Պատվիրաններ

Աստվածային ճշմարտություններ՝ մեզ Աստծո ուխտի արահետում առաջնորդելու համար

Երբևէ նկատե՞լ եք, թե քանի ցուցանակ է փակցված ճանապարհների և մայրուղիների երկայնքով: Որոշ ցուցանակներ տալիս են ուղղություններ, որոնք կօգնեն վարորդներին ուղևորվել այնտեղ, որտեղ նրանք ցանկանում են գնալ: Այլ նշանները նպաստում են անվտանգությանը՝ ցույց տալով արագության սահմանափակումներ կամ նախազգուշական ուղերձներ ճանապարհային պայմանների մասին: Եթե վարորդները որոշեն անտեսել ճանապարհային նշանները, նրանք կարող են վտանգի ենթարկել իրենց և մյուսներին: Երկնային Հոր պատվիրանները մի փոքր նման են ճանապարհային նշաններին: Երբ հնազանդվում եք, պատվիրանները ձեզ ուղղորդում են այն ճանապարհի վրա, որը տանում է դեպի Աստծո ներկայությունը: Նրանք ձեզ հրահանգում են, թե ինչպես գտնել խաղաղություն և ուրախություն այս կյանքում: Աստծո պատվիրանները կարող են նաև օգնել ձեզ խուսափել այս աշխարհի հոգևոր և նյութական շատ վտանգներից:

Պատվիրանները մեր հանդեպ ունեցած Աստծո սիրո վկայությունն են: Պատվիրանները պահելու ընտրությունը օրհնություններ և ուրախություն է բերում ձեր կյանք: Պատվիրաններին հնազանդվելը նաև կպատրաստի ձեզ վերադառնալ և հավիտյան ապրել Աստծո հետ (տես Վարդապետություն և Ուխտեր 82.8–10): Ինչպես ուսուցանել է Նախագահ Դալլին Հ. Օուքսը. «Աստծո համընդհանուր և կատարյալ սերը տեսանելի է Նրա ավետարանական ծրագրի բոլոր օրհնություններում, ներառյալ այն փաստը, որ Աստծո ամենաընտիր օրհնությունները պահված են նրանց համար, ովքեր հնազանդվում են Նրա օրենքներին»:

Ի՞նչ են պատվիրանները:

Պատվիրանները աստվածային օրենքներ և պահանջներ են, որոնք Աստված տալիս է մեր օգտի համար: Աստծո պատվիրաններին հնազանդվելն անհրաժեշտ է մեր վեհացման համար: Պահելով պատվիրանները՝ մենք ցույց ենք տալիս մեր սերը Աստծո հանդեպ և ստանում ենք հոգևոր և նյութական օրհնություններ:

Ավետարանի ուսումնասիրությանն առնչվող ուղեցույցներ. Հնազանդություն, Ազատ կամք, Հավատք առ Հիսուս Քրիստոս, Ապաշխարություն

Բաժին 1

Պատվիրանները ավետարանով ապրելու կարևոր մասն են

Նկար

Հիսուսը ուսուցանում է հարուստ երիտասարդ իշխանավորին

Հիսուսն ուսուցանեց, որ երկու մեծագույն պատվիրաններն են՝ սիրել Աստծուն և սիրել ձեր մերձավորին: Մյուս բոլոր պատվիրաններն ուղղություն են տալիս, թե ինչպես կատարել այդ երկուսը: (Տես Մատթեոս 22.37–40:)

Սուրբ գրությունները ցույց են տալիս, որ Աստված ուսուցանել է պատվիրանները մարգարեների միջոցով՝ Ադամի և Եվայի օրերից սկսած (տես Մովսես 5.4–5): Ողջ աշխարհում շատ մարդիկ ծանոթ են Տասը պատվիրաններին, որոնք Եհովան հայտնեց Մովսեսին (տես Ելք 20.3–17): Այս աստվածային օրենքները կրկին շեշտադրվել են մեր օրերում՝ այլ կարևոր ճշմարտությունների հետ մեկտեղ (տես Վարդապետություն և Ուխտեր 42.19–29, 59.5–13): Աստծո պատվիրաններն արգելում են անբարոյական արարքները, ինչպիսիք են՝ անազնվությունը, շնությունը և սպանությունը։ Աստված նաև պատվիրաններ է տվել բարիք գործելու համար, ինչպես օրինակ՝ աղոթել, ներել, և հոգ տանել կարիքավորների համար:

Հնազանդությունը պատվիրաններին լավագույնս մոտիվացված է Երկնային Հոր և Նրա Որդու՝ Հիսուս Քրիստոսի հանդեպ մեր սիրով: Երբ մենք պայքարում ենք Աստծո պատվիրաններին հնազանդվելու համար, Նա հրավիրում է մեզ ապաշխարել և դառնալ դեպի Իրեն:

Մտորելու հարցեր

Կարդացեք Մատթեոս 22.37–40 հատվածները: Ձեր կարծիքով, ինչո՞ւ Հիսուսն ասաց, որ մեծագույն պատվիրաններն են՝ սիրել Աստծուն և սիրել ձեր մերձավորին: Ինչպե՞ս են մյուս պատվիրաններն արտացոլում այս երկու պատվիրանների իմաստը:
Պատկերացրեք, որ ինչ-որ մեկն առաջարկել է, որ Աստծո յուրաքանչյուր պատվիրանին հետևելը կարևոր չէ: Ինչպե՞ս կարձագանքեիք: Ի՞նչ փորձառություններ եք ունեցել, որոնք մեծացնում են ձեր երախտագիտությունն Աստծո պատվիրանների հանդեպ:
Կարդացեք Մարկոսի 10.17–22 հատվածները՝ ուշադրություն դարձնելով, թե հարուստ երիտասարդն ինչպես էր վերաբերվում պատվիրաններին: Ի՞նչ եք սովորում պատվիրաններին հնազանդվելու մասին Հիսուս Քրիստոսի հետ նրա շփումից: Եթե դուք ձեզ դնեք այս մարդու դիրքում, ձեր կարծիքով Հիսուսը ի՞նչ փոփոխություն կխնդրեր ձեզ անել:

Սովորեք միասին

Դիտեք «Ինչո՞ւ է Աստված մեզ պատվիրաններ տալիս» (0:39) տեսանյութը: Տեսանյութը դիտելուց հետո դուք կարող եք կազմել պատվիրանների ցանկը, որոնցով ապրել եք, նաև կազմել ձեր հնազանդության համար ստացած օրհնությունների ցանկը: Կարող եք նաև խոսել այն մասին, թե ինչու է կարևոր պատվիրանները դիտարկել Աստծո տեսանկյունից:

Լրացուցիչ աղբյուրներ

Ժողովող 12.13, Մոսիա 2.41, 12.33–37, 13.11–26, Վարդապետություն և Ուխտեր 130.20–21
Լ. Ուիթնի Քլեյթոն, «Ինչ որ ասէ ձեզ, արէք», Լիահոնա, մայիս 2017, 97–99,
«Մեծագույն պատվիրանը» (տեսանյութ), Ավետարանի գրադարան

Բաժին 2

Պատվիրանները մեզ մոտեցնում են Հիսուս Քրիստոսին

Նկար

Քայլել սլաքի ուղղությամբ

Հիսուսն ուսուցանեց Իր աշակերտներին. «Եթե ինձ սիրում եք, պահեք իմ պատվիրանները» (Հովհաննես 14.15, տես նաև հատված 21): Հնազանդության յուրաքանչյուր քայլ Աստծո հանդեպ ձեր սիրո դրսևորումն է և ձեզ ավելի է մոտեցնում Հիսուս Քրիստոսին: Երբ մկրտվեցիք, դուք ուխտ կապեցիք կամ խոստում տվեցիք Աստծո պատվիրանները պահելու համար: Բայց երբեմն, դուք գուցե պայքարեք դա անելու համար: Քանի որ Աստված սիրում է ձեզ, Նա հրավիրում է ձեզ հաճախակի ապաշխարել և վերադառնալ Իր մոտ: Կարող են լինել նաև դեպքեր, երբ պարզ չէ, թե Աստված ինչու է տվել որոշակի պատվիրանը: Այդ դեպքում Աստված ցանկանում է, որ դուք հավատք գործադրեք Իր հանդեպ: Բոլոր բաները կգործեն ձեր օգտի համար, երբ վստահեք Աստծուն և ձգտեք հնազանդվել Նրա պատվիրաններին (տես Վարդապետություն և Ուխտեր 100․15)։

Մտորելու հարցեր

Նախագահ Հարոլդ Բ. Լին ուսուցանել է. «Աստծո բոլոր պատվիրաններից ամենակարևորն այն է, որը դուք դժվարանում եք պահել այսօր»: Ի՞նչ կարող եք անել, որպեսզի կենտրոնանաք այդ պատվիրանին հնազանդվելու ձգտման վրա:
Երբեմն պատվիրաններին հնազանդվելը կարծես մեր հավատքի փորձությունը լինի: Կարդացեք 1 Նեփի 3.7։ Ինչպե՞ս կարող է այս հատվածը օգնել, եթե դուք մաքառում եք հնազանդվել Աստծո պատվիրաններից մեկին, ինչպես օրինակ՝ վճարել տասանորդ կամ պահել Իմաստության Խոսքը:

Սովորեք միասին

Դուք կարող եք օգտագործել «Հետևել Աստծուն» (1։25) տեսանյութը՝ քննարկելու, թե կանոնավոր ապաշխարությունը ինչպես է Աստծո պատվիրաններին հնազանդվելու ձգտման կարևոր մասը հանդիսանում։

Լրացուցիչ աղբյուրներ

Մոսիա 2.20–24, 41, 18.8–10,3 Նեփի 12.19–20
Դ. Թոդ Քրիստոֆերսոն, «Սրբերի ուրախությունը», Լիահոնա, նոյեմբեր 2019, 15–18
Քերոլ Մ. Սթեֆենս, «Եթե սիրում եք ինձ, պահեք իմ պատվիրանները», Լիահոնա, նոյեմբեր 2015, 118–20

Այլ աղբյուրներ Աստծո պատվիրանների կարևորության մասին