Mga Baruganan sa Pagpangalagad

Motabang Uban sa Kalooy

Samtang sundon nimo ang ehemplo sa Manluluwas bahin sa kalooy, imong makita nga makahimo ka diay og kalainan sa kinabuhi ngadto sa uban.

Liahona, Hulyo 2018

Ang Imong Pagtuo Maoy Nagpaayo Kanimo, ni Jorge Cocco

Ang kalooy mao ang pagbaton og kasayuran bahin sa kahasol sa uban nga adunay tinguha sa pagpagaan o paghupay niini. Ang pakigsaad sa pagsunod sa Manluluwas usa ka pakigsaad bahin sa kalooy sa “pagtambayayong sa usag usa nga mga alantuson” (Mosiah 18:8). Ang buluhaton sa pag-atiman sa uban usa ka oportunidad sa pagpangalagad nga maoy gusto sa Ginoo: nga “patooha ninyo ang uban nga nagaduhaduha” (Judas 1:22). Misugo ang Ginoo nga, “Magpakita sa kalooy ug malumong pagbati ang tagsatagsa ka tawo sa iyang igsoon” (Zacharias 7:9).

Ang Kalooy sa Manluluwas

Ang kalooy usa ka makadasig nga pwersa sa pagpangalagad sa Manluluwas (tan-awa sa sidebar: “Usa ka Manggiloy-ong Manluluwas [A Compassionate Savior]”). Ang Iyang kalooy alang sa Iyang isigkatawo naghimo nga matabangan Niya sa dili maihap nga okasyon ang mga anaa sa Iyang palibut. Tungod sa pag-ila sa panginahanglan ug mga tinguha sa katawhan, Iya silang napanalanginan ug gitudloan sa daghang paagi nga importante kaayo para kanila. Ang tinguha sa Manluluwas nga mahaw-as kita sa atong mga kahasol misangput sa buhat sa kalooy: nga mao ang Iyang Pag-ula alang sa mga sala ug pag-antus sa katawhan.

Ang iyang kapasidad sa pagtubag sa panginahanglan sa katawhan usa ka butang nga atong angay mapaningkamutan samtang magserbisyo kita. Samtang magpakabuhi kitang matarung ug maminaw sa mga pag-aghat sa Espiritu, madasig kita sa pagtabang sa makahuluganong mga paagi.

Ang Atong Pakigsaad bahin sa Kalooy

Ang Langitnong Amahan gusto nga magmanggiloy-on ang Iyang mga anak (tan-awa sa 1 Mga Taga-Corinto 12:25–27). Aron mahimong tinuod nga mga disipulo, kinahanglan nga makapalambo ug makapakita kita og kalooy ngadto sa uban, ilabi na ngadto sa mga nanginahanglan (D&P 52:40).

Sa atong pagdala sa atong kaugalingon sa ngalan ni Jesukristo pinaagi sa atong pakigsaad sa bunyag, misaksi kita nga kita andam nga mopakita og kalooy. Si Presidente Henry B. Eyring, Ikaduhang Magtatambag sa Unang Kapangulohan, mitudlo nga ang gasa sa Espiritu Santo motabang sa paghimo nato niini: “Kamo mga miyembro sa pakigsaad sa Simbahan ni Jesukristo. …

“Mao nga mibati kamo nga gustong motabang sa tawo nga nanglimbasug nga magpadayon nga dunay gipas-an nga kasubo ug kalisdanan. Misaad kamo nga tabangan ninyo ang Ginoo nga mapagaan ang ilang mga palas-anon ug mahupay. Gihatagan kamo sa gahum aron makatabang nga mogaan kana nga mga palas-anon dihang nadawat ninyo ang gasa sa Espiritu Santo.”¹

Sama pananglit, usa ka sister sa Russia may lisud nga sitwasyon sa pamilya hinungdan nga dili siya makasimba sulod sa kapin sa usa ka tuig. Lain nga sister sa branch mitabang matag Dominggo uban sa kalooy pinaagi sa pagpanawag kaniya aron sultihan siya sa mga pakigpulong, mga leksyon, mga gitawag sa misyon, mga bata nga natawo, ug uban pang mga balita sa branch. Dihang nasulbad ang sitwasyon sa pamilya sa natanggong nga sister sa balay, gibati niya nga kabahin gihapon siya sa branch tungod sa sinemana nga pagtawag kaniya sa iyang higala.

Mubo nga sulat

1. Henry B. Eyring, “Ang Maghuhupay” Liahona, Mayo 2015, 18.

Upat ka Sugyot alang sa Pagpalambo og Kalooy

Lakaw ug Buhata ang Sama Niini: Ang Maayong Samarianhon, ni Jorge Cocco

Samtang ang kalooy sa kasagaran mouswag human atong masinati ang kaugalingon natong mga pagsulay, dunay pipila ka mga butang nga atong mahimo karon aron makapalambo og kalooy. Hunahunaa ang mga paagi nga magamit nimo kining upat ka baruganan.

• Mag-ampo alang niini. Samtang mangamuyo ka sa Langitnong Amahan, ablihan Niya ang imong kasingkasing, ug “mobati ka og usa ka sinserong kabalaka alang sa mahangturong kaayohan ug kalipay sa ubang mga tawo” (Isangyaw ang Akong Ebanghelyo: Usa ka Giya sa Misyonaryo nga Pagserbisyo [2004], 142; tan-awa usab sa Moroni 7:48).

• Praktisa kini. Makapakita ka og kalooy pinaagi sa pagpaminaw ug pagsabut. Ibutang ang imong kaugalingon sa ilang sitwasyon ug ikonsiderar kon unsa kaha ang ilang bation. Kon tukma sa sitwasyon ug tayming, pwede kang motanyag og tabang aron mahuwasan sila sa ilang kasakit, pag-antus, o kahasol.

• Sunda ang mga pag-aghat. Ang Ginoo makapadayag kanato og mga paagi nga mapakita ang kalooy nga posibling wala nato mamatikdi sa atong kaugalingon. Kon mobati ka nga giaghat sa Espiritu sa pagtabang sa uban, ayaw pagpanuko nga lihukon dayon kini.

• Pagkahimong personal nga higala. Ang pagpakita og kalooy pwede ra nga sama ka yano sa pagpakita og tinuod nga interes sa kinabuhi sa mga tawo. Kat-uni ang pagpaminaw og maayo (tan-awa sa “Ministering Principles: Five Things Good Listeners Do [Mga Baruganan sa Pagpangalagad: Lima ka Butang nga Mahimo sa Maayong Tigpaminaw],” Liahona, Hunyo 2018, 6–9). Ang imong gugma para kanila motubo, ug mas sayon ang pagkamatikud og mga paagi aron ikapakita kana nga gugma.

Kalooy

1. Pag-ampo

2. Pag-praktis

3. Mga Pag-aghat

4. Pakighigala

Usa ka Manggiloy-ong Manluluwas

Ikonsiderar ang pagtuon niining pipila ka mga kasulatan aron makita kon sa unsang paagi ang kalooy ni Jesukristo naghimo aron Iyang maayo, mapanalanginan, ug matudloan kadtong mga anaa sa Iyang palibut atol sa Iyang pangalagad: Mateo 9:35–38; 14:14; 18:27, 33; 20:30–34; Marcos 1:40–42; 5:19; 6:30–42; 9:22; Lucas 7:13; 10:33; 15:20.

Ang mga baruganan sa pagpangalagad gitumong aron matabangan kita sa pagkat-on sa pag-atiman sa usag usa—dili ipaambit isip usa ka mensahe. Samtang atong nailhan kadtong atong gialagaran, ang Espiritu Santo moaghat kanato aron makahibalo unsa nga mensahe ang ilang kinahanglanon isip dugang sa atong pag-atiman ug kalooy.