10

Magpakita ng Integridad

Pag-isipang Mabuti:Bakit kaya mahal ng Panginoon ang mga taong may “integridad”? (Tingnan sa Doktrina at mga Tipan 124:15.)

Panoorin:“Anong Ibibigay ng Tao na Katumbas sa Kaniyang Buhay?” (Walang video? Basahin ang kasunod na pahina.)

Talakayin:Ano ang ibig sabihin ng magkaroon ng integridad? Paano ipinagpapalit ng mga tao ang kanilang kaluluwa para makuha lamang ang gusto nila sa buhay na ito?

Basahin:Mga Saligan ng Pananampalataya 1:13; Mosias 4:28; Job 27:5 (sa kanan)

“Naniniwala kami sa pagiging matapat.”

Mga Saligan ng Pananampalataya 1:13

“At nais kong inyong pakatandaan, na sinuman sa inyo ang manghiram sa kanyang kapitbahay ay nararapat na isauli ang bagay na kanyang hiniram, alinsunod sa kanyang pinakipagkasunduan, o kung hindi, kayo ay magkakasala; at marahil, inyong papapangyarihin ang inyong kapitbahay na magkasala rin.”

Mosias 4:28

“Hanggang sa ako’y mamatay ay hindi ko aalisin sa akin ang aking pagtatapat.”

Job 27:5

Praktis:I-rate ang iyong sarili sa sumusunod na mga aspeto.

Maglagay ng numero sa unahan ng bawat aytem para ipakita kung gaano kadalas mo ginagawa ito. 1 = hindi kailanman, 2 = paminsan-minsan, 3 = madalas, 4 = halos palagi, 5 = palagi

1. Tinutupad ko ang lahat ng aking pangako at tipan.

2. Tapat ako sa sinasabi ko at sa mga rekord na iniingatan ko.

3. Hindi ako nagmamalabis para magmukhang mas gumanda ang mga bagay-bagay.

4. Ibinabalik ko ang lahat ng hiniram ko at hindi kinukuha ang mga bagay na hindi akin.

5. Lubos ang katapatan ko sa aking asawa sa salita at sa gawa.

6. Hindi ako nandadaya, kahit alam kong hindi ako mahuhuli.

7. Kapag may napulot akong isang bagay na hindi sa akin, isinasauli ko ito sa may-ari.

8. Lagi kong binabayaran ang perang hiniram ko, pati ang PEF loans mula sa Simbahan.

Mangakong Gawin:Mangakong gawin ang mga sumusunod sa linggong ito. Lagyan ng tsek ang mga kahon kapag nakumpleto mo ang bawat gawain:

• Nagpapakita ng integridad sa araw-araw.

• Itinuro ang alituntuning ito sa iyong pamilya.

• Patuloy na ginagawa ang naunang mga foundation principle o saligang alituntunin.

“Ang ibig sabihin ng integridad ay palaging paggawa ng tama at mabuti anuman ang ibunga nito. Ibig sabihin ay pagiging mabuti mula sa kaibuturan ng ating kaluluwa, hindi lamang sa ating mga kilos kundi, ang pinakamahalaga, sa ating isipan at puso. … Ang kaunting pagsisinungaling, pandaraya, o pananamantala ay hindi kalugud-lugod sa Panginoon. … Ang pinakadakilang gantimpala ng integridad ay ang palaging pagsama ng Espiritu Santo, … na gagabay sa lahat ng ating ginagawa.”

Joseph B. Wirthlin, “Personal Integrity,” Ensign, Mayo 1990, 30–33

Tip para sa Facilitator

Tulungan ang lahat para magawa ito—hindi lamang sa salita.

Anong Ibibigay ng Tao na Katumbas sa Kaniyang Buhay?

Kung hindi ninyo mapapanood ang video, basahin ang script na ito.

Elder Robert C. Gay

ELDER ROBERT C. GAY: Minsa’y itinanong ng Tagapagligtas sa Kanyang mga disipulo: “Anong ibibigay ng tao na katumbas sa kaniyang buhay?”

Ito ay tanong na itinuro sa akin ng aking ama na pag-isipan kong mabuti maraming taon na ang nakalilipas. Habang lumalaki ako, binigyan ako ng mga magulang ko ng mga gawaing-bahay at binigyan ako ng allowance para sa gawaing iyon. Madalas kong gamitin ang perang iyon, na mahigit 50 cents kada linggo, para manood ng sine. Ang halaga ng tiket sa sinehan noon ay 25 cents para sa isang batang 11-taong-gulang. May natitira pa akong 25 cents para ipambili ng kendi, na tig-5 cents ang isa. May sine na, may kendi pa! Ang sarap ng buhay ko noon.

Maayos ang lahat hanggang sa mag-12 anyos ako. Habang nakapila isang hapon, nalaman ko na ang halaga ng tiket para sa mga 12-anyos ay 35 cents, at ibig sabihin niyan ay nabawasan ng dalawa ang kendi. Dahil hindi ako handang isakripisyo iyon, ikinatwiran ko [sa sarili ko] na, “Tulad pa rin noong isang linggo ang hitsura mo.” Pagkatapos ay lumapit ako at humingi ng tiket na halagang 25 cents. Hindi nagduda ang kahera, at lima pa rin ang nabili kong kendi sa halip na tatlo.

Sa tuwa sa nagawa ko, nagmadali akong umuwi para ikuwento kay Itay ang malaking tagumpay ko. Habang ikinukuwento ko ang mga detalye, wala siyang imik. Pagkatapos ko, tumingin lang siya sa akin at sinabing, “Anak, ipagbibili mo ba ang kaluluwa mo sa halagang singko?” Tumimo ang sinabi niya sa batang puso ko. Hinding-hindi ko nalimutan ang aral na ito.

(Robert C. Gay, “Anong Ibibigay ng Tao na Katumbas sa Kaniyang Buhay?” Ensign o Liahona, Nob. 2012, 34.)