Mga Baruganan sa Pagpangalagad

Pagpaambit sa Kahayag sa Manluluwas sa Pasko

Hunahunaa kadtong inyong gipangalagaran. Unsaon ninyo pagtabang kanila nga mahimong mas mapaduol ngadto kang Kristo karong Pasko?

Litrato sa pagkatawo ni Niltza Beatriz Santillan Castillo

Samtang kita mohinumdom sa Manluluwas nga si Jesukristo sa tibuok tuig, ang Pasko mao ang panahon nga atong saulugon ang labing mahinungdanong gasa nga nahatag: “Kay gihigugma gayud sa Dios ang kalibutan nga tungod niana gihatag niya ang iyang bugtong Anak” (Juan 3:16). Samtang mangalagad kita panahon sa Pasko, makahatag usab kita og mga gasa nga makatabang sa uban nga mapaduol ngadto sa Manluluwas. Maanindot kaayo nga maghunahuna sa atong kaugalingon nga parehasan ang gihatag nga gasa sa Langitnong Amahan.

Ako Gihapon nga Gibahandi ang Gasa

Susan Hardy, California, USA

Niadtong 11 anyos pa ko, ang akong magtutudlo sa Sunday School, si Brother Deets, misulti sa among klase nga kon among sag-ulohon ang mga Artikulo sa Hugot nga Pagtuo ug ipasabut ngadto kaniya unsa ang gipasabut niini, iyaha kaming palitan og among kaugalingong set sa mga kasulatan.

Si Brother ug Sister Deets ang batan-ong magtiayon, nga bag-o lang nagsugod. Dili ko sigurado kon si Brother Deets makahimo sa pagpalit og usa ka gasa alang ni bisan kinsa. Apan mihukom ko nga kon nagtuo siya nga ingon niana kaimportante sa pagsag-ulo sa mga Artikulo sa Hugot nga Pagtuo, akong dawaton ang hagit.

Pagkahuman nga akong nahuman ang tanang 13, milabay ang panahon ug nakalimot ko mahitungod sa iyang saad.

Dayon, sa Adlaw sa Pasko, nakadawat ko og package nga anaa ang akong ngalan niini. Sa pag-abli nako niini nakita ang set sa mga kasulatan nga alang gayud kanako, nga gisukipan og usa ka kard nga nag-aghat nako sa pagbasa niini kanunay. Niadto ning 1972, ug hangtud karong adlawa anaa pa gihapon nako kadtong mga kasulatan. Bililhon kini ngari kanako.

Dili tungod sa kantidad sa gasa apan ang kamabination nga iyang gipakita ngari kanako ug ang sakripisyo nga andam siyang mihimo alang kanako nga nakapabayaw kanako inubanan sa dakong tinguha sa pagtuon sa pulong sa Dios. Naningkamot ko sa pagsunod sa ehemplo ni Brother Deets sa pagpangalagad pinaagi sa paghatag og makahuluganong mga gasa niadtong naglibut kanako, naglaum nga makapanalangin ako sa mga kinabuhi sa uban ingon man siya nakapanalangin nako.

Usa ka Imbitasyon sa Paghimo og usa kaTampo

Richard M. Romney, Utah, USA

Sa dihang kadtong nagplano sa among kalihokan sa Pasko sa ward mihangyo kanako sa pagbisita sa usa ka dili kaayo aktibo nga miyembro ug modapit kaniya sa pag-apil sa programa, moangkon ko nga nakulbaan gyud ko. Akong nahimamat si Darren kausa lang kahigayon, sa dihang miapil siya og usa ka kalihokan sa ward. Gipurongan ang iyang ulo og purong nga pangmotorsiklo. Ang iyang puting taas nga buhok gihigtan nga pina-ponytail, ta-as ang iyang puti nga bangas, ug ang iyang mga bukton napuno sa patik.

Karon, giubanan sa usa ka sakop sa komite, nagbarug ko sa pultahan ni Darren, naghunahuna unsa kahay iyang isulti. Iya kaming gipadayon, ug gisultihan namo siya kon nganong anaa kami didto. Miingon siya, “Oy, ganahan ko nga mobuhat niana!”

Nindot kaayo ang iyang gihimo, nagtabang sa paghimo sa kalihokan nga makahuluganon alang sa kadaghanan. Pagkataud-taud, ang akong kauban sa pagpangalagad ug ako gihangyo sa pagbisita ni Darren kanunay. Ingon og malipay siya nga makakita namo, ug aduna kami mga makalingaw nga panag-istoryanahanay. Mapasalamaton ko sa inspirasyon sa pagdapit kaniya sa pag-apil sa programa sa kalihokan sa ward nga misangpot ngadto sa usa ka gipangga nga relasyon.

Pagpangalagad sa Uban atol sa Pasko

Ania ang pipila ka butang nga inyong mabuhat aron sa pagsiguro nga kadtong inyong gipangalagaran masayud nga kamo naghunahuna kanila ilabi na niining panahon sa tuig.

1. Usahay ang usa ka tawag sa telepono o mensahe sa text makahimo og maayong mga butang. Sugdan sa usa ka yanong pakig-istorya “Oy, kumusta naka?” makahimo og kalainan.

2. Apil sa ilang mga pagsaulog kon angay. Ang Pasko mahimong usa ka talagsaong panahon aron makat-on mahitungod sa mga pagtuo nga kumon sa atoa. Kon mopaambit kamo og mga pagtuo ug maminaw sa uban, inyong giablihan ang kahigayunan ngadto sa mas dakong salabutan.

3. Mag-ampo alang kanila sumala sa ilang ngalan. Hangyoa ang Langitnong Amahan sa pagtabang kaninyo sa paghunahuna og mga paagi sa pagdala kanila nga mas maduol ngadto sa Iyang Anak.

4. Yanong mga regalo kasagaran ang mas mahinumduman. Ang gasa dili kinahanglan nga maluho aron higugmaon. Ang gasa sa paggahin og panahon, ang gasa sa pagpaminaw, ang pagpaambit og usa ka litrato o usa ka panumduman—kining tanan mahimong mga gasa sa kasingkasing.

5. Mohatag sa gasa sa pagpapamatuod. Hangyoa sila sa pagpakigbahin sa ilang gugma sa Manluluwas diha ninyo, ug tanyag/dalit sa pagpaambit sa inyong gugma alang Kaniya ngadto nila.

Gamit ang Dan-agi ang Kalibutan sa Pagpangalagad

Inyong magamit ang Dan-agi ang Kalibutan nga kampanya sa pagtabang ninyo samtang kamo mangalagad. Aniay pipila ka ideya aron ikaw makasugod. (Pangita og dugang sa ComeuntoChrist.org.)

1. Ipaambit ang video nga The Christ Child. Maka-post kamo niini, makapaambit og link, o makadapit sa uban sa pagtan-aw niini uban ninyo.

2. Dapita ang uban sa pagtambong og tulumanon sa Pasko. Ang ubang mga tawo gustong mosimba apan wala masayud kon asa moadto. Dapita sila nga mosimba uban ninyo.

3. Awhaga sila sa pagpanghatag ngadto sa uban. Mahimo silang modonar ngadto sa Humanitarian Services sa Simbahan o sa lokal nga mga charity. Kon nagpuyo ka sa usa ka siyudad nga nahimutangan sa usa sa Giving Machine sa Simbahan, mahimo ninyo silang paubanon ninyo kon kamo moadto sa pagdonar. Ang mga machine [makina] naghatag og yanong paagi sa pagpadala og usa ka gasa nga makapanalangin sa katawhan sa tibuok kalibutan.

4. Pagpalista alang sa inadlaw-adlaw nga mga pag-aghat sa pagserbisyo. Makatabang ka sa uban sa pagpalista usab. Ang mga pag-aghat mahimong makahatag og mga oportunidad alang ninyo nga mag-uban sa pagserbisyo.

5. Pun-a ang ilang panimalay sa kalinaw. Pahibaloa sila nga ang mga misyonaryo adunay usa ka espesyal nga mensahe sa Pasko nga ilang ikapaambit, usa nga makahatag og paglaum ug gugma ngadto sa ilang mga kasingkasing.

6. Ipaila sila ngadto sa Dan-agi ang Kalibutan. Ipakita nila unsaon sa pagkat-on og dugang diha sa ComeuntoChrist.org.

Pagpangalagad ngadto sa Tanan Isip usa ka Kongregasyon

Ang matag panginahanglan sa kongregasyon managlahi. Ang pipila makabenepisyo sa pag-organisar og mas dako nga kalihokan. Ang uban nga mga kongregasyon mahimong makabenepisyo gikan sa gagmay ug yano. Kadtong naapil sa pagplano ug pag-organisar sa mga kalihokan mainampoon nga mohunahuna kon unsaon sa pagtubag sa mga panginahanglan nga anaa.

• Ang mga miyembro nga naggikan sa tulo ka stake sa Paris, France, nakatabang sa pagsuporta og usa ka Dan-agi ang Kalibutan soirée [salo-salo] nga naglakip og usa ka pasundayag sa talento ug usa ka pasundayag sa urog [fashion]. Miandam sila sa mga butang nga gihatag ngadto sa mga bakwit ug sa mga tawo nga nakasinati og kawalay kapuy-an. (Tan-awa sa “Lighting the World in Paris,” pahina 32.)

• Ang Charlotte North Carolina Central Stake mipahigayon og kalihokan nga “Pasko sa tibuok Kalibutan” alang sa komunidad, nga may social aron sa pagsaulog ni Kristo pinaagi sa pagkaon, mga pagpakita sa mga internasyonal nga tradisyon sa Pasko, musika, mga proyekto sa pagserbisyo, ug usa ka nativity [pagkatawo sa batang Jesus] sa mga bata.

• Ang mga miyembro sa Vero Beach Florida Stake miapil sa usa ka paghinumdom sa komunidad kabahin sa nganong magsaulog kita sa Pasko. Gipangdonar ang mga dulaan ngadto sa mga charity sa komunidad. Usa ka kuro sa mga bata sa Primary ang mipasundayag, ug daghang mga simbahan adunay mga booth nga nagpakita og mga impormasyon.

• Ang Jacksonville Florida South Stake mipasundayag og Savior of the World nga produksyon alang sa komunidad.

Mas Duol ngadto sa Manluluwas

“Kon sa simbolikanhong paagi moadto kita sa kwadra sa Betlehem, ‘diin ang Dios sa mga oras sa kagabhion nagpahulay na diha sa mga dagami,’ kita mas makaila sa Manluluwas isip usa ka gasa gikan sa usa ka mabination, mahigugmaon nga Langitnong Amahan.”

Elder Dale G. Renlund sa Korum sa Napulog Duha ka mga Apostoles, “Nga Ako Unta Makadala sa Tanan nga mga Tawo ngari Kanako,” Liahona, Mayo 2016, 40.

Ipaambit ang Inyong mga Kasinatian

Ipadala kanamo ang inyong mga kasinatian sa pagpangalagad o kon kamo ang gipangalagaran. Adto sa liahona.ChurchofJesusChrist.org ug i-klik ang “Mosumiter og usa ka Artikulo o Feedback.”