“Kapitulo 3: Leksiyon 2—Ang Plano sa Langitnong Amahan sa Kaluwasan,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 3: Leksiyon 2,” Isangyaw ang Akong Ebanghelyo

Kapitulo 3: Leksiyon 2

Ang Plano sa Langitnong Amahan sa Kaluwasan

Ang mga Tawo Mahimong Maghunahuna

Unsa ang katuyoan sa kinabuhi?
Diin man ako gikan?
Aduna bay usa ka Dios nga nagpakabana kanako? Unsaon nako nga mabati nga Siya nagpakabana?
Unsaon nako sa pagtuo sa Dios kon daghan kaayo ang daotan nga mga butang ang nahitabo?
Nganong ang kinabuhi lisod man kaayo usahay? Unsaon nako pagkaplag og kalig-on atol niining mga panahona?
Unsaon man nako nga mahimong mas maayo nga tawo?
Unsay mahitabo human ako mamatay?

Ang gipahiuli nga ebanghelyo ni Jesukristo motabang kanato nga matubag ang importante nga mga pangutana sa kalag. Pinaagi sa ebanghelyo, kita makakat-on mahitungod sa atong balaan nga pagkatawo ug sa atong mahangtoron nga potensiyal isip anak sa Dios. Ang ebanghelyo maghatag kanato og paglaom ug motabang kanato nga makaplagan ang kalinaw, kalipay, ug kahulogan. Ang pagsunod sa ebanghelyo makatabang kanato nga molambo ug makakaplag og kalig-on samtang mag-tubang kita sa mga hagit sa kinabuhi.

Gusto sa Dios ang labing maayo alang sa Iyang mga anak ug nagtinguha sa paghatag kanato sa Iyang labing mahinungdanon nga mga panalangin, nga mao ang pagka-imortal ug kinabuhi nga dayon (tan-awa sa Moises 1:39; Doktrina ug mga Pakigsaad 14:7). Tungod kay Siya nahigugma kanato, Siya naghatag og usa ka plano alang kanato aron madawat kini nga mga panalangin. Sa mga kasulatan, kini nga plano gitawag og plano sa kaluwasan, ang dakong plano sa kalipay, ug ang plano sa katubsanan (tan-awa sa Alma 42:5, 8, 11, 13, 15, 16, 31).

Diha sa plano sa Dios, ang matag usa kanato mohimo og usa ka panaw latas sa kinabuhi sa wala pa dinhi sa yuta, pagkahimugso, mortal nga kinabuhi, kamatayon, ug sa kinabuhi human sa kamatayon. Ang Dios naghatag kon unsa ang atong gikinahanglan niini nga panaw aron nga human kita mamatay, kita sa kataposan makabalik ngadto sa Iyang presensya ug makadawat og kahingpitan sa kalipay.

Si Jesukristo mao ang sentro sa plano sa Dios. Pinaagi sa Iyang Pag-ula ug Pagkabanhaw, si Jesus mihimo nga posible nga ang matag usa kanato makadawat sa pagka-imortal ug kinabuhi nga dayon.

Atol sa atong kinabuhi dinhi sa yuta, kita wala makahinumdom sa atong kinabuhi sa wala pa dinhi sa yuta. Ni kita hingpit nga makasabot sa kinabuhi human sa kamatayon. Apan, ang Dios mipadayag sa daghang kamatuoran mahitungod niining mga bahin sa atong mahangtoron nga panaw. Kini nga mga kamatuoran nagsangkap og igo nga kahibalo alang kanato aron makasabot sa katuyoan sa kinabuhi, aron masinati ang kalipay, ug aron makabaton og paglaom sa maayo nga mga butang nga umaabot. Kini nga kahibalo sagrado nga bahandi nga mogiya kanato samtang kita ania dinhi sa yuta.

Mga Sugyot alang sa Pagtudlo

Kini nga seksiyon naghatag og usa ka sampol nga latid aron sa pagtabang kanimo nga makaandam sa pagtudlo. Naglakip usab kini sa mga ehemplo sa mga pangutana ug mga imbitasyon nga mahimo nimong gamiton.

Samtang mangandam ka sa pagtudlo, mainampoon nga mokonsidear sa sitwasyon ug sa mga espirituhanong panginahanglan sa matag tawo. Desisyoni kon unsa ang labing makatabang nga itudlo. Pag-andam sa paghatag og kahulogan sa mga termino nga lagmit dili masabtan sa mga tawo. Pagplano sumala kon unsa ka taas ang imong oras, maghinumdom nga himoong mubo ang mga leksiyon.

Pagpili og mga kasulatan nga magamit samtang kamo magtudlo. Ang seksiyon nga “Sukaranan nga Doktrina” sa leksiyon naglakip og daghang makatabang nga mga kasulatan.

Ikonsiderar kon unsa ang mga ipangutana samtang ikaw magtudlo. Planoha ang mga imbitasyon nga ihatag nga makadasig sa matag tawo sa pagbuhat.

Hatagi og gibug-aton ang gisaad nga mga panalangin sa Dios, ug ipakigbahin ang inyong pagpamatuod sa unsay inyong gitudlo.

Unsa Kaha ang Inyong Itudlo sa mga Tawo sulod sa 15–25 Minutos

Pagpili og usa o dugang pa sa mosunod nga mga baroganan mahitungod sa plano sa kaluwasan nga itudlo. Ang sukaranan nga doktrina alang sa matag baroganan gihatag human niini nga latid.

Kinabuhi sa Wala Pa Dinhi sa Yuta: Ang Katuyoan ug Plano sa Dios alang Kanato

Kitang tanan espiritu nga mga anak sa Dios. Siya milalang kanato sa kaugalingon Niyang panagway.
Kita nagpuyo uban sa Dios sa wala pa kita matawo sa yuta. Kita mga sakop sa Iyang pamilya. Siya nakaila ug nahigugma sa matag usa kanato.
Ang Dios naghatag og usa ka plano alang sa atong kalipay ug kauswagan niining kinabuhi ug sa kahangtoran.
Sa atong kinabuhi sa wala pa dinhi sa yuta, gipili nato nga mosunod sa plano sa Dios. Kini nagpasabot nga moanhi sa yuta aron kita mohimo sa sunod nga lakang sa atong mahangtoron nga kauswagan.
Si Jesukristo mao ang sentro sa plano sa Dios. Siya mihimo niini nga posible nga kita makabaton og pagka-imortal ug kinabuhi nga dayon.

Ang Paglalang

Ubos sa direksiyon sa Dios, si Jesukristo milalang sa yuta.

Ang Pagkapukan ni Adan ug ni Eva

Si Adan ug si Eva mao ang una sa mga espiritu nga mga anak sa Dios nga mianhi sa yuta. Ang Dios milalang sa ilang lawas ug mibutang kanila sa Tanaman sa Eden.
Si Adan ug si Eva nakalapas, gipapahawa sa tanaman, ug nahimulag gikan sa presensya sa Dios. Kini nga panghitabo gitawag og ang Pagkapukan.
Human sa Pagkapukan, si Adan ug si Eva nahimong mortal. Isip mga mortal, sila makakat-on, mouswag, ug makabaton og mga anak. Sila usab nakasinati og kasubo, sala, ug kamatayon.
Ang Pagkapukan mao ang usa ka lakang sa pag-uswag alang sa katawhan. Ang Pagkapukan naghimo niining posible nga kita matawo sa yuta ug mouswag diha sa plano sa Langitnong Amahan.

Ang Atong Kinabuhi dinhi sa Yuta

Diha sa plano sa Dios, kita kinahanglan nga moanhi sa yuta aron makadawat og pisikal nga mga lawas, makakat-on ug molambo.
Dinhi sa yuta, kita makakat-on sa paglakaw pinaagi sa hugot nga pagtuo. Apan, wala kita pasagdi sa Langitnong Amahan nga mag-inusara. Siya naghatag og daghang gasa ug mga giya sa pagtabang kanato nga makabalik ngadto sa Iyang presensya.

Ang Pag-ula ni Jesukristo

Matag usa kanato makasala, ug matag usa kanato mamatay. Tungod kay ang Dios nahigugma kanato, Siya mipadala sa Iyang Anak, si Jesukristo, dinhi sa yuta aron sa pagtubos kanato gikan sa sala ug kamatayon.
Tungod sa maulaon nga sakripisyo ni Jesus, kita mahimong mapasaylo ug malimpyohan sa atong mga sala. Ang atong mga kasingkasing mahimong mausab alang sa mas maayo kon kita maghinulsol. Kini nakapahimo niining posible nga kita makabalik ngadto sa presensiya sa Dios ug madawat ang kahingpitan sa kalipay.
Tungod sa Pagkabanhaw ni Jesus, kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab, ug ang matag usa kanato mabuhi hangtod sa kahangtoran diha sa usa ka hingpit, nabanhaw nga lawas.
Si Jesukristo nagtanyag og kahupayan, paglaom ug pagkaayo. Ang Iyang maulaon nga sakripisyo mao ang kinadak-ang pagpadayag sa Iyang gugma. Ang tanang dili makiangayon sa kinabuhi mahimong mahusto pinaagi sa Pag-ula ni Jesukristo.

Ang Kalibotan sa Espiritu

Kon ang atong pisikal nga lawas mamatay, ang atong espiritu magpadayon nga buhi diha sa kalibotan sa espiritu. Kini usa ka temporaryo nga kahimtang sa pagkat-on ug pagpangandam sa dili pa ang Pagkabanhaw.
Ang ebanghelyo ni Jesukristo gitudlo didto sa kalibotan sa espiritu, ug kita makapadayon sa paglambo ug pag-uswag.

Ang Pagkabanhaw, Kaluwasan, ug Kahimayaan

Human sa atong panahon didto sa kalibotan sa espiritu, ang Pagkabanhaw mao ang sunod nga lakang sa atong mahangtoron nga panaw.
Ang Pagkabanhaw mao ang paghiusa pag-usab sa atong espiritu ug lawas. Matag usa kanato mabanhaw ug makabaton ug usa ka nahingpit nga pisikal nga lawas. Kita mabuhi hangtod sa kahangtoran. Kini nahimong posible pinaagi sa Pag-ula ug Pagkabanhaw sa Manluluwas.

Paghukom ug mga Gingharian sa Himaya

Kon kita mabanhaw, si Jesukristo mao ang atong maghuhukom. Uban sa pipila lang ka mga eksepsiyon, ang tanang anak sa Dios makadawat og luna sa usa ka gingharian sa himaya.
Bisan og kitang tanan mabanhaw, kitang tanan dili makadawat og managsama nga mahangtorong himaya. Si Jesus mohukom kanato sumala sa atong hugot nga pagtuo, mga buhat, ug paghinulsol diha sa mortalidad ug sa kalibotan sa espiritu. Kita mahimong makabalik aron makapuyo diha sa presensya sa Dios kon kita magmatinud-anon.

Mga Pangutana nga Mahimo Ninyong Ipangutana sa mga Tawo

Ang mosunod nga mga pangutana mao ang mga ehemplo sa unsay mahimo ninyong ipangutana sa mga tawo. Kini nga mga pangutana makatabang kanimo nga makabaton og makahuluganon nga mga panag-estoryahanay ug makasabot sa mga panginahanglan ug panglantaw sa tawo.

Sa imong pamati unsa ang katuyoan sa kinabuhi?
Unsay naghatag kanimo ug kalipay?
Unsa nga mga hagit nga gusto nimong tabangan ka sa Dios?
Unsa ang imong nakat-onan gikan sa mga hagit nga imong giatubang?
Unsa ang imong nahibaloan mahitungod ni Jesukristo? Sa unsang paagi nga ang Iyang kinabuhi ug misyon nakaapekto sa imong kinabuhi?

Mga Imbitasyon nga Mahimo Ninyong Ipadangat

Ipangutana ba nimo sa Dios pinaagi sa pag-ampo aron matabangan ka nga masayod nga ang unsay among gitudlo tinuod? (Tan-awa sa “Mga Panabot sa Pagtudlo: Pag-ampo” sa kataposan nga seksiyon sa leksiyon 1.)
Motambong ka ba sa simbahan karong Dominggo uban kanamo aron makakat-on og dugang mahitungod sa unsay among gitudlo?
Basahon ba nimo ang Basahon ni Mormon ug mag-ampo aron masayod nga kini mao ang pulong sa Dios? (Mahimo nimong isugyot ang piho nga mga kapitulo o mga bersikulo.)
Sundon ba nimo ang ehemplo ni Jesus ug magpabunyag? (Tan-awa sa “Ang Imbitasyon aron Magpabunyag ug Magpakompirma,” nga nag-una niini nga leksiyon 1.)
Mahimo ba kami nga motakda og panahon alang sa among sunod nga pagbisita?

Sukaranan nga Doktrina

Kini nga seksiyon naghatag sa doktrina ug mga kasulatan nga imong tun-an aron sa pagpalig-on sa imong kahibalo ug pagpamatuod sa ebanghelyo ug sa pagtabang kanimo sa pagtudlo.

Kinabuhi sa Wala Pa Dinhi sa Yuta: Ang Katuyoan ug Plano sa Dios alang Kanato

Kita mga Anak sa Dios, ug Nagpuyo Kita uban Kaniya sa Wala Pa Kita Gipakatawo

Ang Dios mao ang Amahan sa atong mga espiritu. Kita tinuod nga Iyang mga anak, nga gilalang diha sa Iyang panagway. Ang matag usa kanato adunay balaanong kinaiyahan isip usa ka anak sa Dios. Kini nga kahibalo makatabang kanato latas sa lisod nga mga panahon ug makapadasig kanato nga mahimo ang atong labing maayo.

Kita nagpuyo uban sa Dios isip Iyang espiritu nga mga anak sa wala pa kita matawo dinhi sa yuta. Kita mga sakop sa Iyang pamilya.

“Adunay usa ka importante nga kailhanan nga atong gisaw-an karon ug sa kahangtoran, usa nga kinahanglang dili gayod nato wagtangon sa panan-aw, ug usa nga kita magmapasalamaton. Kana mao nga kamo ug sa kanunay nahimong anak nga lalaki ug babaye sa Dios nga may espirituhanong gigikanan sa kahangtoran.

“… Ang pagsabot niini nga kamatuoran—tinuoray nga pagsabot niini ug ang paghangop niini—makapausab sa kinabuhi. Makahatag kini kanimo og talagsaong ilhanan nga wala gayoy tawo nga makakuha gikan kanimo. Apan labaw pa niana, makahatag kini kanimo og nindot nga pagbati nga bililhon ug pamati sa imong walay kinutobang bili. Sa kataposan, naghatag kini kanimo og usa ka balaan, halangdon, ug takos nga katuyoan sa kinabuhi” (M. Russell Ballard, “Children of Heavenly Father [Mga anak sa Langitnong Amahan]” [Brigham Young University devotional, Mar. 3, 2020], 2, speeches.byu.edu).

Kita Mipili sa Pag-anhi sa Yuta

Ang atong Langitnong Amahan nahigugma kanato ug nagtinguha nga kita mamahimong sama Kaniya. Siya usa ka nahimaya ug hingpit na nga binuhat nga may nahimaya nga pisikal nga lawas.

Sa atong kinabuhi sa wala pa dinhi sa yuta, kita nakakat-on nga ang Dios adunay usa ka plano alang kanato aron mamahimong sama Kaniya. Usa ka bahin sa Iyang plano mao nga kita mobiya sa atong langitnong panimalay ug moanhi sa yuta aron makadawat og pisikal nga mga lawas. Kita usab nagkinahanglan nga makaangkon og kasinatian ug makapalambo og hugot nga pagtuo atol sa panahon nga layo sa presensya sa Dios. Kita dili makahinumdom nga nagpuyo uban sa Dios. Apan, Siya naghatag kon unsa ang atong gikinahanglan aron nga kita makabalik og puyo uban Kaniya.

Ang kabubut-on, o kagawasan ug abilidad sa pagpili, usa ka mahinungdanong bahin sa plano sa Dios alang kanato. Sa atong kinabuhi sa wala pa dinhi sa yuta, matag usa kanato mipili sa pagsunod sa plano sa Dios ug sa pag-anhi sa yuta aron nga kita makahimo sa sunod nga lakang sa atong mahangtoron nga kauswagan. Atong nasabtan nga samtang kita anaa pa dinhi, kita makabaton og daghang bag-o nga mga oportunidad aron molambo ug makasinati og kalipay. Kita usab makasabot nga kita mag-atubang og oposisyon. Atong masinati ang tentasyon, mga pagsulay, kasubo, ug kamatayon.

Sa pagpili sa pag-anhi sa yuta, kita misalig diha sa gugma ug tabang sa Dios. Kita misalig sa Iyang plano alang sa atong kaluwasan.

Ang Langitnong Amahan Mipili ni Jesukristo sa Pagtubos Kanato

Si Jesukristo mao ang sentro sa plano sa Dios. Sa wala pa moanhi dinhi sa yuta, kita nasayod nga kita dili makabalik ngadto sa presensya nga kita ra. Ang Langitnong Amahan mipili ni Jesukristo, ang Iyang bugtong Anak, aron mahimo kining posible nga kita makabalik ngadto Kaniya ug maangkon ang kinabuhi nga dayon.

Si Jesus andam nga midawat. Miuyon Siya sa pag-anhi sa yuta ug sa pagtubos kanato pinaagi sa Iyang maulaon nga sakripisyo. Ang Iyang Pag-ula ug Pagkabanhaw makapahimo sa mga katuyoan sa Dios nga matuman alang kanato.

Pagtuon sa Kasulatan

Mga Anak sa Dios

Katuyoan sa Dios

Kinabuhi sa Wala pa Dinhi sa Yuta

Pagkat-on og Dugang mahitungod Niini nga Baroganan

Ang Giya ngadto sa mga Kasulatan: “Kinabuhi sa Wala pa Dinhi sa Yuta,” “Plano sa Katubsanan”
Kinatibuk-ang Tamdanan nga Basahon, 1.1: “Plano sa Dios sa Kalipay”
Gospel Topics: “Premortality,” “Plan of Salvation”

Ang Paglalang

Ang plano sa Langitnong Amahan sa pagsangkap alang sa paglalang sa yuta, diin ang Iyang espiritu nga mga anak makadawat og pisikal nga lawas ug makabaton og kasinatian. Ang atong kinabuhi sa yuta mahinungdanon alang sa atong pag-uswag ug mamahimong sama sa Dios.

Ubos sa direksyon sa Langitnong Amahan, si Jesukristo milalang sa yuta ug sa tanang buhi nga mga butang. Ang Langitnong Amahan milalang dayon sa lalaki ug babaye subay sa Iyang kaugalingong panagway. Ang Paglalang mao ang pagpahayag sa gugma sa Dios ug sa Iyang tinguha alang kanato nga makabaton og oportunidad nga molambo.

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan: “Nilalang, Paglalang”
Gospel Topics, “Creation

Ang Pagkapukan ni Adan ug ni Eva

Sa Wala pa ang Pagkapukan

Si Adan ug si Eva mao ang unang espiritu nga mga anak sa Langitnong Amahan nga mianhi dinhi sa yuta. Ang Dios milalang sa ilang pisikal lawas subay sa Iyang kaugalingon nga panagway ug mibutang kanila sa Tanaman sa Eden. Sa tanaman sila mga inosente ug ang Dios misangkap sa ilang mga panginahanglan.

Samtang si Adan ug si Eva didto sa tanaman, ang Dios misugo kanila nga dili mokaon sa bunga sa kahoy sa kahibalo sa maayo ug daotan. Kon sila mituman niini nga sugo, sila nagpabilin unta didto sa tanaman. Apan, sila dili unta makahimo sa pag-uswag pinaagi sa pagkat-on gikan sa oposisyon ug mga hagit sa mortalidad. Dili unta sila makahibalo sa hingpit nga kalipay tungod kay dili man sila makasinati og kasub-anan ug kasakit.

Si Satanas mitintal nila ni Adan ug Eva sa pagkaon sa gidili nga bunga, ug sila mipili sa pagbuhat sa ingon. Tungod niini nga pagpili, sila gipapahawa gikan sa tanaman ug nabulag gikan sa presensya sa Dios. Kini nga panghitabo gitawag og ang Pagkapukan.

Human sa Pagkapukan

Human sa Pagkapukan, si Adan ug si Eva nahimong mortal. Wala na sa kahimtang sa pagkainosente, sila nakasabot ug nakasinati sa maayo ug daotan. Makagamit na sila sa ilang kabubut-on sa pagpili tali niini. Tungod kay si Adan ug si Eva nag-atubang og oposisyon ug mga hagit, sila nakakat-on ug miuswag. Tungod kay sila nakasinati og kasub-anan, sila makasinati usab og kalipay. (Tan-awa sa 2 Nephi 2:22–25.)

Bisan pa man sa ilang kalisdanan, si Adan ug si Eva mibati nga ang pagkamortal usa ka dakong panalangin. Ang usa sa panalangin mao nga sila makabaton og mga anak. Kini nakahatag og paagi alang sa ubang espiritu nga mga anak sa Dios nga makaanhi sa yuta ug makadawat og pisikal nga mga lawas.

Kalabot sa mga panalangin sa Pagkapukan, sila si Adan ug Eva nagmalipayon. Miingon si Eva, “Kon dili pa unta sa atong kalapasan kita dili unta makaangkon og [mga anak], ug dili gayod masayod sa maayo ug sa daotan, ug sa kalipay sa atong katubsanan, ug sa kinabuhi nga dayon nga ihatag sa Dios ngadto sa tanan nga masulundon” (Moises 5:11; tan-awa usab sa bersikulo 10).

Doktrinal nga Panabot: Ang Pagkapukan

Ang Pagkapukan usa ka mahinungdanong bahin sa plano sa Dios alang sa atong kaluwasan. Ang pagkapukan nakapahimo niining posible alang kanato aron makaanhi sa yuta ug mouswag ngadto sa pagkahimong sama sa Dios (tan-awa sa 2 Nephi 2:25).

Ang desisyon ni Eva ug dayon ni Adan sa pagkaon sa bunga ug mobiya sa Tanaman sa Eden mao ang usa ka espirituhanong sensitibo nga pagpili. Sa kinatibuk-an, ang mga kasulatan ug mga propeta nagpasabot ngadto niini nga pagpili isip usa ka kalapasan, dili usa ka sala (tan-awa sa Mga Artikulo sa Hugot nga Patuo 1:2; 2 Nephi 9:6).

Ang uban nga mga tawo sayop nga nagtuo nga napanunod natong tanan ang pagkasad-an sa kalapasan nilang Adan ug Eva (gitawag sa uban isip “orihinal nga sala”). Apan, ang Ginoo mipadayag nga Siya “miula” alang sa orihinal nga sala, diin ang mga sala sa mga ginikanan dili pagatubagon diha sa mga ulo sa anak.” (Moises 6:54).

Kon unang nagtudlo mahitungod sa Pagkapukan, ipasabot kin sa yano nga paagi.

Pagtuon sa Kasulatan

Sa Tanaman

Ang Pagkapukan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan: “Pagkapukan ni Adan ug Eva,” “Kabubut-on”
Gospel Topics: “Fall of Adam and Eve,” “Agency and Accountability”

Ang Atong Kinabuhi dinhi sa Yuta

Daghang tawo ang naghunahuna, “Nganong ania ako sa yuta?” Ang atong kinabuhi dinhi sa yuta usa ka mahinungdanong bahin sa plano sa Dios alang sa atong mahangtorong kauswagan. Ang atong kinadak-an nga katuyoan mao ang pag-andam sa pagbalik ngadto sa presensya sa Dios ug sa pagdawat sa kahingpitan sa kalipay. Gilatid sa ubos ang pipila sa mga paagi nga ang kinabuhi dinhi sa yuta nag-andam kanato alang niini.

Pagdawat og Pisikal nga Lawas

Usa ka katuyoan sa pag-anhi sa yuta mao ang pagdawat og pisikal nga lawas diin makapuyo ang atong mga espiritu. Ang atong mga lawas sagrado, milagruso nga mga nilalang sa Dios. Uban sa pisikal nga lawas, kita makahimo, makakat-on, ug makasinati og daghang butang nga dili mahimo sa atong espiritu. Kita mahimong mouswag sa mga paagi nga dili mahimo kon kita mga espiritu.

Tungod kay ang atong lawas mortal, kita makasinati og kasakit, mga balatian, ug uban pang mga pagsulay. Kini nga mga kasinatian makatabang kanato sa pagkat-on og pailob, kaluoy, ug ubang mga balaanon nga mga kinaiya. Kini mahimong kabahin sa atong kalipay. Ang pagpili sa husto kon kini lisod buhaton sa kasagaran mao ang paagi nga ang hugot nga pagtuo, paglaom, ug gugmang putli mamahimong kabahin sa atong kinaiya.

Pagkat-on sa Maalamon nga Paggamit sa Kabubut-on

Laing katuyoan sa mortalidad mao ang pagkat-on sa maalamon nga paggamit sa atong kabubut-on—sa pagpili unsa ang husto. Ang pagkat-on sa maalamong paggamit sa atong kabubut-on mahinungdanon sa pagkahimong sama sa Dios.

Ang Langitnong Amahan ug si Jesukristo nagtudlo kanato kon unsa ang husto ug naghatag og mga sugo aron mogiya kanato ngadto sa kalipay. Si Satanas motintal kanato sa pagbuhat og sayop, gusto nga kita maalaot sama kaniya. Kita mag-atubang og oposisyon tali sa maayo ug daotan, nga maoy mahinungdanon sa pagkat-on sa paggamit sa atong kabubut-on (tan-awa sa 2 Nephi 2:11).

Kon kita motuman sa Dios, kita molambo ug makadawat sa Iyang gisaad nga mga panalangin. Kon kita mosupak, kita mipahilayo sa atong kaugalingon gikan Kaniya ug makadawat sa mga sangpotanan sa sala. Bisan tuod og usahay mora og sukwahi tan-awon, ang sala sa kaulahian mosangpot ngadto sa pagkadili-malipayon. Kasagaran ang mga panalangin sa pagkamasulundon—ug ang mga epekto sa sala—dili diha-diha dayon mailhan o makita sa panggawas. Apan kini sigurado, tungod kay ang Dios makiangayon.

Bisan kon kita mobuhat sa atong labing maayo, kitang tanan nakasala ug “nahilayo sa himaya sa Dios” (Mga Taga-Roma 3:23). Sa pagkasayod niini, ang Langitnong Amahan naghatag og usa ka paagi nga kita makahinulsol aron kita makabalik ngadto Kaniya.

Ang paghinulsol magdala sa gahom sa atong Manunubos, si Jesukristo, ngari sa atong mga kinabuhi (tan-awa sa Helaman 5:11). Kon kita maghinulsol, kita mahimong malimpyohan gikan sa sala pinaagi sa maulaon nga sakripisyo ni Jesukristo ug sa gasa sa Espiritu Santo (tan-awa sa 3 Nephi 27:16–20). Pinaagi sa paghinulsol, kita makasinati og kalipay. Ang dalan padulong sa atong Langitnong Amahan bukas ngari kanato, tungod kay Siya maluluy-on. (Tan-awa sa “Paghinulsol” sa leksiyon 3.)

Pagkat-on sa Paglakaw pinaagi sa Hugot nga Pagtuo

Laing katuyoan niining kinabuhi mao ang pagbaton og kasinatian nga mahitabo lang pinaagi sa pagkabulag gikan sa Langitnong Amahan. Tungod kay kita dili makakita Kaniya, kita kinahanglan nga makakat-on sa paglakaw pinaagi sa hugot nga pagtuo (tan-awa sa 2 Mga Taga-Corinto 5:6–7).

Wala kita pasagdi sa Dios nga mag-inusara niining panaw. Siya naghatag sa Espiritu Santo aron mogiya, mopalig-on, ug mopabalaan kanato. Siya usab naghatag sa mga kasulatan, mga propeta, pag-ampo, ug sa ebanghelyo ni Jesukristo.

Ang matag bahin sa atong mortal nga kasinatian—ang mga kalipay ug kasub-anan, ang mga kalamposan ug mga kapakyasan—makatabang kanato nga molambo samtang kita mangandam sa pagbalik ngadto sa Dios.

Pagtuon sa Kasulatan

Usa ka Panahon sa Pagtubo ug Pag-uswag

Pagpili

Maayo ug Daotan

Moroni 7:12–19

Sala

Kita Kinahanglan nga Limpyo aron Makauban sa Dios

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Mortal, Pagkamortal,” “Kalisdanan”
Gospel Topics, “Pagkamortal,” “Kalisdanan”

Ang Pag-ula ni Jesukristo

Tungod sa Pagkapukan ni Adan ug ni Eva, kitang tanan mapaubos ngadto sa sala ug kamatayon. Kita dili makabuntog sa mga epekto sa sala ug kamatayon nga kita-kita ra. Diha sa plano sa atong Langitnong Amahan sa kaluwasan, Siya naghatag og usa ka paagi aron mabuntog ang mga epekto sa Pagkapukan aron kita makabalik ngadto Kaniya. Sa wala pa gilalang ang kalibotan, Siya mipili ni Jesukristo nga mamahimong atong Manluluwas ug Manunubos.

Si Jesukristo lang ang makatubos kanato gikan sa sala ug kamatayon. Siya ang tinuod nga Anak sa Dios. Siya nagpakabuhi og usa ka walay sala nga kinabuhi, hingpit nga nagmasulundon sa Iyang Amahan. Si Jesukristo giandam ug andam nga mobuhat sa kabubut-on sa Langitnong Amahan.

Ang Pag-ula sa Manluluwas naglakip sa Iyang pag-antos sa Getsemani, sa Iyang pag-antos ug kamatayon didto sa krus, ug sa Iyang Pagkabanhaw. Siya miantos lapas pa sa panabot—hilabihan nga miagas ang dugo sa matag lungag sa panit (tan-awa sa Doktrina ug mga Pakigsaad 19:18).

Ang Pag-ula ni Jesukristo mao ang labing importante nga panghitabo sa kasaysayan sa tawo. Pinaagi sa Iyang maulaon nga sakripisyo, gihimo ni Jesus nga epektibo ang plano sa Amahan. Kita walay mahimo kon wala ang Pag-ula ni Jesukristo tungod kay kita dili makaluwas sa atong kaugalingon (tan-awa sa Alma 22:12–15).

Ang sakripisyo sa Manluluwas mao ang kinatas-an nga pagpadayag sa gugma sa Iyang Amahan ug alang kanato. “[Ang] kalapad ug kataas, [ang] kahabog ug kalawom” sa gugma ni Kristo milapaw sa atong pagsabot (Mga Taga-Efeso 3:18; tan-awa usab sa bersikulo 19).

Si Jesukristo Mibuntog sa Kamatayon alang sa Tanan

Sa dihang si Jesukristo namatay diha sa krus, ang Iyang espiritu mibulag gikan sa Iyang lawas. Sa ikatulo nga adlaw, ang Iyang espiritu ug ang Iyang lawas naghiusa pag-usab, dili na gayod magkabulag pa. Nagpakita Siya ngadto sa daghang tawo, mipakita nila nga Siya adunay imortal nga lawas nga unod ug mga bukog. Kini nga paghiusa sa espiritu ug sa lawas mao ang gitawag og Pagkabanhaw.

Isip mga mortal, matag usa kanato mamatay. Apan, tungod sa kadaogan ni Jesus batok sa kamatayon, ang matag tawo nga gipanganak dinhi sa yuta mabanhaw. Ang Pagkabanhaw mao ang usa ka balaan nga gasa alang sa tanan, gihatag pinaagi sa kaluoy ug matubsanon nga grasya sa Manluluwas. Ang espiritu ug lawas sa matag tawo maghiusa pag-usab, ug ang matag usa kanato mabuhi sa kahangtoran sa usa ka hingpit, nabanhaw nga lawas. Kon dili pa tungod ni Jesukristo, ang kamatayon motapos sa tanang paglaom alang sa umaabot nga kinabuhi uban sa Langitnong Amahan (tan-awa sa 2 Nephi 9:8–12).

Si Jesus Mihimo Niining Posible nga Kita Malimpyohan sa Atong mga Sala

Aron masabtan ang paglaom nga atong madawat pinaagi ni Kristo, kinahanglan natong masabtan ang balaod sa hustisya. Kini mao ang dili mausab nga balaod nga magdala og mga sangpotanan sa atong mga aksiyon. Ang pagkamasulundon ngadto sa Dios magdala og positibo nga sangpotanan, ug ang pagkamasinupakon magdala og mga negatibo. (Tan-awa sa Alma 42:14–18.) Kon kita makasala, kita mahimong hugaw sa espirituhanon nga paagi, ug walay mahugaw nga butang nga makapuyo diha sa presensya sa Dios (tan-awa sa 3 Nephi 27:19).

Jesus Praying in Gethsemane [Si Jesus Nag-ampo sa Getsemani], ni Harry Anderson

Atol sa maulaon nga sakripisyo ni Jesukristo, Siya ang mipuli sa atong dapit, miantos, ug mibayad sa silot alang sa atong mga sala (tan-awa sa 3 Nephi 27:16–20). Ang plano sa Dios naghatag ni Jesukristo og gahom aron makapataliwala tali kanato ug sa kaangayan (tan-awa sa Mosiah 15:9). Tungod sa maulaon nga sakripisyo, Siya makaangkon sa Iyang mga katungod sa kaluoy alang kanato kon kita mopakita og hugot nga pagtuo ngadto sa paghinulsol (tan-awa sa Moroni 7:27; Doktrina ug mga Pakigsaad 45:3–5). “Sa ingon ang kaluoy motagbaw sa mga gipangayo sa kaangayan, ug gakson [kita] diha sa mga bukton sa kaluwasan” (Alma 34:16).

Pinaagi lamang sa gasa sa Pag-ula sa Manluluwas ug sa atong paghinulsol nga kita makabalik sa pagpuyo uban sa Dios. Kon kita maghinulsol, kita mapasaylo ug malimpyohan sa espirituhanong paagi. Kita gitangtangan sa palas-anon sa pagbati nga sad-an tungod sa atong mga sala. Ang atong samaran nga mga kalag giayo. Kita napuno sa kalipay (tan-awa sa Alma 36:24).

Bisan tuod og kita dili hingpit ug mahimong makasala pag-usab, adunay mas daghan nga grasya, gugma, ug kaluoy diha ni Jesukristo kaysa kapakyasan, sayop, o sala ngari kanato. Ang Dios kanunayng andam ug matinguhaon sa paghangop kanato kon kita mobalik ngadto Kaniya (tan-awa sa Lucas 15:11–32). Wala ug walay usa ka binuhat nga “makapahimulag kanato gikan sa gugma sa Dios nga naato pinaagi kang Kristo Jesus nga atong Ginoo.” (Mga Taga-Roma 8:39).

Gidala ni Jesukristo diha sa Iyang Kaugalingon ang Atong mga Kasakit, mga Balatian, ug mga Kahuyang

Sa Iyang maulaon nga sakripisyo, si Jesukristo midala diha sa Iyang kaugalingon sa atong mga kasakit, mga balatian, ug mga kahuyang. Tungod niini, Siya nasayod “sumala sa unod, nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:12; tan-awa usab sa bersikulo 11). Siya nag-imbitar, “Duol kamo kanako,” ug kon atong buhaton, Siya mohatag kanato og kapahulayan, paglaom, kalig-on, panglantaw, ug pagkaayo (Mateo 11:28; tan-awa usab sa mga bersikulo 29–30).

Samtang kita mosalig ni Jesukristo ug sa Iyang Pag-ula, Siya makatabang kanato nga makalahutay sa atong mga pagsulay, mga balatian, ug mga kasakit. Mahimong mapuno kita sa kalipay, kalinaw, ug kahupayan. Ang tanan nga dili makiangayon kabahin sa kinabuhi mahimong mapahusto pinaagi sa Pag-ula ni Jesukristo.

Pagtuon sa Kasulatan

Ang Pag-ula sa Manluluwas

Pagkabanhaw

Pagkat-on og Dugang mahitungod Niini nga Baroganan

Ang Giya ngadto sa mga Kasulatan: “Jesukristo,” “Pag-ula, Pag-ula sa Dugo,” “Grasya”
Gospel Topics: “Jesus Christ,” “Atonement of Jesus Christ,” “Grace”

Ang Kalibotan sa Espiritu

Daghang tawo ang naghunahuna, “Unsa ang mahitabo human ako mamatay?” Ang plano sa kaluwasan naghatag og pipila ka importante nga mga tubag niining pangutana.

Ang kamatayon kabahin sa “maluluy-on nga plano” sa Dios alang kanato (2 Nephi 9:6). Imbis nga maoy kataposan sa atong kinabuhi, ang kamatayon mao ang sunod nga lakang sa atong mahangtoron nga kauswagan. Aron mamahimong sama sa Dios, kita kinahanglang makasinati og kamatayon ug sa kataposan madawat ang hingpit, nabanhaw nga mga lawas.

Kon ang atong pisikal nga lawas mamatay, ang atong espiritu magpadayon nga buhi diha sa kalibotan sa espiritu. Kini usa ka temporaryo nga kahimtang sa pagkat-on ug pagpangandam sa dili pa ang Pagkabanhaw ug Kataposang Paghukom. Ang atong kahibalo gikan sa mortal nga kinabuhi magpabilin kanato.

Sa kalibotan sa espiritu, ang mga tawo kinsa midawat ug misunod sa ebanghelyo ni Jesukristo “pagadawaton ngadto sa kahimtang sa kalipay, diin gitawag og paraiso” (Alma 40:12). Ang gagmayng mga bata pagadawaton usab ngadto sa paraiso kon sila mamatay.

Ang mga espiritu diha sa paraiso maanaa sa kalinaw gikan sa ilang mga problema ug mga kasub-anan. Sila mopadayon sa ilang espirituhanon nga paglambo, magbuhat sa buluhaton sa Dios ug mangalagad ngadto sa uban. Sila motudlo sa ebanghelyo ngadto niadtong kinsa wala makadawat niini atol sa ilang mortal nga kinabuhi (tan-awa sa Doktrina ug mga Pakigsaad 138:32–37, 57–59).

Diha sa kalibotan sa espiritu, ang mga tawo kinsa wala makadawat sa ebanghelyo dinhi sa yuta, o kinsa mipili nga dili mosunod sa mga sugo, makasinati og pipila ka limitasyon (tan-awa sa Doktrina ug mga Pakigsaad 138:6–37; Alma 40:6–14). Hinuon, tungod kay ang Dios makiangayon ug maluluy-on, sila makabaton og usa ka oportunidad nga matudloan sa ebanghelyo ni Jesukristo. Kon sila modawat niini ug maghinulsol, sila pagatubson gikan sa ilang mga sala (tan-awa sa Doktrina ug mga Pakigsaad 138:58; tan-awa usab sa 138:31–35; 128:22). Sila pagadawaton ngadto sa kalinaw sa paraiso. Sila sa kadugayan makadawat og luna diha sa usa ka gingharian sa himaya base sa mga pagpili nga ilang gihimo diha sa mortalidad ug sa kalibotan sa espiritu.

Magpabilin kita sa kalibotan sa espiritu hangtod nga kita mabanhaw.

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Paraiso”

Ang Pagkabanhaw, Kaluwasan, ug Kahimayaan

Pagkabanhaw

Ang plano sa Dios mihimo niini nga posible nga kita motubo ug makadawat og kinabuhi nga dayon. Human sa atong panahon didto sa kalibotan sa espiritu, ang Pagkabanhaw mao ang sunod nga lakang niana nga paglambo.

Ang Pagkabanhaw mao ang paghiusa sa atong lawas ug espiritu. Matag usa kanato mabanhaw. Kini nahimong posible pinaagi sa Pag-ula ug Pagkabanhaw sa Manluluwas. (Tan-awa sa Alma 11:42–44.)

Kon kita mabanhaw, ang matag usa kanato makabaton og usa ka hingpit nga pisikal nga lawas, gawasnon sa kasakit ug balatian. Kita mahimong imortal, mabuhi hangtod sa kahangtoran.

Kaluwasan

Tungod kay kitang tanan mabanhaw, kitang tanan maluwas—o makaangkon og kaluwasan—gikan sa pisikal nga kamatayon. Kini nga gasa gihatag ngari kanato pinaagi sa grasya ni Jesukristo.

Kita usab mahimong maluwas—o makaangkon og kaluwasan—gikan sa mga sangpotanan nga gikinahanglan sa balaod sa kaangayan tungod sa atong mga sala. Kini nga gasa nahimo usab nga posible pinaagi sa kaayo ug kaluoy ni Jesukristo kon kita maghinulsol. (Tan-awa sa Alma 42:13–15, 21–25.)

Kahimayaan

Ang kahimayaan, o kinabuhi nga dayon, mao ang kinatas-an nga kahimtang sa kalipay ug himaya diha sa celestial nga gingharian. Ang kahimayaan usa ka gasa nga may kondisyon. Si Presidente Russell M. Nelson mitudlo, “Kadtong makapasarang nga mga kondisyon naglakip sa pagtuo diha sa Ginoo, paghinulsol, bunyag, pagdawat sa Espiritu Santo, ug pagpabilin nga matinud-anon sa mga ordinansa ug mga pakigsaad sa templo.” (“Kaluwasan ug Kahimayaan,” Liahona, Mayo 2008, 9).

Ang kahimayaan nagpasabot sa pagpuyo uban sa Dios hangtod sa kahangtoran isip mahangtoron nga mga pamilya. Kini mao ang pagkaila sa Dios ug ni Jesukristo, ang pagkahimong sama Kanila, ug ang pagsinati sa kinabuhi nga Ilang gitagamtam.

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Pagkabanhaw”
Gospel Topics: “Resurrection,” “Salvation”

Paghukom ug mga Gingharian sa Himaya

Timan-i: Kon unang nagtudlo mahitungod sa mga gingharian sa himaya, itudlo ang sukaranan nga ang-ang sumala sa panginahanglan ug salabotan sa tawo.

Kon kita mabanhaw, si Jesukristo mao ang atong makiangayon ug maluluy-on nga maghuhukom. Uban sa pipila lang ka mga eksepsiyon, ang matag usa kanato makadawat og luna diha sa usa ka gingharian sa himaya. Bisan og kitang tanan mabanhaw, kitang tanan dili makadawat og managsama nga mahangtorong himaya (tan-awa sa Doktrina ug mga Pakigsaad 88:22–24, 29–34; 130:20–21; 132:5).

Ang mga indibidwal kinsa wala makabaton og oportunidad aron hingpit nga makasabot ug makatuman sa mga balaod sa Dios atol sa ilang mortal nga kinabuhi mahatagan niana nga oportunidad diha sa kalibotan sa espiritu. Si Jesus mohukom sa matag tawo sumala sa iyang hugot nga pagtuo, mga buhat, mga tinguha, ug paghinulsol diha sa mortalidad ug sa kalibotan sa espiritu (tan-awa sa Doktrina ug mga Pakigsaad 138:32–34, 57–59).

Ang mga kasulatan nagtudlo sa celestial, terestrial, ug telestial nga mga gingharian sa himaya. Ang matag usa niiini nagpakita sa gugma sa Dios, kaangayan, ug kaluoy.

Kadtong kinsa mopakita og hugot nga pagtuo diha ni Kristo, maghinulsol sa ilang mga sala, modawat sa mga ordinansa sa ebanghelyo, modawat sa Espiritu Santo, ug molahutay hangtod sa kataposan maluwas diha sa celestial nga gingharian. Kini nga gingharian molakip usab sa mga tawo kinsa walay oportunidad sa pagdawat sa ebanghelyo atol sa ilang mortal nga kinabuhi apan “makadawat unta niini sa tibuok nilang kasingkasing” ug mibuhat sa ingon didto sa kalibotan sa espiritu (Doktrina ug mga Pakigsaad 137:8; tan-awa usab sa bersikulo 7). Ang mga bata kinsa namatay sa wala pa ang edad sa pagkamaytulubagon (otso anyos) maluwas usab diha sa celestial nga gingharian (tan-awa sa Doktrina ug mga Pakigsaad 137:10).

Sa mga kasulatan, ang celestial nga gingharian gitandi ngadto sa himaya o kahayag sa adlaw. (Tan-awa sa Doktrina ug mga Pakigsaad 76:50–70.)

Ang mga tawo nga nagpuyo og halangdon nga mga kinabuhi “kinsa wala midawat sa pagpamatuod ni Jesus diha sa unod, apan sa pagkahuman midawat niini” makadawat og luna diha sa terrestrial nga gingharian (Doktrina ug mga Pakigsaad 76:74). Susama gihapon alang niadtong kinsa dili nagmaisugon sa ilang pagpamatuod ni Jesus. Kini nga gingharian gitandi ngadto sa himaya sa bulan. (Tan-awa sa Doktrina ug mga Pakigsaad 76:71–80.)

Kadtong nagpadayon sa ilang pagpakasala ug wala maghinulsol niining kinabuhia o midawat sa ebanghelyo ni Jesukristo didto sa kalibotan sa espiritu makadawat sa ilang ganti diha sa telestial nga gingharian. Kini nga gingharian gitandi ngadto sa himaya sa mga bitoon. (Tan-awa sa Doktrina ug mga Pakigsaad 76:81–86.)

Doktrinal nga Panabot: Paghukom

Matag tawo mobarog sa atubangan ni Jesukristo aron “mahukman sumala sa ilang mga buhat” (3 Nephi 27:15; tan-awa sa mga bersikulo 13–15). Ang Ginoo mokonsiderar sa talagsaon nga mga kahimtang sa matag tawo, lakip na sa iyang kahibalo sa maayo ug daotan, pagsabot sa ebanghelyo, ang-ang sa pagkamaytulubagon, ug mga tinguha (tan-awa sa Lucas 12:47–48; Doktrina ug mga Pakigsaad 137:9).

Tungod kay kita wala makasabot sa hingpit sa mga kahimtang sa uban, kita kinahanglang magpugong sa paghimo og mga paghukom mahitungod sa gingharian sa himaya nga ilang madawat. Hinuon, kita angayng moandam sa atong kaugalingon sa pagsugat sa Ginoo ug modapit sa uban sa pagpangandam. (Tan-awa sa Alma 5:15–19, 33; Moroni 10:32; Dallin H. Oaks, “‘Judge Not’ and Judging,” Ensign, Ago. 1999, 6–13.)

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan: “Maghuhukom, Paghukom,” “Ang-ang sa Himaya, Mga”

Mubo ngadto sa Kasarangan nga Latid sa Leksiyon

Ang mosunod nga latid mao ang usa ka sampol sa unsay mahimo ninyong itudlo sa tawo kon kamo adunay mubo lang nga oras. Kon mogamit niini nga latid, pagpili og usa o dugang pa nga mga baroganan nga itudlo. Ang sukaranan nga doktrina alang sa matag baroganan gihatag nang daan diha sa leksiyon.

Sa inyong pagtudlo, pangutana ug paminaw. Ihatag ang mga imbitasyon nga makatabang sa mga tawo nga makakat-on kon unsaon nga mas mapaduol ngadto sa Dios. Usa ka importante nga imbitasyon mao nga ang tawo makighimamat kaninyo pag-usab. Ang gitas-on sa leksiyon magdepende sa inyong mga ipangutana ug sa pagpaminaw nga inyong buhaton.

Unsa ang Mahimo Ninyong Itudlo sa mga Tawo sulod sa 3-10 Minutos

Kitang tanan espiritu nga mga anak sa Dios. Kita mga sakop sa Iyang pamilya. Siya nakaila ug nahigugma sa matag usa kanato.
Ang Dios naghatag og usa ka plano alang sa atong kalipay ug kauswagan niining kinabuhi ug sa kahangtoran.
Diha sa plano sa Dios, kita kinahanglan nga moanhi sa yuta aron makadawat og pisikal nga mga lawas, makakat-on ug molambo.
Si Jesukristo mao ang sentro sa plano sa Dios. Siya nakapahimo niining posible nga kita makaangkon og kinabuhi nga dayon.
Ubos sa direksiyon sa Dios, si Jesus milalang sa yuta.
Ang atong mga kasinatian dinhi sa yuta gituyo aron sa pagtabang kanato nga mangandam sa pagbalik ngadto sa presensya sa Dios.
Matag usa kanato makasala, ug matag usa kanato mamatay. Tungod kay ang Dios nahigugma kanato, Siya mipadala sa Iyang Anak, si Jesukristo, dinhi sa yuta aron sa pagtubos kanato gikan sa sala ug kamatayon.
Ang tanang dili makiangayon sa kinabuhi mahimong mahusto pinaagi sa Pag-ula ni Jesukristo.
Kon ang pisikal nga lawas mamatay, ang espiritu magpadayon sa pagkabuhi. Sa kataposan kitang tanan mabanhaw. Kini nagpasabot nga ang matag espiritu ug lawas sa tawo mahiusa pag-usab, ug ang matag usa kanato mabuhi hangtod sa kahangtoran diha sa usa ka hingpit, nabanhaw nga lawas.
Kon kita mabanhaw, si Jesukristo mao ang atong maghuhukom. Uban sa pipila lang ka mga eksepsiyon, ang tanang anak sa Dios makadawat og luna sa usa ka gingharian sa himaya. Kita mahimong makabalik aron makapuyo diha sa presensya sa Dios kon kita magmatinud-anon.