Սնուցեք ձեր սեփական հավատքը

Ուրիշի բեռը թեթևացնելը ջանք է պահանջում և կարող է անսպասելի խնդիրներ առաջացնել մեզ համար: Հետևեք, որպեսզի հոգևոր առումով ամուր մնաք և հիմնված լինեք Հիսուս Քրիստոսի վերականգնված ավետարանի վրա: Արտակարգ իրավիճակներում ինքնաթիռի ուղևորներին հրահանգում են նախ ապահովել իրենց թթվածնի դիմակները, այնուհետև օգնել ուրիշներին: Նմանապես, մենք կարող եք բարձրացնել ուրիշներին, եթե կատարենք մեր սեփական հավատքը և վկայությունը սնուցելու կարևոր աշխատանքը։

Հետևյալ սկզբունքները կարող են օգնել ձեզ ամրացնել ձեր հավատքը ուրիշներին ծառայելիս.

Հիշեք, թե ինչին եք հավատում և ինչ եք զգացել։ Խորհեք այն պահերի շուրջ, երբ զգացել եք Սուրբ Հոգու ազդեցությունը: Հիշեք այն պահերը, երբ զգացել եք խաղաղություն, ուրախություն, սեր և հստակություն։ Մտածեք այն մասին, երբ զգացել եք, որ Աստված խոսում է ձեզ հետ առանձին՝ ձեր հավատքը հաստատելով։ Ձեր անցյալի հոգևոր փորձառությունները կարող են ծառայել որպես ուժի աղբյուր և պաշտպանություն կասկածից ու վախից:
Շարունակեք խորացնել ձեր վկայությունը: Կարևոր է շարունակել անել այն ամենը, ինչն օգնում է զարգացնել ձեր վկայությունը ավետարանի մասին: Դրանք կարող են ներառել սուրբ գրությունների ընթերցանությունը, աղոթելը, հաղորդությունը ճաշակելը, տաճարում երկրպագելը և մյուսներին ծառայելը: Այդ պարզ սովորությունները կարող են օգնել ձեզ զգալ Հոգու ազդեցությունը և մնալ հավատարիմ:
Ձեռք մեկնեք ուրիշներին: Եթե ընկերոջը կամ ընտանիքի անդամին ծառայելու բեռը ծանր է, հիշեք, որ դուք միայնակ չեք: Դուք կարող եք կապ հաստատել վստահելի ընտանիքի անդամների, ընկերների, Եկեղեցու ղեկավարների կամ մասնագետների հետ: Նրանց կարեկցանքը, աղոթքները և փորձը կարող են օգնել ձեզ հիշել, թե Աստված որքան է սիրում ձեզ: Նրանք կարող են նաև աջակցել ձեզ, երբ փնտրեք ձեր հարցերի պատասխանները:
Առողջ սահմաններ կիրառեք։ Թեև մենք պետք է ձգտենք լսել և աջակցել ուրիշներին, երբ նրանք հարցեր կամ մտահոգություններ են ունենում, մենք պետք է նաև գիտակցենք մեր կարիքներն ու սահմանափակումները: Ձեր հույզերն ու զգացմունքները նույնպես կարևոր են: Դուք կարող եք վախ, հիասթափություն և վիշտ զգալ: Եթե խոսակցությունը չափազանց ճնշող է թվում, արտահայտեք ձեր զգացմունքները և նոր հանդիպման պայմանավորվածություն ձեռք բերեք: Հնարավոր է, ձեր մտերիմը ցանկանա իր հարցերը անընդմեջ դարձնել զրույցի առարկա կամ խոսելիս փորձի նվաստացնել ձեզ կամ ձեր հավատքը: Ճիշտ ինչպես դուք պետք է հարգեք մյուսների կյանքի ճանապարհը, այնպես էլ նրանք պետք է հարգեն ձերը: Դուք չպետք է ձեզ նվաստացած զգաք, եթե ձեր տեսակետները չեն համընկնում մեկ ուրիշի տեսակետների հետ։
Եղեք ավելի լավ տեղեկացված: Օգնելու համար պարտադիր չէ որևէ հարցի մասնագետ լինել: Բայց շատ օգտակար կլինի սովորել անծանոթ թեմայի մասին: Հետամուտ եղեք Եկեղեցու վարդապետության և պատմության խոհուն ուսումնասիրությանը: Ավելի լավ ծանոթացեք ընդհանուր հարցերին: Իմացեք, թե ինչ են ասել Եկեղեցու ղեկավարները և հավատարիմ փորձագետները այս թեմաների վերաբերյալ: Այդ գործընթացում դուք կարող եք շատ բան սովորել, մոռանալ և նորից սովորել:
Ծանոթացեք պատասխաններ փնտրելու սկզբունքներին: Ուսումնասիրեք և օգտագործեք սկզբունքները, որոնց մասին խոսվում է այս նյութի Փնտրել ձեր հարցերի պատասխանները բաժնում։

Հիմնական սուրբ գրություններ․ Ղուկաս 22․31-32, 1 Նեփի 15․8-11, Հակոբոս 4․6, Ալմա 32․41-43, Վարդապետություն և Ուխտեր 6․14։