8

Makipag-usap: Pagsamo at Pakikinig

Pag-isipang Mabuti:Naranasan mo na ba na sinagot ng Ama sa Langit ang iyong mga panalangin tungkol sa trabaho, negosyo, o pag-aaral mo?

Panoorin:“Paglikha ng Pag-angat” (Walang video? Basahin ang kasunod na pahina.)

Talakayin:Ano ang sinabi ni Pangulong Uchtdorf tungkol sa kakayahan nating iangat ang ating sarili mula sa alalahanin ng mundo? May mga pagkakataon ba na hindi natin nahihiwatigan ang mga sagot sa ating mga panalangin? Ang pakikinig ba ay mahalagang bahagi ng panalangin?

Basahin:Doktrina at mga Tipan 8:2; pahayag ni Elder Nelson (sa kanan)

“Sasabihin ko sa iyo sa iyong isipan at sa iyong puso, sa pamamagitan ng Espiritu Santo, na pasasaiyo at mananahanan sa iyong puso.”

Doktrina at mga Tipan 8:2

“Ang inyong kaluluwa ay mapagpapala kapag natuto kayong makinig, pagkatapos ay makinig para matuto mula sa mga bata, magulang, asawa, kapitbahay, at lider ng Simbahan, lahat ng ito ay magpapaibayo sa inyong kakayahan sa pakikinig nang mabuti sa mga payo mula sa langit.”

Russell M. Nelson, “Listen to Learn,” Ensign, Mayo 1991, 24

Talakayin:Bilang grupo, talakayin ang mga tanong na ito: Bakit mahalagang skill ang pakikinig? Paano makakatulong ang pakikinig nang mabuti sa ating trabaho?

Praktis:Gawin ang aktibidad na ito para mas mapagbuti pa ang iyong skill sa pakikinig:

• Bilang grupo, basahin ang mga step o hakbang sa ibaba at talakayin nang maikli ang mga ito.

• Hilingin sa isa o dalawang kagrupo na sabihin sa iba ang tungkol sa problema o tanong na mayroon sila. Lahat ay kailangang makinig mabuti, na sinusunod ang mga step o hakbang na ito.

• Tanungin ang mga kagrupo na nagsalita kung ano ang nadama nila nang makinig mabuti ang grupo.

communication circle

❶

Mag-concentrate

• Magpokus sa mga sinasabi at galaw ng nagsasalita.

• Huwag sumabad.

➋

Magbigay ng pagpapahalaga

• Tingnan ang nagsasalita.

• Gumamit ng maiikling salita gaya ng “oo” o “okey.”

• Pasalamatan ang nagsalita.

➌

Repasuhin

• Sabihin: “Ang sinasabi mo ay. …”

• Pagkatapos ay ulitin ang narinig.

➍

Magtanong

• Itanong: “Tama ba ako?”

• Maghintay sa sagot at makinig.

Mangakong Gawin:Mangakong gawin ang mga sumusunod sa linggong ito. Lagyan ng tsek ang mga kahon kapag nakumpleto mo ang bawat gawain:

• Ginawa ang mga step o hakbang sa pakikinig nang mabuti sa iyong pamilya:

  • Nagpakuwento sa kapamilya tungkol sa problema o tanong na mayroon siya.

  • Ginawa ang mga step o hakbang sa pakikinig habang nakikinig ka sa problemang ito.

• Itinuro ang alituntuning ito sa iyong pamilya.

• Patuloy na ginagawa ang naunang mga foundation principle o saligang alituntunin.

“Pinakikinggan ng Ama sa Langit ang mga panalangin ng Kanyang mga anak sa buong mundo na humihingi ng pagkaing makakain, damit para takpan ang kanilang katawan, at dangal na magmumula sa kakayahang paglaanan ang kanilang sarili.”

Henry B. Eyring, “Mga Pagkakataong Gumawa ng Mabuti,” Ensign o Liahona Mayo 2011, 22

“Dapat tayong humingi ng tulong sa ating Ama sa Langit at humanap ng lakas mula sa Pagbabayad-sala ng Kanyang Anak na si Jesucristo. Sa mga bagay na kapwa temporal at espirituwal, … ito ay magbibigay-daan sa atin na maging masisinop na tagapaglaan para sa ating mga sarili at sa iba.”

Robert D. Hales, “Pagiging Masinop na Tagapaglaan sa Temporal at sa Espirituwal,” Ensign o Liahona, Mayo 2009, 7–8

Paglikha ng Pag-angat

Kung hindi ninyo mapapanood ang video, basahin ang script na ito.

Pangulong Dieter F. Uchtdorf

PANGULONG UCHTDORF: Para maiangat ang eroplano mula sa lupa, kailangang lumikha ng pag-angat. Sa aerodynamics, nangyayari ang pag-angat kapag dumadaan ang hangin sa mga pakpak ng eroplano at ang puwersa ng hangin sa ilalim ng pakpak ay mas malakas kaysa sa puwersa ng hangin sa ibabaw ng pakpak. Kapag nahigitan ng pag-angat ang paghila pababa ng grabidad [gravity], umaangat ang eroplano sa lupa at nagsisimulang lumipad.

Sa gayunding paraan, makalilikha tayo ng pag-angat sa ating espirituwal na buhay. Kapag ang puwersang tumutulak sa atin pataas ay mas malakas kaysa sa mga tukso at kalungkutang humihila sa atin pababa, makaaangat at makalilipad tayo tungo sa kinaroroonan ng Espiritu.

Bagaman maraming alituntunin ng ebanghelyo na tumutulong sa atin upang makaangat, gusto kong magtuon ng pansin sa isang ito.

[Panalangin!]

Ang panalangin ay isa sa mga alituntunin ng ebanghelyo na nagpapaangat. May kapangyarihan ang panalangin na ilayo tayo mula sa ating [mga alalahanin sa mundo. Maiaangat tayo ng panalangin] mula sa mga ulap ng pagdurusa [o] kadiliman tungo sa maliwanag at maaliwalas na papawirin.

Isa sa pinakadakilang mga pagpapala at pribilehiyo at oportunidad na mayroon tayo bilang mga anak ng ating Ama sa Langit ay ang pagkakataon nating makausap Siya [sa pamamagitan ng panalangin]. Masasabi natin sa Kanya ang mga karanasan natin sa buhay, pagsubok, at pagpapala. Makaririnig at makatatanggap tayo ng makalangit na patnubay mula sa Banal na Espiritu [anumang oras at saanmang lugar].

(Dieter F. Uchtdorf, “Panalangin at ang Bughaw na Papawirin,” Ensign o Liahona, Hunyo 2009, 5–6; ang mga salitang naka-bracket ay idinagdag ni Pangulong Uchtdorf sa isang interbyu noong Marso 2014)