ញត្តិរបស់ព្រះសម្រាប់ឲ្យកូនចៅរបស់ទ្រង់បង្កើតកូនឲ្យចម្រើនជាច្រើនឡើង ឲ្យមានពាសពេញលើផែនដីនេះនៅតែឲ្យប្រតិបត្តិនៅឡើយ ។ យើងសូមប្រកាសថែមទៀតថា ព្រះបានបញ្ជាថា អំណាចពិសិដ្ឋនៃការបង្កើតកូន គឺត្រូវបានប្រើរវាងតែបុរស និង ស្ត្រី ដែលបានរៀបអាពិហ៍ពិពាហ៍ស្របច្បាប់ ជាប្តី និង ប្រពន្ធប៉ុណ្ណោះ » ។ តើតាមការដឹងអំពីគោលបំណងដ៏ទេវភាពនៃការបង្កបង្កើតអាចជួយបងប្អូនឲ្យយល់អំពីមូលហេតុដែលព្រះមានច្បាប់គ្រប់គ្រងអំណាចនៃការបង្កើតដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមមើលវីដេអូ « God’s Greatest Creation » ( ២:៥១ ) ។ សូមពិភាក្សាអំពីភស្ដុតាងមួយចំនួនដែលយើងត្រូវបានបង្កើតឡើងក្នុងរូបភាពរបស់ព្រះ ។
ស្វែងយល់បន្ថែមទៀត
-
រ័សុល អិម ណិលសុន « Decisions for Eternity » Liahona ខែ វិច្ឆិកា ឆ្នាំ ២០១៣ ទំព័រ ១០៦–១០៩
-
គណៈប្រធាន ទី១ ( ឆ្នាំ ១៩០៩ ) « The Origin of Man » Ensign ខែ កុម្ភៈ ឆ្នាំ ២០០២ ទំព័រ ២៦–៣០
-
Church History Topics « Organic Evolution » នៅលើបណ្ណាល័យដំណឹងល្អ
ផ្នែកទី ៣
ផែនដីជាអំណោយទានមួយ ហើយយើងជាអ្នកកាន់កាប់ត្រួតត្រាវា
ព្រះទ្រង់បានប្រទានឲ្យលោកអ័ដាមនូវ « អំណាចត្រួតត្រា » លើជីវិតផងទាំងឡាយដែលកម្រើកនៅលើផែនដី ( ម៉ូសេ ២:២៨; ៥:១ ) ។ នៅក្នុងវិវរណៈសម័យទំនើប ព្រះអម្ចាស់បានមានបន្ទូលថា « គ្រប់ទាំងអស់ដែលបានមកពីផែនដី » គឺ « ត្រូវបានបង្កើតឡើងសម្រាប់ផលប្រយោជន៍ និងការប្រើប្រាស់របស់មនុស្ស » ( គោលលទ្ធិ និងសេចក្តីសញ្ញា ៥៩:១៨ ) ។ ប៉ុន្តែព្រះអម្ចាស់បានមានបន្ទូលថាធនធាននៃផែនដីត្រូវតែប្រើ « ដោយការវិនិច្ឆ័យ គឺមិនឲ្យហួសហេតុ ឬដោយការគំរាមកំហែងឡើយ » ( គោលលទ្ធិ និងសេចក្តីសញ្ញា ៥៩:២០ ) ។
ប៊ីស្សព ហ្គែរ៉ល កូសសេ បានបង្រៀនថា « អំណោយដ៏ទេវភាពនៃការបង្កបង្កើត ពុំមែនបានមកដោយគ្មានកាតព្វកិច្ច និងទំនួលខុសត្រូវនោះទេ ។ កាតព្វកិច្ចទាំងនេះត្រូវបានពិពណ៌នាយ៉ាងល្អបំផុតតាមគោលគំនិតនៃ ការកាន់កាប់ត្រួតត្រា ។ នៅក្នុងវាក្យសព្ទនៃដំណឹងល្អ ពាក្យ ការកាន់កាប់ត្រួតត្រា បានកំណត់នូវការទទួលខុសត្រូវខាងវិញ្ញាណ ឬខាងសាច់ឈាមដ៏ពិសិដ្ឋ ដើម្បីថែរក្សាអ្វីមួយដែលជាកម្មសិទ្ធិរបស់ព្រះ ដែលយើងមានទំនួលខុសត្រូវ » ។
ការណ៍ទាំងឡាយដែលត្រូវពិចារណា
-
សូមអាន គោលលទ្ធិ និងសេចក្ដីសញ្ញា ៥៩:១៦–២០ ហើយធ្វើបញ្ជីនៃមូលហេតុដែលព្រះអម្ចាស់បានប្រទានឲ្យយើងនូវផែនដី និងអ្វីៗគ្រប់យ៉ាងនៅលើផែនដីនោះ ។ សូមពិចារណាអំពីទិដ្ឋភាពនៃការបង្កើតរបស់ព្រះអម្ចាស់បាននាំឲ្យបងប្អូនមានអំណរ ។
-
ព្រះអម្ចាស់ទ្រង់បានប្រាប់ យ៉ូសែប ស្ម៊ីធ ថាមនុស្សគ្រប់គ្នាគឺ « ទទួលការខុសត្រូវ ជានាយតម្រួតការលើព្រះពរទាំងឡាយខាងផែនដី ដែលយើងបានបង្កើត ហើយបានរៀបចំឡើង សម្រាប់សត្វលោកទាំងឡាយរបស់យើង » ( គោលលទ្ធិ និងសេចក្ដីសញ្ញា ១០៤:១៣ ) ។ តើបងប្អូនអាចធ្វើជាអ្នកត្រួតពិនិត្យដ៏ល្អ ឬជាអ្នកថែរក្សាការបង្កើតរបស់ព្រះបានយ៉ាងដូចម្ដេច ? តើបងប្អូនគិតថាព្រះអម្ចាស់មានន័យយ៉ាងណាចំពោះការប្រុងប្រយ័ត្នក្នុងការប្រើរឿងទាំងនេះ « ដោយការវិនិច្ឆ័យ គឺមិនឲ្យហួសហេតុ ឬដោយការគំរាមកំហែងឡើយ » ? ( គោលលទ្ធិ និងសេចក្ដីសញ្ញា ៥៩:២០ ) ។
សកម្មភាពសម្រាប់ការរៀនសូត្រជាមួយអ្នកដទៃ
-
ដើរលេងនៅក្បែរផ្ទះរបស់បងប្អូន ។ រកមើលអ្វីៗក្នុងធម្មជាតិដែលស្រស់ស្អាត ឬនាំឲ្យបងប្អូនមានសេចក្តីសប្បាយរីករាយ ។ ហេតុអ្វីបងប្អូនគិតថាព្រះបានធ្វើឲ្យពិភពលោកនេះស្រស់ស្អាត ?
ស្វែងយល់បន្ថែមទៀត
-
ហ្គែរ៉ល កូសសេ « ការកាន់កាប់ត្រួតត្រានៅលើផែនដីរបស់យើង » លីអាហូណា ខែ វិច្ឆិកា ឆ្នាំ ២០២២ ទំព័រ ៥៧–៥៩
-
Topics and Questions « Environmental Stewardship and Conservation » នៅលើបណ្ណាល័យដំណឹងល្អ
ធនធានផ្សេងៗទៀតអំពីការបង្កបង្កើត