Mga Baruganan sa Pagpangalagad

Pagpangalagad pinaagi sa mga Kalihokan sa Simbahan

Usa ka paagi nga kita makapangalagad sa atong kaubanang mga miyembro, mga silingan, ug mga higala mao ang pinaagi sa mga kalihokan sa Simbahan. Kon magplano kamo og kalihokan mahitungod sa mga panginahanglan o mga interes sa usa ka tawo nga inyong gipangalagaran o kamo modapit kanila sa pag-apil sa mga kalihokan o mga oportunidad sa pagserbisyo alang sa uban, ang mga kalihokan sa ward, stake, o gani sa multistake nga lebel makahatag og makahuluganon ug makalingaw nga mga paagi sa pag-awhag og panaghiusa ug paglig-on sa mga miyembro.

Ang mga kalihokan sa Simbahan makahimo usab og daghang mga oportunidad sa pagpangalagad. Sama pananglit, ang mga kalihokan sa Simbahan makahatag og mga oportunidad sa pag-apil sa mga proyekto sa pagserbisyo nga mopanalangin sa uban ug mo-ugmad og positibong mga relasyon sa komunidad. Ang mga kalihokan sa Simbahan mahimo usab nga usa ka kahigayunan sa pagtabang sa dili kaayo aktibong mga miyembro sa Simbahan ug sa mga higala sa laing mga tinuohan o mga higala nga walay giapilan nga relihiyon.

Ang paglakip sa daghang mga tawo sa mga kalihokan sa Simbahan mohimo og usa ka oportunidad alang sa Ginoo sa pagpanalangin ug paglig-on sa atong mga ward ug branch, sa atong kasilinganan, ug sa atong mga komunidad.

Pag-ugmad og Positibo nga mga Relasyon

Padulong na ang tingtugnaw, ug si David Dickson walay ideya kon unsaon nga ipabiling mainitan ang iyang pamilya.

Si David, iyang asawa, ug duha ka mga anak nga babaye bag-o lang mibalhin ngadto sa bukiran nga siyudad sa Fredonia, Arizona, USA, usa ka habog nga disyerto nga dapit nga gipalibutan og talagsaong pulahon nga mga pangpang, sagebrush ug mga evergreen.

Ang panimalay nga girentahan sa mga Dickson nagsalig sa usa ka sug-angan nga kahoy ang gigamit isip nag-unang tinubdan sa kainit. Dali nga nahibaloan ni David nga ang pagpangahoy usa ka kahanas nga gikinahanglan tungod kay ang mga tingtugnaw sa Fredonia puno sa nyebe ug yelo.

“Wala koy bisan unsang igsusugnod nga kahoy o usa ka chainsaw o bisan ang kahibalo kon unsaon sa paggamit ang usa niana!” Miingon si David. “Wala ko kahibalo unsay akong buhaton.”

Pipila ka mga miyembro sa ward nangutana kang David kon ang iyang pamilya adunay igo nga kahoy nga makalahutay sa tingtugnaw. “Wala ra magdugay nakaamgo sila nga ako walay igo nga kahoy,” miingon si David. “Sa wala madugay ang korum sa mga elder mitanyag sa pagtabang kanako nga manguha og kahoy. Napuno sa pasalamat, gidawat nako ang ilang tanyag.”

Sa wala madugay nahibaloan ni David nga kini nga byahe sa pagpangahoy sama sa daghang mga kalihokan sa ward nga maayo pagkaplano, organisado kaayo, ug daghan ang manambong. Usa ka Sabado sa buntag, si David, ang korum sa mga elder, ug ang ubang mga miyembro sa ward mipadulong ngadto sa kabukiran sa usa ka caravan sa mga trak ug mga trailer.

“Sulod sa usa ka hapon, salamat sa ilang mga himan ug kahibalo ug kahanas, ang mga miyembro sa ward mihatag sa akong pamilya og nagpatong-patong nga binugha nga milungtad kanamo og dul-an sa duha ka mga tingtugnaw,” miingon si David. “Mas importante, natudloan ko sa tanang kinahanglan nakong mahibaloan mahitungod sa pagpangahoy sa akong kaugalingon. Sa dihang mibiya ko sa Fredonia, nahibalo ko unsaon sa paggamit ang usa ka chainsaw, ug mitabang ko sa daghang dili nako maihap nga pagpangahoy nga mga kalihokan sa ward.”

Ang maong mga kalihokan sa ward wala lang mipalambo og positibong mga relasyon tali sa mga miyembro sa Simbahan apan mipalambo usab og positibong mga relasyon sa tanang mga tawo sa komunidad.

“Nakahinumdom ko og usa ka babaye, dili miyembro sa Simbahan, kinsa bag-o sa dapit,” miingon si David. “Siya misunog na lang sa kahoy gikan sa iyang balay mismo aron mainitan. Sa dihang nahibalo mi sa iyang kahimtang, among gisiguro nga siya adunay igong igsusugnod nga kahoy aron makalahutay sa tingtugnaw. Mapasalamaton kaayo siya nga naglisud siya og sulti.”

Ang mga paningkamot sa pagpangalagad sa Fredonia misiguro nga ang tanan luwas ug mainitan latas sa tingtugnaw.

Pagtabang sa Uban

Samtang nagserbisyo og misyon didto sa Romania, si Meg Yost ug ang iyang kompanyon kanunay mibisita sa usa ka pamilya kinsa wala na magsimba sa dugay nang panahon. “Ang mga Stanica usa sa labing unang mga miyembro sa Simbahan sa Romania,” miingon si Meg, “ug kami nahigugma kanila.”

Sa dihang miabut ang panahon sa pagplano ug pag-organisar og usa ka kalihokan sa branch, ang mga lider mihukom nga ang branch mopahigayon og usa ka “Gabii sa Pioneer.” Kini mahimong usa ka gabii sa pagsaulog sa maisugong mga pioneer kinsa mitabok sa Estados Unidos aron makaabut sa Walog sa Salt Lake. Mahimo usab kini nga usa ka oportunidad sa pagpasidungog sa mga pioneer sa Simbahan sa Romania.

“Among nahunahunaan nga kini mahimong usa ka nindot nga paagi alang sa pipila ka mga miyembro sa pagpamatuod sa ilang pagkakabig ug sa unsang paagi nakita nila ang pagtubo sa Simbahan sa Romania,” miingon si Meg. “Nahunahunaan dayon namo nga ang pamilyang Stanica kinahanglang maapil. Gidapit namo sila sa pag-apil, ug sila naghinam-hinam!”

Sa gabii sa kalihokan, ang mga Stanica wala pa gihapon maabot sa dihang oras na nga magsugod.

“Nabalaka mi nga dili sila moabut,” mihinumdom si Meg. “Apan igo ra gayud, sila misulod sa pultahan. Ang mga Stanica mihatag og usa ka maanindot nga pagpamatuod sa ebanghelyo ug sa Simbahan. Nakahugoy-hugoy usab sila sa ubang mga miyembro kinsa wala nila nakita sa dugayng panahon.”

Ang mga miyembro sa branch mihangup ug miabi-abi sa mga Stanica. Pagkasunod Dominggo, malipayong nasurprisa si Meg nga nakakita ni Sister Stanica diha sa simbahan.

“Sa dihang mibisita ko sa branch pipila ka bulan ang milabay, nagsimba gihapon siya!” Miingon si Meg. “Nagtuo ko nga ang kahigayunan nga siya nagpamatuod ug mibati nga naapil ug gikinahanglan sa branch nakatabang gayud niya.”

4 ka mga Ideya alang sa Pagpangalagad pinaagi sa mga Kalihokan sa Simbahan

Pagplano og mga kalihokan nga matubagang mga panginahanglan: Ang mga kalihokan mao ang usa ka nindot nga paagi nga matubag ang daghang nagkalain-laing mga panginahanglan. Mahimo kining planohon sa pagtubag sa piho nga mga panginahanglan sa usa ka indibidwal o grupo. Kini usab kinahanglan makatubag sa mga panginahanglan niadtong kinsa moapil, bisan kon kana nga panginahanglan mao ang mas makaila ang usag usa, mas makakat-on sa ebanghelyo, o mobati sa Espiritu.
Dapita ang tanan: Samtang planohon ninyo ang mga kalihokan, paghimo og espesyal nga paningkamot sa pagdapit niadtong kinsa makabenepisyo gikan sa pag-apil. Hinumdumi ang bag-ong mga miyembro, dili kaayo aktibong mga miyembro, kabatan-onan, mga single adult, mga tawo nga may kakulangan, ug mga tawo sa ubang tinuohan. Ipadangat ang pagdapit uban sa ilang labing maayong mga tinguha nga anaa sa hunahuna, ug ipadayag kon unsa gayud ninyo ka gusto nga moadto sila.
Awhaga ang pag-apil: Kadtong inyong gidapit mas makabenepisyo gikan sa mga kalihokan kon sila adunay oportunidad sa pag-apil. Usa ka paagi sa pag-awhag sa pag-apil mao ang pagpagamit sa mga indibidwal sa ilang mga gasa, mga kahanas, ug mga talento atol sa kalihokan.
Abi-abiha ang tanan: Kon ang inyong mga higala motambong sa kalihokan, buhata ang tanan ninyong mahimo aron mobati sila nga giabi-abi. Sa samang paagi, kon makakita kamo og mga tawo nga wala ninyo mailhi, magmahigalaon ug abi-abiha usab sila!