Mga Baruganan sa Pagpangalagad
Unsaon Nato Pagmugna og Kultura sa Pagpaapil diha sa Simbahan?
Liahona, Hulyo 2019
Mga paghulagway gikan sa Getty Images
Kon motan-aw kita libut sa atong mga ward ug mga branch, makakita kita og mga tawo nga dali kaayong makasinabut sa uban. Wala nato maamgohi nga bisan niadtong daw dali makasinabut sa uban, adunay daghan nga mobati nga wala maapil. Sama pananglit, ang usa ka pagtuon bag-o lang nakakita nga hapit katunga sa mga hingkud sa Estados Unidos mi-report nga mibati nga nag-inusara, wala maapil, o nahimulag sa uban.1
Importante nga mobati nga naapil. Usa kini ka sukaranan nga panginahanglan sa tawo, ug kon mobati kita nga walay labut, sakit kini. Ang dili pagpaapil makamugna og mga pagbati sa kaguol o kasuko.2 Kon mobati kita nga nag-inusara, mosulay kita sa pagpangita og dapit diin mas komportable kita. Kinahanglang atong tabangan ang tanan nga mobati nga nahisakop sila sa simbahan.
Pagpaapil Sama sa Manluluwas
Ang Manluluwas maoy hingpit nga ehemplo sa pagpakabililhon ug pagpaapil sa uban. Sa dihang gipili Niya ang Iyang mga Apostoles, wala Siya magtagad sa kahimtang, katigayunan, o dinayeg nga propesyon. Gihatagan Niya og importansya ang babayeng Samarianhon sa atabay, mipamatuod kaniya sa Iyang kabalaan bisan pa kon gipakaubos sa mga Judeo ang mga Samarianhon (tan-awa sa Juan 4). Motan-aw Siya sa kasingkasing ug dili motamud sa mga tawo (tan-awa sa 1 Samuel 16:7; Doktrina ug mga Pakigsaad 38:16, 26).
Miingon ang Manluluwas:
“Ako magahatag kaninyog bag-ong sugo, nga kinahanglan maghigugmaay kamo ang usa sa usa maingon nga ako nahigugma kaninyo, kinahanglan maghigugmaay usab kamo ang usa sa usa.
“Ang tanang mga tawo makaila nga kamo mga tinun-an ko pinaagi niini, kon kamo maghigugmaay ang usa sa usa” (Juan 13:34–35).
Unsa ang Atong Mabuhat?
Usahay lisud ang pag-ila kon ang usa ka tawo mibati ba nga wala sila maapil. Kadaghanan sa mga tawo dili mosulti niini—sa labing minos dili nila klarong isulti. Apan uban sa mahigugmaong kasingkasing, sa giya sa Espiritu Santo, ug paningkamot nga mahibalo, makabantay kita kon ang usa ka tawo wala mobati nga nalakip sa mga miting ug mga kalihokan sa Simbahan.
Posible nga mga Timailhan nga ang Usa ka Tawo Mibati nga Wala Maapil:
-
Sirado nga linihokan, sama sa mga bukton nga gikyugpos o mga mata nga kanunayng nagtan-aw sa ubos.
-
Naglingkod sa luyo nga bahin sa kwarto o naglingkod nga nag-inusara.
-
Dili motambong sa simbahan o panagsa ra motambong.
-
Sayo nga mobiya sa mga miting o mga kalihokan.
-
Dili moapil sa pag-istoryahanay o sa mga leksyon.
Mahimong mga timailhan usab kini sa ubang mga emosyon, sama sa pagkamaulawon, kabalaka, o pagkadili komportable. Ang mga miyembro mahimong mobati nga “lahi” kon bag-o sila nga mga miyembro sa Simbahan, gikan sa laing nasud o kultura, o bag-o lang nakasinati og sakit nga kausaban sa kinabuhi, sama sa diborsyo, kamatayon sa usa ka sakop sa pamilya, o sayo nga pagpauli gikan sa misyon.
Bisan unsa pa ang rason, dili kita magpanuko sa pagtabang uban sa gugma. Unsay atong isulti ug unsay atong mabuhat makamugna og pagbati nga ang tanan gihangup ug ang tanan gikinahanglan.
Pipila ka mga Paagi aron Mapaapil ug Mahangup ang Uban
-
Ayaw paglingkod nga tupad kanunay sa mao gihapon nga mga tawo sa simbahan.
-
Ayaw pagpalinga sa panggawas nga mga panagway aron makita ang tinuod nga pagkatawo. (Alang sa dugang impormasyon mahitungod niini nga hilisgutan, tan-awa ang “Ang Pagpangalagad Mao ang Pagtan-aw sa Uban sama sa Pagtan-aw sa Manluluwas Kanila,” Liahona, Hunyo 2019, 8–11.)
-
I-apil ang uban sa pag-istoryahanay.
-
Dapita ang uban nga mahimong kabahin sa inyong kinabuhi. Mahimo ninyo silang iapil sa mga kalihokan nga giplano na ninyo.
-
Pangitaa ug ugmara ang komon nga mga gikaikagan.
-
Ayaw ihikaw ang pagpakighigala tungod lamang kay ang usa ka tawo wala makakab-ut sa unsay inyong mga gilauman.
-
Kon aduna kamoy makita nga talagsaon mahitungod sa usa ka tawo, pagkaikag niini imbis nga ibaliwala kini o likayan kini.
-
Pagpahayag og gugma ug hatag og kinasingkasing nga mga pagdayeg.
-
Paggahin og panahon sa paghunahuna kon unsa gayud ang gipasabut sa atong pag-ingon nga ang Simbahan alang sa tanan, bisan unsa pa ang ilang mga kalainan. Unsaon nato paghimo niini nga reyalidad?
Dili kanunayng sayon nga mobati og kakomportable sa kauban nga mga tawo kinsa lahi kay kanato. Apan uban sa pagbansay, mahimo kitang mas maayo sa pagpangita og bili diha sa mga kalainan ug madayeg ang talagsaong kontribusyon nga mahatag sa matag tawo. Sama sa gitudlo ni Elder Dieter F. Uchtdorf sa Korum sa Napulog Duha ka mga Apostoles, ang atong mga kalainan makatabang sa paghimo kanato nga mas maayo, mas malipayon nga mga tawo: “Dali, tabangi kami sa pagpalig-on sa usa ka kultura sa pagkaayo, kamabination, ug kamaloloy-on ngadto sa tanang anak sa Dios.”3
Napanalanginan tungod sa Pagpaapil
Si Christl Fechter mibalhin sa laing nasud human ang gubat migun-ob sa iyang yutang natawhan. Dili siya maayo nga mosulti sa pinulongan ug walay kaila sa iyang bag-ong kasilinganan, mao nga sa sinugdanan mibati siya nga nalahi ug nag-inusara.
Isip miyembro sa Simbahan, nagmaisugon siya ug misugod sa pagtambong sa iyang bag-ong ward. Nabalaka siya nga ang iyang gahi nga pinulongan makapugong sa mga tawo sa pagtinguha nga makigsulti kaniya o nga hukman siya tungod kay wala pa siya maminyo.
Apan nakahimamat siya og uban kinsa mibaliwala sa iyang mga kalainan ug mihangup kaniya diha sa ilang grupo sa mga higala. Mitabang sila uban sa gugma, ug wala madugay nahimo na siyang okupado sa pagtabang sa pagtudlo og klase sa Primary. Ang mga bata maoy mga talagsaong ehemplo sa pagdawat, ug ang pagbati nga gihigugma ug gikinahanglan nakapalig-on sa iyang pagtuo ug mitabang nga mahibalik ang iyang tibuok kinabuhi nga debosyon ngadto sa Ginoo.