Mga Baruganan sa Pagpangalagad

Ang Paghimo sa Pagpangalagad nga Makalipay

Ang pagserbisyo pinaagi sa gugma magdala og kalipay sa tighatag ug sa tigdawat.

Liahona, Abril 2019

ANG SANGLAHON NGA NAGPASALAMAT, ni John Steel

Usahay ang atong pagpangita og kalipay niining kinabuhia daw sama sa pagdagan gamit ang usa ka treadmill [himan sa pag-ehersisyo nga magdagan ibabaw sa nakapundo nga plataporma]. Sigi lang kita og dagan apan sa gihapon daw wala kitay naabtan. Alang sa uban, ang hunahuna sa pagpangalagad sa uban daw nagdugang lang og uban pang buluhaton.

Apan ang atong Langitnong Amahan gusto nga makasinati kita og kalipay ug nag-ingon kanato nga “ang mga tawo naingon, nga unta sila makabaton og hingpit nga kalipay” (2 Nephi 2:25). Ug mitudlo ang Manluluwas nga ang pagpangalagad sa uban usa ka mahinungdanong bahin kon unsaon nga makadala kita og kalipay sa atong kinabuhi ug sa kinabuhi sa uban.

Unsa ang Kalipay?

Ang kalipay nangahulugan nga “usa ka pagbati sa hingpit nga kahimuot ug kalipay.”¹ Ang mga propeta sa ulahing mga adlaw mihatag og katin-awan kon asa naggikan ang kalipay ug sa unsang paagi kini makit-an. “Ang kalipay nga atong gibati dili kaayo konektado sa mga sirkumstansya sa atong kinabuhi apan kining tanan konektado sa unsay atong gitutokan sa atong kinabuhi,” miingon si Presidente Russell M. Nelson. “… Ang kalipay moabut gikan ug tungod kang [Jesukristo]. Siya ang tinubdan sa tanang kalipay.”²

Ang Pagpangalagad Magdala og Kalipay

Dihang mikaon si Lehi sa bunga sa kahoy sa kinabuhi, ang iyang kalag napuno “sa hingpit nga kalipay” (1 Nephi 8:12). Ang iyang tinguha mao ang pagpaambit niini nga bunga ngadto sa iyang mga gimahal.

Ang atong kaandam sa pag-alagad sa uban makadala niining matang sa kalipay ngari kanato ug kanila. Ang Manluluwas mitudlo sa Iyang mga disipulo nga ang atong nahimong bunga kon konektado kita Kaniya magtabang sa pagdala kanato og hingpit nga kalipay (tan-awa sa Juan 15:1–11). Ang paghimo sa Iyang buhat pinaagi sa pagserbsiyo ug ang tinguha sa pagdala sa uban ngadto Kaniya mahimo nga usa ka malipayong kasinatian (tan-awa sa Lucas 15:7; Alma 29:9; Doktrina ug mga Pakigsaad 18:16; 50:22). Makasinati kita niini nga kalipay bisan pa sa atong giatubang nga oposisyon ug pag-antus (tan-awa sa 2 Mga Taga-Corinto 7:4; Mga Taga-Colossas 1:11).

Ang Manluluwas mipakita kanato sa hingpit nga ehemplo nga ang usa sa pinakatalagsaong tinubdan sa tinuod nga kalipay sa mortal nga kinabuhi makita pinaagi sa pagserbisyo. Kon mangalagad kita sama sa atong Manluluwas ngadto sa atong igsoong mga lalaki ug mga babaye, nga adunay gugmang putli diha sa atong mga kasingkasing, makasinati kita og kalipay nga molabaw pa sa yano nga kalipay.

“Kon atong hangupon ang [pagpangalagad] pinaagi sa andam nga mga kasingkasing, kita … mas mapaduol sa pagkahimong mga katawhan sa Zion ug bation nato ang sobrang kalipay uban niadtong kinsa atong natabangan subay sa agianan sa pagkadisipulo,” mitudlo si Sister Jean B. Bingham, Kinatibuk-ang Presidente sa Relief Society.³

Unsaon Nato sa Paghimo ang Pagpangalagad nga Mas Makalipay?

Adunay daghang paagi sa pagdala og mas dakong kalipay diha sa atong pagpangalagad. Ania ang pipila ka mga ideya:

1. Sabta ang imong katuyoan sa pagpangalagad. Adunay daghang rason sa pagpangalagad. Sa katapusan, ang atong mga paningkamot kinahanglang mapahiuyon sa mga katuyoan sa Dios “ang pagpahinabo sa pagka-imortal ug sa kinabuhi nga dayon sa tawo” (Moises 1:39). Samtang dawaton nato ang imbitasyon ni Presidente Russell M. Nelson sa pagtabang sa uban subay sa dalan sa pakigsaad, makakaplag kita og kalipay diha sa pagsalmot sa buhat sa Dios.⁴ (Alang sa dugang pa nga katuyoan sa pagpangalagad, tan-awa sa “Ministering Principles: The Purpose That Will Change Our Ministering [Ang Katuyoan nga Makausab sa Atong Pagpangalagad],” sa Enero 2019 nga Liahona.)

2. Buhata ang pagpangalagad nga ang tumong mao ang pag-alagad sa katawhan ug dili kay ang paghimo lang sa gisangon nga mga buluhaton. Si Presidente Thomas S. Monson mipahinumdom kanato: “Ayaw himoang mas importante ang sulbarunon nga problema kay sa tawo nga angayng higugmaon.”⁵ Ang pagpangalagad mao ang mahitungod sa paghigugma sa mga tawo, dili kini mahitungod sa mga butang nga buhaton. Kon molambo ang atong paghigugma sama sa gihimo sa Manluluwas, mas dayag kanato ang kalipay nga moabut gumikan sa pagserbisyo sa uban.

3. Himoa nga yano ang pagpangalagad. Si Presidente M. Russell Ballard, Akting nga Presidente sa Korum sa Napulog Duha ka mga Apostoles, misulti kanato: “Dagkong mga butang mapahinabo pinaagi sa gagmay ug yanong mga butang. … Ang atong gagmay ug yanong mga buhat sa kamabination ug pagserbisyo matigum ngadto sa kinabuhi nga puno sa gugma alang sa Langitnong Amahan, debosyon sa buhat ni Ginoong Jesukristo, ug pagbati sa kalinaw ug kalipay sa matag higayon nga kita motabang sa usag usa.”⁶

4. Tangtanga ang kaluya gikan sa pagpangalagad. Dili imong responsibilidad ang pagtrabaho sa kaluwasan sa uban. Tali ra kana sa indibidwal ug sa Ginoo. Ang atong responsibilidad mao ang paghigugma kanila ug pagtabang kanila sa pagduol ngadto kang Jesukristo, kinsa ilang Manluluwas.

SI KRISTO UG ANG MGA BATA SA BASAHON NI MORMON, ni Del Parson

Ayaw Ilangay ang Kalipay sa Pagserbisyo

Usahay ang mga tawo magpanuko sa pagpangayo sa gikinahanglan nga tabang, mao nga ang pagtanyag sa atong serbisyo posibling mao ray ilang gikinahanglan. Apan ang pagpugos sa atong mga kaugalingon ngadto sa mga tawo dili usab maoy tubag. Ang pagpangayo og permiso sa dili pa mangalagad usa ka maayo nga ideya.

Si Elder Dieter F. Uchtdorf sa Korum sa Napulog Duha ka mga Apostoles misugilon mahitungod sa usa ka single nga inahan nga gitaptan og hangga—ug dayon nangasakit pud ang iyang mga anak. Ang sa kasagaran hapsay nga balay nahimong katag og samok. Ang mga platong hugasan ug labhanan nagpatong-patong na.

Diha sa gutlo nga gibati na niya ang hingpit nga kabug-at, ang mga sister sa Relief Society nanuktok sa pultahan. Wala sila moingon nga, “Sultihi mi unsay among ikatabang.” Dihang nakita nila ang sitwasyon, milihok dayon sila.

“Gihipos nila ang mga nagkatag, gihawanan ug gilimpyohan ang panimalay, ug gitawagan ang usa ka higala nga magdala og gikinahanglanon kaayo nga mga grocery. Dihang sa katapusan nahuman na nila ang ilang buhat ug nanamilit, gibiyaan nila kanang batan-ong inahan nga nagluha—mga luha sa pasalamat ug gugma.”⁷

Ang tighatag ug ang tigdawat mibati sa mainiton nga kalipay.

Ugmara ang Kalipay sa Imong Kinabuhi

Kon mas dako nga kalipay, kalinaw, ug pagkakontento ang atong maugmad sa atong kinabuhi, mas daghan ang atong mapaambit ngadto sa uban kon kita mangalagad. Ang kalipay maggikan sa Espiritu Santo (tan-awa sa Mga Taga-Galacia 5:22 ug ang Doktrina ug mga Pakigsaad 11:13). Butang kini nga pwede natong iampo (tan-awa sa Doktrina ug mga Pakigsaad 136:29) ug dapiton sa atong kinabuhi. Ania ang pipila ka mga ideya sa pag-ugmad og kalipay sa kaugalingon natong kinabuhi:

1. Ipha ang imong panalangin. Samtang imong susihon ang imong kinabuhi, isulat sa imong journal ang mga butang nga gipanalangin kanimo sa Dios.⁸ Panid-i ang mga maayo diha tanan sa imong palibut.⁹ Susiha kon unsa kaha ang nagpugong kanimo gikan sa pagkalipay ug isulat ang mga paagi sa pagsulbad o aron mas makasabut niini. Atol niining Kapaskohan, gahini og panahon ang pagpangita og mas maayong koneksyon sa Manluluwas (tan-awa sa Doktrina ug mga Pakigsaad 101:36).

2. Batasana ang pagkamahunahunaon. Ang kalipay dali ra nimong matagamtam sa mga gutlo sa hilom nga pagpamalandong.¹⁰ Paminawa og maayo kon unsay nagdala kanimo og kalipay (tan-awa sa 1 Cronicas 16:15). Ang panahon nga layo sa media usahay gikinahanglan aron mabatasan ang pagkamahunahunaon.¹¹

3. Likayi ang pagkomparar sa imong kaugalingon. Ginaingon nga ang pagkomparar mao ang kawatan sa kalipay. Mipahinumdom si Pablo nga kadtong “nagapakigsukdanay sa ilang masigkaugalingon, ug nagatandiay sa ilang masigkaugalingon, sila walay kabuot” (2 Mga Taga-Corinto 10:12).

4. Magtinguha og personal nga pagpadayag. Ang Manluluwas mitudlo: “Kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo, nga kamo masayud sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon” (Doktrina ug mga Pakigsaad 42:61).

Ang Pagdapit sa Paglihok

Unsaon nimo pagpadako sa kalipay nga nakita nimo sa imong kinabuhi pinaagi sa pagpangalagad?

Mubo nga mga sulat

1. “Joy,” en.oxforddictionaries.com

2. Russell M. Nelson, “Hingpit nga Kalipay ug Pagsugakod sa Espirituhanong Paagi,” Liahona, Nob. 2016, 82.

3. Jean B. Bingham, “Pagpangalagad sama sa Gibuhat sa Manluluwas,” Liahona, Mayo 2018, 107.

4. Tan-awa sa Russell M. Nelson, “Samtang Dungan Kita nga Magpadayon sa Unahan,” Liahona, Abril 2018, 4–7.

5. Thomas S. Monson, “Pagpangita og Kalipay Panahon sa Panaw,” Liahona, Nob. 2008, 86.

6. M. Russell Ballard, “[Ang] Pagkaplag og Kalipay pinaagi sa Mahigugmaong Pagserbisyo,” Liahona, Mayo 2011, 49.

7. Tan-awa sa Dieter F. Uchtdorf, “[Ang] Pagsunod sa Ebanghelyo nga Malipayon,” Liahona, Nob. 2014, 120–123.

8. Tan-awa sa Henry B. Eyring, “O Hinumdumi, Hinumdumi,” Liahona, Nob. 2007, 67.

9. Tan-awa sa Jean B. Bingham, “Nga ang Imong Hingpit nga Kalipay Mapuno,” Liahona, Nob. 2017, 87.

10. Tan-awa sa Dieter F. Uchtdorf, “Kabahin sa mga Butang nga Labing Mahinungdanon,” Liahona, Nob. 2010, 21.

11. Tan-awa sa Gary E. Stevenson, “Espiritwal nga Eklipse,” Liahona, Nob. 2017, 46.

Ang mga baruganan nga ania niini nga artikulo magamit sa atong inadlaw nga pakig-inter-aksyon apan gituyo aron makatabang sa mga tigpangalagad nga mga brother ug mga sister sa ilang mga paningkamot sa pagpanalangin sa mga indibidwal ug mga pamilya nga gisanong diha kanila.