« ជំពូកទី ១០ ៖ បង្រៀនដើម្បីស្ថាបនាសេចក្តីជំនឿលើព្រះយេស៊ូវគ្រីស្ទ » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )

« ជំពូកទី ១០ » ប្រកាសដំណឹងល្អរបស់យើង

ជំពូកទី ១០

បង្រៀនដើម្បីស្ថាបនាសេចក្តីជំនឿលើព្រះយេស៊ូវគ្រីស្ទ

សូមពិចារណាការណ៍នេះ

តើខ្ញុំអាចបង្រៀនដោយព្រះវិញ្ញាណដោយរបៀបណា ?
តើខ្ញុំអាចបង្រៀនចេញពីព្រះគម្ពីរដោយរបៀបណា ?
តើខ្ញុំគួរចែកចាយទីបន្ទាល់របស់ខ្ញុំដោយរបៀបណា នៅពេលបង្រៀន ?
តើខ្ញុំអាចរៀបចំផែនការ និងកែសម្រួលការបង្រៀនរបស់ខ្ញុំដោយរបៀបណា ដើម្បីបំពេញតម្រូវការរបស់អ្នករៀន ?
តើខ្ញុំអាចសួរសំណួរ និងធ្វើជាអ្នកស្ដាប់ដ៏ប្រសើរដោយរបៀបណា ?
តើខ្ញុំអាចជួយមនុស្សឲ្យស្វែងរកចម្លើយចំពោះសំណួររបស់ពួកគេ និងទទួលការណែនាំ និងកម្លាំងដោយរបៀបណា ?

អ្នកត្រូវបានហៅឲ្យបង្រៀនដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ឲ្យបានច្រើនបំផុតតាមដែលអាចធ្វើទៅបានទៅកាន់មនុស្សដែលនឹងទទួលអ្នក ។ ការបង្រៀនគឺជាចំណុចសំខាន់នៃការណ៍គ្រប់យ៉ាងដែលអ្នកធ្វើ ។ កាលអ្នកពឹងផ្អែកលើព្រះអម្ចាស់សម្រាប់ជំនួយ ទ្រង់បានសន្យាថា ៖

« ហើយអស់អ្នកណាដែលទទួលអ្នក នោះយើងក៏នឹងនៅទីនោះដែរ ដ្បិតយើងនឹងទៅពីមុខអ្នក ។ យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើងនៅព័ទ្ធជុំវិញអ្នក ដើម្បីទ្រអ្នកឡើង » ( គោលលទ្ធិ និងសេចក្តីសញ្ញា ៨៤:៨៨ ) ។

សូមអធិស្ឋាន សិក្សា និងអនុវត្តដើម្បីកែលម្អសមត្ថភាពបង្រៀនរបស់អ្នក ។ សូមអនុវត្តគោលការណ៍នៅក្នុងជំពូកនេះ និងនៅក្នុងជំពូកផ្សេងទៀតនៃសៀវភៅនេះ ។ ស្វែងរកអំណោយទាននៃការបង្រៀនដោយយកចិត្តទុកដាក់ ដើម្បីអ្នកអាចផ្ដល់ពរដល់អ្នកដទៃ និងលើកតម្កើងព្រះ ។ ព្រះអម្ចាស់នឹងជួយអ្នកបង្រៀនដោយអំណាច និងសិទ្ធិអំណាច នៅពេលអ្នកស្វែងរកទ្រង់ដោយឧស្សាហ៍ ហើយសិក្សាព្រះបន្ទូលរបស់ទ្រង់ ។

សូមព្យាយាមបង្រៀនដូចជាព្រះអង្គសង្គ្រោះបានបង្រៀន

នៅអំឡុងការងារបម្រើនៅលើផែនដីរបស់ទ្រង់ ព្រះយេស៊ូវ « យាងគ្រប់សព្វ…បង្រៀន…ប្រកាស…និងប្រោសជំងឺ » ( ម៉ាថាយ ៤:២៣ ) ។ ទ្រង់បានបង្រៀននៅកន្លែងជាច្រើន—ក្នុងសាលាប្រជុំ នៅផ្ទះ និងនៅតាមផ្លូវ ។ ទ្រង់បានបង្រៀននៅក្នុងការជួបជុំធំៗ និងក្នុងការសន្ទនាជាឯកជន ។ ការប្រាស្រ័យទាក់ទងដ៏មានឥទ្ធិពលបំផុតមួយចំនួនរបស់ទ្រង់គឺខ្លីណាស់ ឬនៅក្នុងស្ថានភាពមិនធម្មតា ។ ទ្រង់បានបង្រៀនតាមរយៈទង្វើ ក៏ដូចជាតាមរយៈព្រះបន្ទូលរបស់ទ្រង់ផងដែរ ។

ព្រះអង្គសង្គ្រោះបានបង្រៀនមនុស្សម្នាក់ៗតាមតម្រូវការពិសេសរបស់គាត់ ឬនាង ។ ឧទាហរណ៍ ពេលបម្រើដល់មនុស្សស្លាប់ដៃស្លាប់ជើងម្នាក់ ទ្រង់បានអភ័យទោសដល់អំពើបាបរបស់គាត់ ហើយបានប្រោសគាត់ ( សូមមើល ម៉ាកុស ២:១–១២ ) ។ ពេលធ្វើការងារបម្រើដល់ស្ត្រីដែលបានប្រព្រឹត្តអំពើសហាយស្មន់ ទ្រង់បានការពារនាង ហើយអញ្ជើញនាងមិនឲ្យប្រព្រឹត្តអំពើបាបទៀតទេ ( សូមមើល យ៉ូហាន ៨:២–១១ ) ។ នៅពេលនិយាយជាមួយបុរសស្តុកស្ដមដែលចង់បានជីវិតដ៏នៅអស់កល្បជានិច្ច ទ្រង់ « ស្រឡាញ់គាត់ » ទោះជាបុរសស្ដុកស្ដមនោះ បដិសេធមិនទទួលយកការអញ្ជើញរបស់ទ្រង់ដើម្បីធ្វើតាមទ្រង់ក៏ដោយ ( ម៉ាកុស ១០:២១; សូមមើល ខទី ១៧–២១ ) ។

អ្នកអាចកែលម្អការបង្រៀនរបស់អ្នកដោយរៀនអំពីរបៀបដែលព្រះអង្គសង្គ្រោះបានបង្រៀន ។ ឧទាហរណ៍ ទ្រង់ស្រឡាញ់ព្រះវរបិតា និងអស់អ្នកដែលទ្រង់បានបង្រៀន ។ ទ្រង់ពោរពេញដោយការអធិស្ឋាន ។ ទ្រង់បានបង្រៀនចេញពីព្រះគម្ពីរ ។ ទ្រង់បានរៀបចំខាងវិញ្ញាណ ទ្រង់បានសួរសំណួរបំផុសគំនិតផ្សេងៗ ។ ទ្រង់បានអញ្ជើញមនុស្សឲ្យធ្វើសកម្មភាពដោយសេចក្ដីជំនឿ ។ ទ្រង់បានប្រៀបប្រដូចគោលការណ៍នៃដំណឹងល្អមកជីវិតប្រចាំថ្ងៃ ។

ការព្យាយាមបង្រៀនដូចជាព្រះអង្គសង្គ្រោះបានបង្រៀនគឺជាការខិតខំពេញមួយជីវិត ។ វានឹងបានដល់អ្នកមួយបន្ទាត់ម្ដងៗ នៅពេលអ្នកធ្វើតាមទ្រង់ ( សូមមើល នីហ្វៃទី២ ២៨:៣០; អេធើរ ១២:៤១ ) ។

« ចូរខំព្យាយាមដើម្បីឲ្យបានព្រះបន្ទូលរបស់យើង »

ដើម្បីបង្រៀនដំណឹងល្អនៃព្រះយេស៊ូវគ្រីស្ទ អ្នកត្រូវដឹងពីគោលលទ្ធិ និងគោលការណ៍ជាមូលដ្ឋានរបស់វា ។ អ្នកក៏ត្រូវការចំណេះដឹងខាងវិញ្ញាណ និងការបញ្ជាក់នៃសេចក្តីពិតនៃដំណឹងល្អផងដែរ ។ ព្រះអម្ចាស់បានមានព្រះបន្ទូលថា « ចូរកុំខំប្រកាសព្រះបន្ទូលរបស់យើងឡើយ ប៉ុន្តែចូរខំព្យាយាមដើម្បីឲ្យបានព្រះបន្ទូលរបស់យើងជាមុនសិន » ។

ដើម្បី « ឲ្យបាន » ព្រះបន្ទូលរបស់ព្រះអម្ចាស់ មានន័យថាត្រូវសិក្សាអំពីព្រះបន្ទូល ហើយទុកឲ្យព្រះបន្ទូលជ្រាបចូលយ៉ាងជ្រៅទៅក្នុងដួងចិត្តរបស់អ្នក ។ នៅពេលអ្នកធ្វើកិច្ចការនេះ ទ្រង់បានសន្យាថា « ខណៈនោះ អណ្ដាតរបស់អ្នកនឹងបានធូរ ពេលនោះ បើសិនជាអ្នកមានប្រាថ្នា នោះអ្នកនឹងបានព្រះវិញ្ញាណរបស់យើង និងព្រះបន្ទូលរបស់យើង មែនហើយ គឺជាព្រះចេស្ដានៃព្រះ ដើម្បីបញ្ចុះបញ្ចូលមនុស្សលោក » ( គោលលទ្ធិ និងសេចក្តីសញ្ញា ១១:២១ ) ។

ព្រះអម្ចាស់បានមានព្រះបន្ទូលផងដែរថាត្រូវ « រក្សាទុកក្នុងគំនិតរបស់អ្នករាល់គ្នា បន្តនូវព្រះបន្ទូលទាំងឡាយខាងជីវិត » ( គោលលទ្ធិ និងសេចក្តីសញ្ញា ៨៤:៨៥ ) ។ ការរក្សាព្រះបន្ទូលរបស់ព្រះអម្ចាស់នឹងបង្កើនចំណេះដឹងរបស់អ្នក ហើយពង្រឹងទីបន្ទាល់របស់អ្នក ។ បំណងប្រាថ្នា និងសមត្ថភាពរបស់អ្នកក្នុងការចែកចាយដំណឹងល្អក៏នឹងកើនឡើងផងដែរ ។ ( សូមមើល យ៉ាកុប ៤:៦–៧; អាលម៉ា ៣២:២៧–៤២; ៣៦:២៦; ៣៧:៨–៩ ) ។

សូមទទួលយក និងរក្សាទុកព្រះបន្ទូលនៃព្រះដោយការអធិស្ឋាន ដោយការសិក្សាព្រះគម្ពីរ ប្រសាសន៍របស់ព្យាការីនៅថ្ងៃចុងក្រោយ និងមេរៀននៅក្នុង ជំពូកទី ៣ ។

បង្រៀនដោយព្រះវិញ្ញាណ

ដំណឹងល្អនៃព្រះយេស៊ូវគ្រីស្ទគឺជា « ព្រះ‌ចេស្តានៃព្រះ សម្រាប់នឹងជួយសង្គ្រោះដល់អស់អ្នកណាដែលជឿ » ( រ៉ូម ១:១៦ ) ។ ដោយសារហេតុផលនោះ សារលិខិតនៃការស្ដារឡើងវិញនៃដំណឹងល្អចាំបាច់ត្រូវបង្រៀនដោយព្រះចេស្ដាដ៏ទេវភាព—ព្រះចេស្ដានៃព្រះវិញ្ញាណបរិសុទ្ធ ។

វាគឺជារឿងដ៏សំខាន់ដែលអ្នកអភិវឌ្ឍជំនាញបង្រៀន ។ វាក៏ជារឿងដ៏សំខាន់ដែរ ដែលអ្នករៀនពីគោលលទ្ធិ និងគោលការណ៍ដែលអ្នកបង្រៀន ។ ទោះជាយ៉ាងណាក៏ដោយ នៅពេលបង្រៀនសេចក្ដីពិតខាងវិញ្ញាណ អ្នកមិនពឹងផ្អែកចម្បងលើសមត្ថភាព និងចំណេះដឹងផ្ទាល់ខ្លួនរបស់អ្នកនោះទេ ។

សេចក្តីពិតខាងវិញ្ញាណគឺត្រូវបានបង្រៀនដោយអានុភាពនៃព្រះវិញ្ញាណ ។ ព្រះអម្ចាស់បានមានព្រះបន្ទូលថា « ហើយព្រះវិញ្ញាណត្រូវបានប្រទានដល់អ្នក ដោយពាក្យអធិស្ឋាននៃសេចក្ដីជំនឿ ហើយបើសិនជាអ្នករាល់គ្នាមិនបានទទួលព្រះវិញ្ញាណទេ នោះអ្នករាល់គ្នានឹងមិនត្រូវបង្រៀនឡើយ » ( គោលលទ្ធិ និងសេចក្តីសញ្ញា ៤២:១៤; សូមមើលផងដែរ គោលលទ្ធិ និងសេចក្តីសញ្ញា ៥០:១៣–១៤, ១៧–២២ ) ។

អត្ថន័យនៃការបង្រៀនដោយព្រះវិញ្ញាណ

នៅពេលអ្នកបង្រៀនដោយព្រះវិញ្ញាណ នោះអ្នកមានព្រះចេស្តានៃព្រះវិញ្ញាណបរិសុទ្ធនៅក្នុងការបង្រៀនរបស់អ្នក ។ អ្នកក៏អធិស្ឋានដែលថា មនុស្សនឹងទទួលសេចក្តីពិតដោយព្រះវិញ្ញាណ ។ មនុស្សអាចនឹងត្រូវបានបញ្ចុះបញ្ចូលពីសេចក្ដីពិតខ្លះ ប៉ុន្តែដើម្បីប្រែចិត្តជឿ ពួកគេត្រូវមានបទពិសោធន៍ជាមួយនឹងព្រះវិញ្ញាណ ( សូមមើល គោលលទ្ធិ និងសេចក្តីសញ្ញា ៨:២–៣ ) ។

ការរៀបចំខ្លួនអ្នកឲ្យក្លាយជាឧបករណ៍នៃព្រះវិញ្ញាណបរិសុទ្ធ ។ សូមគិតថាព្រះវិញ្ញាណបរិសុទ្ធគឺជាដៃគូរបស់អ្នកក្នុងការបង្រៀន ។

សូមពឹងផ្អែកលើព្រះវិញ្ញាណដើម្បីជួយអ្នកឲ្យដឹងពីអ្វីដែលត្រូវនិយាយ ។ ទ្រង់នឹងដឹកនាំគោលលទ្ធិដែលអ្នកបានសិក្សាចូលទៅក្នុងការចងចាំរបស់អ្នក ។ ទ្រង់នឹងជួយអ្នករៀបចំផែនការ និងកែសម្រួលអ្វីដែលអ្នកបង្រៀនតាមតម្រូវការរបស់មនុស្សម្នាក់នោះ ។

នៅពេលអ្នកបង្រៀនដោយព្រះវិញ្ញាណ ទ្រង់នឹងនាំសារលិខិតរបស់អ្នកទៅកាន់ដួងចិត្តរបស់មនុស្ស ។ ទ្រង់នឹងបញ្ជាក់សារលិខិតរបស់អ្នក នៅពេលអ្នកថ្លែងទីបន្ទាល់របស់អ្នក ។ អ្នក និងអស់អ្នកដែលព្រមទទួលយកអ្វីដែលអ្នកបង្រៀនដោយព្រះវិញ្ញាណនឹងត្រូវបានស្អាងឡើង យល់ចិត្ត ហើយរីករាយជាមួយគ្នា ។ ( សូមមើល នីហ្វៃទី២ ៣៣:១; គោលលទ្ធិ និងសេចក្ដីសញ្ញា ៥០:១៣–២២ ) ។

« ព្រះវិញ្ញាណគឺជាធាតុដ៏សំខាន់តែមួយនៅក្នុងកិច្ចការនេះ ។ ដោយមានព្រះវិញ្ញាណលើកស្ទួយការហៅរបស់អ្នក នោះអ្នកអាចបង្កើតអព្ភូតហេតុសម្រាប់ព្រះអម្ចាស់នៅក្នុងតំបន់បេសកកម្មបាន ។ បើគ្មានព្រះវិញ្ញាណទេ នោះអ្នកនឹងមិនទទួលបានជោគជ័យឡើយ មិនថា ទេពកោសល្យ និងសមត្ថភាពរបស់អ្នកប៉ុណ្ណានោះទេ » ( អ៊ែសរ៉ា ថាហ្វ ប៊ែនសឹន សិក្ខាសាលាសម្រាប់ប្រធានបេសកកម្មថ្មី នៅថ្ងៃទី ២៥ ខែ មិថុនា ឆ្នាំ ១៩៨៦ ) ។

សេចក្តីសន្យានៃការហៅរបស់អ្នក

អ្នកត្រូវបានហៅ និងញែកចេញ « ដើម្បីផ្សាយដំណឹងល្អរបស់យើងដោយសារព្រះវិញ្ញាណ គឺព្រះដ៏ជាជំនួយដែលបានចាត់ឲ្យចេញទៅបង្រៀនពីសេចក្ដីពិត » ( គោលលទ្ធិ និងសេចក្ដីសញ្ញា ៥០:១៤ ) ។ ពេលខ្លះ អ្នកអាចមានអារម្មណ៍ថាភ័យខ្លាច ឬមិនល្អគ្រប់គ្រាន់ ។ ប្រហែលជាអ្នកបារម្ភថាអ្នកមិនចេះគ្រប់គ្រាន់ ឬថាអ្នកមិនមានបទពិសោធន៍គ្រប់គ្រាន់ ។

ព្រះវរបិតាសួគ៌របស់អ្នកដែលស្គាល់អ្នកដ៏ឥតខ្ចោះ បានហៅអ្នកឲ្យបង្រៀន ដោយសារតែអ្វីដែលអ្នកអាចផ្ដល់ឲ្យក្នុងនាមជាអ្នកដើរតាមព្រះយេស៊ូវគ្រីស្ទដោយមានការតាំងចិត្ត ។ ទ្រង់នឹងពុំបោះបង់ចោលអ្នកឡើយ ។ សូមទុកចិត្តថា ព្រះវិញ្ញាណនឹងលើកតម្កើងសមត្ថភាពរបស់អ្នក ហើយនឹងបង្រៀនសេចក្ដីពិតដល់អ្នកដែលព្រមទទួល ។

អែលឌើរ នែល អិល អាន់ឌើរសិន បានមានប្រសាសន៍ថា « នៅពេលខ្ញុំជញ្ជឹងគិតអំពីឧបសគ្គនៃបេសកកម្ម ខ្ញុំមានអារម្មណ៍ថា ខ្ញុំពុំល្អគ្រប់គ្រាន់ និងពុំទាន់បានរៀបចំខ្លួនរួចរាល់នោះទេ ។ ខ្ញុំចាំបានពីការអធិស្ឋានថា ‹ ឱព្រះវរបិតាដែលគង់នៅស្ថានសួគ៌ ទូលបង្គំដឹងតិចតួចណាស់ តើទូលបង្គំអាចបម្រើបេសកកម្មបានដោយរបៀបណា ? › ខ្ញុំជឿទៅលើសាសនាចក្រ ប៉ុន្តែខ្ញុំមានអារម្មណ៍ថា ចំណេះដឹងខាងវិញ្ញាណរបស់ខ្ញុំនៅមានកម្រិត ។ នៅពេលខ្ញុំអធិស្ឋាន ខ្ញុំទទួលបានអារម្មណ៍ថា ៖ « កូនពុំដឹងអ្វីៗគ្រប់យ៉ាងនោះទេ ប៉ុន្តែកូនដឹងល្មមគ្រប់គ្រាន់ហើយ ! » ការអះអាងនោះ បានផ្ដល់នូវភាពក្លាហានដល់ខ្ញុំ ដើម្បីបោះជំហានបន្ទាប់ចូលទៅក្នុងតំបន់បេសកកម្ម » ( « You Know Enough » Liahona ខែ វិច្ឆិកា ឆ្នាំ ២០០៨ ទំព័រ ១៣ ) ។

សូមយាងអញ្ជើញព្រះវិញ្ញាណនៅពេលដែលអ្នកចាប់ផ្ដើមបង្រៀន

ជួបគ្នាដំបូងពីរបីនាទីជាមួយមនុស្សមានសារៈសំខាន់ណាស់ ។ ចូរស្មោះត្រង់ និងគោរពគ្នា ។ សូមបង្ហាញចំណាប់អារម្មណ៍ និងសេចក្តីស្រឡាញ់ដោយស្មោះសរ ។ សូមស្វែងរកទំនុកចិត្តពីពួកគេ ។ របៀបមួយដើម្បីទទួលបានទំនុកចិត្តគឺនៅពេលដែលអ្នករៀនទទួលអារម្មណ៍ពីព្រះវិញ្ញាណជាមួយអ្នក ។

សូមសួរសំណួរសាមញ្ញមួយចំនួនដើម្បីជួយអ្នកឲ្យយល់ពីប្រវត្តិរបស់ពួកគេ និងការរំពឹងទុករបស់ពួកគេអំពីជំនួបរបស់អ្នក ។ ស្ដាប់ដោយយកចិត្តទុកដាក់ ។

មុនពេលអ្នកចាប់ផ្តើម សូមអញ្ជើញអស់អ្នកដែលមានវត្តមានចូលរួមនៅក្នុងមេរៀន ។ សូមលើកទឹកចិត្តពួកគេឲ្យយកអ្វីដែលមានការរំខានចេញ ដើម្បីអាចទទួលបានអារម្មណ៍នៃព្រះវិញ្ញាណ ។

សូមពន្យល់ថា អ្នកចង់ចាប់ផ្តើម និងបញ្ចប់មេរៀននីមួយៗដោយការអធិស្ឋាន ។ ស្ម័គ្រចិត្តអធិស្ឋានបើក ។ សូមអធិស្ឋានដោយសាមញ្ញ និងដោយស្មោះសរថា ព្រះនឹងប្រទានពរដល់មនុស្សដែលអ្នកកំពុងបង្រៀននៅក្នុងគ្រប់ទិដ្ឋភាពនៃជីវិតរបស់ពួកគេ ។ សូមអធិស្ឋានឲ្យពួកគេអាចទទួលអារម្មណ៍ពីសេចក្តីពិតនៃអ្វីដែលអ្នកនឹងបង្រៀន ។ សូមចងចាំថា « សេចក្តីទូលអង្វរដ៏អស់ពីចិត្តរបស់ [ មនុស្ស ] សុចរិត នោះពូកែណាស់ » ( យ៉ាកុប ៥:១៦ ) ។

សូមមានសេចក្តីជំនឿលើអំណាចនៃការប្រែចិត្តជឿនៃព្រះវិញ្ញាណបរិសុទ្ធ ។ នៅពេលមានការដឹកនាំដោយព្រះវិញ្ញាណ អ្នកអាចបង្ហាញពីគំនិតដូចខាងក្រោម នៅពេលអ្នកចាប់ផ្តើមបង្រៀន ៖

ព្រះគឺជាព្រះវរបិតាសួគ៌ពេញដោយក្តីស្រឡាញ់របស់យើង ។ យើងទាំងអស់គ្នាគឺជាបងប្អូនប្រុសស្រីនឹងគ្នា ។ ទ្រង់ចង់ឲ្យយើងដកពិសោធន៍សេចក្ដីអំណរ ។
យើងទាំងអស់គ្នាមានឧបសគ្គ និងការតស៊ូ ។ មិនថាអ្នកកំពុងឆ្លងកាត់អ្វីក៏ដោយព្រះយេស៊ូវ និងការបង្រៀនរបស់ទ្រង់អាចជួយអ្នកបាន ។ ទ្រង់អាចជួយអ្នករកឃើញសេចក្តីសុខសាន្ត ក្តីសង្ឃឹម ការព្យាបាល និងសុភមង្គល ។ ព្រះយេស៊ូវអាចជួយអ្នកឲ្យមានកម្លាំងកាន់តែខ្លាំងសម្រាប់ឧបសគ្គក្នុងជីវិត ។
យើងទាំងអស់គ្នាមានកំហុស ដែលអាចបង្កើតអារម្មណ៍នៃកំហុស ភាពអាម៉ាស់ និងការសោកស្តាយ ។ អារម្មណ៍ទាំងនេះនឹងបាត់ទៅវិញ លុះត្រាតែយើងប្រែចិត្ត ហើយស្វែងរកការអភ័យទោសពីព្រះ ។ មានតែតាមរយៈដង្វាយធួននៃព្រះយេស៊ូវគ្រីស្ទប៉ុណ្ណោះ ដែលយើងអាចត្រូវបានប្រោសឲ្យជាទាំងស្រុងពីអំពើបាបរបស់យើង ។
យើងនឹងត្រូវបានដឹកនាំ ដើម្បីឲ្យអ្នកអាចរៀនពីសេចក្តីពិតនៃសារលិខិតរបស់យើងសម្រាប់ខ្លួនអ្នកផ្ទាល់ ។ យើងនឹងអញ្ជើញអ្នកឲ្យធ្វើកិច្ចការមួយចំនួន ដូចជាការអាន ការអធិស្ឋាន និងការចូលរួមក្នុងព្រះវិហារ ។ តួនាទីរបស់យើងគឺដើម្បីជួយអ្នកធ្វើតាមការអញ្ជើញទាំងនេះ ហើយពន្យល់ពីពរជ័យដែលអ្នកអាចទទួលបាន ។ សូមសួរសំណួរ ។
យើងត្រូវបានហៅដោយព្យាការីនៃព្រះឲ្យចែកចាយអ្វីដែលយើងដឹង ។ យើងដឹងថាសារលិខិតរបស់យើងគឺពិត ។
យើងនឹងបង្រៀនអ្នកពីរបៀបចុះសេចក្ដីសញ្ញា ឬការសន្យាពិសេសជាមួយព្រះ ។ សេចក្តីសញ្ញាទាំងនេះនឹងភ្ជាប់អ្នកទៅកាន់ព្រះ ហើយអនុញ្ញាតឲ្យអ្នកទទួលបានអំណរ កម្លាំង និងការសន្យាពិសេសពីទ្រង់ ។
អ្នកនឹងរៀនពីរបៀបធ្វើការផ្លាស់ប្តូរនៅក្នុងជីវិតរបស់អ្នក ហើយធ្វើតាមព្រះយេស៊ូវគ្រីស្ទ និងការបង្រៀនរបស់ទ្រង់ ។ ការបង្រៀនដ៏សំខាន់មួយរបស់ព្រះយេស៊ូវគ្រីស្ទ និងសេចក្ដីសញ្ញាដំបូងដែលយើងចុះគឺការធ្វើតាមគំរូរបស់ទ្រង់ ហើយទទួលបុណ្យជ្រមុជទឹកដោយសិទ្ធិអំណាចត្រឹមត្រូវ ( សូមមើល យ៉ូហាន ៣:៥; គោលលទ្ធិ និងសេចក្តីសញ្ញា ២២ ) ។

មុននឹងបង្រៀនមេរៀនមួយ សូមបង្ហាញទិដ្ឋភាពទូទៅសាមញ្ញមួយអំពីអ្វីដែលអ្នកនឹងបង្រៀន ។ សូមជួយមនុស្សឲ្យមើលឃើញពីរបៀបដែលវានឹងមានភាពទាក់ទងជាមួយពួកគេ ។ ឧទាហរណ៍ អ្នកអាចនិយាយថា « យើងមកទីនេះដើម្បីចែកចាយសារលិខិតដែលព្រះយេស៊ូវគ្រីស្ទបានបង្កើតសាសនាចក្ររបស់ទ្រង់នៅលើផែនដីសព្វថ្ងៃនេះ ហើយបានហៅព្យាការីដែលមានជីវិតរស់ដើម្បីដឹកនាំយើង » ។ ឬអ្នកអាចនិយាយថា « យើងមកទីនេះដើម្បីជួយអ្នកឲ្យដឹងថា ព្រះស្រឡាញ់អ្នក និងមានផែនការមួយសម្រាប់សុភមង្គលរបស់អ្នក » ។

មនុស្សទាំងអស់នឹងទទួលអត្ថប្រយោជន៍ នៅពេលពួកគេទទួលយក និងរស់នៅតាមដំណឹងល្អនៃព្រះយេស៊ូវគ្រីស្ទ ។ ព្រះវរបិតាសួគ៌ប្រហែលជាបានប្រទានពរដល់មនុស្សដែលអ្នករកឃើញជាមួយការរៀបចំខ្លួនខាងវិញ្ញាណដ៏មានតម្លៃ ( សូមមើល អាលម៉ា ១៦:១៦–១៧ ) ។

ការយាងអញ្ជើញព្រះវិញ្ញាណ និងការចែកចាយសេចក្ដីពិតនៅក្នុងការប្រជុំដំបូង នឹងជួយមនុស្សឲ្យទទួលស្គាល់ថាអ្នកជាអ្នកបម្រើរបស់ព្រះអម្ចាស់ ។

ការសិក្សាផ្ទាល់ខ្លួន ឬជាដៃគូ

សូមប្រើការផ្ដល់យោបល់នៅក្នុងផ្នែកនេះ ដើម្បីអនុវត្តរបៀបខុសៗគ្នាដើម្បីចាប់ផ្តើមមេរៀន ។

សូមប្រើបទគម្ពីរ

ព្រះគម្ពីរបរមាណីនៃសាសនាចក្រគឺជាប្រភពមូលដ្ឋានរបស់អ្នកសម្រាប់ការបង្រៀនដំណឹងល្អដែលបានស្ដារឡើងវិញនៃព្រះយេស៊ូវគ្រីស្ទ ។ មានហេតុផលជាច្រើនដែលវាសំខាន់ក្នុងការប្រើព្រះគម្ពីរជាមូលដ្ឋានសម្រាប់ការបង្រៀនរបស់អ្នក ។ ឧទាហរណ៍ ៖

ព្រះគម្ពីរយាងអញ្ជើញព្រះវិញ្ញាណបរិសុទ្ធមកគង់នៅក្នុងការបង្រៀនរបស់អ្នក ( សូមមើល លូកា ២៤:១៣–៣២ ) ។
ព្រះគម្ពីរមានឥទ្ធិពលដ៏មានអានុភាពទៅលើគំនិតមនុស្សច្រើនជាងអ្វីផ្សេងៗទៀត ( សូមមើល អាលម៉ា ៣១:៥ ) ។
ព្រះគម្ពីរបានដោះស្រាយសំណួរដ៏ធំៗនៃព្រលឹង ( សូមមើល ជំពូកទី ៥; សូមមើល ផងដែរ នីហ្វៃទី២ ៣២:៣; យ៉ាកុប ២:៨ ) ។
ព្រះគម្ពីរផ្តល់សិទ្ធិអំណាច និងសុពលភាពដល់ការបង្រៀនរបស់អ្នក ។
ព្រះអម្ចាស់ និងពួកព្យាការីរបស់ទ្រង់បានមានព្រះបន្ទូល និងមានប្រសាសន៍ថាដូច្នោះ ( សូមមើល គោលលទ្ធិ និងសេចក្តីសញ្ញា ៤២:១២, ៥៦–៥៨; ៧១:១ ) ។

តាមរយៈការប្រើបទគម្ពីរនៅក្នុងការបង្រៀនរបស់អ្នក អ្នកអាចជួយអ្នកដទៃឲ្យចាប់ផ្តើមសិក្សាព្រះគម្ពីរដោយខ្លួនឯងបាន ។ នៅពេលដែលសេចក្តីស្រឡាញ់របស់អ្នកចំពោះព្រះគម្ពីរបង្ហាញឲ្យឃើញច្បាស់ នោះពួកគេនឹងត្រូវបានលើកទឹកចិត្តឲ្យសិក្សា ។ សូមបង្ហាញពីរបៀបដែលការសិក្សាព្រះគម្ពីរនឹងជួយពួកគេរៀនដំណឹងល្អ ហើយទទួលអារម្មណ៍ពីសេចក្តីស្រឡាញ់របស់ព្រះ ។ សូមផ្តល់ឧទាហរណ៍អំពីរបៀបដែលបទគម្ពីរអាចជួយពួកគេស្វែងរកចម្លើយចំពោះសំណួររបស់ពួកគេ ហើយទទួលបានការណែនាំ និងកម្លាំង ។

សូមយកចិត្តទុកដាក់ក្នុងការសិក្សាព្រះគម្ពីរ ដើម្បីអ្នកអាចបង្រៀនពីបទគម្ពីរដោយមានប្រសិទ្ធភាព ( សូមមើល ជំពូកទី ២ ) ។ សមត្ថភាពរបស់អ្នកក្នុងការបង្រៀនពីព្រះគម្ពីរនឹងប្រសើរឡើង នៅពេលអ្នកសិក្សាវារាល់ថ្ងៃ ទាំងផ្ទាល់ខ្លួន និងជាមួយដៃគូរបស់អ្នក ។

ជួយមនុស្សអភិវឌ្ឍសេចក្តីជំនឿលើព្រះយេស៊ូវគ្រីស្ទ តាមរយៈការសិក្សាព្រះគម្ពីរ ជាពិសេសព្រះគម្ពីរមរមន ។ ព័ត៌មានខាងក្រោមអាចជួយបាន ។

ណែនាំឲ្យស្គាល់ព្រះគម្ពីរ

សូមពិពណ៌នាប្រវត្តិរបស់សារលិខិតដោយសង្ខេបៗ ។ ឧទាហរណ៍ខាងក្រោមបង្ហាញពីវិធីមួយចំនួនដើម្បីណែនាំពីបទគម្ពីរមួយ ៖

« នៅក្នុងប្រវត្តិរបស់យ៉ូសែប ស្ម៊ីធ យ៉ូសែបប្រាប់យើងតាមប្រសាសន៍របស់លោកផ្ទាល់អំពីអ្វីដែលបានកើតឡើង នៅពេលលោកចូលទៅក្នុងព្រៃដើម្បីអធិស្ឋាន ។ លោកបានមានប្រសាសន៍ថា ‹ ខ្ញុំបានឃើញបង្គោលពន្លឺមួយ … › »
« នៅក្នុងវគ្គបទគម្ពីរនេះ ព្យាការីអាលម៉ាកំពុងបង្រៀនប្រជាជនដែលមានជីវភាពក្រីក្រឲ្យអនុវត្តសេចក្តីជំនឿរបស់ពួកគេលើព្រះបន្ទូលនៃព្រះ ។ លោកបានប្រៀបធៀបព្រះបន្ទូលទៅនឹងគ្រាប់ពូជមួយដែលអាចយកទៅបណ្ដុះនៅក្នុងចិត្តរបស់យើង ។ តើអ្នកនឹងចាប់ផ្តើមអានខ … ? »

អានវគ្គបទគម្ពីរ

អានខគម្ពីរឲ្យឮៗ ឬសុំសិស្សដែលអ្នកកំពុងបង្រៀនឲ្យអានឲ្យឮៗ ។ សូមយកចិត្តទុកដាក់ខ្ពស់ចំពោះសិស្សដែលមានការលំបាកក្នុងការអានព្រះគម្ពីរ ។ ប្រសិនបើវគ្គបទគម្ពីរមួយពិបាកយល់ សូមអានជាមួយពួកគេ ហើយពន្យល់តាមតម្រូវការ ។ សូមឲ្យនិយមន័យពាក្យ ឬ ឃ្លាពិបាកៗ ។ ឬផ្តល់ឲ្យពួកគេនូវអត្ថបទដ៏សាមញ្ញមួយដើម្បីអាន ។ សូមអញ្ជើញពួកគេឲ្យរកមើលចំណុចជាក់លាក់នៅក្នុងវគ្គបទគម្ពីរនេះ ។

អនុវត្តតាមបទគម្ពីរ

នីហ្វៃបានមានប្រសាសន៍ថា « ខ្ញុំប្រៀបធៀបបទព្រះគម្ពីរទាំងអស់ទៅនឹងខ្លួនយើង ដើម្បីទុកជាប្រយោជន៍ និងការចេះដឹងដល់យើង » ( នីហ្វៃទី១ ១៩:២៣ ) ។ ដើម្បី « ប្រៀបធៀប » មានន័យថាការអនុវត្តបទគម្ពីរទៅនឹងជីវិតរបស់អ្នក ។

ប្រៀបធៀបបទគម្ពីរទៅនឹងអស់អ្នកដែលអ្នកបង្រៀន ដោយបង្ហាញពីរបៀបដែលដំណើររឿង និងគោលការណ៍នានាទាក់ទងនឹងពួកគេផ្ទាល់ ។ ឧទាហរណ៍ ៖

« ដូចជាអ្នកដែរ ប្រជាជនអាលម៉ាមានបន្ទុកដ៏ធ្ងន់ ស្ទើរតែលើសពីពួកគេអាចទ្រាំបាន ។ ប៉ុន្តែ នៅពេលពួកគេអនុវត្តសេចក្ដីជំនឿ និងអធិស្ឋាន នោះព្រះបានពង្រឹងពួកគេ ដើម្បីពួកគេអាចស៊ូទ្រាំនឹងឧបសគ្គនានា ។ បន្ទាប់មក ទ្រង់បានរំដោះពួកគេចេញពីការសាកល្បងរបស់ពួកគេ ។ គឺដូចជាទ្រង់បានធ្វើជាមួយប្រជាជនទាំងនេះ ខ្ញុំដឹងថាព្រះនឹងជួយអ្នកឆ្លងកាត់ឧបសគ្គរបស់អ្នក នៅពេលអ្នក … » ( សូមមើល ម៉ូសាយ ២៤ ) ។
« សេចក្តីណែនាំរបស់អាលម៉ា ទៅកាន់ប្រជាជននៅឯទឹកមរមន អនុវត្តចំពោះយើងនៅសព្វថ្ងៃនេះ ។ ចន តើអ្នកស្ម័គ្រចិត្តដើម្បី … ? » ( សូមមើល ម៉ូសាយ ១៨ ) ។

សូមបង្រៀនមនុស្សពីរបៀប « ប្រៀបធៀប » ព្រះគម្ពីរដោយខ្លួនពួកគេផ្ទាល់ ។ ការស្វែងរកការអនុវត្តផ្ទាល់ខ្លួននឹងជួយពួកគេអនុវត្ត និងដកពិសោធណ៍នៃអំណាចនៃព្រះបន្ទូលនៃព្រះ ។

សូមអញ្ជើញ និងជួយមនុស្សឲ្យអានដោយខ្លួនពួកគេ ។

មនុស្សដែលអ្នកបង្រៀនត្រូវអានព្រះគម្ពីរ ជាពិសេសព្រះគម្ពីរមរមន ដើម្បីទទួលបានទីបន្ទាល់អំពីសេចក្ដីពិត ។ តាមរយៈការប្រើប្រាស់បទគម្ពីរប្រកបដោយប្រសិទ្ធភាពក្នុងការបង្រៀនរបស់អ្នក អ្នកអាចជួយមនុស្សឲ្យចាប់ផ្តើមសិក្សាព្រះគម្ពីរដោយខ្លួនពួកគេផ្ទាល់ ។

បន្ទាប់ពីការទៅជួបនីមួយៗ សូមស្នើឲ្យពួកគេអានជំពូក ឬខគម្ពីរជាក់លាក់ ។ សូមផ្ដល់យោបល់សំណួរនានាសម្រាប់ពួកគេដើម្បីពិចារណានៅពេលពួកគេអាន ។ សូមលើកទឹកចិត្តពួកគេឲ្យសិក្សាព្រះគម្ពីរជារៀងរាល់ថ្ងៃដោយខ្លួនពួកគេផ្ទាល់ និងជាមួយក្រុមគ្រួសាររបស់ពួកគេ ។ អ្នកក៏អាចរៀបចំឲ្យសមាជិកអានជាមួយពួកគេផងដែរ ។

មុនពេលចាប់ផ្តើមមេរៀនបន្ទាប់ សូមតាមដានដោយពិភាក្សាអំពីអ្វីដែលអ្នកបានអញ្ជើញមនុស្សឲ្យអាន ។ តាមតម្រូវការ សូមជួយពួកគេឲ្យយល់ ហើយ « ប្រៀបធៀប » បទគម្ពីរទាំងនេះ ។ សូមលើកទឹកចិត្តពួកគេឲ្យកត់ត្រាគំនិត និងសំណួរទាំងឡាយ ។

ពេលអ្នកជួយសិស្សអាន ស្វែងយល់ និងអនុវត្តព្រះគម្ពីរ—ជាពិសេសព្រះគម្ពីរមរមន—នោះពួកគេនឹងមានបទពិសោធន៍ខាងវិញ្ញាណជាមួយនឹងព្រះបន្ទូលនៃព្រះ ។ ពួកគេនឹងទំនងជាអានដោយខ្លួនឯង ហើយធ្វើឲ្យព្រះគម្ពីរក្លាយជាផ្នែកមួយដ៏សំខាន់ក្នុងជីវិតរបស់ពួកគេ ។

សូមជួយមនុស្សឲ្យចូលប្រើបទគម្ពីរ

ព្រះគម្ពីរ និងប្រសាសន៍របស់ព្យាការីដែលនៅរស់ អាចរកបានតាមមធ្យោបាយជាច្រើនទៀត និងមានជាភាសាច្រើនជាងពេលមុនៗ ។ សូមស្វែងយល់ថាតើជម្រើសបោះពុម្ព និងឌីជីថលអ្វីខ្លះ ដែលមានសម្រាប់មនុស្សដែលអ្នកបង្រៀន ។ សូមជួយមនុស្សឲ្យចូលមើលបទគម្ពីរតាមរបៀបដែលត្រូវនឹងតម្រូវការ និងចំណូលចិត្តរបស់ពួកគេ ។ សូមពិចារណាដូចខាងក្រោម ៖

សួរសិស្សថាតើភាសាមួយណាដែលពួកគេចង់អាន ឬស្តាប់បទគម្ពីរ ។
អស់អ្នកដែលមានការពិបាកក្នុងការអាន ឬពិបាកយល់អំពីអ្វីដែលគេអាន អាចនឹងទទួលបានប្រយោជន៍ពីការអានឮៗជាមួយគ្នា ឬស្តាប់ជាសំឡេង ។ អ្វីៗទាំងនេះអាចរកបានតាមរយៈកម្មវិធី និងគេហទំព័រសាសនាចក្រដោយឥតគិតថ្លៃ ។
ប្រសិនបើមនុស្សម្នាក់មានឧបករណ៍ឌីជីថល សូមជួយគាត់ឲ្យចូលមើលព្រះគម្ពីរ ជាពិសេសព្រះគម្ពីរមរមន ។ កម្មវិធីព្រះគម្ពីរមរមន និងបណ្ណាល័យដំណឹងល្អ គឺឥតគិតថ្លៃ និងងាយស្រួលធ្វើការចែកចាយ ។
ប្រសិនបើប្រើអត្ថបទឈែត ឬអ៊ីមែល សូមផ្ញើតំណ ឬរូបភាពព្រះគម្ពីរ ។ នៅពេលបង្រៀននៅក្នុងឈែតជាវីដេអូ សូមពិចារណាចែកចាយអេក្រង់របស់អ្នក ដើម្បីអ្នកអាចអានបទគម្ពីរជាមួយគ្នាបាន ។
សូមជួយមនុស្សឲ្យទទួលបានប្រសាសន៍របស់ព្យាការីដែលនៅរស់ ។

ការសិក្សាផ្ទាល់ខ្លួន ឬជាដៃគូ

សូមប្រាកដថា អ្នក និងដៃគូរបស់អ្នកមានធនធានព្រះគម្ពីរដែលបានធ្វើបច្ចុប្បន្នភាពនៅលើទូរសព្ទរបស់អ្នក រួមទាំងកម្មវិធីព្រះគម្ពីរមរមន និងបណ្ណាល័យដំណឹងល្អ ។

សូមជ្រើសរើសវគ្គបទគម្ពីរដូចតទៅ ៖ ទំព័រចំណងជើងនៃព្រះគម្ពីរមរមន; នីហ្វៃទី៣ ១១; មរមន ១០:៣–៨; យ៉ូហាន ១៧:៣; រ៉ូម ៨:១៦–១៧; កូរិនថូស ទី១ ១៥:២៩; យ៉ាកុប ១:៥; ពេត្រុស ទី១ ៣:១៩–២០; អេម៉ូស ៣:៧ ។

កំណត់ពីរបៀបដែលអ្នកចង់ ៖

ណែនាំឲ្យស្គាល់វគ្គបទគម្ពីរ ។
ផ្តល់សាវតារ និងបរិបទ ។
អានវគ្គបទគម្ពីរនេះ ហើយពន្យល់អត្ថន័យរបស់វា ។
ពន្យល់ពាក្យពិបាកៗ ។
ជួយដល់អ្នកដែលអ្នកបង្រៀនអនុវត្តវានៅក្នុងជីវិតរបស់ពួកគេ ។

ការសិក្សាព្រះគម្ពីរ

ហេតុអ្វីវាសំខាន់ដើម្បីបង្រៀនព្រះគម្ពីរ ?

ចែកចាយទីបន្ទាល់របស់អ្នក

ទីបន្ទាល់គឺជាសាក្សីខាងវិញ្ញាណ ដែលបានប្រទានឲ្យដោយព្រះវិញ្ញាណបរិសុទ្ធ ។ ដើម្បីចែកចាយទីបន្ទាល់របស់អ្នកគឺផ្តល់ការប្រកាសដ៏សាមញ្ញមួយដោយផ្ទាល់អំពីចំណេះដឹង ឬជំនឿអំពីសេចក្ដីពិតនៃដំណឹងល្អ ។ ការចែកចាយទីបន្ទាល់របស់អ្នក បន្ថែមសាក្សីផ្ទាល់ខ្លួនរបស់អ្នកចំពោះសេចក្តីពិតដែលអ្នកបានបង្រៀនពីព្រះគម្ពីរ ។

ការចែកចាយទីបន្ទាល់របស់អ្នក គឺជារបៀបដ៏មានឥទ្ធិពលមួយដើម្បីយាងអញ្ជើញព្រះវិញ្ញាណ ហើយជួយអ្នកដទៃឲ្យទទួលអារម្មណ៍នៃឥទ្ធិពលរបស់ទ្រង់ ។ បេសកកម្មមួយនៃបេសកកម្មរបស់ព្រះវិញ្ញាណបរិសុទ្ធ គឺដើម្បីថ្លែងទីបន្ទាល់អំពីព្រះវរបិតាសួគ៌ និងព្រះយេស៊ូវគ្រីស្ទ ។ ជារឿយៗទ្រង់បំពេញកិច្ចការនេះក្នុងភាពជាគូកនជាមួយអ្នក នៅពេលអ្នកថ្លែងទីបន្ទាល់ ។

ទីបន្ទាល់ដ៏មានឥទ្ធិពលមិនអាស្រ័យលើវោហារ ឬកម្រិតសំឡេងរបស់អ្នកនោះទេ—ប៉ុន្តែអាស្រ័យលើការជឿជាក់ និងភាពស្មោះត្រង់នៃដួងចិត្តរបស់អ្នកវិញទេ ។ សូមប្រយ័ត្នកុំប្រញាប់ប្រញាល់ ឬធ្វើឲ្យទីបន្ទាល់របស់អ្នកដូចជាការសម្តែង ។ សូមផ្តល់ឱកាសឲ្យមនុស្សមានអារម្មណ៍ថាព្រះវិញ្ញាណបរិសុទ្ធធ្វើជាសាក្សីដល់ពួកគេថា អ្វីដែលអ្នកបានបង្រៀនគឺជាការពិត ។

ទីបន្ទាល់របស់អ្នកអាចសាមញ្ញដូចជា « ព្រះយេស៊ូវគ្រីស្ទជាព្រះអង្គសង្គ្រោះ និងជាព្រះប្រោសលោះរបស់យើង » ឬ « ខ្ញុំបានដឹងសម្រាប់ខ្លួនខ្ញុំថា ព្រះគម្ពីរមរមនពិត » ។ អ្នកក៏អាចចែកចាយបទពិសោធន៍ខ្លីៗអំពីរបៀបដែលអ្នកទទួលបានទីបន្ទាល់នេះផងដែរ ។

នៅពេលអ្នកបង្រៀន សូមចែកចាយទីបន្ទាល់របស់អ្នក នៅពេលអ្នកទទួលបានការបំផុសគំនិត មិនមែនគ្រាន់តែនៅពេលចុងបញ្ចប់នោះទេ ។ នៅពេលដៃគូរបស់អ្នកកំពុងបង្រៀន សូមចែកចាយទីបន្ទាល់របស់អ្នក ដើម្បីផ្តល់សាក្សីទីពីរអំពីអ្វីដែលគាត់ ឬនាងបានបង្រៀន ។

សូមចែកចាយទីបន្ទាល់របស់អ្នកថា គោលការណ៍ដែលអ្នកកំពុងបង្រៀននឹងផ្ដល់ពរដល់ជីវិតរបស់មនុស្សនោះ ប្រសិនបើគាត់ ឬនាងនឹងធ្វើតាមវា ។ សូមប្រាប់អំពីរបៀបដែលការរស់នៅតាមគោលការណ៍នេះបានផ្ដល់ពរជ័យដល់ជីវិតរបស់អ្នក ។ ទីបន្ទាល់ដ៏ស្មោះរបស់អ្នកនឹងជួយបង្កើតបរិយាកាសមួយសម្រាប់មនុស្សឲ្យមានអារម្មណ៍ថាព្រះវិញ្ញាណបរិសុទ្ធបញ្ជាក់ពីសេចក្ដីពិត ។

ការសិក្សាផ្ទាល់ខ្លួន

វគ្គបទគម្ពីរខាងក្រោមគឺជាឧទាហរណ៍នៃការថ្លែងទីបន្ទាល់ ។ សូមពិចារណាពីសំណួរទាំងឡាយនៅពេលអ្នកអានបទគម្ពីរនីមួយៗ ។ សូមកត់ត្រាចម្លើយរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។

នៅក្នុងខគម្ពីរទាំងនេះ តើព្រះយេស៊ូវ និងសាវក និងព្យាការីរបស់ទ្រង់ថ្លែងទីបន្ទាល់អំពីអ្វី ?
តើអ្នកអាចប្រាប់បានដោយរបៀបណាថា ពួកគេជឿជាក់លើសេចក្តីពិតនៃអ្វីដែលពួកគេកំពុងនិយាយ ?
នៅពេលអ្នកនិយាយថា « ខ្ញុំដឹងថា គឺជាការពិត » តើអ្នកចង់មានន័យយ៉ាងណា ? តើពាក្យអ្វីទៀតដែលអ្នកអាចប្រើដើម្បីបង្ហាញពីការជឿរបស់អ្នក ?

ការសិក្សាព្រះគម្ពីរ

តើបទគម្ពីរខាងក្រោមនេះបង្រៀនអ្វីខ្លះអំពីគោលការណ៍ និងសេចក្តីសន្យានៃការថ្លែងទីបន្ទាល់ ?

សូមដាក់ផែនការ និងកែសម្រួលការបង្រៀនរបស់អ្នក ដើម្បីបំពេញតាមតម្រូវការទាំងឡាយ

មនុស្សម្នាក់ៗដែលអ្នកបង្រៀនគឺពិសេស ។ សូមស្វែងរកការយល់ដឹងអំពីចំណាប់អារម្មណ៍ តម្រូវការ និងកង្វល់ខាងវិញ្ញាណរបស់គាត់ ឬនាង ។ សូមសួរសំណួរ ហើយស្តាប់ដោយយកចិត្តទុកដាក់ ។ ទោះបីជាអ្នកប្រហែលជាមិនយល់ច្បាស់ពីតម្រូវការរបស់បុគ្គលនោះក៏ដោយ សូមចាំថា ព្រះវរបិតាសួគ៌ជ្រាបដឹង ។ ទ្រង់នឹងដឹកនាំអ្នកតាមរយៈព្រះវិញ្ញាណបរិសុទ្ធ ។

សូមឲ្យព្រះវិញ្ញាណដឹកនាំលំដាប់នៃមេរៀន

សូមឲ្យព្រះវិញ្ញាណដឹកនាំតាមលំដាប់ដែលអ្នកបង្រៀនមេរៀន ។ អ្នកមានភាពបត់បែនក្នុងការបង្រៀនមេរៀនតាមលំដាប់លំដោយ ដែលល្អបំផុតសម្រាប់តម្រូវការ សំណួរ និងកាលៈទេសៈរបស់អ្នកដែលអ្នកបង្រៀន ។

ម្តងម្កាល អ្នកអាចបញ្ចូលគោលការណ៍ពីមេរៀនផ្សេងៗគ្នាដើម្បីដោះស្រាយតម្រូវការ និងចំណាប់អារម្មណ៍របស់មនុស្សម្នាក់ ។ សូមមើលឧទាហរណ៍បីខាងក្រោមនេះ ។

យូគី បានរកឃើញអ្នកនៅលើអនឡាញ ហើយកំពុងសួរថាហេតុអ្វីបានជាមិត្តភក្តិរបស់នាងនៅក្នុងសាសនាចក្រមិនជក់បារី ឬផឹកស្រា ។ អ្នកអាចនឹងបង្រៀននាងអំពីពរជ័យនៃបទបញ្ញត្តិទាំងឡាយដោយប្រើផ្នែកខាងក្រោមពីជំពូកទី ៣ ៖

សាំយូអែលមានអារម្មណ៍ថាគាត់មិនចុះចំណោមគេសោះ ។ អ្នកអាចនឹងបង្រៀនគាត់អំពីអត្តសញ្ញាណរបស់គាត់ និងទីកន្លែងរបស់គាត់នៅក្នុងគ្រួសាររបស់ព្រះដោយប្រើផ្នែកខាងក្រោមពីជំពូកទី ៣ ៖

តាថាណា បានសិក្សាពីសាសនាជាច្រើន ហើយចង់ដឹងពីអ្វីដែលធ្វើឲ្យសាសនាចក្រខុសគ្នា ។ អ្នកអាចនឹងបង្រៀននាងអំពីការស្ដារឡើងវិញនៃដំណឹងល្អនៃព្រះយេស៊ូវគ្រីស្ទដោយប្រើផ្នែកខាងក្រោមពីជំពូកទី ៣ ៖

ព្រះវរបិតាសួគ៌ស្គាល់បុត្រាបុត្រីរបស់ទ្រង់ ដូច្នេះសូមស្វែងរកការបំផុសគំនិតដើម្បីធ្វើការសម្រេចចិត្តទាំងនេះ នៅពេលអ្នករៀបចំបង្រៀន ។ សូមអធិស្ឋានសម្រាប់អំណោយទាននៃការយល់ដឹង ពេលអ្នកសម្រេចចិត្តថាត្រូវបង្រៀនអ្វី ។ សូមកត់ត្រាគំនិត និងអារម្មណ៍ដែលអ្នកទទួលបាន ។

សូមទុកពេលឲ្យអ្នករៀនអនុវត្តអ្វីដែលពួកគេកំពុងរៀន

នៅពេលអ្នកបង្រៀន សូមទុកពេលឲ្យអ្នករៀនអនុវត្តអ្វីដែលពួកគេកំពុងរៀន ( សូមមើល នីហ្វៃទី៣ ១៧:២–៣ ) ។ សូមរកមើលវិធីសមស្របដើម្បីគាំទ្រពួកគេក្នុងការរក្សាការតាំងចិត្តរបស់ពួកគេ ។ សូមផ្ដោតលើការជួយពួកគេដោយទង្វើដែលនឹងស្ថាបនាគ្រឹះនៃសេចក្តីជំនឿ ដូចជាការអធិស្ឋាន ការអាន និងការចូលរួមក្នុងព្រះវិហារ ។ ការណ៍នេះនឹងអាចធ្វើឲ្យពួកគេរក្សាការតាំងចិត្តបន្ថែម ។

នៅពេលអ្នករៀបចំផែនការ និងបង្រៀន សូមយកចិត្តទុកដាក់នឹងព័ត៌មានថ្មីៗដែលអ្នកចែកចាយ ។ គោលបំណងចម្បងនៃការបង្រៀនរបស់អ្នកគឺដើម្បីជួយមនុស្សម្នាក់ឲ្យស្ថាបនាសេចក្ដីជំនឿលើព្រះយេស៊ូវគ្រីស្ទ ដែលដឹកនាំទៅរកការប្រែចិត្ត ។ គោលបំណងរបស់អ្នកគឺមិនមែនដើម្បីមើលថាតើព័ត៌មានប៉ុន្មានដែលអ្នកអាចចែកចាយបាននោះទេ ។

ចូរបង្រៀនក្នុងល្បឿនមួយដែលសមរម្យសម្រាប់បុគ្គលនោះ ។ សូមសួរសំណួរ និងស្តាប់ដោយយកចិត្តទុកដាក់ ដើម្បីឲ្យអ្នកយល់ ថាតើគាត់ ឬនាងកំពុងរៀន និងអនុវត្តអ្វីដែលអ្នកកំពុងបង្រៀនបានល្អប៉ុនណា ។

សេចក្តីពិតដែលអ្នកបង្រៀន រួមជាមួយនឹងព្រះចេស្ដានៃព្រះវិញ្ញាណបរិសុទ្ធ អាចមានឥទ្ធិពលលើអ្នករៀនឲ្យអនុវត្តសិទ្ធិជ្រើសរើសរបស់ពួកគេតាមរបៀបដែលពង្រឹងសេចក្តីជំនឿរបស់ពួកគេលើព្រះគ្រីស្ទ ។ នៅពេលពួកគេអនុវត្តសេចក្តីជំនឿលើព្រះអម្ចាស់ដោយអនុវត្តតាមអ្វីដែលពួកគេរៀន នោះពួកគេនឹងបានដឹងដោយព្រះវិញ្ញាណថាដំណឹងល្អគឺជាការពិត ។

សូមប្រើឱកាសបង្រៀនផ្សេងៗគ្នា

ឱកាសបង្រៀនមានទម្រង់ជាច្រើន ដូចជាការទៅជួបផ្ទាល់ ការឈែតជាវីដេអូ ការហៅទូរសព្ទ សារជាអក្សរ និងប្រព័ន្ធផ្សព្វផ្សាយសង្គម ។

សូមគោរពពេលវេលារបស់អ្នករៀន

សូមបង្រៀនដោយសាមញ្ញ និងសង្ខេបៗ ។ អ្នករៀនទំនងជាចង់ជួបជាមួយអ្នកនៅពេលអ្នកគោរពពេលវេលា និងសំណើរបស់ពួកគេ ។ សូមសួរថាតើពួកគេមានពេលទំនេរប៉ុន្មានសម្រាប់ជំនួបនេះ ។ សូមចាប់ផ្តើម និងបញ្ចប់ការសន្ទនាតាមពេលវេលាដែលបានព្រមព្រៀង ទោះជាការបង្រៀនដោយផ្ទាល់ ឬតាមអនឡាញក៏ដោយ ។ ត្រូវដឹងថានៅកន្លែងខ្លះ ការហៅទូរសព្ទ ឬការឈែតជាវីដេអូអាចមានតម្លៃថ្លៃ ។

អ្នកនឹងត្រូវការជួបជាច្រើនដងដើម្បីបង្រៀនគោលការណ៍ក្នុងមេរៀនមួយ ។ ជាធម្មតាការទៅបង្រៀនមិនគួរលើសពី ៣០ នាទីទេ ហើយអ្នកអាចបង្រៀនមនុស្សម្នាក់ក្នុងរយៈពេលតិចត្រឹមតែ ៥ នាទីប៉ុណ្ណោះ ។ សូមកែសម្រួលការបង្រៀនរបស់អ្នកទៅតាមពេលវេលារបស់អ្នករៀន ។

សូមប្រើបច្ចេកវិទ្យាដោយឈ្លាសវៃ

អ្នកមានឱកាសជាច្រើនក្នុងការបង្រៀនអ្នករៀនដោយប្រើបច្ចេកវិទ្យា ។ មនុស្សមួយចំនួនចូលចិត្តភាពងាយស្រួល ឬភាពឯកជននៃការប្រាស្រ័យទាក់ទងគ្នាតាមរយៈមធ្យោបាយអេឡិចត្រូនិច ។ សូម្បីតែមនុស្សដែលអ្នកទៅជួបដោយផ្ទាល់ក៏អាចទទួលបានអត្ថប្រយោជន៍ពីការគាំទ្របន្ថែមតាមរយៈបច្ចេកវិទ្យាដែរ ។ សូមពិភាក្សាអំពីធនធានដែលមានសម្រាប់ទំនាក់ទំនង ។ បន្ទាប់មកតាមដាន និងបន្តទំនាក់ទំនង ។ សូមទុកឲ្យចំណូលចិត្តរបស់មនុស្សម្នាក់ៗ ដឹកនាំការប្រាស្រ័យទាក់ទងរបស់អ្នក ។

បច្ចេកវិទ្យាដូចជាការហៅជាវីដេអូអាចមានប្រយោជន៍ជាពិសេសសម្រាប់ការបង្រៀនដល់មនុស្សដែលមានកាលវិភាគមមាញឹក ឬរស់នៅឆ្ងាយ ។ នៅពេលខ្លះវាកាន់តែងាយស្រួលសម្រាប់សមាជិកក្នុងការចូលរួមក្នុងមេរៀនតាមរយៈបច្ចេកវិទ្យា ។

ជួយអ្នកសិក្សាវ័យក្មេង

នៅអំឡុងការងារមប្រើរបស់ព្រះអង្គសង្រ្គោះ ទ្រង់បានប្រាប់ដល់ពួកសិស្សរបស់ទ្រង់ថា « ទុកឲ្យកូនក្មេងមកឯខ្ញុំចុះ កុំឃាត់វាឡើយ ដ្បិតនគរព្រះមានសុទ្ធតែមនុស្ស ដូចវារាល់គ្នាដែរ » ( ម៉ាកុស ១០:១៤ ) ។ នៅពេលអ្នកបង្រៀនក្មេងៗ សូមកែតម្រូវវិធីសាស្រ្ត និងសារលិខិតរបស់អ្នក ដើម្បីបំពេញតាមតម្រូវការរបស់ពួកគេ ។ សូមជួយពួកគេរៀនដំណឹងល្អដោយពិភាក្សាអំពីអ្វីដែលពួកគេស្គាល់ ។ សូមប្រាកដថាពួកគេយល់ពីអ្វីដែលអ្នកកំពុងបង្រៀន ។

ការសិក្សាព្រះគម្ពីរ

សូមអាន គោលលទ្ធិ និងសេចក្ដីសញ្ញា ៨៤:៨៥ ។ តើការផ្តល់« នូវចំណែកដែលនឹងបានវាល់ដល់មនុស្សគ្រប់រូប » មានន័យយ៉ាងណា ? តើអ្នកអាចអនុវត្តការណ៍នេះនៅក្នុងការបង្រៀនរបស់អ្នកដោយរបៀបណា ?

តើព្រះអម្ចាស់បានសន្យាអ្វីខ្លះដល់ពួកអ្នកផ្សព្វផ្សាយសាសនាដ៏ស្មោះត្រង់អំពីការដឹងពីអ្វីដែលត្រូវនិយាយ ?

បង្រៀនជាមួយដៃគូរបស់អ្នកដោយសាមគ្គីភាព

ព្រះអម្ចាស់បានមានព្រះបន្ទូលថា « អ្នករាល់គ្នាត្រូវចេញទៅដោយនូវព្រះចេស្ដានៃព្រះវិញ្ញាណរបស់យើង ដោយផ្សាយដំណឹងល្អរបស់យើងពីរនាក់ៗ » ( គោលលទ្ធិ និងសេចក្តីសញ្ញា ៤២:៦ ) ។ ទ្រង់បានប្រទានការទទួលខុសត្រូវដល់អ្នក និងដៃគូរបស់អ្នកផងដែរដើម្បី « រួមគ្នាតែមួយ » ( គោលលទ្ធិ និងសេចក្តីសញ្ញា ៣៨:២៧ ) ។ ការបង្រៀនរបស់អ្នកនឹងកាន់តែមានឥទ្ធិពល និងគួរឲ្យចាប់អារម្មណ៍ ប្រសិនបើអ្នក និងដៃគូរបស់អ្នកធ្វើកិច្ចការដោយសាមគ្គីភាព ។ ជំនួសដោយផ្តល់ការសង្ខេបផ្នែកខ្លះនៃមេរៀន ។

ក្នុងអំឡុងពេលសិក្សាជាមួយដៃគូ សូមពិភាក្សា និងអនុវត្តពីរបៀបដែលអ្នកនឹងបង្រៀន ដើម្បីអ្នកអាចមានសាមគ្គីភាព ។ សូមរៀបចំរបៀបដែលអ្នកនឹងធ្វើការជាមួយគ្នានៅពេលបង្រៀនសិស្សតាមអនឡាញ ។ សូមធ្វើតាម វិធីបង្ការក្នុងការប្រើប្រាស់បច្ចេកវិទ្យា ដែលបានគ្រោងនៅក្នុងជំពូកទី ២ ។

ពួកអ្នកផ្សព្វផ្សាយសាសនាកំពុងបង្រៀនបុរសម្នាក់

នៅពេលដៃគូរបស់អ្នកកំពុងបង្រៀន សូមអធិស្ឋាន ស្តាប់ ហើយមើលគាត់ ឬនាង ។ សូមគាំទ្រដៃគូរបស់អ្នកដោយផ្តល់សាក្សីទីពីរដល់សេចក្តីពិតដែលគាត់ ឬនាងបានបង្រៀន ( សូមមើល អាលម៉ា ១២:១ ) ។ សូមធ្វើតាមចំណាប់អារម្មណ៍របស់អ្នក នៅពេលព្រះវិញ្ញាណដាស់តឿនអ្នកឲ្យនិយាយអ្វីមួយ ។

សូមចាប់អារម្មណ៍ដោយស្មោះសរចំពោះមនុស្សដែលអ្នកបង្រៀន ។ សូមស្តាប់ពួកគេ ។ រក្សាការមើលចំកែវភ្នែកនៅពេលពួកគេ ឬអ្នកកំពុងនិយាយ ។ សូមសង្កេតមើលការឆ្លើយតបរបស់ពួកគេដោយប្រុងប្រយ័ត្ន ហើយស្តាប់តាមការបំផុសគំនិតខាងវិញ្ញាណ ។

សូមអញ្ជើញឲ្យសមាជិកចូលរួម

សូមអញ្ជើញសមាជិកឲ្យជួយមនុស្សដែលអ្នកបង្រៀន និងគាំទ្រមនុស្សដែលអ្នកកំពុងធ្វើការជាមួយ ។ ការណ៍នេះអាចកើតឡើងដោយផ្ទាល់ ឬពីចម្លាយ ។ ក្នុងអំឡុងពេលនៃការប្រជុំសម្របសម្រួលប្រចាំសប្តាហ៍ សូមប្រឹក្សាជាមួយថ្នាក់ដឹកនាំវួដអំពីអ្នកដែលអាចជួយបាន ។

នៅពេលសមាជិកចូលរួមក្នុងការបង្រៀន និងការរាប់អាន នោះពួកគេអាចបន្ថែមការយល់ដឹង និងបង្កើតទំនាក់ទំនងជាមិត្តភក្តិបាន ។ ពួកគេនឹងមានអារម្មណ៍រីករាយអំពីកិច្ចការផ្សព្វផ្សាយសាសនា ។

សូមអញ្ជើញសមាជិកឲ្យជួយបង្រៀន

មុនពេលមេរៀន សូមរៀបចំផែនការជាមួយសមាជិកអំពីរបៀបធ្វើការជាមួយគ្នា ។ អ្នកអាចប្រើសារជាអក្សរ ឬការហៅទូរសព្ទខ្លីៗ ដើម្បីបញ្ជាក់ពីអ្វីដែលអ្នកនឹងបង្រៀន អ្នកណានឹងអធិស្ឋាន អ្នកណានឹងដឹកនាំការសន្ទនា និងព័ត៌មានលម្អិតផ្សេងទៀត ។

តួនាទីចម្បងរបស់សមាជិកនៅក្នុងមេរៀនគឺផ្តល់ទីបន្ទាល់ដោយស្មោះសរ ចែកចាយបទពិសោធន៍ផ្ទាល់ខ្លួនខ្លីៗ និងបង្កើតទំនាក់ទំនងជាមួយអ្នករៀន ។ អ្នកអាចសុំសមាជិកឲ្យចែកចាយពីរបៀបដែលពួកគេអាចរៀន ទទួលយក និងរស់នៅតាមគោលការណ៍ជាក់លាក់មួយនៅក្នុងមេរៀន ។ ប្រសិនបើពួកគេជាអ្នកប្រែចិត្តជឿ សូមអញ្ជើញពួកគេឲ្យចែកចាយពីរបៀបដែលពួកគេសម្រេចចិត្តចូលរួមក្នុងសាសនាចក្រ ។

នៅពេលសមាជិកណែនាំនរណាម្នាក់ សុំឲ្យពួកគេចូលរួមក្នុងការបង្រៀន ។ សមាជិកអាចចូលរួមកាន់តែច្រើននៅក្នុងស្ថានភាពទាំងនេះ ។ សូមប្រឹក្សាជាមួយពួកគេអំពីរបៀបដែលពួកគេចង់ចូលរួម ។

សូមពិចារណាពីរបៀបដែលការប្រើប្រាស់បច្ចេកវិទ្យាដើម្បីបង្រៀនជាមួយសមាជិកប្រហែលជាសមរម្យ ។ បច្ចេកវិទ្យាអនុញ្ញាតឲ្យសមាជិកចូលរួមជាមួយអ្នកដោយមិនមានការចំណាយពេល ដែលតម្រូវឲ្យធ្វើដំណើរទៅជួបដោយផ្ទាល់ឡើយ ។

នៅក្នុងការប្រជុំសម្របសម្រួលប្រចាំសប្តាហ៍ សូមរៀបចំផែនការជាមួយថ្នាក់ដឹកនាំវួដ ដើម្បីឲ្យសមាជិកចូលរួមក្នុងមេរៀនឲ្យបានច្រើនតាមដែលអាចធ្វើទៅបាន ( សូមមើល ជំពូកទី ១៣ ) ។ សូមពិចារណាសុំសមាជិកថ្មីឲ្យជួយបង្រៀន ។

ការសិក្សាផ្ទាល់ខ្លួន ឬជាដៃគូ

សូមស្រមៃថាអ្នកមានការណាត់ជួបដើម្បីបង្រៀនមេរៀនដល់គ្រួសារមួយនៅផ្ទះរបស់សមាជិកម្នាក់ ។ សូមពិភាក្សាអំពីរបៀបដែលអ្នកនឹងធ្វើឲ្យសមាជិកម្នាក់ៗ ដូចខាងក្រោមចូលរួមជួយអ្នកបង្រៀន ៖

អ្នកផ្សព្វផ្សាយសាសនាវួដម្នាក់ដែលទើបត្រឡប់មកពីបេសកកម្មពេញម៉ោង
ជាសង្ឃ
សមាជិកថ្មី
ពួកអែលឌើរកូរ៉ុម ឬប្រធានសមាគមសង្រ្គោះ

សូមអញ្ជើញសមាជិកឲ្យផ្ដល់ការគាំទ្រ

សមាជិកក៏អាចផ្តល់ការគាំទ្រដ៏មានតម្លៃដល់មនុស្សនៅចន្លោះការបង្រៀនសួរសុខទុក្ខផងដែរ ។ ពួកគេអាចផ្ញើសារ អានព្រះគម្ពីរជាមួយគ្នា អញ្ជើញបុគ្គលនោះមកលេងផ្ទះរបស់ពួកគេ ឬចូលរួមសកម្មភាព ឬអញ្ជើញពួកគេឲ្យអង្គុយជាមួយគ្នានៅព្រះវិហារ ។ ពួកគេអាចឆ្លើយសំណួរ ហើយបង្ហាញថាជីវិតរបស់ពួកគេមានលក្ខណៈបែបណាក្នុងនាមជាសមាជិកនៃសាសនាចក្រ ។ បទពិសោធន៍ជីវិត និងទស្សនៈរបស់ពួកគេអាចជួយពួកគេឲ្យភ្ជាប់ទំនាក់ទំនងជាមួយមនុស្សតាមរបៀបដែលជួនកាលវាខុសគ្នាយ៉ាងខ្លាំងពីទំនាក់ទំនងរបស់ពួកអ្នកផ្សព្វផ្សាយសាសនា ។

សូមប្រឹក្សាជាមួយសមាជិកអំពីរបៀបដែលអ្នកអាចធ្វើការរួមគ្នា ដើម្បីជួយអ្នករៀនក្រៅពីពេលបង្រៀន ។

បង្រៀនដើម្បីឲ្យមានការយល់ដឹង

សូមបង្រៀនដំណឹងល្អនៃព្រះយេស៊ូវគ្រីស្ទ ដើម្បីឲ្យអ្នករៀននឹងយល់អំពីដំណឹងល្អនេះ ។ សូមសិក្សាបទគម្ពីរ និងមេរៀន ដើម្បីអ្នកអាចបង្រៀនយ៉ាងច្បាស់ពីបទគម្ពីរទាំងនោះ ។ កាលណាអ្នកបង្រៀនកាន់តែច្បាស់ នោះឱកាសសម្រាប់ព្រះវិញ្ញាណបរិសុទ្ធធ្វើទីបន្ទាល់អំពីសេចក្ដីពិតក៏កាន់តែប្រសើរដែរ ។

សូមសួរសំណួរដើម្បីជួយអ្នករៀនគិតអំពីអ្វីដែលអ្នកបានបង្រៀន ។ បន្ទាប់មក សូមស្តាប់ថាតើពួកគេយល់ និងទទួលយកដំណឹងល្អដែរឬទេ ។

ផ្នែកនៃការបង្រៀនដើម្បីឲ្យមានការយល់ដឹងគឺការពន្យល់ពាក្យ ឃ្លា និងគំនិតទាំងឡាយ ។ អ្នកអាចកែលម្អសមត្ថភាពរបស់អ្នកដើម្បីបង្រៀនដំណឹងល្អដោយ ៖

ការយល់ពីពាក្យដែលអ្នកប្រើ ។
ឲ្យនិយមន័យពាក្យដែលអ្នកដទៃប្រហែលជាមិនយល់ ។
សួរសំណួរដូចជា « តើអ្នកនឹងចែកចាយជាមួយយើងនូវការយល់ដឹងរបស់អ្នកអំពីអ្វីដែលយើងទើបតែបានពន្យល់ដែរឬទេ ? » ឬ « តើអ្នកព្រមសង្ខេបអំពីអ្វីដែលយើងបាននិយាយដែរឬទេ ? »

នៅពេលអ្នកបង្រៀនគោលលទ្ធិនៅក្នុង ជំពូកទី ៣ ប្រើពាក្យ ឃ្លា និងគំនិតទាំងឡាយណាដែលមនុស្សប្រហែលជាមិនយល់ ។ សូមស្វែងយល់អត្ថន័យទាំងនេះដោយការប្រើធនធានដែលមាននៅក្នុងបណ្ណាល័យដំណឹងល្អ ដូចជា សេចក្ដីណែនាំដល់បទគម្ពីរទាំងឡាយ Bible Dictionary និង Gospel Topics ។

សូមបង្រៀនដោយសាមញ្ញ និងសង្ខេបៗ ។ សូមរក្សាវាឲ្យផ្ដោតលើដំណឹងល្អនៃព្រះយេស៊ូវគ្រីស្ទ ស្ថាបនាការយល់ដឹងអំពីគោលលទ្ធិ និងគោលការណ៍គ្រឹះ ។ ជួយអ្នករៀនស្វែងរកការយល់ដឹងដែលបានមកពីព្រះវិញ្ញាណបរិសុទ្ធ ។ នៅពេលពួកគេទទួលបានការយល់ដឹងនេះ ពួកគេនឹងចាប់ផ្ដើមជឿសារលិខិតនៃដំណឹងល្អហើយ ។

ការសិក្សាព្រះគម្ពីរ

ហេតុអ្វីបានជាយើងគួរតែពន្យល់ពីគោលលទ្ធិដោយយកចិត្តទុកដាក់ ?

តើយើងរៀនដោយរបៀបណា ? ហេតុអ្វីវាមានសារៈសំខាន់ដើម្បីបង្រៀនព័ត៌មានបន្តិចម្តងៗ ?

ហេតុអ្វីបានជាភាពច្បាស់មានសារៈសំខាន់ ?

តើអ្នកអាចរៀនអ្វីខ្លះពីខគម្ពីរខាងក្រោមអំពីរបៀបដែលព្រះប្រាស្រ័យទាក់ទងជាមួយបុត្រាបុត្រីរបស់ទ្រង់ ?

សួរសំណួរ

ព្រះអង្គសង្គ្រោះបានសួរសំណួរទាំងឡាយដែលអញ្ជើញដល់មនុស្សឲ្យគិត ហើយទទួលអារម្មណ៍យ៉ាងខ្លាំងអំពីសេចក្ដីពិតដែលទ្រង់បានបង្រៀន ។ សំណួររបស់ទ្រង់បានបំផុសគំនិតដល់ ការស្វែងរកព្រលឹង និងការតាំងចិត្ត ។

សំណួរល្អៗទាំងនេះក៏មានសារៈសំខាន់នៅក្នុងការបង្រៀនរបស់អ្នកដែរ ។ វានឹងជួយអ្នកឲ្យយល់ពីចំណាប់អារម្មណ៍ កង្វល់ និងសំណួររបស់អ្នករៀន ។ សំណួរល្អៗអាចយាងអញ្ជើញព្រះវិញ្ញាណ ហើយជួយមនុស្សឲ្យរៀន ។

សួរសំណួរទំាងឡាយដែលបំផុសគំនិត

សូមស្វែងរកការដឹកនាំពីព្រះវិញ្ញាណក្នុងការសួរសំណួរល្អៗ ។ សំណួរត្រឹមត្រូវនៅពេលត្រឹមត្រូវ អាចជួយមនុស្សឲ្យរៀនអំពីដំណឹងល្អ ហើយទទួលអារម្មណ៍ពីព្រះវិញ្ញាណ ។

សំណួរដែលបំផុសគំនិត និងការស្តាប់ដោយស្មោះសរនឹងជួយអ្នករៀនឲ្យកាន់តែមានទំនុកចិត្តក្នុងការនិយាយដោយបើកចំហ និងមានទំនុកចិត្តក្នុងការចែកចាយអារម្មណ៍របស់ពួកគេ ។ ការណ៍នេះអាចជួយពួកគេរកឃើញទីបន្ទាល់ដែលកំពុងរីកចម្រើន ។ ពួកគេក៏នឹងកាន់តែមានទំនុកចិត្តក្នុងការសួរសំណួរដល់អ្នកនៅពេលដែលពួកគេមិនយល់អ្វីមួយ ឬមានកង្វល់ផងដែរ ។

តារាងខាងក្រោមបង្ហាញពីគោលការណ៍មួយចំនួននៃការសួរសំណួរដែលបំផុសគំនិត រួមជាមួយនឹងឧទាហរណ៍មួយចំនួន ។

គោលការណ៍ និងឧទាហរណ៍នៃសំណួរដែលបំផុសគំនិត

គោលការណ៍ទាំងឡាយ	ឧទាហរណ៍
សូមសួរសំណួរដែលជួយមនុស្សឲ្យមានអារម្មណ៍ថាមានព្រះវិញ្ញាណ ។	តើអ្នកអាចចែកចាយបទពិសោធន៍មួយ ពេលអ្នកមានអារម្មណ៍ថាមានឥទ្ធិពលរបស់ព្រះក្នុងជីវិតរបស់អ្នកដែរឬទេ ? តើអ្នកទទួលអារម្មណ៍ពីសេចក្ដីស្រឡាញ់របស់ព្រះសម្រាប់អ្នកដោយរបៀបណា ?
សូមសួរសំណួរដែលសាមញ្ញ និងងាយយល់ ។	តើអ្នកបានរៀនអ្វីខ្លះអំពីព្រះយេស៊ូវគ្រីស្ទចេញពីបទគម្ពីរនេះ ?
សូមសួរសំណួរដែលជួយអ្នករៀនគិតអំពីអ្វីដែលអ្នកកំពុងបង្រៀន ។	តើការណ៍នេះស្រដៀងនឹងអ្វីដែលអ្នកជឿរួចទៅហើយដោយរបៀបណា ? តើវាខុសគ្នាដោយរបៀបណា ?
សូមសួរសំណួរដែលជួយអ្នកឲ្យដឹងថាមនុស្សយល់ច្បាស់ពីអ្វីដែលអ្នកកំពុងបង្រៀន ។	តើអ្នកមានសំណួរអ្វីខ្លះអំពីអ្វីដែលយើងបានបង្រៀននៅថ្ងៃនេះ ? តើអ្នកនឹងសង្ខេបការសន្ទនារបស់យើងនៅថ្ងៃនេះដោយរបៀបណា ?
សូមសួរសំណួរដែលជួយអ្នករៀនចែកចាយនូវអ្វីដែលពួកគេកំពុងទទួលអារម្មណ៍ ។	តើព្រះយេស៊ូវគ្រីស្ទបានជួយអ្នកនៅក្នុងជីវិតរបស់អ្នកដោយរបៀបណា ? តើអ្វីដែលសំខាន់បំផុតសម្រាប់អ្នក ចេញពីអ្វីដែលយើងបាននិយាយនៅថ្ងៃនេះ ?
សូមសួរសំណួរដែលបង្ហាញពីក្តីស្រឡាញ់ និងការបារម្ភ ។	តើយើងអាចជួយអ្នកដោយរបៀបណា ?
សូមសួរសំណួរដែលជួយអ្នករៀនអនុវត្តអ្វីដែលពួកគេរៀន ។	តើយើងអាចរៀនអ្វីខ្លះចេញពីបទគម្ពីរនេះ ? តើបទគម្ពីរនេះជួយអ្នកនៅក្នុងជីវិតរបស់អ្នកដោយរបៀបណា ? ដូចដែលយើងបាននិយាយ តើអ្នកចាប់អារម្មណ៍នឹងធ្វើអ្វីខ្លះពីអ្វីដែលអ្នកបានរៀន ?

ការសិក្សាជាមួយដៃគូ

សូមពិនិត្យមើលផែនការមេរៀនរបស់អ្នកមកពីមេរៀនថ្មីៗដែលអ្នកបានបង្រៀន ។ សូមសរសេរសំណួរមួយសម្រាប់គោលការណ៍សំខាន់ៗនីមួយៗដែលមានរៀបរាប់នៅក្នុងផែនការរបស់អ្នក ។

សូមពិនិត្យមើលសំណួររបស់អ្នក ដើម្បីមើលថាតើវាសមស្របនឹងគោលការណ៍នៅក្នុងផ្នែកនេះដែរឬទេ ។

បន្ទាប់មក សូមឆ្លើយសំណួរនីមួយៗ ហាក់ដូចជាអ្នកកំពុងទទួលការបង្រៀន ។

សូមចែកចាយសំណួររបស់អ្នកជាមួយដៃគូរបស់អ្នក ។ សូមវាយតម្លៃ និងកែលម្អសំណួររបស់អ្នកជាមួយគ្នា ។

ការសិក្សាផ្ទាល់ខ្លួន ឬជាដៃគូ

មនុស្សដែលអ្នកកំពុងបង្រៀនអាចជួបនឹងបទពិសោធន៍ដូចខាងក្រោម ៖

ពួកគេមានបទពិសោធន៍ខាងវិញ្ញាណ ពេលកំពុងអានព្រះគម្ពីរមរមន ។
មិត្តរួមការងារតែងតែលេងសើចនឹងរឿងខាងវិញ្ញាណ ។
សមាជិកគ្រួសារគឺជាសមាជិកដ៏រឹងមាំនៃព្រះវិហារមួយផ្សេងទៀត ។
មិត្តភក្តិជាច្រើនជឿថា « ពួកមរមន » មិនមែនជាពួកគ្រីស្ទានទេ ។

សូមគិតពីសំណួរដែលអ្នកនឹងសួរដើម្បីរៀនបន្ថែមទៀតអំពីស្ថានភាពនីមួយៗទាំងនេះ ។ សូមសរសេរសំណួរទាំងនេះដាក់នៅក្នុងសៀវភៅកំណត់ហេតុការសិក្សារបស់អ្នក ។ សូមពិភាក្សាជាមួយដៃគូរបស់អ្នកអំពីរបៀបដែលអ្នកអាចកែលម្អសំណួរដែលអ្នកបានសរសេរ ។

សូមចៀសវាងសំណួរដែលមិនមានប្រសិទ្ធភាព ឬហួសហេតុ

ព្យាយាមកុំសួរសំណួរដែល ៖

មានចម្លើយមិនច្បាស់លាស់ ។
អាចនឹងធ្វើឲ្យនរណាម្នាក់ខ្មាសអៀន ប្រសិនបើគាត់ ឬនាងមិនដឹងចម្លើយ ។
បញ្ចូលគំនិតច្រើនជាងមួយ ។
ទាក់ទងនឹងគោលលទ្ធិដែលអ្នកមិនទាន់បានបង្រៀន ។
មិនមានគោលបំណងច្បាស់លាស់ ។
ដែលលើស ។
មានការគាស់កកាយ ឬអាចធ្វើឲ្យអ្នករៀនខឹង និងអាក់អន់ចិត្ត ។

ខាងក្រោមនេះគឺជាឧទាហរណ៍នៃសំណួរដែលមិនសូវមានប្រសិទ្ធភាព ៖

តើនរណាជាព្យាការីដំបូង ? ( បុគ្គលនោះប្រហែលជាមិនដឹងពីចម្លើយទេ ) ។
តើការរក្សារូបកាយយើងឲ្យបរិសុទ្ធជួយយើងឲ្យមានព្រះវិញ្ញាណ ហើយបង្ហាញថាយើងមានឆន្ទៈធ្វើតាមព្យាការីរបស់ព្រះដោយរបៀបណា ? ( មានគំនិតច្រើនជាងមួយ ) ។
តើវាមានសារៈសំខាន់ដើម្បីដឹងអំពីបទបញ្ញត្តិរបស់ព្រះដែរឬទេ ? ( នេះគឺជាសំណួរបាទ-ទេ ហើយចម្លើយច្បាស់ណាស់ ) ។
តើមានអ្វីខ្លះដែលយើងអាចធ្វើជារៀងរាល់ថ្ងៃ ដែលនឹងជួយយើងឲ្យមានអារម្មណ៍ជិតស្និទ្ធនឹងព្រះ ? ( នេះជាសំណួរមិនច្បាស់លាស់ដែលកំពុងស្វែងរកចម្លើយជាក់លាក់ ៖ អធិស្ឋាន ) ។
តើនរណាជាព្យាការី បន្ទាប់ពីណូអេ ? ( បុគ្គលនោះប្រហែលជាមិនដឹងពីចម្លើយឡើយ ហើយសំណួរមិនសំខាន់សម្រាប់សារលិខិតរបស់អ្នកទេ ) ។
តើអ្នកយល់ពីអ្វីដែលខ្ញុំចង់និយាយដែរឬទេ ? ( បុគ្គលនោះអាចនឹងមានអារម្មណ៍ថាអ្នកកំពុងមើលងាយគាត់ ឬនាង ) ។

ការសិក្សាផ្ទាល់ខ្លួន ឬជាដៃគូ

សូមពិចារណាអំពីតម្រូវការរបស់នរណាម្នាក់ដែលអ្នកកំពុងបង្រៀន ។ សូមពិភាក្សាអំពីរបៀបដែលគាត់ ឬនាងអាចឆ្លើយសំណួររបស់អ្នក ។ សូមរៀបចំសំណួរមួយចំនួនដើម្បីសួរដែលធ្វើតាមគោលការណ៍ណែនាំនៅក្នុងផ្នែកនេះ ។ សូមពិភាក្សាអំពីរបៀបដែលសំណួរទាំងនេះអាចយាងអញ្ជើញព្រះវិញ្ញាណ ហើយជួយបុគ្គលនោះឲ្យរៀនដំណឹងល្អ ។

ស្ដាប់

នៅពេលអ្នកស្តាប់អ្នកដទៃដោយយកចិត្តទុកដាក់ នោះអ្នកនឹងយល់ពីពួកគេកាន់តែច្បាស់ ។ នៅពេលពួកគេដឹងថា គំនិត និងអារម្មណ៍របស់ពួកគេសំខាន់ចំពោះអ្នក ពួកគេនឹងកាន់តែស្តាប់ការបង្រៀនរបស់អ្នក សូមចែកចាយបទពិសោធន៍ផ្ទាល់ខ្លួន និងធ្វើការតាំងចិត្តផ្សេងៗ ។

នៅពេលដែលអ្នកស្ដាប់ អ្នកនឹងទទួលបានការយល់ដឹងដើម្បីដឹងពីរបៀបបត់បែនការបង្រៀនរបស់អ្នកទៅតាមតម្រូវការ និងចំណាប់អារម្មណ៍របស់ពួកគេ ។ អ្នកនឹងយល់កាន់តែច្បាស់អំពីសេចក្ដីពិតនៃដំណឹងល្អដែលមានប្រយោជន៍បំផុតសម្រាប់ពួកគេ ។

ជាពិសេសសូមស្តាប់តាមការខ្សឹបប្រាប់ពីព្រះវិញ្ញាណ ។ នៅពេលអ្នកដទៃចែកចាយអារម្មណ៍របស់ពួកគេ ព្រះវិញ្ញាណបរិសុទ្ធអាចនឹងបំផុសគំនិតអ្នកឲ្យមានការពិចារណា ឬគំនិត ។ ព្រះវិញ្ញាណក៏អាចជួយអ្នកឲ្យយល់ពីអ្វីដែលអ្នកដទៃកំពុងព្យាយាមបង្ហាញផងដែរ ។

ស្តាប់ដោយការយកចិត្តទុកដាក់ពិតប្រាកដ

ការស្តាប់ត្រូវការការខិតខំប្រឹងប្រែង និងការយកចិត្តទុកដាក់ពិតប្រាកដ ។ ខណៈពេលដែលអ្នកផ្សេងទៀតនិយាយ ត្រូវប្រាកដថាអ្នកផ្តោតលើអ្វីដែលពួកគេកំពុងនិយាយ ។ សូមចៀសវាងពីទំនោរក្នុងការដាក់ផែនការពីអ្វីដែលអ្នកនឹងនិយាយ ។

អែលឌើរ ជែហ្វ្រី អ័រ ហូឡិន បានបង្រៀនថា ៖ « ការស្តាប់គឺសំខាន់ជាងការនិយាយទៅទៀត ។ មនុស្សទាំងនេះមិនមែនជាវត្ថុដែលគ្មានជីវិតដែលគ្រាន់តែចែកចាយដំណឹងល្អឲ្យតែបានទទួលប៉ុណ្យជ្រមុជទឹកប៉ុណ្ណោះទេ ។ … សូមសួរមិត្តភក្តិទាំងនេះអំពីអ្វីដែលមានសារៈសំខាន់បំផុតចំពោះ ពួកគេ ។ តើអ្វីដែល ពួកគេ ស្រឡាញ់ចូលចិត្ត និងអ្វីខ្លះដែល ពួកគេ ឲ្យតម្លៃ ? បន្ទាប់មក ចូរស្ដាប់ ។ ប្រសិនបើបរិយាកាសនេះត្រឹមត្រូវ អ្នកអាចសួរថាតើពួកគេភ័យខ្លាចអ្វី អ្វីដែលពួកគេចង់បាន ឬអ្វីដែលពួកគេមានអារម្មណ៍ថាបាត់បង់នៅក្នុងជីវិតរបស់ពួកគេ ។ ខ្ញុំសូមសន្យានឹងអ្នកថា អ្វី ដែលពួកគេនិយាយ ពួកគេនឹង តែងតែ បញ្ជាក់ពីសេចក្តីពិតនៃដំណឹងល្អ ដែលអ្នកអាចថ្លែងទីបន្ទាល់ និងអំពីអ្វីដែលអ្នកអាចផ្តល់ជូនបន្ថែមទៀត ។ … ប្រសិនបើយើងស្តាប់ដោយសេចក្តីស្រឡាញ់ នោះយើងពុំត្រូវការគិតអំពីអ្វីដែលត្រូវនិយាយឡើយ ។ អ្វីដែលត្រូវនិយាយនឹងប្រទានដល់យើង—ដោយព្រះវិញ្ញាណ និងដោយមិត្តភក្តិរបស់យើង » ( « Witnesses unto Me » Ensign ខែ ឧសភា ឆ្នាំ ២០០១ ទំព័រ ១៥ ) ។

សូមសង្កេតមើលសារដែលមិនបានបញ្ចេញជាពាក្យសម្តី

មនុស្សក៏ប្រាស្រ័យទាក់ទងតាមរយៈភាសាកាយវិការរបស់ពួកគេផងដែរ ។ សូមកត់សម្គាល់ពីរបៀបដែលពួកគេអង្គុយ ទឹកមុខរបស់ពួកគេ អ្វីដែលពួកគេធ្វើជាមួយដៃរបស់ពួកគេ សំឡេងរបស់ពួកគេ និងកន្លែងដែលពួកគេកំពុងសម្លឹងមើល ។ ការសង្កេតមើលសារលិខិតដែលមិនបានបញ្ចេញជាពាក្យសម្តីអាចជួយអ្នកឲ្យយល់ពីអារម្មណ៍របស់អ្នកទាំងឡាយដែលអ្នកបង្រៀន ។

ក៏ត្រូវដឹងពីភាសាកាយវិការរបស់អ្នកផងដែរ ។ ផ្ញើសារនៃចំណាប់អារម្មណ៍ និងភាពរីករាយដោយការស្តាប់ដោយស្មោះ ។

សូមទុកពេលឲ្យមនុស្សគិត និងឆ្លើយតប

ព្រះអង្គសង្គ្រោះតែងតែសួរសំណួរដែលទាមទារពេលវេលាសម្រាប់ឲ្យមនុស្សម្នាក់ឆ្លើយតប ។ នៅពេលអ្នកសួរសំណួរ សូមផ្អាកដើម្បីផ្តល់ឱកាសឲ្យមនុស្សគិត និងឆ្លើយតប ។ សូមកុំខ្លាចចំពោះការស្ងៀមស្ងាត់ ។ ជាញឹកញាប់ មនុស្សជាច្រើនត្រូវការពេលវេលាដើម្បីគិតអំពីរបៀបឆ្លើយសំណួរ ឬដើម្បីបង្ហាញពីអារម្មណ៍ដែលពួកគេមាន ។

អ្នកអាចផ្អាកបន្ទាប់ពីសួរសំណួរ បន្ទាប់ពីការចែកចាយបទពិសោធន៍ខាងវិញ្ញាណ ឬនៅពេលដែលអ្នករៀនពិបាកបញ្ចេញមតិរបស់ពួកគេ ។ សូមប្រាកដថា អ្នកផ្តល់ពេលវេលាដល់ពួកគេ ដើម្បីគិតឲ្យបានសព្វគ្រប់ មុនពេលអ្នកឆ្លើយតប ។ សូមកុំរំខានខណៈពេលពួកគេកំពុងនិយាយ ។

ឆ្លើយតបដោយការយល់ចិត្ត

នៅពេលមនុស្សម្នាក់ឆ្លើយសំណួរ សូមចាប់ផ្តើមការឆ្លើយតបរបស់អ្នកដោយបង្ហាញការយល់ចិត្តប្រសិនបើសមរម្យ ។ ការយល់ចិត្តបង្ហាញថាអ្នកព្រួយបារម្ភពិតប្រាកដ ។ សូមចៀសវាងពីការលោតទៅរកការសន្និដ្ឋាន ផ្តល់ដំណោះស្រាយភ្លាមៗ ឬហាក់ដូចជាមានចម្លើយទាំងអស់ ។

សូមបញ្ជាក់ថាអ្នកយល់ពីអ្វីដែលមនុស្សនិយាយ

នៅពេលស្វែងយល់ពីអ្វីដែលមនុស្សកំពុងនិយាយ សូមសួរតបវិញដើម្បីបញ្ជាក់ថាអ្នកយល់ ។ ឧទាហរណ៍ អ្នកអាចសួរថា « អ៊ីចឹង អ្វីដែលអ្នកកំពុងនិយាយគឺ ។ តើវាត្រឹមត្រូវទេ ? » ឬ « បើខ្ញុំយល់មិនខុសនោះគឺអ្នកមានអារម្មណ៍ថា » ។ នៅពេលដែលអ្នកមិនប្រាកដថាអ្នកយល់ទេ សូមសួរបុគ្គលនោះបញ្ជាក់ ។

ស្វែងយល់ពីបញ្ហាប្រឈមក្នុងការប្រាស្រ័យទាក់ទងគ្នា

អ្នកនឹងជួយមនុស្សបានច្រើនបំផុតតាមរយៈការបង្រៀនដំណឹងល្អនៃព្រះយេស៊ូវគ្រីស្ទដល់ពួកគេ ។ មនុស្សខ្លះប្រហែលជាចង់និយាយច្រើនជាងគេ ។ ពេលខ្លះមនុស្សគ្រាន់តែត្រូវការនរណាម្នាក់ដើម្បីស្តាប់ដោយចិត្តអាណិតអាសូរចំពោះបញ្ហា និងអារម្មណ៍របស់ពួកគេប៉ុណ្ណោះ ។ មនុស្សផ្សេងទៀតអាចព្យាយាមគ្រប់គ្រងគេ ឬជជែកតវ៉ា ។

សូមរៀនគ្រប់គ្រងស្ថានការណ៍បែបនេះដោយការប៉ិនប្រសព្វ និងដោយក្តីស្រឡាញ់ ។ អ្នកប្រហែលជាអាចសម្របការបង្រៀនរបស់អ្នក ភ្ជាប់ទៅនឹងពាក្យសម្តីដែលមនុស្សម្នាក់បានចែកចាយ ។ ឬអ្នកប្រហែលជាត្រូវនិយាយដោយគួរសមថា អ្នកចង់ពិភាក្សាអំពីកង្វល់របស់ពួកគេនៅពេលផ្សេងទៀត ។ ព្រះវិញ្ញាណអាចជួយអ្នកឲ្យដឹងពីរបៀបឆ្លើយតបក្នុងស្ថានភាពលំបាកនានា ។

ជួយអ្នករៀនឲ្យមានអារម្មណ៍ស្រណុកចិត្ត ក្នុងការចែកចាយអារម្មណ៍ពិត

ដើម្បីចៀសវាងការខ្មាសអៀន មនុស្សមួយចំនួននឹងឆ្លើយសំណួរតាមរបៀបដែលពួកគេគិតថា អ្នកចង់ឲ្យពួកគេឆ្លើយ ជាជាងចែកចាយអារម្មណ៍ពិតរបស់ពួកគេ ។ សូមស្វែងរកដើម្បីអភិវឌ្ឍទំនាក់ទំនងមួយដែលអនុញ្ញាតឲ្យពួកគេអាចស្រណុកចិត្ត ក្នុងការចែកចាយពីអារម្មណ៍ពិតរបស់ពួកគេជាមួយអ្នក ។

ការយល់ និងការភ្ជាប់ជាមួយអ្នករៀននឹងអនុញ្ញាតឲ្យអ្នកជួយពួកគេ បំពេញតាមចំណាប់អារម្មណ៍ និងតម្រូវការរបស់ពួកគេ ហើយបង្ហាញសេចក្ដីស្រឡាញ់របស់ព្រះអង្គសង្គ្រោះចំពោះពួកគេ ។ បង្កើតទំនាក់ទំនងនៃការទុកចិត្តដោយមានភាពស្មោះត្រង់ជាមួយពួកគេ រក្សាទំនាក់ទំនងអ្នកផ្សព្វផ្សាយសាសនាដែលសមរម្យ និងបង្ហាញការគោរព ។

ការសិក្សាផ្ទាល់ខ្លួន ឬជាដៃគូ

សូមពិចារណាថាតើអ្នកកំពុងស្តាប់អ្នកដទៃបានល្អប៉ុណ្ណា ។ សូមសរសេរចម្លើយនៅក្នុងសៀវភៅកំណត់ហេតុការសិក្សារបស់អ្នកចំពោះសំណួរខាងក្រោម ។ ឬពិភាក្សាអំពីពួកគេជាមួយដៃគូរបស់អ្នក ។

ក = មិនពិតចំពោះខ្ញុំ ខ = ពេលខ្លះពិតចំពោះខ្ញុំ គ = ជាធម្មតាពិតចំពោះខ្ញុំ ឃ = ពិតជានិច្ចចំពោះខ្ញុំ

នៅពេលអ្នកដទៃនិយាយជាមួយខ្ញុំ ខ្ញុំបានគិតពីបទពិសោធន៍ស្រដៀងគ្នាដែលខ្ញុំអាចចែកចាយ ជំនួសឲ្យការស្តាប់ដោយយកចិត្តទុកដាក់ ។
នៅពេលអ្នកដទៃប្រាប់ខ្ញុំអំពីអារម្មណ៍របស់ពួកគេ ខ្ញុំព្យាយាមដាក់ខ្លួនខ្ញុំនៅកន្លែងរបស់ពួកគេ ដើម្បីយល់ថាតើខ្ញុំនឹងមានអារម្មណ៍យ៉ាងណា ។
ពេលខ្ញុំបង្រៀនមនុស្ស ខ្ញុំគិតអំពីអ្វីដែលខ្ញុំនឹងនិយាយ ឬបង្រៀនបន្ទាប់ ។
ខ្ញុំស្មុគស្មាញ នៅពេលអ្នករៀននិយាយច្រើនពេក ។
ខ្ញុំស្មុគស្មាញដើម្បីធ្វើតាម ឬយល់ពីអ្វីដែលអ្នកដទៃកំពុងព្យាយាមប្រាប់ខ្ញុំ ។
ជាញឹកញាប់ខ្ញុំបាត់បង់ការផ្ដោតអារម្មណ៍ នៅពេលដែលដៃគូខ្ញុំកំពុងបង្រៀន ។
ខ្ញុំខឹងប្រសិនបើនរណាម្នាក់និយាយជាមួយខ្ញុំ ហើយអ្នកផ្សេងទៀតកាត់ ឬរំខានចំណាប់អារម្មណ៍របស់ខ្ញុំ ។
ខ្ញុំទទួលបានការបំផុសគំនិតខាងវិញ្ញាណឲ្យនិយាយ ឬធ្វើអ្វីមួយ ប៉ុន្តែខ្ញុំមិនខ្វល់ខ្វាយនឹងការបំផុសគំនិតនោះទេ ។

ជួយមនុស្សស្វែងរកចម្លើយចំពោះសំណួរ និងកង្វល់របស់ពួកគេ

សូមខិតខំឲ្យអស់ពីសមត្ថភាពដើម្បីឆ្លើយសំណួររបស់អ្នករៀន និងជួយដោះស្រាយកង្វល់របស់ពួកគេ ។ ទោះជាយ៉ាងណាក៏ដោយ វាមិនមែនជាការទទួលខុសត្រូវរបស់អ្នកក្នុងការឆ្លើយគ្រប់សំណួរនោះទេ ។ នៅទីបំផុត មនុស្សត្រូវតែដោះស្រាយសំណួរ និងកង្វល់របស់ពួកគេសម្រាប់ខ្លួនពួកគេ ។

ត្រូវដឹងថាមិនមែនគ្រប់សំណួរ និងកង្វល់ទាំងអស់អាចឆ្លើយបានទាំងស្រុងនោះទេ ។ ចម្លើយខ្លះកាន់តែច្បាស់តាមពេលវេលា ។ សំណួរផ្សេងទៀតមិនទាន់បានបើកបង្ហាញនៅឡើយទេ ។ សូមផ្ដោតលើការស្ថាបនាគ្រឹះដ៏រឹងមាំនៃសេចក្ដីពិតជាមូលដ្ឋាន និងចាំបាច់នៃដំណឹងល្អ ។ គ្រឹះនេះនឹងជួយអ្នក និងអស់អ្នកដែលអ្នកបង្រៀនឲ្យឆ្ពោះទៅមុខដោយភាពអត់ធ្មត់ និងជំនឿ នៅពេលដែលមានសំណួរដែលមិនមានចម្លើយ ឬពិបាក ។

គោលការណ៍មួយចំនួនសម្រាប់ការឆ្លើយសំណួរគឺបានព្រៀងនៅក្នុងផ្នែកនេះ ។

យល់ពីកង្វល់

អ្វីមួយចំនួនដែលអ្នកបង្រៀនដល់អ្នករៀនអាចហាក់ដូចជាពិបាក ឬពួកគេមិនសូវដឹង ។ ប្រសិនបើអ្នករៀនមានចម្ងល់ឬកង្វល់ សូមស្វែងយល់ពីចម្ងល់ និងកង្វល់ទាំងនោះឲ្យច្បាស់លាស់សិន ។ ពេលខ្លះ កង្វល់របស់មនុស្សមួយចំនួន ដូចជាផ្ទាំងទឹកកក ។ មានតែផ្នែកតូចមួយប៉ុណ្ណោះ ដែលស្ដែងឲ្យឃើញនៅផ្ទៃខាងលើ ។ កង្វល់ទាំងនេះអាចស្មុគស្មាញ ។ សូមអធិស្ឋានទូលសូមអំណោយទាននៃការយល់ដឹង ហើយធ្វើតាមព្រះវិញ្ញាណអំពីអ្វីដែលអ្នកឆ្លើយតប ។ ព្រះវរបិតាសួគ៌ជ្រាបដឹងពីដួងចិត្ត និងបទពិសោធន៍ទំាងឡាយរបស់មនុស្សទំាងអស់ ( ផ្ទាំងទឹកកកទាំងមូល ) ។ ទ្រង់នឹងជួយអ្នកដឹងនូវអ្វីដែលល្អបំផុតសម្រាប់មនុស្សម្នាក់ៗ ។

ជាញឹកញយ កង្វល់ទាក់ទងនឹងរឿងសង្គមច្រើនជាងទាក់ទងនឹងគោលលទ្ធិ ។ ឧទាហរណ៍ មនុស្សមួយចំនួនអាចខ្លាចការប្រឆាំងពីសមាជិកគ្រួសារ ប្រសិនបើពួកគេចូលរួមសាសនាចក្រ ។ ឬពួកគេអាចខ្លាចមិត្តភក្តិនៅកន្លែងធ្វើការមិនរាប់រកពួកគេ ។

សូមស្វែងយល់ពីប្រភពនៃកង្វល់នេះ ដោយការសួរសំណួរ និងស្តាប់ ។ តើកង្វល់ដែលកើតឡើងគឺដោយសារបុគ្គលនោះមិនមានការបញ្ជាក់ខាងវិញ្ញាណអំពីសេចក្ដីពិតនៃការស្ដារឡើងវិញឬ ? តើវាកើតឡើងដោយសារបុគ្គលនោះមិនចង់តាំងចិត្តដើម្បីរស់នៅតាមគោលការណ៍នៃដំណឹងល្អឬ ? ការដឹងពីឫសគល់នៃកង្វល់របស់ពួកគេនឹងជួយអ្នកឲ្យដឹងថាតើត្រូវផ្តោតលើទីបន្ទាល់ ឬក៏ការតាំងចិត្ត ។

សូមប្រើបទគម្ពីរ ជាពិសេសព្រះគម្ពីរមរមន ដើម្បីជួយឆ្លើយសំណួរ

សូមបង្ហាញអ្នករៀនអំពីរបៀបដែលសេចក្ដីពិតក្នុងព្រះគម្ពីរអាចជួយឆ្លើយសំណួររបស់ពួកគេ និងដោះស្រាយកង្វល់របស់ពួកគេ ។ ( សូមមើល « ព្រះគម្ពីរមរមនថ្លែងពីសំណួរខាងព្រលឹង » នៅក្នុងជំពូកទី ៥ ) ។ នៅពេលមនុស្សស្វែងរកការបំផុសគំនិតដោយការសិក្សា និងការអនុវត្តតាមព្រះគម្ពីរ នោះពួកគេនឹងបង្កើនសមត្ថភាពរបស់ពួកគេដើម្បីស្តាប់ និងធ្វើតាមព្រះអម្ចាស់ ។ សេចក្តីជំនឿរបស់ពួកគេលើទ្រង់នឹងកើនឡើង ។ នៅពេលសេចក្តីជំនឿកាន់តែកើនឡើងនោះទីបន្ទាល់ ការប្រែចិត្ត និងពិធីបរិសុទ្ធនៃពិធីបុណ្យជ្រមុជទឹកក៏មកដល់ដែរ ។

« ពេលខ្លះ ខ្ញុំបើកទៅព្រះគម្ពីរដើម្បីរៀនពីគោលលទ្ធិ ។ ពេលខ្លះខ្ញុំបើកទៅព្រះគម្ពីរដើម្បីទទួលបានការណែនាំ ។ ខ្ញុំទៅរកព្រះគម្ពីរដោយមានសំណួរ ហើយជាធម្មតាសំណួរនោះគឺ ‹ តើព្រះសព្វព្រះទ័យឲ្យខ្ញុំធ្វើអ្វី ? › ឬ ‹ តើទ្រង់សព្វព្រះទ័យឲ្យខ្ញុំមានអារម្មណ៍យ៉ាងណា ? › ខ្ញុំរកឃើញគំនិតថ្មីៗ គំនិតដែលខ្ញុំមិនធ្លាប់គិតពីមុនមក ហើយខ្ញុំទទួលបានការបំផុសគំនិត និងការណែនាំ និងចម្លើយចំពោះសំណួររបស់ខ្ញុំ » ( ហិនរី ប៊ី អាវរិង នៅក្នុង « A Discussion on Scripture Study » Ensign ខែ កក្កដា ឆ្នាំ ២០០៥ ទំព័រ ២២ ) ។

វាអាចមានប្រយោជន៍ក្នុងការពន្យល់ថា ការយល់ដឹងជាច្រើនរបស់យើងអំពីដំណឹងល្អនៃព្រះយេស៊ូវគ្រីស្ទ កើតចេញពីអ្វីដែលត្រូវបានបើកសម្ដែងដល់ព្យាការី យ៉ូសែប ស្ម៊ីធ និងអ្នកដែលបានស្នងតំណែងពីលោក ។ សំណួរអំពីភាពពិតនៃដំណឹងល្អអាចត្រូវបានដោះស្រាយដោយទទួលបានទីបន្ទាល់ថា យ៉ូសែប ស្ម៊ីធ គឺជាព្យាការីរបស់ព្រះ ។ ការអាន និងការអធិស្ឋានអំពីព្រះគម្ពីរមរមន គឺជាវិធីដ៏សំខាន់មួយដើម្បីទទួលបានទីបន្ទាល់នេះ ។

សូមជួយមនុស្សឲ្យផ្ដោតលើការពង្រឹងសេចក្តីជំនឿរបស់ពួកគេលើព្រះយេស៊ូវគ្រីស្ទ ។ ការអាន និងការអធិស្ឋានអំពីព្រះគម្ពីរមរមន គឺជាវិធីដ៏សំខាន់មួយដើម្បីពង្រឹងសេចក្តីជំនឿរបស់ពួកគេ ។

អញ្ជើញពួកគេឲ្យធ្វើសកម្មភាពដោយសេចក្ដីជំនឿ

នៅពេលមនុស្សអភិវឌ្ឍ និងពង្រឹងទីបន្ទាល់របស់ពួកគេអំពីដំណឹងល្អដែលបានស្ដារឡើងវិញ នោះពួកគេនឹងអាចដោះស្រាយសំណួរ និងកង្វល់របស់ពួកគេពីគ្រឹះនៃសេចក្ដីជំនឿ ។ នៅពេលពួកគេធ្វើសកម្មភាពដោយសេចក្ដីជំនឿលើសេចក្ដីពិតដែលពួកគេជឿ នោះពួកគេនឹងអាចទទួលបានទីបន្ទាល់អំពីសេចក្ដីពិតនៃដំណឹងល្អផ្សេងទៀត ។

របៀបមួយចំនួនដើម្បីធ្វើសកម្មភាពដោយសេចក្ដីជំនឿរួមមាន ៖

ការអធិស្ឋានជាញឹកញាប់ និងដោយស្មោះអស់ពីចិត្តដើម្បីទទួលការបំផុសគំនិត និងការណែនាំ ។
ការសិក្សាព្រះគម្ពីរ ជាពិសេសព្រះគម្ពីរមរមន ។
ការចូលរួមក្នុងព្រះវិហារ ។

ប្រើប្រភពដែលអាចទុកចិត្តបាន

សូមលើកទឹកចិត្តមនុស្សឲ្យប្រើប្រភពដែលអាចទុកចិត្តបាន ប្រសិនបើពួកគេមានសំណួរ ។ សូមពន្យល់ថាមិនមែនគ្រប់ប្រភពទាំងអស់សុទ្ធតែគួរឲ្យទុកចិត្តនោះទេ ជាពិសេសនៅលើអ៊ីនធឺណិត ។ ប្រភពជាច្រើនប្រើព័ត៌មានតាមរបៀបបំភាន់ ។ ប្រភពដ៏ល្អបំផុតសម្រាប់ការសិក្សាអំពីសាសនាចក្រ គឺជាធនធានដែលបានអនុម័តដោយសាសនាចក្រ ។

ការសិក្សាជាមួយដៃគូ

សូមជ្រើសរើសការអញ្ជើញមួយដើម្បីផ្ដល់ឲ្យ នៅពេលអ្នកបង្រៀនមេរៀនមួយ ។ បន្ទាប់មកស្វែងយល់ពីកង្វល់ផ្សេងៗដែលអាចបង្អាក់នរណាម្នាក់ពីការទទួលយក ឬរក្សាការតាំងចិត្តនោះ ។ សូមពិភាក្សា និងអនុវត្តពីរបៀបដែលអ្នកអាចជួយអ្នករៀនបានប្រសើរបំផុត នៅពេលពួកគេធ្វើការដើម្បីដោះស្រាយកង្វល់របស់ពួកគេ ។

ការសិក្សាផ្ទាល់ខ្លួន ឬជាដៃគូ

នៅក្នុងសៀវភៅកំណត់ហេតុការសិក្សារបស់អ្នក សូមសរសេរពីរបៀបដែលអ្នកចង់សំដៅទៅលើ យ៉ូសែប ស្ម៊ីធ និងព្រះគម្ពីរមរមន ដើម្បីឆ្លើយតបទៅនឹងកង្វល់ខាងក្រោម ៖

« ខ្ញុំមិនជឿថា ព្រះមានបន្ទូលទៅកាន់មនុស្សទៀតទេ » ។
« ខ្ញុំជឿថា ខ្ញុំអាចថ្វាយបង្គំព្រះតាមរបៀបរបស់ខ្ញុំ ជាជាងតាមរយៈសាសនាដែលបានរៀបចំឡើង » ។
« ហេតុអ្វីបានជាខ្ញុំត្រូវបោះបង់ការផឹកស្រាជាមួយនឹងអាហាររបស់ខ្ញុំ ប្រសិនបើខ្ញុំចូលរួមនៅព្រះវិហាររបស់អ្នក ?
« ហេតុអ្វីខ្ញុំត្រូវការសាសនា ? »

សូមទុកអ្វីដែលត្រូវសិក្សាមួយអន្លើ ហើយអធិស្ឋានអំពីរឿងនោះ

នៅចុងបញ្ចប់នៃការចុះបង្រៀនសួរសុខទុក្ខនីមួយៗ សូមផ្តល់អ្វីមួយដល់មនុស្សដើម្បីសិក្សា សញ្ជឹងគិត និងអធិស្ឋានអំពីការរៀបចំសម្រាប់ការជួបបន្ទាប់ ។ ការអាន ការអធិស្ឋាន និងការជញ្ជឹងគិតរវាងការបង្រៀនសួរសុខទុក្ខយាងអញ្ជើញឥទ្ធិពលនៃព្រះវិញ្ញាណបរិសុទ្ធមកក្នុងជីវិតរបស់ពួកគេ ។

អ្នកអាចអញ្ជើញអ្នករៀនឲ្យអានជំពូកជាក់លាក់នៅក្នុងព្រះគម្ពីរមរមន ។ ឬអ្នកអាចលើកទឹកចិត្តពួកគេឲ្យប្រើធនធានរបស់សាសនាចក្រ ដូចជា បណ្ណាល័យដំណឹងល្អ ដើម្បីស្វែងរកចម្លើយចំពោះសំណួរ សិក្សាអំពីប្រធានបទ ឬមើលវីដេអូ ។ ការណ៍នេះអាចក្លាយជាប្រធានបទបើកនៃការពិភាក្សានៅពេលអ្នកជួបលើកក្រោយ ។

សូមចៀសវាងការសូមឲ្យមនុស្សធ្វើច្រើនពេក ជាពិសេស ប្រសិនបើអ្នកប្រាស្រ័យទាក់ទងជាមួយពួកគេខ្លីៗញឹកញាប់ ។

ការសិក្សាផ្ទាល់ខ្លួន ឬជាដៃគូ

សូមពិចារណាលើមនុស្សម្នាក់ៗដែលអ្នកបានដាក់កាលវិភាគបង្រៀននៅសប្តាហ៍នេះ ។ តើជំពូកអ្វីខ្លះនៅក្នុងព្រះគម្ពីរមរមននឹងមានប្រយោជន៍បំផុតសម្រាប់ពួកគេ ? តើធនធានអ្វីផ្សេងទៀតនឹងផ្តល់អត្ថប្រយោជន៍ដល់ពួកគេ ? សូមកត់ត្រាអ្វីដែលអ្នកមានបំណងផ្តល់ឲ្យសម្រាប់មនុស្សម្នាក់ៗ ។ សូមកត់ត្រាផងដែរនូវអ្វីដែលអ្នកនឹងធ្វើដើម្បីតាមដានក្នុងអំឡុងពេលអ្នកជួបលើកក្រោយ ។

ការជួយមនុស្សដែលញៀន

អ្នកអាចជួយមនុស្សដែលកំពុងពុះពារដើម្បីយកឈ្នះលើការញៀនដោយការពិភាក្សាពេញដោយក្ដីស្រឡាញ់អំពីការពុះពាររបស់ពួកគេ គាំទ្រពួកគេ និងភ្ជាប់ពួកគេជាមួយនឹងធនធានទាំងឡាយ ។ អ្នកអាចលើកទឹកចិត្តពួកគេឲ្យចូលរួមក្រុមជំនួយដែលគាំទ្រដល់ការព្យាបាលឲ្យជាសះស្បើយពីការញៀនមួយរបស់សាសនាចក្រ ។ ក្រុមទាំងនេះអាចជួបដោយផ្ទាល់ ឬតាមអនឡាញ ។ ( សូមមើល AddictionRecovery.ChurchofJesusChrist.org ) ។ សូមលើកទឹកចិត្តពួកគេដើម្បីប្រើប្រាស់ធនធាននៅក្នុងផ្នែក « Addiction » នៃជំនួយជីវិតនៅក្នុងបណ្ណាល័យដំណឹងល្អ ។

ថ្នាក់ដឹកនាំ និងសមាជិកសាសនាចក្រប្រចាំតំបន់ ក៏អាចផ្ដល់ជំនួយគាំទ្រផងដែរ ។ មនុស្សមួយចំនួនដែលមានការញៀនអាចត្រូវការការព្យាបាលវេជ្ជសាស្រ្ត និងការព្យាបាលសុខភាពផ្លូវចិត្តប្រកបដោយវិជ្ជាជីវៈ ។

នេះគឺជាការផ្ដល់យោបល់មួយចំនួនសម្រាប់របៀបដែលអ្នកអាចជួយគាំទ្រមនុស្សដែលមានការពុះពារដើម្បីជម្នះលើការញៀន ៖

ពង្រឹងការខិតខំរបស់ពួកគេដើម្បីមករកព្រះគ្រីស្ទ ។ សូមជួយពួកគេឲ្យឃើញថា ការខិតខំរបស់ពួកគេដើម្បីសង្គ្រោះ និងព្យាបាលត្រូវបានទទួលស្គាល់ និងឲ្យតម្លៃដោយព្រះវរបិតាសួគ៌ និងព្រះយេស៊ូវគ្រីស្ទ ។ សូមបង្រៀនពួកគេថា ពួកគេអាចត្រូវបានពង្រឹងតាមរយៈព្រះអង្គសង្គ្រោះ និងដង្វាយធួនរបស់ទ្រង់ ។ ទ្រង់ទទួលស្គាល់យ៉ាងពេញទំហឹងនូវចេតនានៃដួងចិត្តរបស់ពួកគេក្នុងការធ្វើអំពើល្អ ។
សូមអធិស្ឋានសម្រាប់ពួកគេនៅក្នុងការអធិស្ឋានផ្ទាល់ខ្លួនរបស់អ្នក ហើយអធិស្ឋានជាមួយពួកគេ ។ តាមដែលសមរម្យ សូមលើកទឹកចិត្តពួកគេឲ្យស្វែងរកការប្រសិទ្ធពរបព្វជិតភាពពីថ្នាក់ដឹកនាំបព្វជិតភាពក្នុងតំបន់ ។
សូមបន្តបង្រៀនពួកគេនូវដំណឹងល្អនៃព្រះយេស៊ូវគ្រីស្ទ ។ សូមបង្រៀនពួកគេថា ព្រះវរបិតាសួគ៌ ព្រះអង្គសង្រ្គោះ និងព្រះវិញ្ញាណបរិសុទ្ធស្រឡាញ់ពួកគេ ហើយចង់ឲ្យពួកគេទទួលបានជោគជ័យ ។
សូមលើកទឹកចិត្តពួកគេឲ្យចូលរួមព្រះវិហារ និងបង្កើតទំនាក់ទំនងជាមួយសមាជិកជាប្រចាំ ។
ត្រូវមានភាពវិជ្ជមាន និងផ្ដល់ការគាំទ្រ ជាពិសេសប្រសិនបើពួកគេត្រឡប់ទៅប្រព្រឹត្តម្តងទៀត ។

ព្រះយេស៊ូវគ្រីស្ទឈោងព្រះហស្ដទៅកាន់ស្រ្តីម្នាក់

ការញៀនគឺពិបាកយកឈ្នះ ហើយការត្រឡប់ទៅប្រព្រឹត្តម្តងទៀតអាចកើតឡើងបាន ។ ថ្នាក់ដឹកនាំ និងសមាជិកសាសនាចក្រមិនគួរភ្ញាក់ផ្អើលពី ការណ៍នេះទេ ។ ពួកគេគួរតែបង្ហាញសេចក្ដីស្រឡាញ់ មិនមែនការវិនិច្ឆ័យនោះទេ ។

សមាជិកថ្មីដែលឈប់ទៅព្រះវិហារប្រហែលជាអាចត្រឡប់ទៅរកការញៀនដូចពីមុន ហើយប្រហែលជាមានអារម្មណ៍មិនមានភាពស័ក្តិសម និងបាក់ទឹកចិត្ត ។ ការទៅសួរសុខទុក្ខភ្លាមៗ ផ្តល់ការលើកទឹកចិត្ត និងការគាំទ្រអាចជួយបាន ។ សមាជិកគួរបង្ហាញទាំងពាក្យសម្ដី និងទង្វើថា សាសនាចក្រជាកន្លែងដែលអាចរកឃើញសេចក្ដីស្រឡាញ់របស់ព្រះគ្រីស្ទ ( សូមមើល នីហ្វៃទី៣ ១៨:៣២ ) ។

ការសិក្សាផ្ទាល់ខ្លួន ឬជាដៃគូ

សូមគិតអំពីនរណាម្នាក់ដែលអ្នកកំពុងបង្រៀន ឬសមាជិកថ្មី ឬសមាជិកដែលត្រឡប់មកវិញ ដែលកំពុងព្យាយាមយកឈ្នះការញៀន ។ សូមពិនិត្យមើល « សេចក្ដីជំនឿលើព្រះយេស៊ូវគ្រីស្ទ » និង « ការប្រែចិត្ត » មកពីមេរៀន « ដំណឹងល្អនៃព្រះយេស៊ូវគ្រីស្ទ » នៅក្នុងជំពូកទី ៣ ។

តើអ្នកអាចបង្រៀនបុគ្គលរូបនេះអ្វីខ្លះពីមេរៀននោះ និងពីជំពូកនេះ ដែលអាចជួយគាត់ ឬនាងបាន ?
សូមបង្កើតផែនការមេរៀនមួយដើម្បីជួយបុគ្គលនេះ ។

ការបង្រៀនមនុស្សដែលមិនមានប្រវត្តិជាពួកគ្រីស្ទាន

មនុស្សមួយចំនួនដែលអ្នកបង្រៀន ប្រហែលជាមិនមានប្រវត្តិជាគ្រីស្ទាន ឬប្រហែលជាមិនជឿលើព្រះវរបិតាសួគ៌ និងព្រះយេស៊ូវគ្រីស្ទទេ ។ ទោះជាយ៉ាងណាក៏ដោយ មនុស្សទាំងនេះជាច្រើនមានជំនឿ ការអនុវត្ត និងទីកន្លែងដែលពួកគេគោរពបូជា ។ វាជាការចាំបាច់ដែលអ្នកបង្ហាញការគោរពចំពោះជំនឿសាសនា និងប្រពៃណីរបស់ពួកគេ ។

ជួយពួកគេឲ្យយល់ថាព្រះជានរណា

អ្នកប្រហែលជាឆ្ងល់ថាតើអ្នកគួរកែសម្រួលការបង្រៀនរបស់អ្នកដោយរបៀបណាសម្រាប់មនុស្សដែលមិនមានប្រវត្តិជាគ្រីស្ទាន ។ គោលការណ៍ដែលជួយមនុស្សឲ្យមានជំនឿគឺដូចគ្នានៅគ្រប់វប្បធម៌ទាំងអស់ ។ សូមជួយមនុស្សឲ្យទទួលបានការយល់ដឹងត្រឹមត្រូវអំពីព្រះ និងបេសកកម្មដ៏ទេវភាពរបស់ព្រះយេស៊ូវគ្រីស្ទ ។ មធ្យោបាយដ៏ល្អបំផុតសម្រាប់ពួកគេដើម្បីរៀនពីសេចក្ដីពិតទាំងនេះគឺតាមរយៈបទពិសោធន៍ខាងវិញ្ញាណផ្ទាល់ខ្លួន ។ របៀបមួយចំនួនដែលអ្នកអាចជួយពួកគេឲ្យមានបទពិសោធន៍ទាំងនេះគឺត្រូវបានរៀបរាប់ដូចខាងក្រោម ៖

សូមបង្រៀនថា ព្រះជាព្រះវរបិតាសួគ៌របស់យើង ហើយទ្រង់ស្រឡាញ់យើង ។ យើងគឺជាបុត្រាបុត្រីរបស់ទ្រង់ ។ សូមអញ្ជើញពួកគេឲ្យស្វែងរកសាក្សីនោះសម្រាប់ខ្លួនពួកគេ ។
សូមបង្រៀនអំពីផែនការនៃសេចក្តីសង្រ្គោះ ។
សូមបង្រៀនថា ព្រះជាព្រះវរបិតា ហើយព្រះយេស៊ូវគ្រីស្ទបានយាងមកជួបយ៉ូសែប ស្ម៊ីធ ។
សូមថ្លែងទីបន្ទាល់ដោយស្មោះសរអំពីដំណឹងល្អ រួមទាំងរបៀបដែលអ្នកទទួលអារម្មណ៍នៃសេចក្ដីស្រឡាញ់របស់ព្រះវរបិតាសួគ៌ និងមូលហេតុដែលអ្នកជ្រើសរើសធ្វើតាមព្រះយេស៊ូវគ្រីស្ទ ។
សូមអញ្ជើញពួកគេឲ្យផ្ដល់ការអធិស្ឋានដោយសាមញ្ញ ចេញពីចិត្ត—ជាមួយអ្នក និងដោយខ្លួនរបស់ពួកគេផ្ទាល់ ។
សូមអញ្ជើញពួកគេឲ្យអានព្រះគម្ពីរមរមនប្រចាំថ្ងៃ—ជាមួយអ្នក និងដោយខ្លួនពួកគេផ្ទាល់ ។
សូមអញ្ជើញពួកគេឲ្យចូលរួមក្នុងព្រះវិហារ ។
សូមណែនាំពួកគេឲ្យស្គាល់សមាជិកសាសនាចក្រ ដែលអាចពន្យល់ពីរបៀបដែលពួកគេបានមកជឿលើព្រះវរបិតាសួគ៌ និងព្រះយេស៊ូវគ្រីស្ទ ។
សូមអញ្ជើញពួកគេឲ្យគោរពតាមបទបញ្ញត្តិទាំងឡាយ ។

មនុស្សភាគច្រើនចង់មានទំនាក់ទំនងកាន់តែខ្លាំងជាមួយព្រះ ហើយស្វែងរកគោលបំណង និងអត្ថន័យក្នុងជីវិត ។ សូមជួយពួកគេមើលឃើញពីរបៀបដែលពួកគេជាបុត្រាបុត្រីរបស់ព្រះវរបិតាសួគ៌ដែលពេញដោយក្តីស្រឡាញ់ និងរបៀបដែលទ្រង់មានផែនការសម្រាប់ពួកគេ ។ ឧទាហរណ៍ អ្នកអាចចាប់ផ្តើមដោយការនិយាយអ្វីមួយដូចតទៅនេះ ៖

ព្រះជាព្រះវរបិតា ទ្រង់មានព្រះជន្មរស់ ហើយស្រឡាញ់យើង ។ យើងគឺជាបុត្រាបុត្រីរបស់ទ្រង់ ។ យើងបានរស់នៅជាមួយព្រះ មុនពេលយើងកើតមក ។ ដោយសារយើងទាំងអស់គ្នាជាបុត្រាបុត្រីរបស់ទ្រង់ យើងទាំងអស់គ្នាគឺជាបងប្អូននឹងគ្នា ។ ទ្រង់ចង់ឲ្យយើងត្រឡប់ទៅកាន់ទ្រង់វិញ ។ ដោយសារសេចក្តីស្រឡាញ់របស់ទ្រង់ចំពោះយើង ទ្រង់បានប្រទានផ្លូវសម្រាប់យើងដើម្បីត្រឡប់ទៅកាន់ទ្រង់វិញតាមរយៈព្រះរាជបុត្រាទ្រង់ គឺព្រះយេស៊ូវគ្រីស្ទ ។

សូមបត់បែនការបង្រៀនរបស់អ្នកតាមតម្រូវការ

ពួកអ្នកប្រែចិត្តជឿជាច្រើននាក់មានប្រវត្តិចេញពីអ្នកដែលមិនមែនជាគ្រីស្ទាននិយាយថា ពួកគេមិនបានយល់ច្រើនអំពីអ្វីដែលពួកអ្នកផ្សព្វផ្សាយសាសនាបង្រៀនទេ ។ ទោះជាយ៉ាងណា ពួកគេទទួលអារម្មណ៍ពីព្រះវិញ្ញាណ ហើយចង់ធ្វើអ្វីដែលអ្នកផ្សព្វផ្សាយសាសនាបានស្នើសុំ ។ សូមធ្វើអស់ពីសមត្ថភាពរបស់អ្នកដើម្បីជួយមនុស្សឲ្យយល់ពីគោលលទ្ធិនៃដំណឹងល្អ ។ សូមអត់ធ្មត់ និងផ្ដល់ការគាំទ្រ ។ វាអាចត្រូវការពេលវេលាសម្រាប់មនុស្សដើម្បីរៀនស្វែងយល់ និងបង្ហាញពីអារម្មណ៍របស់ពួកគេ ។ អ្នកប្រហែលជាត្រូវកែតម្រូវល្បឿន និងជម្រៅនៃការបង្រៀនរបស់អ្នក ដើម្បីជួយពួកគេ ។

ការណែនាំខាងក្រោមអាចជួយនៅពេលអ្នករៀបចំបង្រៀនមនុស្សដែលមិនមានប្រវត្តិជាគ្រីស្ទាន ៖

ស្វែងយល់ពីតម្រូវការ ឬចំណាប់អារម្មណ៍ខាងវិញ្ញាណដែលជំរុញឲ្យពួកគេជួបជាមួយអ្នក ។
ផ្តល់នូវទិដ្ឋភាពទូទៅ និងការពិនិត្យឡើងវិញដ៏សាមញ្ញសម្រាប់មេរៀននីមួយៗ ។
សូមឲ្យពួកគេប្រាប់អ្នកអំពីអ្វីដែលពួកគេយល់ និងអ្វីដែលពួកគេបានដកពិសោធន៍ ។
ឲ្យនិយមន័យពាក្យ និងគោលការណ៍សំខាន់ៗ ។ មនុស្សប្រហែលជាមិនស្គាល់ពាក្យជាច្រើនដែលអ្នកប្រើនៅពេលអ្នកបង្រៀនទេ ។
សូមត្រឡប់ទៅមេរៀនដែលបានបង្រៀនពីមុនវិញ ដើម្បីបង្រៀនគោលលទ្ធិកាន់តែច្បាស់ ។ ការណ៍នេះអាចចាំបាច់នៅពេលណាមួយនៅអំឡុងពេលដំណើរការបង្រៀន ។
កំណត់ការអញ្ជើញដែលអ្នកអាចធ្វើ ដើម្បីជួយមនុស្សឲ្យទទួលបាននូវពរជ័យនៃដំណឹងល្អ ។

បញ្ជីរាយនាមខាងក្រោមគឺជាធនធានមួយចំនួននៅក្នុងបណ្ណាល័យដំណឹងល្អ ដែលអ្នកអាចប្រើដើម្បីជួយអ្នកដែលមិនមានប្រវត្តិជាគ្រីស្ទាន ៖

« តើព្រះជានរណា ? »
« តើព្រះយេស៊ូវគ្រីស្ទជានរណា ? »
« ព្រះយេស៊ូវគ្រីស្ទ ជាព្រះរាជបុត្រានៃព្រះ »
« អ្វីដែលត្រូវរំពឹងចង់បាននៅពេលទៅជួបជាមួយនឹងពួកអ្នកផ្សព្វផ្សាយសាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ »
« ពួកអ៊ីស្លាម និងពួកបរិសុទ្ធថ្ងៃចុងក្រោយ ៖ ជំនឿ គុណតម្លៃ និងរបៀបរស់នៅ »

ការសិក្សាផ្ទាល់ខ្លួន ឬជាដៃគូ

បើអាចធ្វើទៅបាន សូមស្វែងរកអ្នកប្រែចិត្តជឿ ដែលមិនមានប្រវត្តិជាគ្រីស្ទាន មុននឹងជួបជាមួយពួកអ្នកផ្សព្វផ្សាយសាសនា ។ រៀបចំជួប និងសួរអំពីបទពិសោធន៍នៃការប្រែចិត្តជឿរបស់គាត់ ឬនាង ។ ឧទាហរណ៍ អ្នកអាចសួរបុគ្គលនោះអំពី ៖

អ្វីដែលបានដឹកនាំគាត់ ឬនាងឲ្យជឿលើព្រះវរបិតាសួគ៌ និងព្រះយេស៊ូវគ្រីស្ទ ។
តើបទពិសោធន៍នៃការអធិស្ឋានជាលើកដំបូងមានលក្ខណៈបែបណា ។
តើវាមានលក្ខណៈយ៉ាងណាជាលើកដំបូងសម្រាប់គាត់ ឬនាងពេលមានអារម្មណ៍ថាបានទទួលចម្លើយចំពោះការអធិស្ឋាន ។
តួនាទីនៃព្រះគម្ពីរក្នុងការប្រែចិត្តជឿរបស់គាត់ ឬនាង ។
តើការចូលព្រះវិហារមានលក្ខណៈបែបណា ។

សូមកត់ត្រាអ្វីដែលអ្នករៀននៅក្នុងសៀវភៅកំណត់ហេតុការសិក្សារបស់អ្នក ។

សូមពិចារណាអញ្ជើញបុគ្គលនោះឲ្យជួយអ្នកបង្រៀននរណាម្នាក់ដែលមិនមានប្រវត្តិជាគ្រីស្ទាន ។

ចងចាំការណ៍នេះ

មនុស្សទាំងអស់នឹងទទួលបានអត្ថប្រយោជន៍ នៅពេលពួកគេទទួលយក ហើយរស់នៅតាមដំណឹងល្អដែលបានស្ដារឡើងវិញ ។
ដាក់ផែនការ និងសិក្សាជារៀងរាល់ថ្ងៃជាមួយដៃគូរបស់អ្នក ដើម្បីរួបរួមគ្នា និងបង្រៀនដោយសំឡេងតែមួយ ។
ចែកចាយទីបន្ទាល់របស់អ្នកឲ្យបានញឹកញាប់ ។
ព្រះគម្ពីរ ជាពិសេសព្រះគម្ពីរមរមន គឺជាប្រភពមូលដ្ឋានគ្រឹះសម្រាប់ការបង្រៀនរបស់អ្នក ។
សូមអធិស្ឋានទូលសុំជំនួយពីអ្វីដែលអ្នកបានរៀននៅក្នុងជំពូកនេះ ។

គំនិតសម្រាប់ការសិក្សា និងការអនុវត្ត

ការសិក្សាផ្ទាល់ខ្លួន

សូមសន្មតថាអ្នកត្រូវបានដាក់នៅក្នុងស្ថានភាពដូចតទៅនេះ ។ តើអ្នកអាចប្រើគោលការណ៍ និងជំនាញក្នុងជំពូកនេះដោយរបៀបណាដើម្បីជួយមនុស្សទាំងនេះឲ្យរីកចម្រើន ? សូមដាក់ផែនការពីរបៀបដែលអ្នកនឹងអនុវត្តវានៅក្នុងស្ថានភាពនីមួយៗ ។
- នរណាម្នាក់ដែលបានរៀបចំខ្លួនសម្រាប់ពិធីបុណ្យជ្រមុជទឹកប្រាប់អ្នកថា គាត់ ឬនាងលែងចង់ជួបជាមួយអ្នកទៀតហើយ ។
- អ្នកកំពុងជួបជាលើកទីប្រាំពីរជាមួយនឹងបុគ្គលម្នាក់ដែលពួកអ្នកផ្សព្វផ្សាយសាសនាជាច្រើននាក់បានបង្រៀនជាច្រើនដងក្នុងរយៈពេលពីរឆ្នាំ ។ សញ្ញានៃការរីកចម្រើនគឺមានតិចតួចណាស់ ។
សូមជ្រើសរើសមេរៀនមួយរបស់អ្នកផ្សព្វផ្សាយសាសនា ។ កំណត់យកវគ្គបទគម្ពីរមួយ ឬពីរពីគោលការណ៍សំខាន់នីមួយៗ ។ អនុវត្តការបង្រៀនពីវគ្គបទគម្ពីរទាំងនោះ ដូចបានរៀបរាប់នៅក្នុងព្រះគម្ពីរផ្នែក « សូមប្រើបទគម្ពីរ » នៃជំពូកនេះ ។

ការសិក្សាជាមួយដៃគូ និងការផ្លាស់ប្តូរដៃគូ

សូមអានដំណើររឿងរបស់អាំម៉ូន និងស្ដេចឡាម៉ូណៃនៅក្នុង អាលម៉ា ១៨–១៩ និងដំណើររឿងរបស់អើរ៉ុននៅក្នុង អាលម៉ា ២២:៤–១៨ ។ នៅពេលអ្នកអាន សូមស្វែងយល់ និងពិពណ៌នាអំពីរបៀបដែល អាំម៉ូន និងអើរ៉ុន ៖
- ធ្វើតាមព្រះវិញ្ញាណ ហើយបង្រៀនដោយសេចក្ដីស្រឡាញ់ ។
- ចាប់ផ្ដើមបង្រៀន ។
- បត់បែនការបង្រៀនរបស់ពួកគេស្របតាមតម្រូវការ ។
- ថ្លែងទីបន្ទាល់ ។
- ប្រើគម្ពីរ ។
- សួរសំណួរ ស្តាប់ និងជួយអ្នកដែលពួកគាត់បានបង្រៀនឲ្យដោះស្រាយកង្វល់របស់ពួកគេ ។
- លើកទឹកចិត្តអ្នកដែលពួកគាត់បានបង្រៀនឲ្យធ្វើការប្តេជ្ញាចិត្ត ។
ពិភាក្សាអំពីរបៀបដែលការបម្រើ និងការបង្រៀនរបស់ពួកគេជះឥទ្ធិពលដល់ស្តេចឡាម៉ូណៃ បិតារបស់ទ្រង់ និងអ័ប៊ីស ។

ក្រុមប្រឹក្សាមណ្ឌល សន្និសីទហ្សូន និងក្រុមប្រឹក្សាថ្នាក់ដឹកនាំបេសកកម្ម

សូមអញ្ជើញសមាជិក ឬអ្នកដែលកំពុងរៀនបច្ចុប្បន្នឲ្យចូលរួមការប្រជុំរបស់អ្នក ។ សូមពន្យល់ដល់ក្រុមថាអ្នកចង់ឲ្យពួកអ្នកផ្សព្វផ្សាយសាសនាកែលម្អសមត្ថភាពរបស់ពួកគេក្នុងការចែកចាយសារលិខិតសំខាន់របស់ពួកគេ ។ សូមជ្រើសរើសមេរៀន និងជំនាញ ។ សូមឲ្យពួកអ្នកផ្សព្វផ្សាយសាសនាបង្រៀនមនុស្សម្នាក់ ឬច្រើននាក់អំពីមេរៀនដែលអ្នកបានជ្រើសរើសរយៈពេល ២០ នាទី ដោយផ្តោតលើជំនាញដែលអ្នកបានកំណត់ ។ សូមឲ្យពួកគេផ្លាស់ប្តូរមនុស្សដែលពួកគេបង្រៀនបន្ទាប់ពី ២០ នាទី ។ បន្ទាប់ពីពួកអ្នកផ្សព្វផ្សាយសាសនាបានបង្រៀនហើយ សូមនាំក្រុមមកជួបគ្នា ។ សូមឲ្យមនុស្សម្នាក់ ឬច្រើននាក់ប្រាប់ពួកអ្នកផ្សព្វផ្សាយសាសនាអំពីអ្វីដែលមានប្រសិទ្ធភាពបំផុត និងរបៀបមួយដែលពួកគេអាចកែលម្អ ។
សូមបង្ហាញវីដេអូឧទាហរណ៍អំពីពួកអ្នកផ្សព្វផ្សាយសាសនាបង្រៀន ឬកំពុងទំនាក់ទំនងមនុស្ស ។ សូមជ្រើសរើសជំនាញមួយ ហើយពិភាក្សាអំពីរបៀបដែលពួកអ្នកផ្សព្វផ្សាយសាសនាអនុវត្តគោលការណ៍ទាំងឡាយសម្រាប់ជំនាញនោះ ។
សូមជ្រើសរើសជំនាញមួយ ហើយស្វែងយល់គោលលទ្ធិ ឬវគ្គបទគម្ពីរដែលគាំទ្រដល់ជំនាញនោះ ។ បង្រៀនមូលដ្ឋានគ្រឹះនៃគោលលទ្ធិនេះដល់ពួកអ្នកផ្សព្វផ្សាយសាសនា ។

ថ្នាក់ដឹកនាំបេសកកម្ម និងទីប្រឹក្សាបេសកកម្ម

ម្តងម្កាល សូមទៅជាមួយពួកអ្នកផ្សព្វផ្សាយសាសនា ពេលពួកគេបង្រៀន ។ សូមដាក់ផែនការអំពីរបៀបដែលអ្នកអាចចូលរួមនៅក្នុងការបង្រៀន ។
សូមលើកទឹកចិត្តថ្នាក់ដឹកនាំក្នុងតំបន់ឲ្យចូលរួមជាមួយនឹងពួកអ្នកផ្សព្វផ្សាយសាសនានៅក្នុងការបង្រៀនការសួរសុខទុក្ខ ។
សូមបង្ហាញ និងជួយពួកអ្នកផ្សព្វផ្សាយសាសនាអនុវត្តជំនាញបង្រៀនមួយដែលបានពិពណ៌នានៅក្នុងជំពូកនេះ ដូចជាការសួរសំណួរល្អៗ និងការស្តាប់ជាដើម ។
បង្ហាញពីការប្រើប្រាស់បទគម្ពីរប្រកបដោយប្រសិទ្ធភាព នៅពេលបង្រៀនពួកអ្នកផ្សព្វផ្សាយសាសនានៅក្នុងសន្និសីទហ្សូន ក្រុមប្រឹក្សាថ្នាក់ដឹកនាំបេសកកម្ម និងការសម្ភាសន៍ ។ សូមធ្វើដូចគ្នានៅពេលអ្នកបង្រៀនជាមួយពួកគេ ។
សូមជួយពួកអ្នកផ្សព្វផ្សាយសាសនាឲ្យយល់ពីបទគម្ពីរ ហើយបង្កើតសេចក្តីស្រឡាញ់ចំពោះពួកគេ ។ អែលឌើរ ជែហ្វ្រី អ័រ ហូឡិន បានប្រឹក្សាថ្នាក់ដឹកនាំបេសកកម្មថា ៖

« ចូរស្រឡាញ់ព្រះបន្ទូលនៃព្រះដែលពិតជាសំខាន់ណាស់ចំពោះវប្បធម៌នៃបេសកកម្មរបស់អ្នក ។… ចូរធ្វើខ្លួនឲ្យងាយសម្គាល់ពីវិវរណៈ និងការប្រើប្រាស់ព្រះគម្ពីរបរមាណីជាប្រចាំ ដែលជាលក្ខណៈសំខាន់មួយនៃពួកអ្នកផ្សព្វផ្សាយសាសនារបស់អ្នកអស់មួយជីវិតរបស់ពួកគេ ។

« នៅពេលអ្នកបង្រៀនពួកអ្នកផ្សព្វផ្សាយសាសនារបស់អ្នក—ហើយគ្រប់ពេលទាំងអស់—សូមបង្រៀនពួកគេចេញពីព្រះគម្ពីរ ។ សូមឲ្យពួកគេដឹងពីរបៀបដែលអ្នកទទួលបានកម្លាំង និងការបំផុសគំនិត ។ សូមបង្រៀនពួកគេឲ្យស្រឡាញ់ និងពឹងផ្អែកលើវិវរណៈដែលបានទទួលកាន់តែច្រើនទាំងនោះ ។

« ប្រធានបេសកកម្ម [ របស់ខ្ញុំ ] បានបង្រៀនចេញពីព្រះគម្ពីរមរមន និង ព្រះគម្ពីរ [ ផ្សេងទៀត ] ជារៀងរាល់ ពេលយើងនៅជាមួយគាត់ ឬបង្រៀនអ្វីផ្សេងទៀតដែលស្រដៀងនោះ ។ ការសម្ភាសន៍ផ្ទាល់ខ្លួនត្រូវបានបង្កប់ដោយបទគម្ពីរ ។ គម្រោងសម្រាប់…ការប្រជុំត្រូវបានធ្វើតាមព្រះគម្ពីរបរមាណី ។…

« យើងមិនបានដឹងទេនៅពេលនោះ ប៉ុន្តែប្រធានរបស់យើងកំពុងលើកដៃយើងនៅខាងស្តាំ និងខាងឆ្វេង ដោយដាស់តឿនយើងអស់ពីថាមពលនៃព្រលឹងរបស់គាត់ និងអស់ពីកម្រិតនៃចំណេះដឹងទាំងអស់ដែលគាត់មានដើម្បីកាន់ដំបងដែកដើម្បីឲ្យយើងនឹងមិនវិនាសឡើយ [ សូមមើល នីហ្វៃទី១ ១៥:២៣–២៥ ] » ( « The Power of the Scriptures » សិក្ខាសាលាសម្រាប់ថ្នាក់ដឹកនាំបេសកកម្មនាថ្ងៃទី ២៥ ខែ មិថុនា ឆ្នាំ ២០២២ ) ។