3

Dau Talairawarawa

Vakananuma Vakatitobu:Na lawa cava meu vakamuria me rawa niu bula rawati au?

Sarasara:“Obedience Brings Blessings” (Sega na vidio? Wilika na draunipepa ka tarava.)

Veivosaki: Na talairawarawa ki na lawa kei na ivakavuvuli e veimuataki ki na veivakalougatataki vakayalo ka vakayago. Na cava so o sa sotava me vakavinakataka na veika oqo?

Wilika:Vunau kei na Veiyalayalati 130:20–21; tukutuku mai vei Josefa Simici (ena imatau)

“Sa virikotori na ivakaro … sa yavutaki kina na veivakalougatataki kecega—Ia ni da sa muria e dua na ivakaro, ena vakalougatataki keda na Kalou eda sa yalataki tu kina.

Vunau kei na Veiyalayalati 130:20-21

“Oqo na noqu lawa: Ni sa veivakaroti na Kalou, cakava.”

Josefa Simici, ena History of the Church, 2:170

Vakatovotovo:Raica na teveli e ra. Raica ni talairawarawa ki na veilawa eso e kauta mai na veivakalougatataki digitaki eso. Eso na ivakaraitaki e soli tiko.

Taura e so na gauna mo:

1. Vola eso na veivakalougatataki matailalai o gadreva ena nomu vaqara cakacaka, vakacakacakataki iko ga, se vuli. Vakayagataka na kolomu ena imatau.

2. Vakayagataka na kolomu ena imawi mo lisitaka kina na lawa o rawa ni muria mo ciqoma kina na veivakalougatataki.

Talairawarawa	Mo Ciqoma na
Lawa se ivakavuvuli	Veivakalougatataki
Na Vosa ni Vuku (V&V 89)	Bulabula vinaka, Levu cake na kila
iKatini kei na iSolisoli tale eso (Malakai 3:10–12)	Veivakalougatataki vakayalo ka vakayago tale ga, qaqa ena cakacaka, taqomaki
Lako icakacaka ena veisiga ena gauna donu	Tomani na cakacaka kei na rawa ni tauyavutaki na vakabulai ilavo
Kania na kakana bulabula ka dau vakaukauwa yago wasoma	Ena lailai nomu vakalutu cakacaka baleta na tauvi mate

Vakatovotovo:Vola e rua se tolu na sala e na rawa ni vakalevutaki na talairawarawa kina lawa o digia:

Yalataka:Yalataka mo cakava na veika oqo ena loma ni macawa. Tikitaka na kisi ena kena yadua o sa vakacavara:

• Vakatovotovotaka na talairawarawa ena veisiga.

• Vakavulica na ivakavuvuli oqo kina nomu matavuvule.

• Tomana tiko na vakatovotovotaki ni yavu ni vakavuvuli e liu.

“Kevaka eda taleitaka vakalevu cake na tiko sautu se na iyau mai na talairawarawa, eda na calata na veivakalougatataki e via solia vei keda o Koya.”

Spencer W. Kimball, ena Nona iVakavuvuli o Spencer W. Kimball, ed. Edward L. Kimball (1982), 212.

iDusidusi nei Dauveituberi

Mera vakauqeti kece mera cakava ka maroroya na iyalayala matailalai ka vakavulici na nodra matavuvale.

Talairawarawa ena Kauta mai na Kalougata

Kevaka o sega ni sarava rawa na vidio, wilika na itukutuku

Sa dua na yalayala totoka! “Ia ko koya sa muria na nona vunau, sa rarama kina ka kila na ka dina; ia sa vakavukui sara ka kila na ka kece ga me yacova ni sa vakalagilagi ena ka dina ka kila na ka kecega” [V&V 93:28]. …

Kemuni na taciqu kei na ganequ, na veivakatovolei levu ena bula oqo na talairawarawa. “Meda vakatovolei ira mada kina,” sa kaya na Turaga, “era na muria na veika kece sa vakaroti vei ira na Turaga na nodra Kalou se sega.” [Eparaama 3:25.].

E kaya kina na iVakabula, “Ia, ko ira kecega era sa gadreva meu vakalougatataki ira, sa kilikili mera muria na kena ivakaro sa virikotori tu ni sa bera ni buli ko vuravura.” [V&V 132:5].

Ena sega tale ni dua na ivakaraitaki ni talairawarawa me vakataka na noda iVakabula. E vakaoqo na nona raici Koya o Paula:

“Ia sa dina ga sa Luvena ko Koya a sa vakatavulici ga ena ivalavala ni talairawarawa ni sa vosota tiko na ka rarawa;

“Ia ni sa vakarautaki oti sa yaco me vu ni bula tawamudu vei ira kecega sa talairawarawa vua.” [Iperiu 5:8–9.].

Na iVakabula e vakaraitaka ni lomana dina na Kalou ena nona bulataka na bula sa vinaka sara kei na nona dinata na ilesilesi sa lesi mai kina o Koya. E sega ni tiko vua na viavia turaga. Sega ni tiko vua na kaukauti koya cake ena dokadoka. Dau yalodina tu ga. Dau yalomalua tu ga. Dau vosa vakadodonu. Dau talairawarawa. …

Ena kena sotavi tu na yaluma mai Kecisemani, ena Nona vosota na mosi ka “ia na nona buno sa vaka na tiri ni dra ni sa lutu ki na qele” [Luke 22:44.], A vakaraitaka ni sa Luvena talairawarawa ena nona kaya, “Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa” [Luke 22:42.].

Me vaka sa vakavulici ira na Nona iApositolo taumada na iVakabula, sa vakakina na Nona vakasalataki iko kei au, “Mo muri au mai.” [Joni 21:22.]. Eda na talairawarawa beka?

Na kila-ka eda vakasaqara, na kena isau eda sasagataka meda rawata, kei na kaukauwa eda gadreva, nikua meda sotava kina na ibolebole ni dua na vuravura dredre vakaidina ka vuki veisau tu ga, sa na rawa ni noda kevaka me sa na talairawarawa ki na ivakaro ni Turaga. Au cavuta tale mada vakadua na ka e tukuna na Turaga: “Ia, ko koya sa muria na nona vunau, sa rarama kina ka kila na ka dina, ia sa vakavukui sara ka kila na ka kecega.” [V&V 93:28].

Sa noqu masu malumalumu meda na vakalougatataki ena yalayala taucoko sa yalataki vei ira era sa talairawarawa. Ena yaca i Jisu Karisito, na noda Turaga ka iVakabula, emeni.

(Thomas S. Monson, “Talairawarawa ena Kauta mai na Kalougata,” Ensign se Liaona, Me 2013, 89, 92).