Սուրբ Հոգու պարգև

Ունենալ Աստվածագլխի անդամին՝ որպես մշտական ուղեկից

Երբևէ մտածե՞լ եք այն բոլոր ուղիների մասին, որոնցով դուք օրհնվել եք Սուրբ Հոգու պարգևի միջոցով: Աստծո բոլոր զավակները կարող են զգալ Սուրբ Հոգու ազդեցությունը, որն առաջնորդում է նրանց դեպի Հիսուս Քրիստոսն ու Նրա ավետարանը: Սակայն Սուրբ Հոգու պարգևը վերապահված է նրանց համար, ովքեր Հիսուս Քրիստոսի հանդեպ հավատքի և ապաշխարության միջոցով ուխտեր են կապում Հիսուս Քրիստոսի հետ՝ մկրտության միջոցով: Այս պարգևը խոստումն է, որ դուք կարող եք վայելել Սուրբ Հոգու՝ Աստվածագլխի անդամի մշտական ընկերակցությունը: Դա սովորական պարգև չէ, այն չի երևում, բայց դրա ուժը անհերքելի է, երբ դուք ընտրում եք ստանալ այն արդար ապրելու միջոցով: Նրանք, ովքեր ստանում են Սուրբ Հոգու պարգևը, մաքրվում են մեղքից, ստանում են անձնական հայտնություն և վայելում օրհնությունները, որոնք հայտնի են որպես «Հոգու պարգևներ»:

Ի՞նչ է Սուրբ Հոգու պարգևը:

Քահանայության հաստատման արարողությունը գալիս է այն բանից հետո, երբ մարդը մկրտվել է ջրի մեջ ընկղմվելով: Արարողությունը կատարվում է Մելքիսեդեկյան Քահանայություն կրող մեկի կողմից ձեռքերը դնելով: Այս արարողության ժամանակ է, որ տրվում է Սուրբ Հոգու պարգևը: Սուրբ Հոգին Աստվածագլխի անդամն է և կարող է մշտական ուղեկից լինել նրանց համար, ովքեր ձգտում են պահել պատվիրանները և հրավիրել Նրան իրենց կյանք:

Թեմայի ակնարկ. Սուրբ Հոգի

Ավետարանի ուսումնասիրության ուղեցույցներ. Սուրբ Հոգի, Ուխտեր և արարողություններ, Անձնական հայտնություն, Հոգու պարգևներ

Բաժին 1

«Ստացիր Սուրբ Հոգին»

Երբ ինչ-որ մեկը հաստատվում է որպես Եկեղեցու անդամ, նրան ասում են՝ «ստացիր Սուրբ Հոգին»: Սուրբ Հոգու պարգևը որևէ մեկին պարտադրված չէ: Անդամների պարտականությունն է դառնում հրավիրել Սուրբ Հոգուն՝ լինելու իրենց հետ (տես Վարդապետություն և Ուխտեր 88․33)։ Երեց Դեյվիդ Ա. Բեդնարն ասել է. «Երբ մենք ստանում ենք այս արարողությունը, մեզանից յուրաքանչյուրն ընդունում է սուրբ և շարունակվող պարտականություն՝ ցանկանալու, ձգտելու, աշխատելու և այնպես ապրելու, որ մենք իսկապես «ստանանք Սուրբ Հոգին» և դրան ծառայող հոգևոր պարգևները»:

Հիսուսը բացատրեց Նիկոդեմոսին՝ հրեաների կառավարիչին, որ «եթե մեկը ջրից ու Հոգուց չծնվի, նա չի կարող մտնել Աստծու արքայությունը» (Հովհաննես 3.5): Ուստի, բացի ջրով մկրտվելուց, Տերը ցանկանում է, որ դուք «Հոգուց ծնված լինեք» (հատված 6): Դա տեղի է ունենում, երբ դուք ստանում եք Սուրբ Հոգու պարգևը և զգում «կրակով և Սուրբ Հոգով մկրտությունը» (տես 2 Նեփի 31.13–14): Կրակը մաքրության խորհրդանիշ է: Այս սրբագործող զորությունը բերում է մեղքերի թողություն (տես 2 Նեփի 31.17, 3 Նեփի 12.1–2): Մկրտությունից հետո Եկեղեցու անդամները կարող են աստիճանաբար զգալ կրակով մկրտությունը (տես 3 Նեփի 9.20) կամ ավելի անմիջականորեն (տես Մոսիա 4.2–3):

Մտորելու հարցեր

Երբ հարություն առած Հիսուս Քրիստոսը սպասավորեց մարդկանց Արևմտյան կիսագնդում, Նա տասներկու աշակերտներին տվեց զորություն՝ շնորհելու Սուրբ Հոգին (տես 3 Նեփի 18.36–37): Մարդկանց ուսուցանվել էր այս պարգևի մասին, և «նրանք աղոթեցին նրա համար, ինչն իրենք ամենաշատն էին փափագում. և նրանք փափագում էին, որ Սուրբ Հոգին շնորհվեր իրենց» (3 Նեփի 19.9): Ինչպե՞ս կբնութագրեք ձեր զգացմունքները Սուրբ Հոգու պարգևի վերաբերյալ:
Մարգարե Ջոզեֆ Սմիթն ուսուցանել է. «Ջրով մկրտությունը, առանց կրակով մկրտության և Սուրբ Հոգու ներկայության, ոչ մի օգուտ չունի. դրանք անհրաժեշտորեն և անքակտելիորեն կապված են»: Որպեսզի օգնեք ձեզ ավելի լավ հասկանալ «կրակով և Սուրբ Հոգով մկրտության» իմաստը, դիտեք «Կրակով մկրտությունը» (1:41) տեսանյութը: Ելնելով տեսանյութում տրված երեց Դեյվիդ Ա. Բեդնարի մեկնաբանություններից, ինչպե՞ս կբացատրեք «կրակով մկրտության» իմաստը:

Լրացուցիչ նյութեր

Գործք Առաքելոց 10, Մորոնի 2, Վարդապետություն և Ուխտեր 76․50-52
Բոյդ Ք. Փաքեր, «Սուրբ Հոգու պարգևը. Ինչ պետք է իմանա յուրաքանչյուր անդամ», Ensign, օգոսոս 2006, 46-52)
Եկեղեցու նախագահների ուսմունքները․ Ջոզեֆ Սմիթ (2007), 89-100

Բաժին 2

Սուրբ Հոգին կարող է լինել մեր մշտական ուղեկիցը

երիտասարդ տղամարդիկ՝ սքեյթբորդները ձեռքերում պահած

Նախագահ Հենրի Բ. Այրինգն ասել է. «Մենք ունենք Սուրբ Հոգու մշտական ընկերակցության կարիքը: Մենք կամենում ենք դա, այնուամենայնիվ, մենք գիտենք փորձառությունից, որ այն հեշտ չէ պահպանել: Մեզանից յուրաքանչյուրն ասում է և կատարում է քայլեր, որոնք կարող են վիրավորել Սուրբ Հոգուն: Տերն ուսուցանեց մեզ, որ Սուրբ Հոգին կլինի մեր մշտական ուղեկիցը, երբ մեր սրտերը լցված լինեն գթությամբ, և երբ առաքինությունը զարդարի մեր մտքերն անդադար (տես Վ&Ու 121.45)»: Երբ դուք ձգտում եք ընկերակցություն զարգացնել Սուրբ Հոգու հետ, դուք կզգաք, թե ինչը պետք է փոխվի ձեր կյանքում

Մտորելու հարցեր

Հաղորդության աղոթքները հզոր հիշեցում են առ այն, որ Սուրբ Հոգին միշտ կարող է լինել մեզ հետ (տես Վարդապետություն և Ուխտեր 20.77, 79): Երբ դուք արժանավորությամբ պատրաստվում եք և ճաշակում հաղորդությունը, դուք հրավիրում եք Հոգու ընկերակցությունը: Ինչպե՞ս է ձեր կյանքը օրհնվել, երբ ձգտել եք արժանի լինել Նրա մշտական ներկայությանը:

Սովորեք միասին

Կարդացեք և խորհեք Նախագահ Գորդոն Բ. Հինքլիի այս խոսքերի շուրջ. «Կարծում եմ, որ Մորմոնն իր փորձից շատ լավ գիտեր իր խոսքերի ճշմարտացիությունը, որ «Մխիթարիչը, որը լցնում է հույսով և կատարյալ սիրով, սեր, որը համբերում է ջանասիրությամբ առ աղոթքը, մինչև որ կգա վերջը, երբ բոլոր սրբերը կբնակվեն Աստծո հետ» (Մորոնի 8.26): Թեև մենք երբեմն կարող ենք մենակ մնալ աշխարհի մարդկանց մեջ, մենք կարիք չունենք միայնակ լինել, քանի որ Տերը տվել է մեզ Սուրբ Հոգին, որպեսզի մեր ուղեկիցը լինի՝ մեզ հետ քայլելու համար»: Դուք կարող եք քննարկել, թե Մորմոն մարգարեին ինչու էին անհրաժեշտ իր նկարագրած օրհնությունները: Ե՞րբ է Սուրբ Հոգին խաղաղություն և օգնություն ցույց տվել ձեզ:

Լրացուցիչ նյութեր

3 Նեփի 27.20, Վարդապետություն և Ուխտեր 14․8, 20․77, 121.45–46
Դեյվիդ Ա. Բեդնար, «Որ Նրա Հոգին միշտ մեզ հետ ունենանք», Լիահոնա, ապրիլ 2006, 28–31
Դալլին Հ. Օուքս, «Միշտ ունեցիր Նրա Հոգին»,,” Ensign, հոկտեմբեր 1996, 59–61
Գորդոն Բ. Հինքլի, «Սուրբ Հոգու պարգևը», Լիահոնա, հունվար 2005, 5–7

Բաժին 3

Ինչպե՞ս կարող եմ իմանալ՝ արդյոք ես զգում եմ Սուրբ Հոգին

Երբևէ փորձե՞լ եք շփվել մեկի հետ, ով խոսում է ձեզ անհասկանալի լեզվով: Նույնքան հիասթափեցնող կարող է լինել, երբ ինչ-որ մեկն ասում է, որ զգում է Հոգին, բայց դուք չգիտեք, թե դա ինչ է ձեզ համար: Այնուամենայնիվ, ամաչելու բան չկա, քանի որ մենք բոլորս զգում ենք Հոգին տարբեր ձևերով: Դուք կսովորեք ճանաչել և հասկանալ, թե ինչպես է Սուրբ Հոգին հաղորդակցվում ձեզ հետ, սակայն կարող է ժամանակ և ջանքեր պահանջվել: Եղիա մարգարեն իմացավ, որ Հոգին կարող է նմանվել «մեղմ ու նուրբ ձայնի» (տես Գ Թագավորներ 19.11–12): Երբեմն Սուրբ Հոգին դրսևորվում է հույսի և ուրախության զգացումների միջոցով (տես Հռոմեացիներ 15.13): Սուրբ Հոգին ճշմարտությունը սովորելու կարևոր միջոց է (տես Հովհաննես 14.26, Մորոնի 10.5):

Մտորելու հարցեր

Դիտեք «Զգալ Սուրբ Հոգին. Սուրբ Հոգու զորությունը» տեսանյութը (3:17), որպեսզի տեսնեք, թե Եկեղեցու որոշ անդամներ ինչպես են զգում Հոգին: Ի՞նչ եղանակներով է Սուրբ Հոգին հաղորդակցվել ձեզ հետ:

Սովորեք միասին

Ջոզեֆ Սմիթը և Օլիվեր Քաուդերին թարգմանում էին Մորմոնի Գիրքը, երբ իմացան, որ Սուրբ Հոգուն երբեմն կարելի է ճանաչել «այրվելու» զգացողության միջոցով (տես Վարդապետություն և Ուխտեր 9.8–9): Կարդացեք Վարդապետություն և Ուխտեր 6.22–23, 8.1–2, 11.11–14 հատվածները և միասին խոսեք այն ընդհանուր ձևերի մասին, որոնցով Հոգին հաղորդակցվում է մեզ հետ: Քննարկեք, թե ինչու է կարևոր հիշել, որ «այրվելու» զգացումը միակ միջոցը չէ, որով դուք կարող եք զգալ Հոգին

Լրացուցիչ նյութեր

Գաղատացիս 5.22–23, 2 Նեփի 32.5, 8, Վարդապետություն և Ուխտեր 8.1–2, 9.8–9
Քարոզիր իմ ավետարանը. Միսիոներական ծառայության ուղեցույց (2019), 95–105:
Բոյդ Կ. Փաքեր, «Տիրոջ մոմը», Ուսումնական Սեմինարիա. Նախնական ընթերցումներ, 32-34:
Ռոնալդ Ա. Ռասբանդ, «Ես «լսում եմ Նրան»՝ արձագանքելով հուշումներին», Ոգեշնչում (բլոգ), հոկտեմբերի 21, 2021, ChurchofJesusChrist.org:
«Լսիր Նրան» տեսանյութերի հավաքածու

Այլ աղբյուրներ Սուրբ Հոգու պարգևի մասին