Mga Baruganan sa Pagpangalagad
Wala Ba Ikaw Makahibalo Niining Importante nga Bahin sa Pagpangalagad?
Ang pagpangalagad mao ang “pagkalipay kamo duyog sa mga nagakalipay” sama sa “panghilak kamo duyog sa mga nagapanghilak” (Mga Taga-Roma 12:15).
Liahona, Oktubre 2019
Mga paghulagway pinaagi ni Augusto Zambonato
Kon kita maghunahuna mahitungod sa pagpangalagad, sayon ang paghunahuna mahitungod sa pagtabang niadtong nanginahanglan. Naghisgot kita mahitungod sa pagpananom alang sa biyuda, pagdala og panihapon ngadto sa masakiton, o paghatag niadtong kinsa nakigbisog. Hinumduman nato ang tambag ni Pablo nga “panghilak kamo duyog sa mga nagapanghilak,” apan nakatutok ba kita pag-ayo sa unang bahin niana nga bersikulo—nga “pagkalipay kamo duyog sa mga nagakalipay”? (Mga Taga-Roma 12:15). Ang pagkalipay uban niadtong atong gipangalagaran—bisan kana nagpasabut sa pagsaulog sa ilang kalampusan o pagtabang kanila sa pagpangita og kalipay sa malisud nga mga panahon—usa ka importante nga bahin sa pagpangalagad sama sa pagpangalagad sa Manluluwas.
Ania ang tulo ka ideya nga makatabang (ug ang usa nga likayan) samtang kita mangita sa pagtutok sa maayo nga gibutang sa Dios sa atong kinabuhi.
1.Pagkahibalo
Si Bonnie H. Cordon, Kinatibuk-ang Presidente sa Young Women, nagtabang nato nga makasabut nga kinahanglan nato nga makita kadtong atong gipangalagaran—makita dili lamang ang ilang mga gisagubang ug mga pakigbisog apan usab ang ilang mga kalig-on, mga talento, ug mga kalampusan. Siya miingon nga kita kinahanglan nga mahimong “usa ka magdadapig ug usa ka kasumbungan—usa ka tawo nga nahibalo sa ilang mga kahimtang ug mopaluyo kanila sa ilang mga paglaum ug mga pangandoy.”1
Sa sambingay sa karnero ug mga kanding, ang Manluluwas naghisgot niadtong kinsa makita sa Iyang tuong kamot nga mangutana: “Ginoo, kanus-a ba kami nakakita kanimo nga gigutom ug amo ikawng gipakaon? o giuhaw ug amo ikaw gipainom?
“Kanus-a ba kami makakita kanimo nga nadumoloong ug ako ikaw gipasaka?” (Mateo 25:37–38).
“Mga kaigsoonan, ang importante nga pulong mao ang makakita,” miingon si Sister Cordon. “Ang matarung nakakita niadtong nanginahanglan tungod kay sila nagbantay ug naniid. Kita usab mahimong mabinantayon aron sa pagtabang ug paghupay, aron sa pagsaulog ug gani sa paglaum.”2
2. Pangita og mga Rason sa Pagsaulog
Magsaulog sa mga kalampusan dako o gamay. Tingali nakalahutay sa kanser o nakabuntog sa kasakit sa panagbulag, pagpangita og bag-ong trabaho o pagpangita sa nawala nga sapatos, padayon sa pagpakabuhi human sa kamatayon sa usa ka minahal o padayon og pagpakabuhi og usa ka semana nga walay asukar.
Motawag aron mopahalipay, mohatag og kard, o maniudto sa gawas. Pinaagi sa pagpakigbahin sa atong mga panalangin, pagpuyo uban sa pasalamat, ug pagsaulog sa mga panalangin ug mga kalampusan sa uban, kita “makaangkon og pagmaya diha sa hingpit nga kalipay sa atong mga kaigsoonan” (Alma 30:34).
3. Tan-awa ang Kamot sa Ginoo
Usahay ang paglipay duyog sa uban nagpasabut sa pagtabang kanila nga makakita sa mga rason sa paglipay—bisan unsa pa nga mga kalisud o mga kaharuhay ang moabut sa atong kinabuhi. Ang yanong kamatuoran nga ang Langitnong Amahan nakahibalo kanato ug andam sa pagbayaw nato mahimong usa ka talagsaong tinubdan sa kalipay.
Kamo makatabang sa uban nga makakita sa kamot sa Ginoo sa ilang kinabuhi pinaagi sa pagpakigbahin sa unsa nga paagi ninyo nakita kini sa inyong kaugalingon. Pagmadayganon sa pagpakigbahin kon sa unsa nga paagi nga ang Langitnong Amahan nakatabang kaninyo pinaagi sa inyong mga hagit. Kini nga pagpamatuod makatabang sa uban nga makahibalo ug makaila giunsa Niya sa pagtabang kanila (tan-awa sa Mosiah 24:14).
4. Ayaw Butangi og Kinutuban ang Inyong Abilidad sa Paglipay
Subo lang, kita usahay mohatag og kinutuban sa atong kaugalingong abilidad sa paglipay duyog sa uban, ilabi na kon kita mobati nga walay kasiguroan mahitungod sa unsay anaa nato nga ikatanyag o unsa ang atong kasamtangang kahimtang sa kinabuhi. Imbis mangita og kamaya sa kalipay sa uban, kita makahimo og sayop sa pagtandi. Ug sama sa gitudlo ni Elder Quentin L. Cook sa Napulog Duha ka mga Apostoles: “Ang pagtandi sa mga panalangin hapit sigurado makaabug sa kalipay. Dili mahimong mapasalamaton ta unya sa samang panahon masinahon.”3
“Unsaon nato sa pagbuntog sa kalagmitan nga komon kaayo sa hapit natong tanan?” pangutana ni Elder Jeffrey R. Holland sa Korum sa Napulog Duha ka mga Apostoles. “… Kita makaihap sa atong daghang mga panalangin ug kita makapahalipay sa kalampusan sa uban. Ang labing maayo sa tanan, kita makaserbisyo sa uban, ang labing epektibo nga paagi sa pagtabang nato sa pagpalambo og kapuangod alang sa uban.”4 Imbis motandi, daygon nato kadtong atong gipangalagaran. Gawasnong mopakigbahin unsay inyong giganahan kanila o sa mga sakop sa ilang pamilya.
Sama sa gipahinumdom ni Pablo kanato, kitang tanan mga sakop sa lawas ni Kristo, ug kon “ang usa ka bahin pasidunggan, nan, ang tanan magadungan sa pagkalipay” (1 Mga Taga-Corinto 12:26). Uban sa tabang sa Langitnong Amahan, kita makahibalo sa mga kasinatian sa uban, mosaulog sa mga kalampusan dako ug gamay, motabang kanila nga makakita sa kamot sa Ginoo, ug mobuntog sa kasina aron nga kita tinud-anay nga maglipay sa mga panalangin, mga talento, ug kalipay sa uban.