Mga Baruganan sa Pagpangalagad

Pagpangalagad pinaagi sa Kinatibuk-ang Komperensya

Uban sa tanang makapabayaw nga mga kinutlo, mga tradisyon sa pamilya, ug mga pagtulun-an gikan sa mga sulugoon sa Ginoo, ang kinatibuk-ang komperensya naghatag kanato og daghang mga paagi sa pagpangalagad—sa wala pa, atol, ug human sa kinatibuk-ang komperensya nga tapos sa semana!

Liahona, Abril 2020

Isip mga magtutudlo sa klase sa pagpangandam sa misyon, si Susie ug Tom Mullen kanunay nga mohangyo sa mga sakop sa ilang mga klase sa pagdapit og usa ka tawo nga motan-aw sa kinatibuk-ang komperensya.

“Ang pagdapit og tawo nga mobuhat og usa ka butang usa ka importante nga bahin sa misyonaryo nga buhat, ug magamit usab kini diha sa pagpangalagad,” miingon siya. “Ang among mga estudyante kanunay nga mo-report kon unsa ka maayo ang resulta niini kanila ug sa tawo nga ilang gidapit.”

Ania ang pipila sa mga paagi sa pagtabang nga gi-report sa ilang mga estudyante:

“Nangalagad kami sa usa ka higala kinsa adunay pipila ka isyu nga gipanglimbasugan. Gidapit namo siya sa pagpaminaw sa kinatibuk-ang komperensya alang sa mga tubag. Sa dihang nakigsulti kami kaniya human sa komperensya, misulti siya kanamo nga daghan kaayo siya’g nadunggan nga mga ideya nga makatabang.”
“Mipahigayon kami og party sa kinatibuk-ang komperensya ug ang tanan midala og pagkaon nga mapaambit. Lingaw kaayo kadto nga nakahukom kami nga buhaton kadto pag-usab.”
“Midapit ko og higala nga motan-aw sa kinatibuk-ang komperensya uban kanako. Samtang nag-istorya kami mahitungod niini, nakahukom kami nga mangadto sa meetinghouse aron susihon kon pwede kaming motan-aw niini didto. Nahimo namo, ug kadto ang labing nindot nga kasinatian nga maana didto!”

Sama sa nakat-onan sa mga Mullen ug sa ilang mga estudyante, adunay daghang paagi sa pagpangalagad pinaagi sa kinatibuk-ang komperensya. Usa ka talagsaong paagi nga mopaambit og makapadasig nga mga kinutlo, mga tradisyon sa pamilya, makahuluganon nga mga diskusyon, ug mga pagtulun-an sa mga sulugoon sa Ginoo!

Dapita ang Uban ngadto sa Inyong Panimalay

“Ang Manluluwas misugo sa Iyang mga sumusunod nga ‘maghigugmaay sa usag usa; maingon nga ako nahigugma kaninyo’ (Juan 13:34). Mao nga atong tan-awon kon unsa ka dako ang Iyang paghigugma kanato. … Kon ato Siyang himoon nga atong ehemplo, kinahanglan kitang maningkamot kanunay sa pagtabang sa pagpaapil sa tanan.” —Presidente Dallin H. Oaks¹

Katuigan ang milabay ang among talagsaon nga home teacher nga si Mike nakamatikod nga ang akong tulo ka bata ug ako adunay gamay lamang nga laptop nga among katan-awan sa kinatibuk-ang komperensya. Siya diha-diha dayon midapit kanamo ngadto sa iyang balay aron motan-aw uban kaniya ug sa iyang asawa, si Jackie, namugos nga ganahan sila nga naay kauban. Nalipay ang akong mga anak nga motan-aw sa komperensya diha sa usa ka tinuod nga TV; mapasalamaton kaayo ko nga nakabaton og suporta; ug kaming tanan giganahan sa among panahon nga nagkauban.

Human niana, ang pagtan-aw og dungan sa kinatibuk-ang komperensya nahimo na nga tradisyon. Bisan kon nakaangkon na kami og among kaugalingong TV, malipayon gihapon kaming mangadto sa ilang Mike ug Jackie dala ang among mga unlan, mga notebook, ug mga snack alang sa kinatibuk-ang komperensya. Ang pagpaminaw sa mga pulong sa mga propeta nga magkauban nakahimo niini nga mas espesyal. Nahimo kaming daw usa ka pamilya. Si Mike ug Jackie nahimong pipila sa akong labing suod nga mga higala ug ikaduha nga mga apohan sa akong mga anak. Ang ilang gugma ug pakighigala usa ka talagsaon nga panalangin sa akong pamilya. Mapasalamaton kaayo ko sa ilang kaandam sa pag-abli sa ilang panimalay ug sa ilang mga kasingkasing kanamo.

Suzanne Erd, California, USA

Mga Baruganan nga Hunahunaon

“Nakamatikod”

Ang Manluluwas mahigugmaong migahin og panahon aron makita ang mga panginahanglan sa uban ug dayon milihok aron sa pagtubag niadto nga mga panginahanglan (tan-awa sa Mateo 9:35–36; Juan 6:5; 19:26–27). Makabuhat usab kita niini.

“Diha-diha dayon midapit”

Human kita makamatikod sa mga panginahanglan niadtong atong gipangalagaran, ang sunod nga lakang mao ang paglihok.“Pagpaminaw sa mga pulong sa mga propeta”

Kita kinahanglang “[mag]tigum sa kanunay” (Moroni 6:5) aron sa pagkat-on og dungan, paglambo og dungan, ug paghisgot mahitungod sa espirituhanong mga butang nga labing mahinungdanon sa atong mga kalag.

Ang “Dali, ug paminawon ta, pulong sa propeta”² tingali maoy usa sa labing importanting mga pagdapit nga matanyag nato ngadto niadtong atong gipangalagaran.

“Gugma ug pakighigala”

Aron tinud-anay nga makatabang ug makaimpluwensya sa uban, kinahanglan gayud kitang mag-ugmad og relasyon uban sa kalooy ug “tiunay nga paghigugma” (tan-awa sa Doktrina ug mga Pakigsaad 121:41).

Ipaambit diha sa Internet

“Ang mga channel sa social media mao ang mga himan sa tibuok kalibutan nga personal ug positibong makaapekto sa daghang mga tawo ug mga pamilya. Ug ako nagtuo nga ang panahon miabut alang nato isip mga disipulo ni Kristo sa paggamit niining dinasig nga mga himan sa husto ug mas epektibo nga paagi sa pagpamatuod sa Dios ang Mahangturong Amahan, Iyang plano sa kalipay alang sa Iyang mga anak, ug sa Iyang Anak, nga si Jesukristo, isip Manluluwas sa kalibutan.” —Elder David A. Bednar³

Ang internet nagtugot kanato sa pagpaambit sa ebanghelyo ngadto sa tibuok kalibutan. Ganahan ko niana! Mopaambit ko og pipila ka mga kalihokan alang sa kinatibuk-ang komperensya, apan sa kasagaran naningkamot ko sa pagtabang sa uban sa pagmugna og diskusyon gikan sa mga pakigpulong sa kinatibuk-ang komperensya. Ang pagkakita og mga pangutana gikan sa uban sa kasagaran makatabang nato nga makakita sa mga butang sa bag-ong paagi ug mahimong sinugdanan sa atong kaugalingong mahinungdanon nga pangdiskusyon nga mga pangutana.

Akong nakaplagan nga samtang ikaw mogamit og mga pangutana aron sa paghisgot sa mga pakigpulong sa kinatibuk-ang komperensya ngadto sa mga pamilya nga imong gipangalagaran, makatabang kini kanimo nga makita ang ilang mga kalig-on ingon man ang ilang mga panginahanglan. Usa sa akong paborito nga mga ipangutana mao ang, Unsay imong gibati nga mao ang tema gikan sa labing bag-o nga sesyon sa kinatibuk-ang komperensya?

Ang tubag hapit kanunay nagtugot nimo nga makita ang nagpanghitabo sa ilang kinabuhi ug unsay importante kanila. Nagtugot kini nimo nga mahimong mas maayo nga tigpangalagad nga brother o sister tungod kay mas klaro na nimo silang makita.

Camille Gillham, Colorado, USA

Mga Baruganan nga Hunahunaon

“Pagpaambit sa ebanghelyo”

Gihangyo kita sa pagpakigsaad nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).

“Pagmugna og diskusyon”

Ang mga mensahe sa kinatibuk-ang komperensya makadasig og mga panag-istoryahanay nga talagsaon, mapuslanon, ug giniyahan sa espirituhanong paagi. Ug kini nga matang sa mga diskusyon makalig-on sa imong mga relasyon, makatabang nga molambo ang imong pagpamatuod, ug mohatag kanimo og kalipay! (tan-awa sa Doktrina ug mga Pakigsaad 50:22).

“Mogamit og mga pangutana”

“Ang maayo nga mga pangutana makatabang kaninyo sa pagsabut sa mga interes, mga kahingawa, o mga pangutana nga anaa sa uban. Kini makapahanas sa inyong pagtudlo, makapadapit sa Espiritu, ug makatabang sa mga tawo nga makat-on.”⁴