ʻE anga fēfē haʻaku fakakau pe tokoniʻi ʻa kinautolu ʻoku nau aʻusia ʻa e femanakoʻaki ʻa e fefine mo e fefine pe tangata mo e tangata ʻi hoku uōtí pe siteikí?

Taki ʻi he Faʻifaʻitakiʻanga

“ʻI heʻetau hoko ko ha siasí, ʻoku ʻikai totonu ke ʻi ai ha taha ʻe toe ʻofa mo manavaʻofa lahi ange. … Tuku muʻa ke tau takimuʻa ʻi he anga hono fakahaaʻi ʻetau ʻofá, manavaʻofá mo e tokoní. … ʻOua naʻa tau ʻai ke ʻikai fakakau pe taʻe fakaʻapaʻapaʻi ʻe he fāmilí ʻa kinautolu ʻoku fili ha tōʻonga moʻui kehe ko ha ola ʻo ʻenau ngaahi ongo fekauʻaki mo honau tuʻunga tangata pe fefiné.”

“ʻOku mahino ʻaupito ko e meʻa faingataʻa taha ne u aʻusia ʻi heʻeku hoko ko ha palesiteni fakasiteikí … [ʻa e] taimi naʻe fuofua ʻilo ai ʻe he kau ngāue fakafaitoʻó fekauʻaki mo e ʻEitisí (AIDS), pea naʻe tokolahi haʻamau kakai tangata naʻe ʻilo kuo maʻu kinautolu ʻe he ʻEitisí. Naʻe ʻi ai hanau niʻihi naʻe ʻikai ke nau mālohi ʻi he Siasí—ko ha tokolahi ʻo kinautolu; ko ha tokosiʻi pē [ne mālohi ʻi he Siasí]—pea naʻa mau ʻiloʻi naʻe ʻi ai haʻamau kau tangata ʻe toko 17 ne maʻu ʻe he ʻEitisí. ʻI he taimi ko iá naʻe ʻikai ha faitoʻo. Pea naʻe iku ʻo mate kotoa e toko 17 ko iá ʻi he ʻEitisí lolotonga ʻeku kei hoko ko e palesiteni fakasiteikí.

“Naʻá ku ako ha ngaahi lēsoni fakaofo ʻi he founga ko iá: ʻI heʻetau hoko ko ha tukui kolo ʻo e [Kāingalotu ʻo e Siasí], ko ha tukui kolo ia ʻo e ʻofa mo e manavaʻofa. Naʻá ku mātā ha kau pīsope ne nau fakahoko ha ngaahi feilaulau fakaofo ke tauhi ha niʻihi ʻo e kau tangata kei talavou ko ʻeni ne tei maté. Naʻá ku mātā ʻi heʻenau feinga mālohi ke toe fakafehokotaki kinautolu mo honau ngaahi fāmilí pea ke tauhi kinautolu ʻe honau ngaahi fāmilí. Pea ko e tahá, naʻe ʻikai pē ha faitoʻo he taimi ko iá pea mo hano mapuleʻi ʻo [e mahakí]. Naʻá ku mamata ki heʻenau fetauhiʻakí. Ne u mamata ki hanau niʻihi—ko hanau taha ʻoku ou fakakaukau ki ai, ʻa ia ko ha taha ne ʻosi ngāue fakafaifekau pea naʻe tupunga ʻi haʻane tōʻonga ʻe taha naʻá ne maʻu ai e mahakí, naʻá ne loto-toʻa ke tauhi ʻa e niʻihi ne faingataʻaʻia tahá pea mo e niʻihi ne puke lahí, peá ne toki mate fakamuimui leva.

“ʻOku ou tui ko e lēsoni ne u ako mei aí ko ʻetau hoko ko ia ko ha siasí, ʻoku ʻikai totonu ke ʻi ai ha taha ʻe toe ʻofa mo manavaʻofa lahi ange. Ko ha fāmili ʻoku ʻi ai hanau taha ʻoku palopalema ʻi he femanakoʻaki fakafāfine/fakatangatá ʻoku ʻikai totonu ke nau taʻe-fakakau kinautolu mei he siakale ʻo e fāmilí. ʻOku fie maʻu ke nau kau ʻi he siakale ʻo e fāmilí” (Quentin L. Cook, “Let Us Be at the Forefront,” ChurchofJesusChrist.org).

Fakahaaʻi ʻa e ʻOfa, Manavaʻofa, mo e Tokoni

“ʻOku tau akoʻi nai ʻa e fanongonongo ki he fāmilí? ʻOku tau akoʻi nai e palani ʻa e Tamai Hēvaní? ʻOku tau akoʻi ʻa e vahe ʻuluaki ʻi he tohi tuʻutuʻuni hono uá? ʻIo, ʻoku tau fakahoko ia. ʻOku tau maʻu ha palani ʻo e fakamoʻuí. Pea ko e konga ʻo e palani ʻa e Tamai Hēvaní ke ʻomi ha fānau ki heʻetau moʻuí. Kae tuku muʻa ke tau taaimuʻa ʻi hono fakahaaʻi ʻo e ʻofá, manavaʻofá mo e tokoni kiate kinautolú. Pea ʻoua naʻa tau ʻai ke ʻikai fakakau pe taʻe fakaʻapaʻapaʻi ʻe he fāmilí ʻa kinautolu ʻoku fili ha tōʻonga moʻui kehe ko ha ola ʻo ʻenau ngaahi ongo fekauʻaki mo honau tuʻunga tangata pe fefiné. … Hangē ko ia ʻoku mou meaʻí, ʻoku ongo mālohi ʻaupito ʻa e meʻá ni kiate au. ʻOku ou tui ko ha tefitoʻi moʻoni mahuʻinga ʻaupito ia” (Quentin L. Cook, “Let Us Be at the Forefront,” ChurchofJesusChrist.org).