Mga Baruganan sa Pagpangalagad

Lima ka Butang nga Buhaton sa Maayong mga Tigpaminaw

Ang tinud-anay nga pagpaminaw makatabang ninyo nga makahibalo unsaon sa pagtabang ang espirituhanon ug temporal nga mga panginahanglan sa uban sama sa buhaton sa Manluluwas.

Liahona, Hunyo 2018

Si Elder Jeffrey R. Holland sa Korum sa Napulog Duha ka mga Apostoles miingon, “Tingali ang mas importante kay sa pagpamulong mao ang pagpaminaw. … Kon maminaw kita uban sa gugma, dili kinahanglan nga maghunahuna kita unsay isulti. Ihatag kini nato—pinaagi sa Espiritu.”¹

Ang pagpaminaw mao ang usa ka kahanas nga atong makat-unan. Ang pagpaminaw nagpakita sa atong gugma sa uban, makatabang sa paglig-on sa mga relasyon, ug nagdapit sa Espirtu sa pagpanalangin kanato uban sa gasa sa pag-ila sa pagtabang nato nga makasabut sa mga panginahanglan sa uban.² Ania ang lima ka paagi nga atong mapalambo kon unsaon nato sa pagpaminaw.

1. Hatagi sila og Panahon

Daghang mga tawo ang nagkinahanglan og panahon sa paghunahuna og maayo sa dili pa mosulti. Hatagi sila og panahon sa paghunahuna sa dili pa ug human sila makasulti (tan-awa sa Santiago 1:19). Tungod kay nahuman na sila og sulti wala magpasabut nga nasulti na nila ang tanan nga gikinahanglan nga isulti. Ayaw kahadlok sa kahilom (tan-awa sa Job 2:11–3:1 ug Alma 18:14–16).

2. Paminaw

Mas kusog ang atong hunahuna kay sa pagsulti sa uban. Batuki ang tintasyon nga nakahibalo mo sa unsay ilang gisulti o maghunahuna og una sa unsay imong isulti kon mahuman na sila (tan-awa sa Mga Proverbio 18:13). Hinoon, paminaw uban sa tuyo nga makasabut. Ang inyong tubag mas maayo tungod kay kini gibase sa mas dakong pagsabut.

3. Klaruha

Ayaw kahadlok nga mangutana nga moklaro sa butang nga wala ninyo masabti (tan-awa sa Marcos 9:32). Ang pagklaro makapakunhod sa dili pagsinabtanay ug nagpakita sa inyong tinguha sa unsay gisulti.

4. Pamalandong

Isulti pag-usab unsay inyong nadunggan ug sa unsa nga paagi kamo nakasabut sa gibati sa uban. Kini makatabang nila nga makahibalo kon nasabtan ba sila ug mohatag nila og kahigayunan sa pagklaro.

5. Pangita og Komon nga mga Ideya

Mahimong dili kamo mouyon sa tanang gisulti, apan uyon sa unsay inyong mauyunan nga dili magsulti sa inyong kaugalingong pagbati. Ang pagpakighigala dayon makatabang sa pagpakunhod sa kabalaka ug paglikay nga sawayon (tan-awa sa Mateo 5:25).

Si Presidente Russell M. Nelson mitudlo nga kinahanglan nga kita “makat-on sa pagpaminaw, ug maminaw aron makat-on gikan sa usag usa.”³ Samtang maminaw kamo uban sa tuyo nga makat-on mahitungod sa uban, kamo anaa sa mas maayo nga pagkabutang nga makasabut sa ilang mga panginahanglan ug maminaw sa mga pag-aghat mahitungod kon unsaon nga kamo makaatiman niadtong anaa sa inyong palibut sama sa buhaton sa Manluluwas.

Ang Pagpaminaw Mao ang Paghigugma

Ang istorya gikan ni Elder Holland naghulagway sa gahum sa pagpaminaw:

“Ang higala nakong si Troy Russell hinay-hinayng mipagawas sa iyang pickup truck sa iyang garahe … Gibati niyang may naligsan ang luyo nga ligid. … Naghunahuna nga dunay karga nga nahulog sa trak, nanaog siya ug nakita ang pinangga niyang nuwebe anyos nga anak, si Austen nga naghigda na sa agianan … Patay na si Austen.

“Dili makatulog, walay makaplagan nga kalinaw, walay kahupayan si Troy. … Apan nianang labihan kasubo nga panahon miabut … si John Manning.

“Ambot kon unsay iskedyul ni John ug sa iyang junior companion sa pagbisita sa balay sa pamilyang Russell. … Ang nahibaloan ra gayud nako mao nga sa miaging tingpamulak si Brother Manning mitabang ug mipalig-on ni Troy Russell gikan sa trahedya sa driveway sama nga iyang gipunit mismo ang bata nga si Austen. Sama sa … home teacher o tigbalantay o igsoon sa ebanghelyo nga maoy iyang buhatunon, gihimo ni John ang priesthood nga pag-atiman ug pagbantay ni Troy Russell. Gisugdan niya sa pag-ingon, ‘Troy, si Austen gusto nga magpadayon ka—lakip diha sa basketball court—mao nga moanhi ko matag buntag sa alas 5:15. Pangandam. …’

“‘Dili ko gustong molakaw,’ miingon si Troy nako wala madugay, ‘tungod kay magkauban mi ni Austen kanunay. … Apan miinsister si John, mao nga miadto ko. Sukad niadtong adlawa ug sa sunod, nag-istorya mi—o ako ang mag-istorya—ug si John maminaw. … Sa pagsugod lisud, apan paglabay sa panahon akong namatikdan nga nagkalig-on ko sama sa hinay kaayong [John Manning], nahigugma ug naminaw kanako hangtud nga ang adlaw mibalik sa pagsubang sa akong kinabuhi.’”⁴