“Mataupu 3: Lesona 3—O Le Talalelei a Iesu Keriso,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)
“Mataupu 3: Lesona 3,” Tala’i La’u Talalelei
Mataupu 3: Lesona 3
O Le Talalelei a Iesu Keriso
E Ono Manatu Tagata
-
O ai Iesu Keriso? E mafai faapefea ona Ia fesoasoani mai ia te a’u ma lo’u aiga?
-
O le a le uiga o le faatuatua ia Iesu Keriso? E mafai faapefea e le mauaina o le faatuatua ia te Ia ona faamanuiaina ai lo’u olaga?
-
O le a le uiga o le salamo?
-
E mafai faapefea ona ou lagonaina le filemu ma le faamagaloga a le Atua pe a uma ona ou faia ni filifiliga leaga?
-
O le a le faamoemoega o le papatisoga?
-
O le a le meaalofa o le Agaga Paia?
-
O le a le uiga o le tumau e oo i le iuga?
O le talalelei a Iesu Keriso o le auala lea tatou te o mai ai ia Keriso. E matua faigofie lava lea e mafai ona malamalama i ai se tamaitiiti. O lenei lesona e taulai atu i le talalelei ma le aoaoga faavae a Keriso, e aofia ai le faatuatua ia Iesu Keriso, salamo, papatisoga, le meaalofa o le Agaga Paia, ma le tumau e oo i le iuga. O loo taulai atu foi i le auala e faamanuiaina ai e le talalelei fanau uma a le Atua.
O le upu talalelei o lona uiga “o tala e lelei.” O le talalelei a Iesu Keriso o se tala fiafia auā o loo aumaia ai le aoaoga faavae—le upumoni e faavavau—e tatau ona tatou o mai ia te Ia ma faaolaina (tagai i le 1 Nifae 15:14). Ua aoaoina i tatou e le talalelei i le ala e ola ai i ni olaga lelei, ma anoa. O le tala fiafia o le talalelei ua saunia ai le ala mo i tatou ina ia faamagaloina ai mai agasala, ia faapaiaina, ma toe foi atu ai i le afioaga o le Atua.
Fautuaga mo le Aoao Atu
O lenei vaega o loo tuuina atu ai se otootoga faataitai e fesoasoani ia te oe e saunia ai e aoao atu. E aofia ai foi faataitaiga o fesili ma valaaulia e mafai ona e faaaogaina.
A o e sauni e aoao atu, ia mafaufau ma le agaga tatalo i tulaga o tagata taitoatasi ma manaoga faaleagaga. Filifili po o le a se mea o le a sili ona fesoasoani ia i latou. Sauni e faamatala ia faaupuga atonu e le malamalama ai tagata. Fuafua e tusa ai ma le tele o le taimi o le a e maua, ia manatua e faapuupuu lesona.
Filifili mau e faaaoga a o e aoao atu. O le vaegao le “Faavae o Aoaoga Faavae” o le lesona o loo aofia ai le tele o mau aoga.
Mafaufau po o le fea fesili e fai atu a o e aoao atu. Fuafua ni valaaulia e tuuina atu lea o le a uuna’ia ai tagata taitoatasi e faatino.
Faamamafa atu faamanuiaga folafolaina a le Atua, ma faasoa atu lau molimau i mea e te aoaoina atu.
O Mea e Mafai Ona E Aoao Atu i Tagata i le 15–25 Minute
Filifili se mataupu faavae se tasi pe sili atu o loo i lalo e te aoaoina atu. O le faavae faaleaoaoga faavae mo mataupu faavae taitasi ua saunia pe a uma lenei otootoga.
O Le Misiona Paia a Iesu Keriso
-
Na auina mai e le Atua Lona Alo Pele, o Iesu Keriso, i le lalolagi e togiola i tatou mai le agasala ma le oti.
-
Ona o le taulaga togiola a Iesu, ua mafai ai ona faamamaina i tatou mai a tatou agasala ma faapaiaina pe a tatou salamo.
-
Ina ua uma ona faasatauroina Iesu, sa toetu mai o Ia. Ona o Lona Toetu mai, o le a tatou toetutu uma ai pe a mavae le oti. O lona uiga o le a toe faatasia le agaga ma le tino o tagata taitoatasi, ma o le a tatou ola e faavavau i se tino toetu atoatoa.
Faatuatua ia Iesu Keriso
-
O le Faatuatua o le aoaoga faavae muamua lea o le talalelei a Iesu Keriso.
-
O le faatuatua ia Iesu Keriso e aofia ai le i ai o le mautinoaga o Ia o le Alo o le Atua ma faatuatua o Ia o lo tatou Faaola ma le Togiola.
-
O le faatuatua ia Iesu Keriso o se mataupu faavae o le faatinoga ma le mana.
-
Tatou te faamalosia lo tatou faatuatua e ala i le tatalo, suesue i tusitusiga paia, ma usiusitai i poloaiga.
Salamo
-
O le faatuatua ia Iesu Keriso e taitaiina atu ai i tatou e salamo. O le salamo o le faagasologa o le liliu atu i le Atua ma liliu ese mai le agasala. A o tatou salamo, e suia a tatou faatinoga, manaoga, ma mafaufauga ina ia ogatusa atili ma le finagalo o le Atua.
-
Pe a tatou salamo faamaoni, o le a faamagaloina i tatou e le Atua. E mafai le faamagaloga ona sa togiolaina e Iesu Keriso a tatou agasala.
-
A tatou salamo, tatou te lagonaina le filemu a o faamaloloina lo tatou tausalaina ma le faanoanoa.
-
O le salamo o se faagasologa i le olaga atoa. E faafeiloai i tatou e le Atua i taimi uma tatou te salamo ai. E Na te lē fiu lava ia i tatou.
Papatisoga: o La Tatou Uluai Feagaiga ma le Atua
-
O le papatisoga o le auala muamua lea tatou te ulu atu ai i se sootaga faalefeagaiga ma le Atua.
-
O le papatisoga e lua ona vaega: papatisoga i le vai ma le Agaga. Pe a papatisoina ma faamauina i tatou, ua faamamaina i tatou mai a tatou agasala, ma tuuina mai ai ia i tatou se amataga fou i le olaga.
-
Ua papatisoina i tatou e ala i le faatofuina, e mulimuli ai i le faataitaiga a Iesu.
-
E lē papatisoina tamaiti seiloga ua ta’i valu o latou tausaga. O tamaiti e maliliu a o le’i oo i lena tausaga e togiolaina e ala i le Togiola a Iesu Keriso.
-
Tatou te aai ma feinu i le faamanatuga i vaiaso taitasi e manatua ai le taulaga a Iesu ma faafou ai a tatou feagaiga ma le Atua.
O Le Meaalofa o le Agaga Paia
-
O le Agaga Paia o le sui lona tolu o le Aiga Atua.
-
A uma ona papatisoina i tatou, tatou te maua le meaalofa o le Agaga Paia e ala mai i le sauniga o le faamauga.
-
A tatou maua le meaalofa o le Agaga Paia, e mafai ona tatou maua Lana mafutaga i o tatou olaga atoa pe afai tatou te faamaoni.
-
O le Agaga Paia o le a faapaiaina i tatou, taitaia i tatou, faamafanafanaina i tatou, ma fesoasoani ia i tatou ia iloa le upumoni.
Tumau e oo i le Iuga
-
O le tumau e aofia ai le faaauau pea ona faatino le faatuatua ia Keriso i aso taitasi. E faaauau pea ona tatou tausia a tatou feagaiga ma le Atua, salamo, saili le mafutaga a le Agaga Paia, ma aai ma feinu i le faamanatuga.
-
A o tatou saili ma le faamaoni e mulimuli ia Iesu Keriso, ua folafola mai e le Atua o le a tatou maua le ola e faavavau.
O le Talalelei a Iesu Keriso e Faamanuiaina Ai Fanau Uma a le Atua.
-
O le ola ai i le talalelei e faalolotoina ai lo tatou olioli, musuia ai a tatou faatinoga, ma faatamaoaigaina ai a tatou sootaga.
-
O le a sili ona tatou fiafia—o ni tagata taitoatasi ma o ni aiga—pe a tatou ola i aoaoga a Iesu Keriso.
-
E ala i le talalelei a Iesu Keriso, e faamanuiaina ai aiga i lenei olaga ma e mafai ona tuufaatasia mo le faavavau ma ola ai i le afioaga o le Atua.
O Fesili e Te Ono Fesili Ai i Tagata
O fesili nei o ni faataitaiga o mea e mafai ona e fesili atu ai i tagata. O nei fesili e mafai ona fesoasoani ia te oe e faia ai ni talanoaga anoa ma malamalama ai i manaoga ma le vaaiga a se tagata.
-
O a mea ua e iloa e uiga ia Iesu Keriso?
-
O le a le uiga ia te oe o le faatuatua ia Iesu Keriso?
-
O a ni suiga e te manao e faia i lou olaga?
-
O le a sou malamalama i le salamo?
-
O le a sou malamalama i le papatisoga? O le a se mea e mafai ona e faia i le taimi nei e saunia ai mo le papatisoga?
-
E mafai faapefea ona fesoasoani le Agaga Paia ia te oe i lau malaga e toe foi atu i le afioaga o le Atua?
-
O le a se luitau o feagai ma oe po o lou aiga? E mafai ona ma faasoa atu nisi o auala e mafai ona fesoasoani ai le talalelei a Iesu Keriso?
O Valaaulia E Te Ono Tuuina Atu
-
Pe o le a e ole atu i le Atua i le tatalo ina ia iloa o mea sa tatou aoaoina e moni? (Tagai i le “Malamalamaaga Faafaiaoga: Tatalo” i le vaega mulimuli o le lesona 1.)
-
Pe o le a e auai i le lotu i lenei Aso Sa e aoao atili ai e uiga i mea sa tatou aoaoina?
-
Pe o le a e faitauina le Tusi a Mamona ma ole atu i le Atua i le tatalo ina ia iloa o le afioga ia a le Atua? (E mafai ona e fautuaina atu ni mataupu po o ni fuaiupu faapitoa.)
-
Pe o le a e mulimuli ea i le faataitaiga a Iesu ma papatisoina? (Tagai i le “O Le Valaaulia ina ia Papatisoina ma Faamauina,” lea e muamua atu i le lesona 1.)
-
E mafai ona seti se taimi tatou te toe feiloai ai?
Faavae Faale-Aoaoga Faavae
O lenei vaega ua tuuina atu ai aoaoga faavae ma mau mo oe e suesue ai e faamalosia ai lou malamalama ma le molimau o le talalelei ma fesoasoani ai ia te oe e aoao atu.
O Le Misiona Paia a Iesu Keriso
Na auina mai e le Tama Faalelagi Lona Alo Pele, o Iesu Keriso, i le lalolagi ina ia mafai ai e i tatou uma ona lagonaina le olioli i lenei lalolagi ma le ola e faavavau i le lalolagi a sau. “Ma o le talalele lenei, o tala fiafia ia, … na afio mai o ia [Iesu keriso] i le lalolagi … e faasatauroina mo le lalolagi, ma tauave agasala a le lalolagi, ma faapaia le lalolagi, ma faamama mai amioletonu uma; ina ia mafai ona faaolaina e ala ia te Ia i latou uma lava” (MFF 76:40–42
I le avea ai ma tagata soifua, tatou te agasala uma lava, ma e tatou te feoti uma lava. O le agasala ma le oti o le a taofia ai i tatou mai le mauaina o le ola e faavavau faatasi ma le Atua se’i vagana ua i ai so tatou Togiola (tagai i le 2 Nifae 9). A o le’i faia le lalolagi, na filifilia ai e lo tatou Tama Faalelagi ia Iesu Keriso e faaola i tatou. I se faaaliga silisili o le alofa, na afio mai ai Iesu i le lalolagi ma faataunuuina lenei misiona paia. Na Ia faia ina ia mafai ona togiolaina i tatou mai a tatou agasala, ma sa Ia faamautinoa mai o le a tatou toetutu uma pe a tatou feoti.
Sa soifua Iesu Keriso i se olaga e leai se agasala. I le faaiuga o Lana galuega i le olaga nei, sa Ia tauaveina i Ona lava luga a tatou agasala e ala i Ona puapuaga i Ketesemane ma ina ua faasatauroina o Ia (tagai i le 1 Nifae 11:33). Sa matuā tele puapuaga o Iesu lea na afua ai ona Ia “gatete ona o le tiga, ma tafe toto ai i pu afu uma” (Mataupu Faavae ma Feagaiga 19:18). Ina ua mavae Lona Faasatauroga, sa toetu Iesu, ma maua ai le manumalo i le oti. I le aotelega, o nei mea na tutupu o le Togiola a Iesu Keriso.
O a tatou agasala tatou te le mama ai faaleagaga, ma “e leai se mea le mama e mafai ona nofo faatasi ma le Atua” (1 Nifae 10:21). E le gata i lea, o le tulafono o le faamasinotonu e manaomia ai se taunuuga mo a tatou agasala.
O le taulaga togiola a Iesu ua saunia ai le ala mo i tatou e faamamaina ai mai agasala ma faapaiaina pe a tatou salamo. Ua saunia ai foi le ala e faamalie ai manaoga o le faamasinotonu (tagai i le Alema 42:15, 23–24). Na fetalai mai le Faaola, “Aua faauta, o A’u, o le Atua, na mafatia i nei mea mo tagata uma, ina ia latou le mafatia pe afai latou te salamo; Ae afai latou te le salamo, o le a latou mafatia e pei lava o A’u” (Mataupu Faavae ma Feagaiga 19:16–17). Ana leai Iesu Keriso, semanu e muta i le oti faamoemoega uma mo se olaga faatasi ma le Tama Faalelagi i le lumanai.
I le ofoina atu o Ia lava o se taulaga mo i tatou, e le’i aveesea ai e Iesu o tatou lava ia tiutetauave patino. E manaomia ona tatou faatuatua ia te Ia, salamo, ma taumafai e usitai i poloaiga. A tatou salamo, o le a tautino mai e Iesu mo i tatou Ana aiā tatau o le alofa mutimutivale o Lona Tama (tagai i le Moronae 7:27–28). Ona o le puluvaga o le Faaola, ua faamagalo ai i tatou e le Tama Faalelagi, ma faamamaina i tatou mai le avega ma le tausalaina o a tatou agasala (tagai i le Mosaea 15:7–9). Ua faamamaina faaleagaga i tatou ma e mafai ona talia i tatou i le afioaga o le Atua.
O le misiona paia a Iesu o le laveaiina foi lea o i tatou mai le oti. Ona sa toetu o Ia, o le a tatou toetutu uma ai pe a mavae le oti. O lona uiga o le a toe faatasia le agaga ma le tino o tagata taitoatasi, ma o le a tatou ola e faavavau i se tino toetu atoatoa. Ana leai Iesu Keriso, semanu e muta i le oti ia faamoemoega uma mo se olaga faatasi ma le Tama Faalelagi i le lumanai.
Suesuega o Tusitusiga Paia
Na Auina Mai e le Atua Lona Alo
Faaolataga e ala ia Iesu Keriso
Aoao Atili e uiga i Lenei Mataupu Faavae
-
Taiala i Tusitusiga Paia, “Iesu Keriso”
-
Autu o le Talalelei: “Iesu Keriso”
Faatuatua ia Iesu Keriso
O le muai mataupu faavae o le talalelei o le faatuatua i le Alii o Iesu Keriso. O le faatuatua o le faavae lea mo isi mataupu faavae uma o le talalelei.
O le faatuatua ia Iesu Keriso e aofia ai le i ai o le talitonuga o Ia o le Alo e Toatasi na Fanaua e le Atua. E aofia ai le faalagolago ia te Ia o lo tatou Faaola ma le Togiola—ua na o Ia lava lo tatou ala e toe foi atu ai i le afioaga o le Atua (tagai i le Galuega 4:10–12; Mosaea 3:17; 4:6–8). Ua valaaulia i tatou e faaaoga le “faatuatua le maluelue ia te ia, ma faalagolago atoa i galuega a ia o lē ua malosi aoao e laveai” (2 Nifae 31:19).
O le faatuatua ia Iesu Keriso e aofia ai le talitonu na puapuagatia o Ia mo a tatou agasala i Lana taulaga togiola. Ona o Lana taulaga, ua mafai ai ona faamamaina ma togiolaina i tatou pe a tatou salamo. O lenei faamamaina e fesoasoani tatou te maua ai le filemu ma le faamoemoe i lenei olaga. E mafai ai foi ona tatou maua se atoatoaga o le olioli pe a tatou feoti.
O le faatuatua ia Iesu Keriso e aofia ai le faatuatuaina lea e ala ia te Ia, o le a tatou toetutu uma ai pe a mavae lo tatou oti. O lenei faatuatua e mafai ona lagolagoina ma faamafanafanaina i tatou i taimi o le maliu. O le faanoanoa o le oti e mafai ona aveesea e le folafolaga o le Toetu.
O le faatuatua ia Iesu Keriso e aofia ai le talitonu ma le faatuatua na Ia tauaveina i Ona lava luga o tatou puapuaga ma vaivaiga (tagai i le Isaia 53:3–5). Na te silafia e ala i Lona aafiaga le ala e lagolagoina ai ma le alofa mutimutivale i tatou i luitau o le olaga (tagai i le Alema 7:11–12; Mataupu Faavae ma Feagaiga 122:8). A o tatou faatinoina le faatuatua, e fesoasoani o Ia ia i tatou e fetaomi atu i luma ma te’a atu ma faigata.
E ala atu i lo tatou faatuatua ia Iesu Keriso, e mafai ai ona Ia faamaloloina i tatou faaletino faapea foi ma le faaleagaga. E saunia pea o Ia e fesoasoani mai ia i tatou a’o tatou manatua Lana valaaulia e “vaai mai ia te aʼu i mafaufauga uma; aua le masalosalo, aua le fefefe” (Mataupu Faavae ma Feagaiga 6:36).
O se Mataupu Faavae o Faatinoga ma le Mana
O le faatuatua ia Iesu Keriso e taitaiina atu ai i faatinoga. Tatou te faailoa atu lo tatou faatuatua e ala i le usiusitai i poloaiga ma le faia o mea lelei i aso taitasi. Tatou te salamo ia tatou agasala. Tatou te faamaoni ia te Ia. Tatou te taumafai e avea atili faapei o Ia.
A o tatou faatinoina le faatuatua, e mafai ona tatou lagonaina le mana o Iesu i o tatou olaga i aso taitasi. O le a Ia faalauteleina a tatou lava taumafaiga silisili. O le a Ia fesoasoani ia i tatou ia tuputupu a’e ma tetee atu i faaosoosoga.
Faamalosia o lo Tatou Faatuatua
Na aoao mai le perofeta o Alema o le fausiaina o le faatuatua e mafai ona amata i se “manao ia talitonu” (Alema 32:27). O le vaega e sosoo ai, mo lo tatou faatuatua ia Iesu Keriso ina ia tuputupu a’e, e manaomia ona tatou faafaileleina e ala i le aoaoina o Ana afioga, faaaoga Ana aoaoga, ma usitai i Ana poloaiga. Na aoao mai Alema a o tatou faafailele ma le onosai, faafailele ma le filiga le afioga a le Atua i o tatou loto, “o le a mauaa [ma avea ai e pei] o se laau e puna aʼe i le ola e faavavau”—ma faapea ona faamalosia ai lo tatou faatuatua (Alema 32:41; tagai i le fuaiupu 26–43).
Suesuega o Tusitusiga Paia
Faatuatua, Mana, ma le Faaolataga
O Le Mataupu o le Faatuatua
Faataitaiga o le Faatuatua
Galuega ma le Usiusitai
Faatuatua e oo i le Salamo
Aoao Atili e uiga i Lenei Mataupu Faavae
-
Taiala i Tusitusiga Paia: “Iesu Keriso,” “Togiola, Togiola,” “Faatuatua”
-
Bible Dictionary, “Faith”
-
Autu o le Talalelei: “Iesu Keriso,” “Togiola a Iesu Keriso,” “Faatuatua ia Iesu Keriso”
Salamo
O Le A Le Salamo?
O le salamo o le mataupu faavae lona lua o le talalelei O le faatuatua ia Iesu Keriso ma lo tatou alolofa mo Ia e taitai atu ai i tatou ia salamo (tagai i le Helamana 14:13). O le salamo o le faagasologa o le liliu atu i le Atua ma liliu ese mai le agasala. A o tatou salamo, e suia a tatou faatinoga, o manaoga, ma mafaufauga ina ia ogatusa atili ma le finagalo o le Atua. O le faamagaloga o agasala ua mafai ona o Iesu Keriso ma Lana taulaga togiola.
O le salamo o se vaega e sili atu nai lo le na o le faaaogaina o le naunautaiga e suia ai se amioga pe faatoilalo ai se vaivaiga. O le salamo o le liliu atu ma le faamaoni ia Keriso, o lē e tuuina mai ia i tatou le mana e iloa ai se “liuga tele” i o tatou loto (Alema 5:12–14). A o tatou oo i lenei suiga o le loto, ua tatou toefanauina faaleagaga (tagai i le Mosaea 27:24–26).
E ala mai i le salamo, tatou te atia’eina ai se vaaiga fou o le Atua, i tatou lava, faapea ma le lalolagi. Tatou te toe lagona faafouina le alofa o le Atua mo i tatou o Ana fanau—ma le alofa o lo tatou Faaola mo i tatou. O le avanoa e salamo ai o se tasi lea o faamanuiaga silisili ua tuuina mai e le Atua ia i tatou e ala mai i Lona Alo.
Faagasologa o le Salamo
A tatou salamo, tatou te iloa a tatou agasala ma lagonaina le faanoanoa faamaoni. Tatou te ta’uta’u atu a tatou agasala i le Atua ma ole atu mo Lana faamagaloga. Tatou te ta’uta’u atu foi agasala sili ona matuia i taitai faamaonia o le Ekalesia, o e o le a lagolagoina i tatou a o tatou salamo faamaoni. Tatou te faia mea e mafai ona tatou faia e toe totogi atu ai, o lona uiga o le taumafai e faasa’o faafitauli atonu na mafua mai i a tatou faatinoga. O le salamo faamaoni e sili ona faaalia e ala i faatinoga amiotonu mo se vaitaimi.
O le salamo o se faagasologa i aso taitasi i o tatou olaga atoa. “Aua ua agasala tagata uma lava, ma ua le oo i le viiga o le Atua” (Roma 3:23). E tatau ona faaauau pea lo tatou salamo, ma manatua e tatou te ”mafaia mea uma lava i le faamalosi mai o Keriso [ia te i tatou]” (Filipi 4:13). Sa faamautinoa mai e le Alii ia i tatou “Ioe, ma o le tele o taimi e salamo ai loʼu nuu ‘Ou te faamagalo ai i latou ia latou solitulafono faasaga mai ia te aʼu” (Mosaea 26:30).
Faamanuiaga o le Salamo
O le salamo o se mataupu faavae lelei lea e aumaia ai le olioli ma le filemu. E na te aumai ai i tatou “i le mana o le Togiola, mo le faaolataga o o latou agaga” (Helamana 5:11).
A tatou salamo, o le a faamaloloina lo tatou tausalaina ma le faanoanoa i le gasologa o taimi. Tatou te lagona le faateleina anoanoa’i o le aafiaga a le Agaga. O la tatou manao e mulimuli i le Atua o le a faamalosia.
“Ua toatele naua tagata e manatu o le salamo o se faasalaga—o se mea e tatau ona aloese mai ai. … Ae o lenei lagona o le faasalaina e mafua mai ia Satani. E taumafai o Ia e poloka i tatou mai le vaavaai atu ia Iesu Keriso, o le o loo tu ma aao mafola, faamoemoe ma naunau e faamalolo, faamagalo, faamama, faamalosia, faamamaina, ma faapaiaina i tatou” (Russell M. Nelson “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67).
Suesuega o Tusitusiga Paia
Salamo
Togiolaina ma le Faamagaloina
Alofa Mutimutivale mo i Latou o E Salamo
Aoao Atili e uiga i Lenei Mataupu Faavae
-
Taiala i Tusitusiga Paia, “Salamo, Salamo,” “Togiola, Togiola”
-
Bible Dictionary, “Repentance”
-
Tusitaulima Aoao, 32.1
-
Autu o le Talalelei: “Salamo,” “Togiola a Iesu Keriso”
Papatisoga: o La Tatou Uluai Feagaiga ma le Atua
O le faatuatua ia Iesu Keriso ma le salamo e saunia ai i tatou mo sauniga o le papatisoga ma le faamauga. O le papatisoga o le sauniga faaola muamua lea o le talalelei. A o tatou mauaina lenei sauniga olioli o le faamoemoe, tatou te osia la tatou uluai feagaiga ma le Atua.
O se sauniga o se faatinoga paia lea e faia i le pule o le perisitua. O nisi sauniga, e pei o le papatisoga, e taua i lo tatou faaolataga.
E ala i sauniga, tatou te osia ai feagaiga ma le Atua. O nei feagaiga o ni folafolaga paia i le va o i tatou ma le Atua. Ua Ia folafola mai e faamanuia i tatou pe a tatou tausia a tatou folafolaga ma Ia. E tatau ona tatou maua se tautinoga malosi e tausia a tatou folafolaga ma le Atua.
Ua saunia e le Atua sauniga ma feagaiga e fesoasoani ai ia i tatou e o mai ia te Ia ma maua le ola e faavavau. A o tatou mauaina sauniga o le perisitua ma tausia feagaiga e o faatasi ai, e mafai ona tatou maua “le mana o le faaleatua” i o tatou olaga (Mataupu Faavae ma Feagaiga 84:20).
O Le Feagaiga o le Papatisoga
Na aoao mai le Faaola e tatau ona tatou ulu atu i le malo o le lagi i le papatisoga (tagai Ioane 3:5). E tatau foi mo i tatou ona avea ma tagata o le Ekalesia a Iesu Keriso. Na faia e lo tatou Faaola le faataitaiga e ala i le papatisoina (tagai Mataio 3:13–17).
Pe a papatisoina i tatou ma tausia a tatou feagaiga, ua folafola mai le Atua e faamagalo a tatou agasala (tagai Galuega 22:16; 3 Nifae 12:1–2). O lenei faamanuiaga sili ua mafai ona maua e ala i le taulaga togiola a Iesu Keriso, o le na “alofa mai ia te i tatou, ma mulumuluina i tatou mai a tatou agasala i lona lava toto” (Faaaliga 1:5). Ua folafola mai foi e le Atua e faamanuia i tatou i le mafutaga a le Agaga Paia ina ia mafai ai ona faapaiaina i tatou, taialaina, ma faamafanafanaina.
I la tatou vaega o le feagaiga o le papatisoga, tatou te molimau atu ai ua tatou naunau e tauave i o tatou luga le suafa o Iesu Keriso. Tatou te folafola atu foi e faia Lana galuega ma tausi Ana poloaiga. A uma ona tatou papatiso, ua tatou folafola atu e “loto ina faanoanoa faatasi ma e faanoanoa; … ma faamafanafana i e ua tatau i ai le faamafanafanaga, ma laulaututu e fai ma molimau a le Atua i aso uma, ma mea uma, atoa ma nuu uma” (Mosaea 18:9; tagai fuaiupu 8–10, 13). Tatou te faailoa atu se naunautaiga e auauna atu ia Iesu Keriso e oo i le iuga o o tatou olaga (tagai Mataupu Faavae ma Feagaiga 20:37; Mosaea 2:17).
O a tatou tautinoga o feagaiga e o faatasi ma le papatisoga o se tiutetauave sili lea. E musuia foi ma olioli i latou. Latou te fatuina se sootaga faapitoa i le va o i tatou ma le Tama Faalelagi lea e faaauau ai pea ona Ia faalauteleina Lona alofa.
Papatisoga e ala i le faatofu
Na aoao mai Iesu e tatau ona papatisoina i tatou e ala i le faatofuina mo se faamagaloga o a tatou agasala (tagai Mataupu Faavae ma Feagaiga 20:72–74). O le papatisoga e ala i le faatofuina o se faatusa o le maliu, tanumia, ma le Toetu o Iesu Keriso (tagai Roma 6:3–6).
O le papatisoga e ala i le faatofu o loo i ai foi ni faatusa mamana mo i tatou lava ia. E faatusa i le oti o lo tatou olaga tuai, o le tanuga o lena olaga, ma lo tatou tula’i mai i le toefanauina faaleagaga. Afai tatou te papatiso ua tatou amataina se faagasologa o le toe fanaufouina ma avea ma ni atalii ma ni afafine faaleagaga o Keriso (tagai Mosaea 5:7–8; Roma 8:14–17).
Tamaiti
E lē papatisoina i latou seiloga e oo i tausaga e tali atu ai i latou mo mea na latou faia, o le valu lea o tausaga (tagai Mataupu Faavae ma Feagaiga 68:27). O tamaiti e maliliu a o le’i oo i lena tausaga e togiolaina e ala i le Togiola a Iesu Keriso (tagai Moronae 8:4–24; Mataupu Faavae ma Feagaiga 137:10). A o le’i papatisoina tamaiti, e tatau ona aoaoina i latou i le talalelei ina ia latou saunia ai mo lenei laasaga taua i o latou olaga e osia ai se feagaiga ma le Atua.
O Le Faamanatuga
E finagalo lo tatou Tama Faalelagi ia tatou faamaoni i feagaiga tatou te osia ma Ia. Ina ia fesoasoani ia i tatou e faia lena mea, ua Ia poloaia i tatou ia potopoto soo ma aai ma feinu i le faamanatuga. O le faamanatuga o se sauniga faaleperisitua lea na faailoa atu e Iesu i Ana Aposetolo a o le’i oo i Lana Togiola.
O le aai ma feinu i le faamanatuga o le faamoemoega tutotonu lea o le sauniga faamanatuga i vaiaso taitasi. Ua faamanuiaina le areto ma le vai ma pasi atu i le potopotoga. O le areto e faatusa i le taulagaina e le Faaola o Lona tino mo i tatou. O le vai ua faatusa i Lona toto, lea na Ia faamaligiina mo i tatou.
Tatou te aai ma feinu i nei faatusa e manatua ai le taulaga a le Faaola ma faafou ai a tatou feagaiga ma le Atua. Tatou te toe maua le folafolaga o le a faatasi le Agaga ma i tatou.
Suesuega o Tusitusiga Paia
Faataitaiga a Keriso
O Le Feagaiga o le Papatisoga
Tulaga Agavaa mo le Papatisoga
Faamanuiaga Folafolaina o le Papatisoga
Faatulagaga Moomia mo le Pule
Na faatulagaina e Iesu le faamanatuga
O Tatalo o le Faamanatuga
Taumafa i le Faamanatuga
Aoao Atili e uiga i Lenei Mataupu Faavae
-
Taiala i Tusitusiga Paia, “Papatisoga, Papatiso,” “Faamanatuga”
-
Autu o le Talalelei: “Papatisoga,” “Faamanatuga”
O Le Meaalofa o le Agaga Paia
Mauaina o le Meaalofa a le Agaga Paia
O le papatisoga e lua ona vaega. Na aoao mai Iesu e tatau ona tatou “fanau i le vai ma le Agaga” e ulu atu ai i le malo o le Atua (Ioane 3:5; faaopoopo le faamamafa). O le papatisoga i le vai o se afa papatisoga, ma e leai se uiga e aunoa ma le isi afa—o lona uiga, o le papatisoga a le Agaga Paia” (Aoaoga a Peresitene o le Ekalesia: Iosefa Samita [2007], 95).
O le papatisoga i le vai e tatau ona sosoo ai ma le papatisoga a le Agaga ina ia atoatoa ai. A tatou maua uma papatisoga, e faamamaina i tatou mai a tatou agasala ma toefanauina faaleagaga. Ona tatou amataina ai lea o se olaga fou faaleagaga i le avea ai ma soo o Keriso.
Tatou te maua le papatisoga a le Agaga e ala i se sauniga e ta’ua o le faamauga. O lenei sauniga e faatinoina e se tasi pe sili atu foi o e umia le perisitua o e faaee o latou lima i luga o o tatou ulu. Muamua latou te faamauina i tatou o se tagata o le Ekalesia, ona latou faaee mai lea o le meaalofa o le Agaga Paia i o tatou luga. O le sauniga lava lea e tasi o loo faasino i ai i le Feagaiga Fou ma le Tusi a Mamona (tagai Galuega 8:14–17; 3 Nifae 18:36–37).
O le Agaga Paia o le sui lona tolu o le Aiga Atua. E galulue i le lotogatasi atoatoa o ia ma le Tama Faalelagi ma Iesu Keriso. A tatou maua le meaalofa o le Agaga Paia, e mafai ona tatou maua Lana mafutaga i o tatou olaga atoa pe a tatou faamaoni.
Auala e Faamanuia ai i Tatou e le Agaga Paia
O le meaalofa o le Agaga Paia o se tasi lea o meaalofa silisili a le Tama Faalelagi. O le Agaga Paia e faamamaina ma faapaiaina i tatou, faia i tatou ia paia atili, sili atu ona atoatoa, sili atu ona faapei o le Atua (tagai 3 Nifae 27:20). E fesoasoani o Ia ia i tatou ia suia ma tuputupu a’e faaleagaga a o tatou saili e mulimuli i mataupu a le Atua.
E fesoasoani le Agaga Paia ia i tatou e aoao ma iloa le upumoni (tagai Moronae 10:5). Na te faamautuina foi upumoni i o tatou loto ma mafaufau. E le gata i lea, e fesoasoani le Agaga Paia ia i tatou e aoao atu upumoni (tagai Mataupu Faavae ma Feagaiga 42:14). A tatou aoao mai ma aoao atu upumoni e ala i le mana o le Agaga Paia, Na te molioo atu i o tatou loto (tagai 2 Nifae 33:1).
A o tatou sailia ma le lotomaualalo le taitaiga mai le Agaga Paia, o le a Ia taialaina i tatou (tagai 2 Nifae 32:5). E aofia ai le uunaia o i tatou i le auala e mafai ai ona tatou auauna atu i isi.
E tuuina mai e le Agaga Paia le malosi faaleagaga e fesoasoani ia i tatou e faatoilalo ai vaivaiga. E fesoasoani o Ia ia i tatou e tetee atu i faaosoosoga. E na te lapataiina i tatou i tulaga matautia faaleagaga pe faaletino.
O le a fesoasoani le Agaga Paia ia i tatou e ala i luitau o le olaga. O le a Ia faamafanafanaina i tatou i taimi o tofotofoga po o faanoanoaga, e faatumulia ai i tatou i le faamoemoe (tagai Moronae 8:26). E ala mai i le Agaga Paia, e mafai ai ona tatou lagonaina le alofa o le Atua mo i tatou.
Suesuega o Tusitusiga Paia
Natura o le Agaga Paia
Faamanuiaga ma Aafiaga mai le Agaga Paia
Taua o le Meaalofa o le Agaga Paia
Aoao Atili e uiga i Lenei Mataupu Faavae
-
Taiala i Tusitusiga Paia: “Agaga Paia,” “Meaalofa o le Agaga Paia”
-
Bible Dictionary, “Holy Ghost”
-
Autu o le Talalelei: “Agaga Paia,” “Meaalofa Faaleagaga”
Tumau e oo i le Iuga
Pe a tatou papatiso ma faamauina, tatou te ulu atu i se feagaiga ma le Atua. Faatasi ai ma isi mea, tatou te folafola atu e tausi Ana poloaiga ma auauna atu ia te Ia mo o tatou olaga o totoe (tagai Mosaea 18:8–10, 13; Mataupu Faavae ma Feagaiga 20:37).
A uma ona tatou ulu atu i le ala o le talalelei e ala i le papatisoga ma le faamauga, tatou te faia taumafaiga uma e tumau ai. Pe a tatou o ese teisi mai le ala, tatou faatinoina le faatuatua ia Keriso e salamo ai. O le faamanuiaga o le salamo e mafai ai ona tatou toe foi atu i le ala o le talalelei ma faatumauina faamanuiaga o a tatou feagaiga ma le Atua. A tatou salamo faamaoni, e naunau pea le Atua e faamagalo ma toe faafeiloai i tatou.
O le tumau e oo i le iuga o lona uiga o le tumau faamaoni i le Atua e oo i le iuga o o tatou olaga—e ala i taimi lelei ma taimi faigata, e ala i le manuia ma faigata. Tatou te faatagaina ma le lotomaualalo Keriso e mamanu i tatou ma faia i tatou ia avea atili e faapei o Ia. Tatou te vaai atu ia Keriso ma le faatuatua, faatuatuaina, ma le faamoemoe e tusa lava po o a mea e oo mai i o tatou olaga.
O le tumau e oo i le iuga e le faapea o le pipiimau pea seia oo ina tatou oti. Nai lo lena, o lona uiga o le taulai atu o o tatou olaga, mafaufauga, ma faatinoga ia Iesu Keriso. E aofia ai le faaauau pea ona faatino le faatuatua ia Keriso i aso taitasi. E faaauau foi ona tatou salamo, tausia a tatou feagaiga ma le Atua, ma saili le mafutaga a le Agaga Paia.
O le tumau seia oo i le iuga e aofia ai le “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.” Ua folafola mai e lo tatou Tama Faalelagi a tatou tumau e oo i le iuga, o le a tatou “maua le ola e faavavau” (2 Nifae 31:20).
Suesuega o Tusitusiga Paia
Tumau e oo i le Iuga
Faamanuiaga mo i Latou o e Tumau
Aoao Atili e uiga i Lenei Mataupu Faavae
O le talalelei a Iesu Keriso e faamanuiaina ai fanau uma a le Atua.
O le talalelei a Iesu Keriso e mo fanau uma a le Atua. Ua aoao mai tusitusiga paia e faapea “e tutusa tagata uma i le Atua” e tusa lava po o a o tatou talaaga po o tulaga. O loo aoao mai tusitusiga paia, ua valaaulia e le Alii “ia o mai uma ia te ia, ia tofo i latou i lona agalelei; ua le faafitia foi e ia se tasi e sau ia te ia” (2 Nifae 26:33).
E faamanuiaina i tatou e le talalelei i o tatou olaga faaletino ma i le faavavau atoa. O le a sili ona tatou fiafia—o ni tagata taitoatasi ma o ni aiga—pe a tatou ola i aoaoga a Iesu Keriso (tagai Mosaea 2:41; “O Le Aiga: O Se Folafolaga i le Lalolagi,” ChurchofJesusChrist.org). O le ola ai i le talalelei e faalolotoina ai lo tatou olioli, musuia ai a tatou faatinoga, ma faatamaoaigaina ai a tatou sootaga.
O le ola ai i le talalelei a Iesu Keriso e mafai foi ona puipuia ai i tatou mai le faia o filifiliga o le a afaina ai i tatou faaletino po o le faaleagaga. E fesoasoani tatou te maua ai le malosi ma le mafanafana i taimi o tofotofoga ma faanoanoaga. E saunia ai le ala i se ola fiafia e faavavau.
O se tasi o sāvali maoa’e o le talalelei toefuataiina o le, o i tatou uma o se vaega o le aiga o le Atua. O i tatou nei o Ona atalii ma afafine faapelepele. Po o le a lava le tulaga o lo tatou aiga i le lalolagi, o i tatou taitoatasi o se tasi o le aiga o le Atua.
O le isi vaega sili o la tatou sāvali o le, e mafai ona faatasia aiga mo le faavavau. O le aiga ua faauuina e le Atua. O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. O sauniga ma feagaiga paia o le malumalu ua mafai ai e aiga ona faatasia e faavavau.
O le malamalama o le talalelei, e mafai ai e aiga ona foia ni feeseesea’iga, fefinaua’iga, ma luitau. O aiga ua mavaevae i le feeseesea’i e mafai ona faaleleia e ala i le salamo, faamagaloga, ma le faatuatua i le mana o le Togiola a Iesu Keriso.
E fesoasoani le talalelei a Iesu Keriso ia i tatou e atiina a’e ni sootaga malolosi atu faaleaiga. O le aiga o le nofoaga sili lea mo fanau e aoao ai mataupu faavae ma tu masani o le talalelei. O se aiga e faavae i mataupu faavae o le talalelei, o se nofoaga lea e sulufa’i i ai mo le saogalemu. O le a avea o se nofoaga e mafai ona afio ai le Agaga o le Alii.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia, “Talalelei”
-
Tusitaulima Aoao, Mataupu 27 ma le 16
Otootoga o Lesona Pupuu ma Feololo
O le otootoga lenei o se faataitaiga o mea e mafai ona e aoao atu i se tasi pe afai e na o sina taimi puupuu e te maua ai. Pe a faaaogaina lenei otootoga, filifili se mataupu faavae se tasi pe sili atu e aoao atu. O le faavae faaleaoaoga faavae mo mataupu faavae taitasi o loo tuuina atu i le amataga o le lesona.
A o e aoao atu, fai atu fesili ma faalogo. Tuuina atu valaaulia o le a fesoasoani i tagata e aoao ai pe faapefea ona ola latalata atili i le Atua. O se tasi o valaaulia taua e mo le tagata e toe feiloai ai ma oe. O le umi o le lesona o le a faalagolago i fesili e te fesili ai ma le faalogo o loo e faia.
O mea e mafai ona e aoao atu i tagata i le 3–10 Minute
-
Na auina mai e le Atua Lona Alo Pele, o Iesu Keriso, i le lalolagi e togiola i tatou mai le agasala ma le oti.
-
O le faatuatua ia Iesu Keriso o se mataupu faavae o le faatinoga ma le mana. E fesoasoani le faatuatua ia i tatou e iloa ai le mana faamalosiau o le Faaola i o tatou olaga.
-
O le faatuatua ia Iesu Keriso e taitaiina atu ai i tatou e salamo. O le salamo o le faagasologa o le liliu atu i le Atua ma liliu ese mai le agasala. A o tatou salamo, e suia a tatou faatinoga, manaoga, ma mafaufauga ina ia ogatusa atili ma le finagalo o le Atua.
-
Pe a tatou salamo, e faamagalo e le Tama Faalelagi i tatou. E mafai le faamagaloga ona sa togiolaina e Iesu Keriso a tatou agasala.
-
O le papatisoga e lua ona vaega: papatisoga i le vai ma le Agaga. Pe a papatisoina ma faamauina i tatou, ua faamamaina i tatou mai a tatou agasala, ua tuuina mai ai ia i tatou se amataga fou i le olaga.
-
A uma ona papatisoina i tatou, tatou te maua le meaalofa o le Agaga Paia i se sauniga ua ta’ua o le faamauga.
-
A o tatou mulimuli ma le faamaoni i le ala o le talalelei e oo atu i le iuga o o tatou olaga, ua folafola mai e le Atua o le a tatou maua le ola e faavavau.