“Ko ha angahala nai ʻa e femanakoʻaki ʻa ha tangata mo e tangata pe fefine mo e fefiné?” Femanakoʻaki ʻa e Fefine mo e Fefine pe Tangata mo e Tangata: Kau Taki ʻo e Siasí (2020)
“Ko ha angahala nai ʻa e femanakoʻaki ʻa ha tangata mo e tangata pe fefine mo e fefiné?” Femanakoʻaki ʻa e Fefine mo e Fefine pe Tangata mo e Tangata: Kau Taki ʻo e Siasí
Ko ha angahala nai ʻa e femanakoʻaki ʻa ha tangata mo e tangata pe fefine mo e fefiné?
ʻOku ʻIkai Ko ha Angahala ʻa e Ngaahi Ongó
ʻOku ʻikai ko ha angahala ʻa e ongoʻi femanakoʻaki ʻa e tangata mo e tangata pe fefine mo e fefiné. Naʻe pehē ʻe Palesiteni M. Russell Ballard:
“Tau ʻai mahino pē: ʻOku tui ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ‘ko hono aʻusia ko ia ʻo e femanakoʻaki fakaetangata mo fakaefefiné (same-sex attraction) ko ha moʻoni fihituʻu ia ki he kakai tokolahi. ʻOku ʻikai ko ha angahala ʻa e femanakoʻakí, ka ʻe angahala ka ngāueʻi. Neongo ʻoku ʻikai fili ʻe he fakafoʻituituí ʻa e faʻahinga femanakoʻaki ko iá, ka ʻoku nau fili ʻa e anga ʻenau fakafeangai ki aí. ʻOku kakapa atu ʻa e Siasí ki he fānau kotoa ʻa e ʻOtuá ʻi he ʻofa mo e mahino, kau ai [ʻa kinautolu ʻoku femanakoʻaki fakaetangata mo fakaefefiné]’” (“ʻOku Fie Maʻu Kimoutolu ʻe he ʻEikí he Taimí Ni!” Liahona, Sepitema 2015, 15).
Neongo ʻoku ʻikai ko ha angahala e femanakoʻaki fakahomosekisualé, ka ʻe ala faingataʻa ia. Neongo he ʻikai fili ha taha ia ke maʻu e ngaahi ongo ko ʻení, ka te ne lava ʻo tukupā ke tauhi e ngaahi fekau ʻa e ʻOtuá. ʻOku totonu ke fili ʻa e mātuʻa ʻa ha fānau ʻoku femanakoʻaki fakahomosekisualé pe tala ʻoku fakafāfine/fakatangatá, ke ne ʻofa mo tali lelei e fānau ko iá. ʻI heʻetau hoko ko ha kāingalotu ʻo e Siasí, ʻoku totonu ke tau fili ke fokotuʻu ha ʻātakai ʻoku talitali lelei ai kinautolú.