Ang ngalan nga ʾIbrāhīm nga gisulat sa sinulatan nga Islamic, gisundan sa “diha Kaniya ang kalinaw”

Ang Kaliwatan ni Abraham

Ang mga Muslim ug ang mga Santos sa Ulahing mga Adlaw nagtan-aw ni Abraham (AS) isip usa ka ehemplo sa pagkamatinud-anon, pagkamatinuoron, ug pagkamasulundon ngadto sa Dios. Sila nakakita og panaghigalaay tali sa Islam, Kristiyanismo, ug Judaism tungod sa komon nga espirituhanon nga kabilin nga nagsumpay ngadto ni Abraham. Tungod niini nga rason, kining tulo ka relihiyon kasagaran gitawag og “Mga Tinuhoan ni Abraham.”

Mga Muslim

Ang mga Muslim nagtuo nga si Ibrahim, o Abraham (AS), mao ang usa ka propeta kinsa adunay nabantog nga tahas sa Islam isip usa ka ehemplo sa hugot nga pagtuo ug pagkamasulundon ngadto sa Dios. Siya wala gayod mosimba og laing dios o mga dios-dios (tan-awa sa Qur’an 3:67). Gidala niya ang iyang anak nga lalaki nga si Ishmael (AS) ngadto sa Mecca. Si Abraham (AS) mao ang responsable sa pagtukod sa Ka’bah didto sa Mecca alang sa pagsimba sa Usa ka Dios. Ang Islam nagtudlo nga ang kinaiya ni Abraham ug sa iyang pagkaandam sa pagtugyan ngadto sa kabubut-on sa Dios makahatag niya og espesyal nga dapit isip usa ka Higala sa Dios.

Mga Santos sa Ulahing mga Adlaw

Ang mga Santos sa Ulahing mga Adlaw nagtuo nga si Abraham usa ka talagsaon nga propeta ug ehemplo sa pagkamasulundon. Siya usa ka tigpangita sa kalipay,kalinaw, ug kahibalo. Pinaagi sa iyang pagkamatarong ug hugot nga pagtuo sa Dios, si Abraham nakaangkon og mga panalangin alang sa iyang kaliwatan ug nahimong amahan sa daghang nasod. And Dios misaad ni Abraham nga ang iyang kaliwatan modawat sa Iyang kamatuoran ug motudlo niini ngadto sa katawhan sa kalibotan sa ulahing mga adlaw (tan-awa sa Perlas nga Labing Bilihon, Abraham 1:2, 19).