Mga Baruganan sa Pagpangalagad
Unsaon sa Pagpakigbahin sa Pagpamatuod sa Mas Natural nga Paagi
Ang pagpangalagad mao ang pagpamatuod. Ang lain-laing paagi sa pagpangalagad makapadugang sa atong mga oportunidad sa pagpakigbahin sa pagpamatuod sa pormal ug sa dili pormal nga mga paagi.
Liahona, Marso 2019
PAGHULAGWAY NI NEIL WEBB
Gihangyo kita sa pagpakigsaad nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Ang pagpakigbahin sa atong mga pagpamatuod mao ang kabahin sa pagbarug isip usa ka saksi ug usa ka gamhanan nga paagi sa pagdapit sa Espiritu Santo sa pagtandog sa kasingkasing sa usa ka tawo ug pag-usab sa ilang kinabuhi.
“Sa yanong pagkasulti, ang pagpamatuod—tinuod nga pagpamatuod, nagagikan sa Espiritu ug gikumpirmar sa Espiritu Santo—makapausab og mga kinabuhi,” miingon si Presidente M. Russell Ballard, Akting nga Presidente sa Korum sa Napulog Duha ka mga Apostoles.1
Apan ang pagpakigbahin sa atong pagpamatuod mahimong makahadlok ug dili komportable alang sa pipila kanato. Tingali tungod kini kay kita naghunahuna sa pagpakigbahin sa atong pagpamatuod sa butang nga atong gibuhat sa miting sa pagpuasa ug pagpamatuod o kon magtudlo og leksyon. Niadtong pormal nga mga sitwasyon kanunay kitang mogamit og piho nga mga pulong nga morag wala sa lugar sa natural nga panag-istoryahanay.
Ang pagpakigbahin sa atong mga pagpamatuod mahimong usa ka regular nga panalangin sa atong kinabuhi ug sa mga kinabuhi sa uban kon kita makasabut unsa ka yano ang pagpakigbahin sa unsay atong gituohan sa matag adlaw nga mga sitwasyon. Aniay pipila ka ideya aron kamo makasugod.
Himoa kini nga Yano
Ang usa ka pagpamatuod dili kinahanglan nga sugdan sa mga pulong, “Gusto ko nga mohatag sa akong pagpamatuod,” ug dili kinahanglan nga tapuson sa, “Sa ngalan ni Jesukristo, amen.” Ang usa ka pagpamatuod usa ka pagpadayag sa unsay atong gituohan ug nasayran nga tinuod. Mao nga ang pagpakigsulti sa inyong silingan diha sa dalan mahitungod sa iyang problema ug sa pag-ingon nga, “Ako nasayud nga ang Dios motubag og mga pag-ampo,” mahimong gamhanan sama sa bisan unsa nga pagpamatuod nga gipakigbahin gikan sa pulpito sa simbahan. Ang gahum dili moabut gikan sa binulakan nga mga pulong; nagagikan kini sa Espiritu Santo nga nagkumpirma sa kamatuoran (tan-awa sa Doktrina ug mga Pakigsaad 100:7–8).
Ipahaum ang Dagan sa Natural nga Panag-istoryahanay
Kon kita andam nga mopakigbahin, adunay mga oportunidad sa atong palibut aron mohaum ang pagpamatuod ngadto sa kada adlaw nga pag-istoryahanay. Pananglitan:
-
Adunay nangutana ninyo kon kumusta ang inyong katapusan sa semana. “Nindot kaayo,” tubag ninyo. “Ang Simbahan mao gayud ang akong gikinahanglan.”
-
Adunay mipadayag og simpatiya human makahibalo sa hagit sa inyong kinabuhi: “Pasayloa ko.” Inyong tubag: “Salamat sa imong pagpakabana. Nasayud ko nga ang Dios motabang kanako. Anaa siya kanunay alang kanako.”
-
Dunay misulti: “Maayo unta moarang-arang na ang panahon sa dili madugay,” o “Ang bus naulahi gyud,” o “Tan-awa ra gud ang trapiko.” Kamo tingali motubag: “Sigurado ko nga ang Dios motabang nga mamaayo ra ang tanan.”
Ipakigbahin ang Inyong mga Kasinatian
Kanunay kitang mag-istoryahanay mahitungod sa atong mga hagit. Kon dunay mosulti ninyo mahitungod unsay ilang giatubang, mahimo kamong mopakigbahin og panahon sa dihang ang Dios mitabang kaninyo sa inyong mga pagsulay ug mopamatuod nga kamo nakahibalo nga Siya motabang usab kanila. Ang Ginoo miingon nga Siya molig-on nato sa atong mga pagsulay aron “nga kamo mobarug ingon nga mga saksi alang kanako human niini, ug nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit” (Mosiah 24:14). Makabarug kita isip mga saksi Kaniya kon kita mopamatuod kon giunsa kita Niya sa pagtabang sa atong mga pagsulay.
Pag-andam
Alang sa pipila kanato, ang pagpakigbahin og pagpamatuod nga wala makapangandam mahimong makakulba. Adunay mga paagi nga kita makaplano og sayo ug “kinahanglan andam kamo kanunay sa pagtubag kang bisan kinsa nga mangutana [kanato] sa hinungdan sa paglaum nga anaa [kanato]” (1 Pedro 3:15).
Una, ang pagkaandam mahimong magpasabut nga magtan-aw giunsa nato sa pagpuyo. Gidapit ba nato ang Espiritu Santo sa atong kinabuhi ug naglig-on sa atong kaugalingong mga pagpamatuod matag adlaw pinaagi sa matarung nga pagpuyo? Naghatag ba kita og mga oportunidad sa Espiritu sa pagpakigsulti kanato ug paghatag nato sa mga pulong nga atong gikinahanglan pinaagi sa pag-ampo ug pagtuon sa kasulatan? Sama sa gitambag sa Ginoo ni Hyrum Smith, “Ayaw pagtinguha sa pagpahayag sa akong pulong, apan unaha ang pagbaton sa akong pulong, ug unya ang imong dila makasulti” (Doktrina ug mga Pakigsaad 11:21).
Ikaduha, ang pagkaandam mahimong magpasabut sa paglantaw sa unahan ug pagkonsiderar sa mga oportunidad nga anaa kaninyo nianang adlawa o nianang semanaha sa pagpakigbahin sa inyong pagpamatuod. Makaandam kamo niadto nga mga oportunidad pinaagi sa paghunahuna mahitungod kon sa unsa kaha nga paagi kini makahatag kaninyo og kahigayunan sa pagpakigbahin unsay inyong gituohan.
Pabilin nga Nakasentro sa Manluluwas ug sa Iyang Doktrina
Si Presidente Ballard mitudlo, “Bisan og makabaton kita og mga pagpamatuod sa daghang mga butang, isip mga miyembro sa Simbahan adunay sukaranang mga kamatuoran nga kinahanglan natong itudlo kanunay ug ipaambit.” Isip mga ehemplo, siya milista: “Ang Dios mao ang atong Amahan ug si Jesus mao ang Kristo. Ang plano sa kaluwasan gisentro sa Pag-ula sa Manluluwas. Si Joseph Smith mipahiuli sa kahingpitan sa walay katapusan nga ebanghelyo ni Jesukristo ug ang Basahon ni Mormon mao ang ebidensiya nga ang atong pagpamatuod tinuod.” Samtang atong gipadayag kadtong kinasingkasing nga mga kamatuoran, atong gidapit ang Espiritu sa pagpamatuod nga ang atong gisulti tinuod. Si Presidente Ballard mipasabut nga “ang Espiritu dili kapugngan kon ang lunsay nga pagpamatuod kang Kristo ihatag.”2
Ang Ehemplo sa Manluluwas
Gikapoy gikan sa biyahe padulong sa Samaria, ang Manluluwas mihunong aron mopahulay sa may atabay ug nakahimamat sa usa ka babaye didto. Nagsugod Siya sa pagpakigsulti mahitungod sa pagkuha og tubig gikan sa atabay. Gamit niining kada adlaw nga buluhaton nga gibuhat sa babaye nakahatag og oportunidad ni Jesus sa pagpamatuod sa buhi nga tubig ug sa kinabuhing dayon alang niadtong kinsa motuo Kaniya (tan-awa sa Juan 4:13–15, 25–26).
Ang Usa ka Yanong Pagpamatuod Makapausab sa Kinabuhi
Si Presidente Russell M. Nelson naghisgot bahin sa usa ka nurse kinsa nangutana ni Dr. Nelson og pangutana human sa usa ka malisud nga operasyon. “Nganong dili ikaw sama sa ubang mga surgeon?” Ang pipila ka mga surgeon nga iyang nailhan dali ra masuko ug mamalikas samtang magpahigayon og makakapoy nga proseso.
Si Dr. Nelson makatubag unta og bisan unsa sa daghang paagi. Apan yano siyang mitubag, “Tungod kay nasayud ko nga ang Basahon ni Mormon tinuod.”
Ang iyang tubag nakaaghat sa nurse ug sa iyang bana sa pagtuon sa Basahon ni Mormon. Dayon sa wala madugay si Presidente Nelson mibunyag sa nurse. Dayon paglabay sa mga dekada, samtang nagdumala sa usa ka komperensya sa stake didto sa Tennessee, USA, usa ka bag-ong naorden nga Apostol, si Presidente Nelson nalipay sa wala damha nga panagkita pag-usab uban sa nurse. Mipakigbahin siya nga ang iyang pagkakabig, tungod sa iyang yano nga pagpamatuod ug impluwensya sa Basahon ni Mormon, nakatabang sa pagkabig sa laing 80 ka tawo.3
Pagdapit sa Paglihok
“Ayaw kahadlok sa pagpakigbahin sa inyong pagpamatuod. Makapanalangin kini niadtong inyong gipangalagaran. Unsaon ninyo sa paggamit niini nga mga ideya o sa inyong kaugalingon sa pagpakigbahin sa inyong pagpamatuod karon?