iVakamacala Taumada
E rawa li kina ilawalawa oqo me vukei au meu kunea e dua na cakacaka?
Ena sega ni ka rawarawa na kunea e dua na cakacaka, ia na ilawalawa oqo ni bula rawati koya ena vukei iko mo vulica na sala vinaka duadua mo kunea kina e dua na cakacaka ka rawata vinaka. Ena bose ni lawalawa ko na yalataka kina ni ko na cakava na ka o sa yalataka, ka ra na soli vakasama, ka vakayaloqaqataki iko na ilawalawa. Na inaki ni ilawalawa oqo e sega walega mo vukei mo rawata e dua na cakacaka, ia e vukei iko mo talairawarawa ka vakabauta vakalevu cake na Turaga ka mo ciqoma kina na Nona veivakalougatataki vakayago ka vakayalo ni bula rawati koya.
Na cava na ilawalwa ni bula rawati koya?
E duidui na ilawalawa ni bula rawati koya mai na vei kalasi, lesoni, kei na vuli cakacaka tale e so ni Lotu. E sega kina na qasenivuli, iliuliu, se dauniveivakavulici. O ira na lewe ni ilawalawa era na vuli vata, veivakauqeti ka veitokoni. Era na dau veivakananumi baleta na nodra yalodina kei na veivakasalataki mera walia kina na leqa.
Na cava era dau cakava na lewe ni ilawalawa?
Ena soqoni, era dauyalayala kina na lewe ni ilawalawa mera na cakava. E sega walega ni da vuli ia eda cakava talega na veika me da bula rawati keda kina. Eda na yalayala, eda vukei ira na tani mera dinata nodra yalayala, ka qai ripotetaka noda itosotoso. Ni cakacaka na ilawalawa me vaka na matabose, sa dodonu mo tiko kina ena veigauna ena kena gauna donu. Me na kau tiko mai ena veigauna na ivola ni cakacaka, na ivolalalai ni Noqu Sala kina Bula Rawati Au, kei na ivolalailai ni Noqu Yavu: iVakavuvuli, Maqosa Vakacakaka, iTovotudei. Na bose ni ilawalawa me na dau taura ga e rua na aua. Ena dau taura e dua kina rua na aua ena dua na siga na kena qaravi na noda yalayala.
Na cava e dau cakava na dauveivakarautaki?
O ira na dauveivakarautaki era sega ni kenadau ni veivakacakacakataki se qasenivuli. Era sega ni liutaka se vakavulica na ilawalawa. Era dau vukei ira ga na ilawalawa mera muria na veika sa volai tu ena ivakasala volai. Na kena dau ni bula rawati koya e veivakarautaki kina dua na bose ni ilawalawa, o ira na lewena mera vakaitavi ni sa na oti e vica vata na macawa, kevaka ena gadrevi vakakina. Me baleta na ikuri ni vuli, raica na iDusidusi ni iLiuliu kei na kena vidio ena srs.lds.org.
Sitivikiti ena Vakacavari ni Tabanivuli
O ira na lewe ni ilawalawa ka ra dau lakova mai na bose ka dau qarava nodra yalayala era na rawa ni ciqoma e dua na sitivikiti ni bula rawati koya mai na LDS Business College. Raica na tabana e 29 ena Noqu Yavu me baleta na veika e gadrevi.