Mga Baruganan sa Pagpangalagad
Pagpangalagad pinaagi sa Dali, Sunod Kanako
Sa unsang paagi nga ang Dali, Sunod Kanako makatabang kaninyo nga makahimo og kalainan ngadto sa uban?
Mga paghulagway ni Joshua Dennis
Maanaa man kamo uban sa inyong pamilya, diha sa klasehanan sa Sunday School isip usa ka magtutudlo o estudyante, o sa eskwelahan, sa trabaho, o sa laing dapit, ang Dali, Sunod Kanako nagtanyag og igong oportunidad sa pagpangalagad sa uban. Ang pagtudlo, total, “mas labaw pa kay sa pagpangulo og usa ka diskusyon sa Domingo; naglangkob kini sa pagpangalagad pinaagi sa gugma ug pagpanalangin sa uban pinaagi sa ebanghelyo.”1
Pagkonektar uban sa mga Estudyante
Sa dihang si Ofelia Trejo de Cárdenas gitawag sa pagtudlo sa mga young adult sa iyang ward sa Siyudad sa Mexico, mibati siya nga ang pagbaton og suod nga relasyon sa matag usa sa iyang mga estudyante sa Sunday School makapadugang sa iyang abilidad sa pagtudlo ug paglig-on kanila.
“Kon wala koy suod nga relasyon uban sa akong mga estudyante ug kon dili nila mabati ang akong gugma, tingali dili sila motuo nako kon magtudlo ko sa klase o mohatag sa akong pagpamatuod,” miingon siya. “Tingali mobati sila nga basta lang usa ako ka magtutudlo sa Sunday School.”
Apan giunsa kaha ni Sister Cárdenas sa pagpalambo sa ingon nga relasyon kon siya magtudlo lang og kausa sa kada duha ka semana? Nakakaplag siya og tubag pinaagi sa teknolohiya. Gamit ang mobile phone application nga WhatsApp, siya ug ang iyang mga estudyante sa wala madugay nakonektar sa kada adlaw pinaagi sa text ug mga voice message. Karon, kada adlaw sa dili pa ang sunod nga leksyon sa Sunday School, usa ka boluntaryo sa klase mopadala ngadto sa laing sakop sa klase og usa ka bersikulo sa kasulatan gikan niana nga sunod nga leksyon uban sa may kalabutan nga personal nga hunahuna. Human mabasa ang bersikulo ug ang pagtulun-an, ipadala sa mga sakop sa klase ang ilang kaugalingong mga tubag.
“Kon magbasa sila sa mga kasulatan, magpadala sila og usa ka malipayon nga panagway aron ako masayud nga ilang nabasa o natun-an ang kasulatan ug nga sila naghunahuna mahitungod niini,” misulti si Sister Cárdenas. Kon panahon na alang sa sunod nga leksyon sa Dominggo, ang mga estud-yante andam na sa pag-apil.
Kining inadlaw nga mga koneksyon nakapalangin sa usa ka young adult kansang mga ginikanan dili aktibo sa Simbahan.
“Malipay ko kon ako siyang makita sa simbahan tungod kay nasayud ko nga aron makaabut didto, siya mag-agi og daghang mga hagit,” miingon si Sister Cárdenas. “Sigurado ko nga ang gipadala nga mga kasulatan ug mga hunahuna sa iyang mga kauban sa klase ug ang mga kasulatan ug mga hunahuna nga iyang gipadala kon kini iyaha nang turno nakapalig-on og dako kaniya.”
Miingon si Sister Cárdenas nga ang pagpangalagad pinaagi sa mga kasulatan dili mohunong sa iyang mga leksyon sa Dominggo ug ang inadlaw nga koneksyon sa kasulatan sa iyang klase.
“Ang akong pagpangandam naglakip sa pag-ampo alang sa akong mga estudyante,” miingon siya. “Ako naghunahuna niini dili lang sa Dominggo apan sa kada adlaw sa semana usab. Ang matag usa kanila adunay piho ug lain-laing mga panginahanglan. Ang matag usa anak sa Dios. Maghunahuna ko kabahin nila samtang nangandam ko sa akong mga leksyon.”
Ug kon siya magtudlo, siya maminaw—sa iyang mga estudyante ug sa Espiritu Santo.
“Ang magtutudlo mao ang Espiritu,” nga kanunay niyang madungog diha sa mga tingog sa iyang mga estudyante. “Kinahanglan ko maminaw tungod kay unsay ilang isulti mao ang pagpadayag nga gihatag sa Espiritu kanila.”
Ang among Klase “Sama sa Home Evening”
Si Carla Gutiérrez Ortega Córdoba mibati nga bulahan ang pagkahimong usa ka sakop sa Sunday School nga klase ni Sister Cárdenas tungod sa maamumahon ug mapangalagaron nga palibut. Si Carla mipasidungog niana nga palibut ngadto sa daghang mga butang lakip sa:
-
Pagpangandam: Ang pagpaambit og mga kasulatan ug mga hunahuna nakatabang sa mga estudyante nga maandam alang sa sunod nga klase. “Ang inadlaw nga mga kasulatan nag-amuma kanamo ug mipalapad sa among kahibalo,” mipasabut siya.
-
Pag-apil: “Kaming tanan mosulti. Kini nagtugot kanako nga mas makaila og maayo sa akong mga kauban sa klase, isip mga higala ug isip mga kaigsoonan.”
-
Gugma: “Si Sister Cárdenas moagak kanimo. Ang among klase mura og home evening, uban sa pipila ka mga kaigsoonan. Espesyal kaayo kini.”
-
Ang Espiritu Santo: “Kami adunay makapahimuot, mauyunon nga diwa sulod sa among klase tungod kay managsama kami sa Espiritu.”
-
Pagpamatuod: Ang “Dali, Sunod Kanako nakatabang nako nga andam sa pagpaambit sa akong pagpamatuod. Nakabaton ko og mas lawom nga kahibalo sa Basahon ni Mormon ug sa Biblia. Kana nagtugot nga ako makapaambit sa unsay akong nakat-unan uban sa akong mga kauban sa klase sa eskwelahan ug sa mga tawo sa trabahoan.”
Pagpangalagad sa Espirituhanong mga Panginahanglan
Sa dihang si Greg ug si Nicky Christensen, gikan sa Kentucky, USA, nagbasa mahitungod sa pakigsaad ni Abraham diha sa mga kasulatan uban sa ilang tulo ka mga anak nga lalaki, nakamatngon sila nga naglisud sila sa pagpasabut niini ngadto nila. Nakahukom sila isip pamilya ngaang matag usa nila magtuon sa pakigsaad ni Abraham sa ilang kaugalingon ug dayon mopakigbahin sa unsay ilang nakit-an.
“Nakakuha kami og makapainteresado nga mga komento,” miingon si Greg. “Ang among otso anyos naka-kat-on nga ang ngalan ni Abraham mao si Abram kanhi. Ang iyang ngalan giusab ngadto sa Abraham tungod kay siya misaad sa Ginoo nga mobiya sa sala ug mopuyo og matarung nga kinabuhi. Nasurprisa kaayo ko nga nakapresentar siya sa ingon niana.”
Nakat-on sila og butang nga bag-o ug nakaangkon og maayong panaghisgutan mahitungod sa kon unsa ang pakigsaad ni Abraham ug unsa ang kahulogan niini alang sa mga Santos sa Ulahing mga adlaw karon.
“Naandan lang namo nga magpuli puli og basa sa mga bersikulo sa kasulatan alang sa among pagtuon sa kasulatan sa pamilya,” miingon si Nicky. Ang “Dali, Sunod Kanako midesinyo og dugang pa sa pagtudlo pinaagi sa Espiritu. Karon kon magdungan kami sa pagtuon, mabati nako ang ginagmay nga pag-aghat sa Espiritu aron madala ang among mga panaghisgutan sa lahi nga direksyon base sa panginahanglan sa among pamilya.”
Ang paggamit sa Dali, Sunod Kanako wala lamang makatabang sa ilang pamilya nga mas malambigit ug mainteresado sa pagtuon sa ebanghelyo sa pamilya, apan kini nakatabang usab ni Greg ug ni Nicky sa pagpangalagad sa espirituhanong panginahanglan sa ilang mga anak.
Ang “Dali, Sunod Kanako nakatabang nako sa pagtudlo sa akong mga anak,” miingon si Nicky. “Nagtabang usab kini nako sa pagdala sa lahi nga mga hagit nga usahay naa nako uban sa akong mga anak. Mas mabati nako nga nahiuyon sa Espiritu, mas maminaw ko og maayo ug makadawat ko og mga pag-aghat kon unsaon nga ako makatabang sa matag bata.”
Si Greg malingaw sa mas taas nga panaghisgutan sa ebanghelyo nga namugna tungod sa Dali, Sunod Kanako diha sa pamilya. “Ang among mga anak nga lalakii tanan managlahi sa ilang kahibalo sa ebanghelyo,” siya miingon. Ang “Dali, Sunod Kanako nakahatag og paagi kanamo aron matabangan ang matag usa kanila nga makat-on base sa ilang mga panginahanglan. Ang makita sila nga molambo diha sa ilang gugma alang sa ebanghelyo ug magtan-aw nila nga makaplag kon unsaon nila sa paggamit ang kahibalo sa ebanghelyo diha sa ilang kinabuhi nahimong usa ka maanindot kaayo nga panalangin.”