Te u lava fēfē ʻo tokoniʻi e kāingalotu ʻoku tala ʻoku nau fakafāfine/fakatangatá pe foua ʻa e femanakoʻaki ʻa e fefine mo e fefine pe tangata mo e tangatá ke nau ongoʻi ʻoku ʻofaʻi, talitali lelei, pea ueʻi fakalaumālie kinautolu ʻi he lotú?

Fakaʻatā ke Tupulaki mo Fatongia ʻAki

“ʻOku matuʻaki mahuʻinga ke mahino kiate kitautolu, ko e tokotaha kotoa pē ʻoku ʻi ha tuʻunga kehekehe ʻi he moʻuí pea ke tau fakatupulaki ha tokaʻi ki he kakai ʻoku tau feohi mo iá.

“ʻOku ou ʻiloʻi ʻoku ʻi ai e kakai ʻoku nau omi ki he lotú he Sāpate kotoa ke fakalotoa mo langaki fakalaumālie kinautolu pea ʻoku nau foki pē mo e ongoʻi kuo fakamaaua, ʻikai fie maʻu pea taʻeʻofaʻi kinautolu, ʻo hangē ʻoku ʻikai ha potu moʻonautolu ʻi he lotú. ʻOku fie maʻu ke tau liliu e foungá ni. ʻOku fie maʻu ke tau ʻiloʻi moʻoni ʻa e taumuʻa ʻo e omi ki he lotú he Sāpaté pea fakapapauʻi ʻoku ongoʻi ʻe he tokotaha kotoa pē ʻoku haʻu ki he lotú ʻoku ʻofaʻi, fie maʻu, tali lelei, pea langaki [fakalaumālie] kinautolu. ʻOku foua ʻe he tokotaha kotoa pē ha faingataʻa ʻoku ʻikai haʻatau lavelaveʻilo ki ai. Pea ʻoku matuʻaki mahuʻinga ke tau ʻiloʻi ʻoku ʻofaʻi ʻe he ʻOtuá ʻa e tokotaha kotoa pē pea ʻoku fie maʻu ke tau mamata kiate kinautolu ʻaki e mata faka-Kalaisí. Pea ʻoua naʻa tau tuku ke hanga ʻe he loto-fakamāú ʻo puleʻi ʻa e founga ʻoku tau feohi ai mo e kakaí. ʻOku ʻikai pē ko ha meʻa ia ʻoku totonu. ʻOku ou tui ʻoku ʻi ai ha taumuʻa ʻoku tuku ai kitautolu ʻe he ʻEikí ʻi he ngaahi feituʻu ʻoku tau ʻi aí pea fakafehokotaki kitautolu mo e kakai ʻoku tau feohí.

“He koeʻuhí ʻoku ʻikai ko ʻetau fakalakalaká pē ka ʻoku kau foki ai mo hono tokoniʻi e niʻihi kehé ke nau fakalakalaká. Pea kuó u fakatokangaʻi ʻoku tuku kitautolu ki he feituʻu ʻoku tau ʻi aí koeʻuhí ke tau lava ʻo ʻofa mo hiki hake ʻa e niʻihi kehé.

“He ʻikai lava ke tau hoko ko ha ākonga ʻo Kalaisi, pe te tau ui kitautolu ko ha taha pehē, ʻo kapau ʻoku ʻikai ke tau tokoniʻi e niʻihi kehé ʻi he hala ko iá. ʻOku ʻikai ke tukuhifo ʻe he ongoongolelei ʻo Sīsū Kalaisí ʻa e kakaí. Ko e kakaí pē ʻoku nau tukuhifo ʻa e kakaí. Pea ʻoku totonu ke tau fakaleleiʻi ia. ʻOku fie maʻu ke tau ongoʻingofua pea ʻofa ʻiate kinautolu pea tuku ha faingamālie ke nau tupulaki pea aʻusia honau tuʻunga lelei tahá. ʻOku ʻi ai honau talēniti mo e ivi malava mo e ʻulungaanga ʻoku fie maʻu ʻi he puleʻanga ʻo e ʻOtuá. Pea kapau te tau langa hake ʻa e puleʻanga ʻo e ʻOtuá ʻi māmani, ʻe fie maʻu ʻa e tokotaha kotoa pē ke kau mai, ke nau omi ʻo fai honau fatongiá. Pea ʻoku fie maʻu ke tau ʻiloʻi ia. Ko e taimi ʻoku hū ai ha taha ʻi he matapā ʻo e falelotú, ʻoku totonu ke nau ongoʻi he taimi pē ko iá ʻoku talitali lelei, ʻofaʻi, hiki hake pea ueʻi fakalaumālie kinautolu ʻi he taimi ʻoku nau hū ai ki tuʻa he matapaá ke nau toe lelei ange. Koeʻuhí ʻoku nau ʻiloʻi ʻoku ʻofa ʻa e ʻEikí ʻiate kinautolu. Pea koeʻuhí ʻoku ʻi ai hanau ngaahi kaungāmeʻa ʻoku nau tui tatau” (Carol F. McConkie, “Lifting Others,” ChurchofJesusChrist.org).