8

Bëni Kërkesa dhe Dëgjoni

Përsiatni:A keni pasur një përvojë kur Ati Qielloi u është përgjigjur lutjeve tuaja për një vend pune, biznesin tuaj apo arsimimin tuaj?

“Creating Lift” [“Krijimi i Forcës Ngritëse”] (Nuk keni material filmik? Lexoni faqen vijuese.)

Diskutoni:Si thotë Presidenti Uhtdorf se mund ta ngremë veten nga shqetësimet tokësore? A ka kohë kur ne nuk i dallojmë përgjigjet ndaj lutjeve tona? A është dëgjimi një pjesë thelbësore e lutjes?

Lexoni:Doktrina e Besëlidhje 8:2; Citimi i Plakut Nelson (në të djathtë)

“Unë do të të them në mendjen tënde dhe në zemrën tënde, me anë të Frymës së Shenjtë, që do të vijë mbi ty dhe që do të banojë në zemrën tënde.”

Doktrina e Besëlidhje 8:2

“Shpirti juaj do të bekohet teksa mësoni të dëgjoni, më pas tek dëgjoni për të mësuar nga fëmijët, prindërit, shokët, fqinjët dhe udhëheqësit e Kishës, gjithçka prej të cilave do ta zgjerojë aftësinë për të dëgjuar këshilla nga lart.”

Russell M. Nelson, “Listen to Learn”, Ensign, maj 1991, f. 24

Diskutoni:Si grup diskutoni për këto pyetje: Pse është të dëgjuarit një aftësi thelbësore? Si mund të na ndihmojë në punën tonë të dëgjuarit me kujdes?

Ushtrohuni:Bëjeni këtë veprimtari që të mësoni t’i përmirësoni aftësitë tuaja dëgjimore:

• Si grup, lexojini hapat më poshtë dhe diskutojini shkurtimisht ata.

• Kërkojini njërit ose dy anëtarëve të grupit t’u tregojnë të tjerëve rreth një sfide apo pyetjeje që ata kanë. Çdokush tjetër duhet të përpiqet të dëgjojë, duke i ndjekur këta hapa.

• Pyetini anëtarët e grupit që folën, se si u ndien kur grupi u përpoq vërtet të dëgjonte.

❶

Kini mendjen

• Përqendrohuni te fjalët e folësit dhe te gjuha e tij e trupit.

• Mos e ndërpritni.

➋

Vlerësojeni

• Vështrojeni folësin.

• Përdorni fjalë të shkurtra si “po” ose “mirë”.

• Falënderojeni folësin.

➌

Shqyrtoni

• Thoni: “Pra, ju po thoni. …”

• Dhe pastaj përsëritni atë që dëgjuat.

➍

Pyetni

• Pyetni: “A e kuptova?”

• Prisni një përgjigje dhe dëgjojeni.

Zotohuni:Zotohuni që t’i bëni veprimet vijuese gjatë javës. Shenjojini kutitë përzgjedhëse kur ta përfundoni çdo detyrë:

• Ushtrojini hapat drejt të dëgjuarit më të mirë me familjen tuaj:

  • Kërkojini një pjesëtari/eje të familjes të tregojë një sfidë apo pyetje me të cilën ai apo ajo po përballet.

  • Ushtrojini hapat e të dëgjuarit ndërsa e dëgjoni këtë sfidë.

• Jepjani mësim familjes suaj këtë parim.

• Vazhdoni t’i ushtroni parimet e mëparshme të themelit.

“Ati ynë Qiellor i dëgjon lutjet e fëmijëve të Tij nëpër tokë, që luten për ushqim për të ngrënë, për rroba për të mbuluar trupat e tyre dhe për dinjitetin që do të rridhte nga të qenët në gjendje për të siguruar për vete.”

Henri B. Ajring, “Mundësi për të Bërë Mirë”, Ensign ose Liahona, maj 2011, f. 22

“Ne duhet të kërkojmë ndihmë nga Ati ynë Qiellor dhe të kërkojmë forcë përmes Shlyerjes së Birit të Tij, Jezu Krishtit. Në të dyja, si në gjërat materiale, ashtu dhe ato shpirtërore, marrja e kësaj ndihme hyjnore na mundëson të bëhemi kujdestarë të matur për vete dhe për të tjerë.”

Robert D. Hejls, “Të Bëhemi Kujdestarë të Matur, Materialisht dhe Shpirtërisht”, Ensign ose Liahona, maj 2009, f. 8

Krijimi i Forcës Ngritëse

Nëse nuk jeni në gjendje ta shikoni materialin filmik, lexojeni këtë skenar.

PRESIDENTI UHTDORF: Me qëllim që një aeroplan të ngrihet nga toka duhet krijuar një forcë ngritëse. Në aerodinamikë, forca ngritëse krijohet kur ajri kalon te krahët e një aeroplani në mënyrë të tillë që trysnia nga poshtë krahëve të jetë më e madhe se trysnia sipër krahëve. Kur forca ngritëse e tejkalon tërheqjen poshtë të gravitetit, aeroplani ngrihet nga toka dhe arrin të fluturojë.

Në një mënyrë të ngjashme, ne mund ta krijojmë forcën ngritëse në jetën tonë shpirtërore. Kur forca që na shtyn drejt qiellit, është më e madhe sesa tundimet dhe ankthi që na tërheqin poshtë, ne mund të ngjitemi dhe të fluturojmë në mbretërinë e Shpirtit.

Edhe pse ka shumë parime të ungjillit që na ndihmojnë të arrijmë forcën ngritëse, do të më pëlqente të përqendrohesha te njëra në veçanti.

[Lutja!]

Lutja është një nga parimet e ungjillit që siguron forcë ngritëse. Lutja ka fuqinë të na ngrejë nga [shqetësimet tona tokësore. Lutja mund] të na ngrejë përmes reve të dëshpërimit [ose] errësirës për te një horizont i ndritshëm e i kthjellët.

Një nga bekimet e privilegjet dhe mundësitë më të mëdha që kemi si fëmijë të Atit tonë Qiellor, është se ne mund të komunikojmë me Të [nëpërmjet lutjes]. Mund t’i flasim Atij për përvojat tona jetësore, sfidat dhe bekimet. Ne mund ta dëgjojmë e të marrim udhërrëfim qiellor nga Shpirti i Shenjtë [në çdo kohë e në çdo vend].

(Dieter F. Uchtdorf, “Prayer and the Blue Horizon”, Ensign ose Liahona, qershor 2009, f. 5–6; fjalët në kllapa u shtuan nga Presidenti Uhtdorf në një intervistë në mars të vitit 2014)