Mga Baruganan sa Pagpangalagad

Pagpangalagad pinaagi sa Pagserbisyo sa Templo

Kon motabang kita sa uban aron makatagamtam sa mga panalangin sa templo, kita nangalagad.

Liahona, Marso 2020

Ang pagtambong sa templo bililhon kaayo nga paningkamot. Si Presidente Russell M. Nelson mitudlo nga “ang templo importante kaayo sa atong kaluwasan ug kahimayaan ug ngadto sa atong mga pamilya. …

“… Matag usa kanato nanginahanglan sa padayon nga espirituhanong paglig-on ug pagtudlo nga mahimo lamang diha sa balay sa Ginoo.”¹

Ang pagtambong sa templo nagkinahanglan og pagdumala sa atong panahon, mga responsibilidad ug mga kapanguhaan, ingon man sa espirituhanong pagkaandam. Nangalagad kita kon atong gitino ang mga babag nga nagpugong sa atong mga kaigsoonan sa pag-adto sa templo ug pagtabang nga makita nila ang mga sulbad.

Ang Templo Usa ka Panalangin nga Matagamtam sa Tanan

Usa ka bag-ong return missionary, si Meg, naglakaw padulong sa mga pultahan sa Templo sa Kona Hawaii dihang nakamatikod siya og usa ka batan-ong babaye nga nag-inusarang naglingkod sa usa ka lingkuranan sa gawas. Mibati si Meg nga kinahanglan siyang makig-istorya sa batan-ong babaye, apan wala siya kasigurado unsay isulti. Mao nga nangutana siya mahitungod sa tattoo nga naa sa kiting sa batan-ong babaye. Sinugdanan kadto sa pag-istoryahanay, nga niana ang batan-on nga si Lani, mipaambit sa iyang sugilanon.

Gisultihan ni Lani si Meg mahitungod sa iyang pakigbisog nga mahingpit ang iyang pagbalik sa Simbahan, sa buotang mga miyembro nga mitabang niya, ug sa iyang panghinaot nga masilyo sa iyang masuso nga anak nga babaye.

Gidapit ni Meg si Lani sa pag-adto sa waiting room nga molingkod uban kaniya. Dili pa sila makasulod sa unahan pa gyud sa sulod sa templo, apan makatabok na sila sa ganghaan. Miuyon si Lani, ug nagkuyog sila agi sa dagkong pultahan. Ang worker sa templo mipaadto nila sa usa ka lingkuranan tungod sa usa ka painting sa Manluluwas.

Samtang nanglingkod sila, mihunghong si Lani, “gusto gyud kong mosulod sa templo karon, apan nakulbaan ko.” Tungod kay misunod sa Espiritu, mitabang siya nga matubag ang hilum nga pag-ampo ni Lani.

Mga Ideya sa Pagtabang Niadtong walay Rekomend

Bisan kadtong dili pa kwalipikado alang sa rekomend, pweding mapanalanginan sa templo.

Ipaambit ang imong mga pagbati mahitungod kon sa unsang paagi ang Ginoo mipanalangin kanimo pinaagi sa buhat sa templo.
Pagdapit og usa ka tawo nga makatambong og usa ka open house sa templo o sa visitors’ center. Mangita og umaabut nga mga open house sa templo diha sa temples.ChurchofJesusChrist.org.

Himoon ang Pagtambong sa Templo nga Mas Sayon alang sa Uban

Bisan sa mga miyembro nga dunay rekomend sa templo, ang pagtambong sa templo posible nga usa ka hagit. Ang uban kinahanglan nga mobiyahe og layo. Ang uban adunay gagmayng mga anak o edaran nang mga sakop sa pamilya kinsa nagkinahanglan og pag-atiman. Pwede kitang magtinabangay aron mahimo ang pagserbisyo sa templo nga posible para sa tanan.

Si Leola Chandler mibati nga lisud ang pag-atiman sa iyang masakiton nga bana ug sa ilang upat ka anak. Mao nga mihukom siya nga mogahin og panahon matag Martes aron makatambong sa duol nga templo. Nahimo kining usa ka tinubdan sa inspirasyon ug gahum sa iyang kinabuhi.

Usa ka adlaw nakadungog siya nga pipila ka gulang na nga mga sister sa iyang ward gusto gayud nga makatambong sa templo, apan wala silay pamilete. Si Leola mitanyag nga ila siyang pasakyon. Sulod sa 40 ka tuig, panagsa ra siyang moadto sa templo nga mag-inusara.²

Napanalanginan si Leola, ug napanalanginan niya ang uban sa dihang iya silang pasakyon uban kaniya padulong sa templo.

Mga Ideya sa Pagtabang sa Uban aron Makaadto sa Templo

Unsaon nimo sa pagtabang sa uban aron makaadto kanunay sa templo? Tingali makita nimo nga ang susamang mga ideya makatabang usab kanimo.

Magkuyog mo. Motanyag nga mopasakay o moplano og biyahe para sa usa ka tawo. Tingali makadasig kini og usa ka tawo aron motambong usab sa templo.
Paghangyo og mga sakop sa imong pamilya o ward aron tabangan ka nga makahimo sa mga ordinansa para sa imong mga katigulangan, ilabi na kon duna kay daghang ngalan sa pamilya nga andam na para sa mga ordinansa.
Itanyag ang pagbantay sa bata aron ang mga ginikanan makatambong sa templo. O planuhon ang pagpuli-puli og bantay sa mga bata. (Alang sa dugang nga mga ideya, basaha ang “Temple Night nga Gipasayon: 6 ka Sugyot aron sa Paghimong Sayon sa mga Pagbiyahe sa Templo” [sa digital lamang nga artikulo], Liahona, Ene. 2018.)

Kon ang Templo Layo Kaayo

Si Chandradas “Roshan” ug si Sheron Antony nga taga Colombo, Sri Lanka, nakahukom nga masilyo sa templo. Ang ilang mga higala nga si Ann ug Anton Kumarasamy mahinamon kaayo alang sa ilaha. Apan nasayud sila nga ang pag-adto sa Templo sa Manila Philippines dili sayon o dili sab gamay og gasto.

Si Roshan ug Sheron nagtigum og kwarta ug misayo og palit og mga tiket aron makakuha og flight nga ilang makaya. Sa katapusan, miabut na ang adlaw. Apan, atol sa ilang pagtugpa sa Malaysia, ilang nasayran nga aron makapadayon sa Pilipinas, nagkinahanglan diay sila og visa o gikinahanglan nga mosakay og lahi nga eroplano. Dili posible ang pagkuha og visa, ug dili nila makaya ang pagpalit og mga tiket sa laing eroplano. Apan dili sila makaako sa paghunahuna nga mamauli sila nga wala masilyo.

Dili sigurado kon unsa pay buhaton, gitawagan ni Roshan si Anton. Si Anton ug Ann gusto gyud kaayong motabang. Usa sila sa pipila ka magtiayon sa Sri Lanka nga nasilyo sa templo, ug nasayud sila sa panalangin niini. Apan bag-ohay lang nilang nagamit ang ilang mga tinigum aron pagtabang og usa ka sakop sa pamilya nga nagkinahanglan, ug wala silay igong kwarta nga ikatabang ni Roshan ug Sheron para sa mga tiket alang sa bag-ong flight.

Sa Sri Lanka naandan na nga palitan sa pamanhunon ang pangasaw-unon og bulawang kwentas aron siya dunay kwarta kon inkaso mamatay ang iyang bana. Mihukom si Ann nga ibaligya ang iyang kwentas aron itabang sa pagpalit og bag-ong mga tiket. Ang iyang dakung gasa naghimong posible para ni Roshan ug ni Sheron nga makaabut sa ilang iskedyul sa Manila.

“Nasayud ako sa bili sa pagkasilyo sa templo,” miingon si Ann. “Nasayud ko nga si Sheron ug Roshan mahimo unya nga kalig-on sa branch. Dili ko gustong mawala kanila kini nga oportunidad.”³

Mga ideya sa Pagtabang Niadtong Kinsa dili Makabisita sa Templo

Posibling tawagon kamo nga mangalagad niadtong dili kanunay makaadto sa templo o dili gayud makaadto tungod sa gilay-on o sa gasto. Apan makakita ra gihapon ka og paagi sa pagtabang nila nga makadayeg sa mga panalangin sa templo.

Motudlo o dungan nga moapil sa usa ka klase nga pagpangandam alang sa templo o sa klase sa family history.
Mohatag kanila og litrato sa templo nga ikasab-it sa ilang balay.
Kon nakaadto na ka sa templo, ipaambit ang imong mga pagbati mahitungod sa imong kasinatian ug sa imong pagpamatuod bahin sa mga ordinansa sa templo.
Tabangi sila nga makakat-on og daghan pa mahitungod sa mga pakigsaad nga ilang gihimo ug kon unsaon sa pagtuman niini. Ikonsiderar ang paggamit sa “Pagsabut sa Atong mga Pakigsaad ngadto sa Dios: Usa ka Kinatibuk-ang Pagpasabut sa Atong Pinaka Importante nga mga Pakigsaad,” naa sa Hulyo 2012 nga Liahona.