Mga Baruganan sa Pagpangalagad

Pagtukod og Makahuluganong mga Relasyon

Ang atong abilidad sa pag-atiman sa uban madungagan kon kita adunay makahuluganong relasyon uban kanila.

Liahona, Agosto 2018

Ang imbitasyon sa pagpangalagad ngadto sa uban usa ka oportunidad sa paghimo og maamumahon nga mga relasyon uban kanila—ang matang sa relasyon nga makahimo nila nga komportable sa pagpangayo ug pagdawat sa atong tabang. Kon nakahimo kita sa paningkamot sa pagpalambo niana nga matang sa relasyon, ang Dios makausab sa mga kinabuhi sa duha ka habig sa relasyon.

“Nagtuo ko nga walay klaro nga kausaban kon walay klaro nga mga relasyon,” miingon si Sharon Eubank, Unang Magtatambag sa Kinatibuk-ang Kapangulohan sa Relief Society. Ug sa atong mga buhat sa pagserbisyo nga makapausab sa mga kinabuhi sa uban, miingon siya, kinahanglan kini nga “nakagamut sa sinsero nga tinguha sa pag-ayo ug pagpaminaw ug pagkooperar ug pagtahud.”¹

Ang makahuluganong mga relasyon dili mga taktika. Natukod kini sa kapuangod, sinsero nga mga paningkamot, ug “tiunay nga paghigugma” (D&P 121:41).²

Mga Paagi sa Pagtukod ug Pagpalig-on og mga Relasyon

“Maugmad nato kini nga [pakigrelasyon] ngadto sa usa ka tawo sa matag higayon,” miingon si Elder Dieter F. Uchtdorf sa Korum sa Napulog Duha ka mga Apostoles.³ Sa atong pagpaningkamot sa pagtukod og makahuluganong mga relasyon uban niadtong atong gipangalagaran, ang Espiritu Santo makagiya nato. Ang mosunod nga mga sugyot gibase sa usa ka sumbanan nga gitanyag ni Elder Uchtdorf.⁴

Pagkat-on mahitungod kanila.

Si Presidente Ezra Taft Benson (1899–1994) mitudlo, “Dili ka makaserbisyo og maayo niadtong wala nimo mailhi og maayo.” Misugyot siya nga ilhon ang mga ngalan sa matag sakop sa pamilya ug pagkahibalo sa importante nga mga panghitabo sama sa mga adlaw nga natawhan, mga panalangin, mga bunyag, ug mga kaminyoon. Naghatag kini og oportunidad sa pagsulat og mubo nga sulat o pagtawag aron mopahalipay sa sakop sa pamilya sa espesyal nga kalampusan.⁵
Paggahin og panahon nga magkauban.

Ang relasyon nagkinahanglan og panahon sa pagpalambo. Pangita og mga oportunidad nga magpadayon ang pagkontak. Ang mga pagtuon nagpakita nga ang pagpahibalo sa mga tawo nga kamo nagpakabana importante sa maanindot nga relasyon.⁶ Bisitahi kanunay kadtong inyong serbisyuhan. Pakigsulti nila sa simbahan. Gamita ang bisan unsa nga dugang nga mga paagi—sama sa email, Facebook, Instagram, Twitter, Skype, mga tawag sa telepono, o pagpadala og kard. Si Elder Richard G. Scott (1928–2015) sa Korum sa Napulog Duha ka mga Apostoles namulong mahitungod sa gahum sa yano ug mamugnaon nga pagpadayag sa gugma ug suporta: “Kanunay ko nga moabli sa akong mga kasulatan, … ug akong makita ang usa ka mahigugmaon, mapinanggaon nga mubo nga sulat [sa akong asawa] nga gisup-itan ni Jeanene sa mga pahina. … Kadtong bililhon nga mubo nga mga sulat … padayon nga nahimong bililhon nga bahandi sa kahupayan ug inspirasyon.”⁷

Usab, hinumdumi nga ang usa ka relasyon nagkinahanglan og duha. Makatanyag kamo og gugma ug panaghigala, apan ang relasyon dili motubo gawas kon ang tanyag gidawat ug gibalik. Kon ang lain nga indibidwal dili manumbaling, ayaw ipugos ang relasyon. Hatagi siya og panahon nga makakita sa inyong sinsero nga mga paningkamot, ug kon gikinahanglan, pakitambag sa inyong mga lider mahitungod kon ang makahuluganon nga relasyon posible pa ba o dili.
Pagpakig-istorya uban sa pagpakabana.

Ang pagtukod og makahuluganong mga relasyon nagkinahanglan nga kita dili taphaw. Ang taphaw nga pagpakigsulti puno sa gagmay nga istorya mahitungod sa mga iskedyul, sa klima, ug sa ubang gagmay nga mga isyu, apan wala maglakip sa pagpakigbahin og mga pagbati, mga pagtuo, mga tumong, ug mga kabalaka nga gikinahanglan aron sa paghimo og mas makahuluganong mga koneksyon. Ang Langitnong Amahan mipakita niini nga mas makahuluganong matang sa komunikasyon pinaagi sa pagpakigbahin sa Iyang mga pagbati ug mga plano uban sa Iyang Anak (tan-awa sa Juan 5:20) ug uban nato pinaagi sa Iyang mga propeta (tan-awa sa Amos 3:7). Pinaagi sa pagpakigbahin sa adlaw-adlaw nga mga panghitabo ug sa mga hagit sa kinabuhi sa usag usa ingon nga giniyahan sa Espiritu, makaangkon kita og pasalamat alang sa usag usa samtang makakita kita og komon nga mga interes ug gipakigbahin nga mga kasinatian.

Ang pagpaminaw mao ang usa ka kritikal nga bahin sa pagpakigsulti nga kamo nagpakabana.⁸ Kon kamo maminaw pag-ayo, ang inyong oportunidad sa pagtabang sa uban nga moduol ngadto kang Kristo magkadako samtang kamo makaangkon og pagsabut sa ilang mga panginahanglan ug samtang sila mobati nga gihigugma, gisabut ug luwas.
Pagdawat sa mga kalainan ingon man usab ang pagkapareha.

“Ang pipila … nakapatuo sa uban nga ang Simbahan gustong mohimo sa kada miyembro nga parehas—kada usa kinahanglang makita, mobati, maghunahuna, ug molihok sama sa usag usa,” miingon si Elder Utchdorf. “Sukwahi kini sa kaalam sa Dios, nga milalang sa tawo nga lahi sa iyang igsoon, kada anak lahi sa iyang amahan. …

“Ang Simbahan malig-on kon pahimuslan nato kining panaglahi ug moawhag sa usag usa sa pagpalambo ug paggamit sa atong talento sa pagdasig ug paglig-on sa atong isigka disipulo.”⁹

Sa paghigugma sa uban sa paagi nga ang Dios nahigugma nato nagkinahanglan nga kita maningkamot sa pagtan-aw sa uban sa paagi nga sila gitan-aw sa Dios. Si Presidente Thomas S. Monson (1927–2018) mitudlo, “Atong palamboon ang kapasidad sa pagtan-aw sa [uban] dili kon unsa sila karon apan kon unsa sila sa umaabut.”¹⁰ Makaampo kita alang sa panabang aron makita ang uban sa paagi sa pagtan-aw sa Dios kanila. Sa atong pagtagad sa uban base sa ilang potensyal alang sa pag-uswag, hayan nga sila molambo gayud.¹¹
Pagserbisyo kanila.

Pagmabination sa mga panginahanglan niadtong inyong gipangalagaran ug pangandam sa paghatag sa inyong panahon ug mga talento, bisan sa panahon sa panginahanglan o tungod lang kay kamo nagpakabana. Mahimong anaa kamo sa paghatag og kahupayan, suporta, ug sa gikinahanglan nga tabang kon dunay emerhensya, balatian, o dinalian nga sitwasyon. Apan sa daghan kaayo nga mga relasyon ulahi kaayo ang atong reaksyon. Ang Dios mihatag nato og kabubut-on aron nga kita makalihok kay sa aghaton sa pagpalihok (tan-awa sa 2 Nephi 2:14). Sama sa gitudlo ni Apostol Pablo nga kita nahigugma sa Dios tungod kay Siya unang nahigugma kanato (tan-awa sa 1 Juan 4:19), kon ang uban mobati sa atong tinuod nga gugma pinaagi sa atong mga buhat sa pagserbisyo, makapahumok kini sa mga kasingkasing ug makapadugang sa gugma ug pagsalig.¹² Makapahimo kini og malambuon nga matang sa buhat nga makatukod og mga relasyon.

Pagpangalagad sama sa pagpangalagad sa Manluluwas

Si Jesukristo mitukod og makahuluganong mga relasyon sa Iyang mga disipulo (tan-awa sa Juan 11:5). Nakaila Siya kanila (tan-awa sa Juan 1:47–48). Migahin siya og panahon uban kanila (tan-awa sa Lucas 24:13–31). Ang iyang pagpakigsulti dili taphaw (tan-awa sa Juan 15:15). Nagpasalamat Siya sa ilang mga kalainan (tan-awa sa Mateo 9:10) ug nakakita sa ilang potensyal (tan-awa sa Juan 17:23). Miserbisyo Siya sa tanan, bisan og Siya ang Ginoo sa tanan, nag-ingon Siya mianhi dili aron pagaalagaron kondili sa pag-alagad (tan-awa sa Marcos 10:42–45).

Unsay inyong buhaton sa pagtukod og mas lig-on nga mga relasyon diin kamo gitawag sa pagserbisyo?